Maraddam kami nga ireport nga nammungan mana i bilang na wawwaragi tam nga natay megafu ta maddaggun nga gerra ta Ukraine. Bali, 28 ngana nga Saksi ni Jehova i natay.

Base ta report na international news, durante na ollu ira nga ligguan na gerra, grabe i parralaban ta ili ira nga aranni ta Kyiv. Ta ma-4,900 nga publisher nga maddian tatun nga lugar, maturu ngana tu 3,500 i nagali ta mas safe ira nga lugar.

Masingan ta tumunug ira nga ekspiriensa nu kunnasi nga napattalupaddian lagapa na wawwaragi tam tatun nga lugar i masikan nga pangurug da kani Jehova maski nu kitazziga i situasiodda.

Nanaw ta ili na Makariv i elder nga si Oleksandr. Nagali yayya ta mas safe nga lugar ta central Ukraine. Ngem megafu ta mavurung yayya ta ari na makontak i appa nga publisher ta field service group na, nanoli yayya tari ta lugar nga paddianadda tapenu alegan ira maski nu maddaggun i parralaban tari. Istorian na: “Ammù tu para kani Jehova, iddeddu na danari ira aripan na. . . . Ta paddattal ku ta arubang na balay na tadday ira tatun nga publisher, nasingakku tu kinanna balo yatun na bomba ira. Agga-serra i puerta na underground onu basement na balena anna awan vuluvuga tu tubbag ta pagaga-agal ku. Mas naggudu-gudu ngà.” Finersa ni Oleksandr nga tallungan i puerta na underground tapus nakaddagan yayya ta egga ira i totolay tari nga agga-dulang ta nisa. Nalegan na gabbalaman tatun danari ira i publisher, kunne na gapa i ari tu Saksi ira nga karruba da nga nakipattagu kavulu da.

Kinagi ni Yaroslav, tadday tari ira ta publisher ta underground, nga walu aggaw ira nga nattatagu tari. Istorian na: “Egga laman i pilippiga nga biscuit mi anna taggi-tanga-basu tu danummi para ta kada tolay kada aggaw. Ngem binibbig mi i Biblia anna i publikasiottam ira, nakimallo kami, anna nakka-pasa-pasikakkami tu nono. Tagga ta naginnà i ngagakku nga aga-agalan ni Oleksandr, abbo ku nu egga ngana ira i suddalu nga umay nga manga ta nio. Abbo ku nu matay ngà ngana. . . . [Ngem,] ni-rescue na kami ngamin. Mappappabalo kami kani Jehova tatun ira nga wawwaragi nga minaggiddu anna mangipaka-pakimallo ta nikami. Pinappeligro da paga lagu i inango da tapenu laman me-rescue dakami.”

Nadesision ni Pylyp anna na tadday paga tu brother nga mangiyangay tu makan para tari ira ta maddian ta ili na Borodianka. Ta Marso 17, turi ta mappange ngana ira tatun nga ili, ina na suddalu ira i takay ni Pylyp, maski yari ira i makan. Tapus inaresto danatun nga suddalu yari i dua tu brother. Pinosasadda ira anna ni-blindfold da ira. Niyangay da ira ta baddi nga kuarto ta tadday nga basement, kavulu i pitu paga nga tanakuan nga lallaki. Nappasa i dua tu aggaw, neyali yatun nga dua nga brother ta tadday nga selda, nu sitaw pinala-palu ira na guardia ira ta kagabian na. Kinagi ni Pylyp: “Ari ku siguradu nu makalawan ngà paga nga sigga-matolay. Nidasal ku tu ariakku nakuan mawawwan i kinamatalo ku.”

Kustu ta mittan nga pinala-palu da si Brother Pylyp, niyassikan na i pappakimallo na para tari ira ta bako ngana tu sister nga awan tu makadda. Masiki-sikan gapa i pinaddasal na nga safe nakuan i familia na anna nappappabalo yayya kani Jehova ta piga ragun nga magayayya nga passerbi ta Nisa. Nitoli yayya na guardia ta selda na nu sitaw tulu-tuloy lagapa nga nakimallo yayya nga paray nakuan tu malippawa nari na suddalu ira nga ari mabba tu mamanggulu i brother ira. Nilayyagayyan gapa natun nga dua tu brother yari ira i guardia. Dua aggaw nga nilayyagayyadda i ngamin nga mad-duty nga magguardia ta nira. Tadday gapa tari ira ta nakavulu da nga nefuku nga lalaki i naginteres ta mensahe na Biblia. Nappabalo yayya tari ira ta dua tu brother. Turi ta Marso 27, napalawan gabbalaman yatun nga dua nga brother kunne na gapa yari i interesadu nga lalaki.

Megafu ta maddaggun i gerra, dua ligguan nga ari nga makapanaw i single sister nga si Svitlana ta Bucha. Istorian na: “Sangawè lang talaga nantindian nu kunnasi ka-importante i imammo nga iyayawa ni Jehova. Nu egga nittam i imammo na Dios, ari na balo kayà kagian nga kanayun nga ammu tam nu anni i kuattam. Ngem, nu masingattam tu awan tu solusion ta problema tam ira, basta mattalo ittam ngana laman kani Jehova.”

Turi ta egga ta biahe si Svitlana mappange ta mas safe nga lugar ta Ukraine, nilayyagayyan na i tadday nga babay anna i kanakan natun nga lalaki. Zimittal ira ngamin ta mas safe nga lugar, tapus zinafung ira na tadday nga familia nga Saksi. Pinaddian natun nga familia nga Saksi da Svitlana kunne na gapa yari i babay anna i kanakan na ta baleda tatun nga gabi. Ta tumunug nga aggaw, nikiddaw natun nga babay nga maka-atende nakuan yayya tari ta study, anna nakkiddaw gapa yayya tu Biblia anna literatura tam. Adde sangawe, egga lagapa i komunikasion ni Svitlana ta nisa.

Base ta report turi ta Abril 12, 2022, masingan ta gukag i paddia-paddian na wawwaragi ta Ukraine. Nebase laman i tumunug ira nga bilang ta kumfirmadu nga report maggafu ta wawwaragi tari. Megafu ta mariga nga kontakan i wawwaragi ta nadduruma nga parte na nasion, awayya na tu mas aru paga i aktual nga bilang.

• 28 nga publisher i natay

• 48 nga publisher i nabigaran anna natakitan

• 40,778 nga publisher i nanaw ta gibbalayadda tapenu magali ta mas safe nga lugar ta nasiodda

• 278 nga babalay i nadabba

• 268 nga babalay i nadara-daral

• 746 nga babalay i baddi laman i daral na

• 1 nga Kingdom Hall i nadabba

• 9 nga Kingdom Hall i nadara-daral

• 26 nga Kingdom Hall i baddi laman i daral na

• 27 nga Disaster Relief Committee (DRC) i mangasikasu ta wawwaragi tam ta Ukraine

• 41,974 nga publisher i inuffunan na DRC ira tapenu makaleg tu mas safe nga paddianan

• 18,097 nga publisher i nagali ta tanakuan nga nasion anna uuffunan ira na kapangngurug da