Tulu-tuloy lagapa nga ipakimallo tam i wawwaragi tam ta Mariupol megafu ta ari lagapa nga magiggimmang i parralaban anna pabbomba tari. Kaddaraddam ta annam ta wawwaragi tam i natay tatun ira nga pabbomba. Bali, mafulu ngana gafu nga wawwaragi tam i natay ta Ukraine. Gitta na nereport gapa ta news, ta nappasa nga ligguan, binomba da i tadday nga theater nga pinattaguan na maturu tu 1,000 nga totolay. Awan tu natay nga wawwaragi tam tatun nga pangatake, ngem egga ira i na-injure.

Ma-750 nga wawwaragi tam i nakapanaw ngana ta Mariupol, ngem maggi 1,600 paga i nabattang tari. Aru ta nira i maddian ta east nga parte na siudad nga kontroladu ngana sangawe na Russia.

Gitta na nakagi ta nappasa nga update, ma-200 nga wawwaragi tam i mattatagu ta basement na tadday nga lote nu sitaw egga i Kingdom Hall anna Assembly Hall. Turi ta manganannuan nga nakontak i wawwaragi ira tatun, kunnaw i nireport da:

“Turi ta maddaggun i passabug, egga ira i wawwaragi nga fermi nga nanassingan. Tumangi paga lagu i karuan. Turi ta naginna mi i passabug ta lawan, abbo mi tu matay kami ngana megafu tatun onu megafu ta tuggi. Ngem kinagi na tadday nga elder nga makkansiokkami tu Kingdom song. Bali, 10 adde ta 15 nga kansion i matturunug nga kinansiommi. Habang mas massikan i passabug anna mas nga mayayyag i building, mas niyassikammi gapa i pinakkansiommi. Tapus binibbig mi i Salmo 27 anna pinaguruvovugammi yatun. Kabalin natun, kinagi na kada tadday nu anni i paborito na nga teksto na Biblia, tapus niyistoria na nu kunnasi yayya nga pinasikan natun. . . . Naekspiriensa mi nga si Jehova talaga ay ‘minaggallallo nga Yama anna Dios nga paggafuan na ngamin nga uffun anna banna-bannay.’ Mawayya na ittam nga pakalman maski ta pinakamariga ira nga situasion.”​—2 Corinto 1:3, 4.

Inala-aleg na minassakrifisio ira nga elder anna miembro na Disaster Relief Committee (DRC) tari i kapangngurug da ira anna iyangayadda ira tu makan anna medisina nu kawagan, maski paga nu mappeligro i inango da. Nu mittan, makkara danatun nga brother tapenu ari ira nga makanna na bala durante nga magala-aleg ira tu wawwaragi ta siudad. Proud kami tatun ira nga brother nga pinappeligro da i inango da para laman ta kapangngurug da ira.​—Roma 16:4.

Megafu ta awan tu gas anna kuryente ta siudad, nigutu-gutu na sister ira nga mallutu ta lawan gukaban na kayu. Tapus, meyangay i makan tari ira ta manakam anna baldadu ira nga wawwaragi. Aru ta wawwaragi i nawawadda i gibbalayadda, takeda, anna i material ira nga pakkukua da, ngem mappabalo ira ta aya anna pangikavurung na kapangngurug da ira.

Ari lagapa nga niyemmang danuri na mattatagu nga wawwaragi tam i espiritual nga rutina da. Makkaravulu nga gigiammuadda i Biblia anna kada posible, ikagi da i mensahe na Biblia ta tanakuan.

Base ta report turi ta Marso 22, 2022, yaw i paddia-paddian na wawwaragi ta Ukraine. Nebase laman i tumunug ira nga bilang ta kumfirmadu nga report maggafu ta wawwaragi tari. Megafu ta mariga nga kontakan i wawwaragi ta nadduruma nga parte na nasion, awayya na tu mas aru paga i aktual nga bilang.

• 10 nga publisher i natay

• 27 nga publisher i nabigaran anna natakitan

• 33,180 nga publisher i nanaw ta gibbalayadda tapenu magali ta mas safe nga lugar ta nasiodda

• 78 nga babalay i nadabba

• 102 nga babalay i nadara-daral

• 484 nga babalay i baddi laman i daral na

• 1 nga Kingdom Hall i nadabba

• 4 nga Kingdom Hall i nadara-daral

• 18 nga Kingdom Hall i baddi laman i daral na

• 27 nga DRC i mangasikasu ta wawwaragi tam ta Ukraine

• 25,069 nga publisher i inuffunan na DRC ira tapenu makaleg tu mas safe nga paddianan

• 14,308 nga publisher i nagali ta tanakuan nga nasion anna uuffunan ira na kapangngurug da