Namegafu turi ta Disiembre 26, 2022, naka-atende ta Pioneer Service School i regular anna special pioneer ira ta lugar ira ta Ukraine nga safe nga kuan yatun. Depende ta situasion, puede nga magatende i pioneer ira ta face-to-face onu ta Zoom. Maski nu aru i pakarigatan, kagitta na paddanna na bomba ira, kana-kanayun nga pab-brownout, krisis, anna mawawawan nga Internet, niprayoridad na wawwaragi tam i magatende tapenu makagigiammu. Megafu tatun, aru nga bendision ta espiritual i nalawa da.

Istorian ni Natalia nga taga-Kryvyi Rih: “Neyarig ku ta salbabida i pinagiskuelà. Nakoffun yatun tapenu ari ngà malaggabban ta pakavurungan anna paganassingakku ira.” Kunnatun gapa i kinagi ni Anastasia nga taga-Chernivtsi: “Nakumbinsi ngà ta pinagiskuelà nga talaga iddeddukan nà ni Jehova. Ta nappasa nga dagun, aru i kappaganassing nga nesimmu, ngem i pinagiskuelà i talaga kakawagakku. Megafu tatun, determinadu ngà nga itulu-tuloy nga kuan i adde na mawayyà tapenu malawa ku i bendision ni Jehova.”

Pioneer ta Kitsman si Svitlana. Mavurung bi yayya turi ta nalawa na i imbitasion nga magiskuela. Istorian na: “Kinagì kani Jehova i pakavurungakku ira, nelavu tatun i finansial. Nattalo ngà ta nisa anna ari ku pinabbabawyan yatun. Natageno ku i aya anna pangikavurung ni Jehova.” Megafu ta pappursigi ni Svitlana, napaguyu i atawa na nga ari tu Saksi ni Jehova nga mevulu ta nisa ta study ira ta kongregasion.

Namiddua tu mawag nga magali i estudiante ira ta Zhytomyr ta tadday nga pattaguan ta underground megafu ta warning ira nga egga i madanna tu bomba. Nadduppang ira tu kayu tapenu mapapatu da i kuarto anna metulu-tuloy da i klase da. Maski nu aru i pakarigatan, istorian ni Valentyna nga bagu laman nga nagali ta Zhytomyr: “Ari ku vuluvuga makattaman yaw nga pinagiskuelà. Gitta na egga ngà ta proteksion na makapangngua nga paya ni Jehova.”

Kagitta na ta aru nga nasion, fermi i pagayayya na pioneer ira ta Ukraine turi ta nakannammuadda nga napakarianan i mekiddaw nga oras ta nira. Kunnaw i kinagi ni Yulia kabalin na nga naginna i announcement: “Talaga mas inaya ku si Jehova. Turi ta umma, nakimemallo ngà kani Jehova nga ipamavulun na nakuan nga mattulu-tuloy i pap-pioneer ku. Ari ku ammu nu kunnasi na tabbagan yatun, ngem ammù nga magga tabbagan na. Turi ta nakannammuakku nga napakarianan i mekiddaw nga oras, mas naappresià i kukukuan ni Jehova para niakan. Yaw nga pinakabagu nga announcement ay gitta na masissingngo nga dessert kabalin na pinagiskuelà.”

Base ta report turi ta Enero 24, 2023, masingan ta gukag i paddia-paddian na wawwaragi ta Ukraine. Nebase laman i tumunug ira nga bilang ta kumfirmadu nga report maggafu ta wawwaragi tari. Megafu ta mariga nga kontakan i wawwaragi ta nadduruma nga parte na nasion, awayya na tu mas aru paga i aktual nga bilang.

• 47 nga publisher i natay

• 97 nga publisher i nabigaran anna natakitan

• 8,953 nga publisher i nagali ta tanakuan nga lugar

• 590 nga babalay i nadabba

• 645 nga babalay i nadara-daral

• 1,722 nga babalay i baddi laman i daral na

• 8 nga Kingdom Hall i nadabba

• 17 nga Kingdom Hall i nadara-daral

• 76 nga Kingdom Hall i baddi laman i daral na

• 26 nga Disaster Relief Committee (DRC) i mangasikasu ta wawwaragi tam ta Ukraine

• 46 nga babalay i napakappian

• 5 nga Kingdom Hall i napakappian

• 54,445 nga publisher i inuffunan na DRC ira tapenu makaleg tu mas safe nga paddianan

• 27,655 nga publisher i nagali ta tanakuan nga nasion anna uuffunan ira na kapangngurug da