Kaddaraddam ta base ta report na Marso 29, 2022, pitu paga nga wawwaragi tam i natay ta siudad na Mariupol. Bali, 17 ngana i total na wawwaragi tam nga natay ta Ukraine.

Malallappo i miembro ira na Disaster Relief Committee (DRC) ta Ukraine tapenu manguffun tari ira ta magawag, maski paga lagu pappeligrowadda i inango da ta pagaleg ta kapangngurug da tari ira ta lugar nga zinara-daral na gerra.

Angngarigan na, egga ira i brother nga makipattrabahu ta DRC ira nga nawayya da i mangitulug tu makan, medisina, anna karuan paga nga pakawagan ta siudad ira nga zinara-daral na gerra, kagitta na ta Kharkiv, Kramatorsk, anna Mariupol. Tadday nga miembro na DRC i inaggaw nga mabbiahe tu maturu tu 500 kilometro anna maddalan yayya ta aru nga checkpoint na suddalu tapenu mangitulug yayya tu makan anna medisina ta ma-2,700 nga publisher.

Inorganisa gapa na DRC ira i pattakayan tapenu mepanaw i wawwaragi ira ta lugar ira nga grabe i parralaban. Kunnaw i istorian na tadday nga brother nga miembro na Chernihiv DRC: “Kustu ta pegafuanan ngana na suddalu ira nga bomban i babalay, nanono mi nga talaga delikadu ngana i mattalupaddian ta siudad. Megafu ta awan ngana tu kuryente anna Internet, maski maddaggun i pabbomba, insigida nga inangngayan na elder ira i siudad tapenu pakannammuan i wawwaragi ira nga mattatagu ta basement nga egga i available nga pattakayan tapenu makapanaw ira ta siudad.”

Minanugu i tadday nga makakkua tu transportation business nga usan i van anna bus na ira tapenu ipanaw i 254 nga wawwaragi tam ta Chernihiv. Namissiam yayya nga nabbiahe tapenu makua na yatun. Mittan, inusa na paga lagu i heavy equipment na tapenu pakappian i dalan nga dalanan na bus na. Mappappabalo i wawwaragi tam tatun nga pinanguffun na.

Makipaddaraddam ittam turi ira ta natayan megafu ta maddaggun nga gerra. Iddanamattam ngamin i ketuppal na iddanama tam nga mabibbig ta Biblia, i Uvovug na Dios, sonu awan ngana vuluvuga tu matay anna maddaddam.—Nepakannammu 21:3, 4.

Base ta report turi ta Marso 29, 2022, yaw i paddia-paddian na wawwaragi ta Ukraine. Nebase laman i tumunug ira nga bilang ta kumfirmadu nga report maggafu ta wawwaragi tari. Megafu ta mariga nga kontakan i wawwaragi ta nadduruma nga parte na nasion, awayya na tu mas aru paga i aktual nga bilang.

• 17 nga publisher i natay

• 35 nga publisher i nabigaran anna natakitan

• 36,313 nga publisher i nanaw ta gibbalayadda tapenu magali ta mas safe nga lugar ta nasiodda

• 114 nga babalay i nadabba

• 144 nga babalay i nadara-daral

• 612 nga babalay i baddi laman i daral na

• 1 nga Kingdom Hall i nadabba

• 7 nga Kingdom Hall i nadara-daral

• 23 nga Kingdom Hall i baddi laman i daral na

• 27 nga DRC i mangasikasu ta wawwaragi tam ta Ukraine

• 34,739 nga publisher i inuffunan na DRC ira tapenu makaleg tu mas safe nga paddianan

• 16,175 nga publisher i nagali ta tanakuan nga nasion anna uuffunan ira na kapangngurug da