MAYO 23, 2022
UKRAINE
UPDATE #8 | Makka-aya-aya i Wawwaragi Tam Maski Mariga i Situasion ta Ukraine
Tulu-tuloy i Gerra Ngem Tulu-tuloy i Pash-Shepherding
Mazziga ’la nga mazziga i situasion ta Ukraine, ngem tulu-tuloy lagapa i pash-shepherding na Ukraine branch. Ta interu nga nasion, malallappo nga manguffun i brother ira nga mangirollu tapenu i-shepherding i rinivu nga wawwaragi nga fersadu nga nagali ta tanakuan nga lugar. Napakaru nga wawwaragi i nammakapia tatun ira nga pash-shepherding. Angngarigan na, binisita na tadday nga miembro na Branch Committee i wawwaragi ira nga nagali ta western Ukraine. Tadday ta sister nga shinepherding na ay maddian labbi sangawe ta Kingdom Hall ta siudad na Uzhgorod kavulu i 30 paga nga tanakuan nga wawwaragi. Kunnaw i kinagi na: “Natageno ku nga gitta na gaggakkopan nà ni Jehova.”
Massassakrifisio gapa i brother ira tapenu i-shepherding i maggi 100 nga magutu nga miembro na 27 nga Disaster Relief Committee (DRC). Kunnaw i istorian ni Ihor, tadday nga miembro na DRC: “Nanaw kami ngana na atawà ta balemi anna maddiakkami ngana ta tanakuan nga balay turi ta neyasayn ngà ta DRC. Matageno mi nga mediu nababbannag kami ngana. Yatun gapa i tiempo nga binisita nakami na tadday nga miembro na Branch Committee anna naggigginna yayya tu mapia ta nikami. Kingngua na yatun maski nu kuruga busy yayya. Natageno mi i kurug nga pangikavurunna ta nikami.” Kinagi paga ni Ihor: “Egga ira i tiempo nga gitta tam i beybi ira nga ari tam ammu nu anni i kuattam ta situasiottam. Awan gapa tu manono tam nga solusion, nu ari, ipakimallo ngana laman i panguffun ni Jehova. Tatun tam nu kua masingan nu kunnasi yayya nga magguyu para ta nittam.”
Megafu ta tulu-tuloy lagapa i parralaban, 4 ngana nga Kingdom Hall i interamente nga nadaral, 8 gapa i grabe i dara-daral na, anna 33 i egga i baddi tu daral na.
Base ta report turi ta Mayo 17, 2022, masingan ta gukag i paddia-paddian na wawwaragi ta Ukraine. Nebase laman i tumunug ira nga bilang ta kumfirmadu nga report maggafu ta wawwaragi tari. Megafu ta mariga nga kontakan i wawwaragi ta nadduruma nga parte na nasion, awayya na tu mas aru paga i aktual nga bilang.
Situasion na Wawwaragi Tam
37 nga publisher i natay
74 nga publisher i nabigaran anna natakitan
45,253 nga publisher i nanaw ta gibbalayadda tapenu magali ta mas safe nga lugar ta nasiodda
418 nga babalay i nadabba
466 nga babalay i nadara-daral
1,213 nga babalay i baddi laman i daral na
4 nga Kingdom Hall i nadabba
8 nga Kingdom Hall i nadara-daral
33 nga Kingdom Hall i baddi laman i daral na
Panguffun ta Wawwaragi
27 nga DRC i mangasikasu ta wawwaragi tam ta Ukraine
48,806 nga publisher i inuffunan na DRC ira tapenu makaleg tu mas safe nga paddianan
21,786 nga publisher i nagali ta tanakuan nga nasion anna uuffunan ira na kapangngurug da