Magayayya kami nga ireport nga binendisionan ni Jehova i wawwaragi tam ta madduruma nga parte na Ukraine tapenu makaselebra ira tu Memorial na patay ni Cristo. Aru nga Kingdom Hall ta western Ukraine i neyunnug tapenu mosa ta Memorial para ta nagali ira nga wawwaragi tatun. Aru nga wawwaragi i nasselebra tu Memorial ta baraddi nga grupo. Nikonek da gukaban na videoconference danuri ari nga makapanaw ta balay da.

Ta aru nga parte na nasion, makkaraguni i wang-wang nga maw-warning ta paddanna na bomba ira ta interu aggaw na Memorial. Ngem turi ta gumabi ngana, nagimmang i wang-wang. “Ipaki-pakimallo mi nga ari nakuan nga maistorbo i Memorial megafu ta pabbomba,” inistoria ni Sherhiy nga taga-Druzhkivka, Donetsk Region. “Nige laman na Memorial, nagimmang i pabbomba anna ari ngana nga nagguni i wang-wang.”

Maturu tu tanga-vulan ngana nga ari tu naka-atende ta study i grupo na mannakam anna mataki ira nga publisher ta Nemishaeve, aranni ta Kyiv. Ipaki-pakimallo da nga maka-atende nakuan ira ta Memorial. Dinuffunan ira na tadday nga elder nga si Vitaliy tapenu meselebra i Memorial. “Awan tu kuryente,” kinagi na, “yari tu agga-flashlight kami nga nam-Memorial. Awan tu heating system. Awan tu music mi, yari tu nappatoka tu violin i ana ku nga babay tapenu makakansiokkami.”

Inistoria ni Oleksandr, tadday nga elder nga maddian ta lugar na gerra: “Turi ta nagimbita kami para ta Memorial, ari kami nga makatura ta totolay ira ta teritoria na kongregasiommi megafu ta nabomba anna abandunadu i babalay ira. Yari tu inimbita mi ngana laman i kakilala mi ira, i totolay ira nga nakilala mi ta basement, anna i totolay ira nga kavulu mi nga nagevacuate. Aru ta nira i ari vuluvuga nagginna ta Saksi ira tagga. Ngem aru ta nira i nakavulu mi ta Memorial.”

Maski nu ari paga nga kumpleto i report maggafu ta ngamin nga kongregasion ta Ukraine, natantia nga maturu tu 210,000 i nagatende ta Memorial.

Inistoria na tadday nga brother ta Ukraine i mataga-tageno na meyannung ta Memorial: “Nu kunnasi nga ipasiguradu na tadday nga lighthouse ta mabbiahe ira ta bebay nga aranni ngana ira ta pipi, ipasiguradu gapa niakan na passelebra ta Memorial nga aranni ngana nga duttal i aggaw ni Jehova. Mas paga nga pinasikan na Memorial sangawe nga dagun i pangurug ku.”

Base ta report turi ta Abril 21, 2022, masingan ta gukag i paddia-paddian na wawwaragi ta Ukraine. Nebase laman i tumunug ira nga bilang ta kumfirmadu nga report maggafu ta wawwaragi tari. Megafu ta mariga nga kontakan i wawwaragi ta nadduruma nga parte na nasion, awayya na tu mas aru paga i aktual nga bilang.

• 35 nga publisher i natay

• 60 nga publisher i nabigaran anna natakitan

• 43,792 nga publisher i nanaw ta gibbalayadda tapenu magali ta mas safe nga lugar ta nasiodda

• 374 nga babalay i nadabba

• 347 nga babalay i nadara-daral

• 874 nga babalay i baddi laman i daral na

• 1 nga Kingdom Hall i nadabba

• 10 nga Kingdom Hall i nadara-daral

• 27 nga Kingdom Hall i baddi laman i daral na

• 27 nga Disaster Relief Committee (DRC) i mangasikasu ta wawwaragi tam ta Ukraine

• 44,971 nga publisher i inuffunan na DRC ira tapenu makaleg tu mas safe nga paddianan

• 19,961 nga publisher i nagali ta tanakuan nga nasion anna uuffunan ira na kapangngurug da