Maraddam kami nga ireport nga dua ta sister tam i natay gafu ta pabbomba ta siudad na Mariupol. Sangawe, maturu tu 2,000 paga nga wawwaragi tam i ari makapanaw ta siudad megafu ta grabe i parralaban. Ta nappasa ira nga aggaw, 150 nga Saksi i nakapanaw tatun nga siudad. Pinurueban na wawwaragi tam ta Disaster Relief Committee (DRC) nga mangiyangay tu relief supply ta Mariupol ngem gafu ta napala-palattugan i takeda, maski gapa i takay na karuan paga nga mangiyangay nakuan tu uffun tari, fersadu nga nagatras ira. Nassabug i bomba ta tadday nga lote nu sitaw egga i Kingdom Hall anna Assembly Hall. Turi ta nesimmu yatun, 200 nga wawwaragi tam i mattatagu tari ta basement na Kingdom Hall. Awan tu na-injure ta wawwaragi tam, ngem nadara-daral i takeda, yatutta mas marigatan ngana ira nga makapanaw ta siudad.

Nakapanaw ta Mariupol i tadday nga elder (nga masingan i picture na ta gukag) anna i familia na. Istorian na: “Nadaral i apartment mi, nawanakkami tu trabahu, anna ari mi makontak i wawwaragi. Yari i dati nga biahe mi nga tangaggaw laman, eh nabbalin ngana tu annam nga aggaw. Turi ta mad-drive ngà [palawan ta siudad], natalebarammi ta dalan i umata-atu ira nga bomba nga ari paga nassabug. Ta interu nga pinabbiahe mi, inuffunan nakami na wawwaragi tapenu makaleg kami tu makan anna paddianammi kada gabi. Natageno mi nga tattangngallan nakami na Yama tam nga si Jehova . . . Gafu tatun, nakumbinsi kami nga iyawa i ngamin nga pattalo mi kani Jehova.”

Nabbiahe mappange ta nadduruma nga nasion ta Europe i refugee ira nga Saksi nga naggafu ta Ukraine tapenu mas safe ira. Angngarigan na, nappa-Portugal i tadday nga ministerial nga aripan, i atawa na, anna i tallu nga ana da nga magedad tu 7, 11, anna 16. Egga gare i paparientes da tari nga Saksi ira ni Jehova. Naginnag ira tu 11 nga oras nige ira nga nakalampas ta border, tapus appa-aggaw nga nabbiahe yatun nga familia tu maturu tu 4,000 nga kilometro tapenu makadde ta balay na paparientes da. Nakadde ira tari nige nga mamegafu i study. Maski nu ari ira nga mabbida tu Portuguese, ari lagapa nga niyemmang natun nga familia i rutina da ta espiritual anna naki-connect ira ta study. Napagaram i kongregasion gafu ta nasingadda nga magayayya lagapa yatun nga familia maski nu mariga i situasiodda.

Kunnaw i istorian na tadday paga nga sister nga nattammang mappange ta Germany kavulu i familia na: “Talaga napasikan anna napagaram kami na pabbibbig tu Biblia, pabbalin tu positibo, anna pannono ta makakkasta nga iddanama tam. . . . Inusa ni Jehova i wawwaragi tam tapenu igiya anna uffunakkami. Ta Ukraine man, ta Hungary, onu maski taw ta Germany, inalawa anna inasikasu da kami tu mapia!”

Manawag nga tulu-tuloy nga uuffunan ni Jehova i ngamin nga meddu nga wawwaragi tam ta Ukraine.—Salmo 145:14.

Base ta report turi ta Marso 16, 2022, yaw i paddia-paddian na wawwaragi ta Ukraine. Nebase laman i tumunug ira nga bilang ta kumfirmadu nga report maggafu ta wawwaragi tari. Megafu ta mariga nga kontakan i wawwaragi ta nadduruma nga parte na nasion, awayya na tu mas aru paga i aktual nga bilang:

• 4 nga publisher i natay

• 19 nga publisher i nabigaran anna natakitan

• 29,789 nga publisher i nanaw ta gibbalayadda tapenu magali ta mas safe nga lugar ta nasiodda

• 45 nga balay i nadabba

• 84 nga balay i nadara-daral

• 366 nga balay i baddi laman i daral na

• 16 nga Kingdom Hall i nadaral

• 27 nga DRC i mangasikasu ta wawwaragi tam ta Ukraine

• 20,981 nga publisher i inuffunan na DRC ira tapenu makaleg tu mas safe nga paddianan

• 11,973 nga publisher i nagali ta tanakuan nga nasion anna uuffunan ira na kapangngurug da