Ta uffun na 27 nga Disaster Relief Committee (DRC), itulu-tuloy lagapa na Ukraine branch i pangasikasu ta wawwaragi ira nga nagali ta tanakuan nga parte na Ukraine. Adde turi ta namegafu i gerra, maturu tu 250 tonelada ngana na relief goods maggafu ta Poland i neyangay ta Ukraine. Kasali tatun i makan, sinnun, anna gamit ira nga pappakarenu ta baggi onu pang-hygiene. Maturu gapa tu 80 tonelada na maka-makan i niyawa na wawwaragi nga maddian ta mas safe ira nga lugar ta Ukraine.

Tadday si Sister Valentyna nga taga-Kyiv ta noffunan na wawwaragi ta DRC. Kunnaw i nitura na: “Kustu namegafu i gerra, talaga delikadu i maddian ta siudad. Yatutta nagali ngà ta baddi nga bario ta Cherkasy region. Maturu tu dua vulan ngà ngana taw. Talaga ikavurungan nà na wawwaragi ta kongregasion taw. Niddadda tu kinarton nga maka-makan anna pang-hygiene. Sobra nga na-touch ngà tatun. Ta tadday paga lagu nga karton, egga i nakepay nga drowing na appa i dagun na nga si Blanca anna watercolor nga postcard . . . Ipappakku danatun nga drowing tapenu egga i remembrance ku. Fermi i appabalo ku ta ngamin nga wawwaragi, mas ngana kani Jehova.”

Noffunan gapa i 83-anios nga disabled nga sister nga mangngagan balaman tu Sister Valentyna nga taga-Sieverodonetsk. Nitura na: “Turi ta namegafu i gerra, awan tu kavulu ku. Nige gare na gerra, natay i tattadday nga ana ku nga lalaki. Kappaganassing ta ari nga nagiggimmang i pabbomba ta siudad ta interu nga aggaw. Awan tu danum, kuryente, gas, anna makafi i Internet. Mappappabalo ngà ta brother ira nga pinappeligro da i inango da tapenu laman moffunan ngà.”

Kinagi na paga: “Turi kua, niyali ngà na brother ira kavulu i dua paga nga disabled nga sister ta mas safe nga siudad na Dnipro. Inuffunan nà na wawwaragi ta Dnipro tapenu makaleg ngà tu paddianan. Sangawe, maddian ngà ngana ta balay na tadday nga familia nga Saksi. Tattangngawaddà anna gitta na kafamilia dà. Inuffunaddà paga lagu nga makala tu smartphone tapenu maka-atende anna makapakkomento ngà ta study. Kakku makattaman yatun nga kinasippo na wawwaragi niakan.”

Magayayya ittam anna mappappabalo ittam ta minaggiddu nga Yama tam nga si Jehova ta kanayun nga maasikasu i iddeddu tam nga wawwaragi ta Ukraine tapenu ‘awan tu pakkurangad-da ta anni laman nga mapia.’—Salmo 34:10.

Base ta report turi ta Hunio 7, 2022, masingan ta gukag i paddia-paddian na wawwaragi ta Ukraine. Nebase laman i tumunug ira nga bilang ta kumfirmadu nga report maggafu ta wawwaragi tari. Megafu ta mariga nga kontakan i wawwaragi ta nadduruma nga parte na nasion, awayya na tu mas aru paga i aktual nga bilang.

• 42 nga publisher i natay

• 82 nga publisher i nabigaran anna natakitan

• 46,145 nga publisher i nagali ta tanakuan nga lugar

• 469 nga babalay i nadabba

• 540 nga babalay i nadara-daral

• 1,405 nga babalay i baddi laman i daral na

• 5 nga Kingdom Hall i nadabba

• 8 nga Kingdom Hall i nadara-daral

• 33 nga Kingdom Hall i baddi laman i daral na

• 27 nga DRC i mangasikasu ta wawwaragi tam ta Ukraine

• 50,663 nga publisher i inuffunan na DRC ira tapenu makaleg tu mas safe nga paddianan

• 22,995 nga publisher i nagali ta tanakuan nga nasion anna uuffunan ira na kapangngurug da