Ta lugar ira nu sitaw grabe i parralaban, kagitta na ta Mariupol, awan tu kuryente onu heating system, anna ari gapa nga meyusa i telefono anna Internet. Nadaral i benta na aru ta babalay ira. Makkukurang gapa i suplay na makan anna danum. Maturu tu 2,500 nga wawwaragi tam i ari nga makapanaw ta Mariupol. Ngem ta karuan ira nga siudad, kagitta na Bucha, Chernihiv, Hostomel, Irpin, Kyiv, anna Sumy, posible ngana nga makapanaw i karuan nga totolay. Megafu tatun, nakapa-evacuate i aru nga wawwaragi tam ta mas safe ira nga lugar.

Maddian ta Hostomel i tadday nga 36-anios nga elder anna payunir. Ngem nattammang yayya kavulu i atawa na anna magana na. Inistoria na i naekspiriensa na turi ta nakadde ngana ta siudad da i parralaban:

“Egga ira i helicopter. Kanayun nga egga i takay ira na suddalu ta dalan. Sinallung na suddalu ira i balemi habang egga kami ta basement. Pinala-palattugan na tadday ta nira i basement nga naddianammi. Nakanna i go bag ni yenà ngem pia ngana laman ta awan tu nesimmu ta nikami. Mattallu onu appa nga oras nga ari kami vuluvuga nga nagguyu onu nattannug habang magigginna mi i passabug na bomba ira anna papparalattug ta lawan. . . . Ta kommanan na, turi ta mabbiahe kami tapenu mattammang, gavva nga egga parralaban aranni ta nikami. Egga ira i tangki ta dalan . . . Talaga delikadu tatun, ngem mas delikadu nu ari kami manaw.

“Dakal i nangulian na pattolemi megafu taw ira nga mesissimmu. Nagigiammu mi nga iyaplika i aru nga prinsipio na Biblia. Angngarigan na, nagigiammu mi nga ari mavvurung ta mesimmu ta tumunug nga aggaw, makontentu ta egga nikami, anna mattalo kani Jehova ta pinakamariga ira nga situasion.”

Makasiguradu ittam nga ammu na Dios tam nga si Jehova i ngamin nga mariga nga kapurueba nga meparubang ta wawwaragi tam ta Ukraine. Ari na ira vuluvuga pagurayan.​—2 Pedro 2:9.

Base ta report turi ta Marso 10, 2022, yaw i paddia-paddian na wawwaragi ta Ukraine:

• 2 nga publisher i natay

• 8 nga publisher i nabigaran anna natakitan

• 25,407 nga publisher i nanaw ta gibbalayadda tapenu magali ta mas safe nga lugar ta nasiodda

• 25 nga balay i nadabba

• 59 nga balay i nadara-daral

• 222 nga balay i baddi laman i daral na

• 7 nga Kingdom Hall i nadaral

• 27 nga Disaster Relief Committee (DRC) i mangasikasu ta wawwaragi tam ta Ukraine

• 10,566 nga publisher i inuffunan na DRC ira tapenu makaleg tu mas safe nga paddianan

• 9,635 nga publisher i nagali ta tanakuan nga nasion anna uuffunan ira na kapangngurug da