Neyemmang labbi i in-person nga rehional nga kombension turi Marso 2020 megafu ta COVID-19 pandemic. Taw nga dagun, egga i makua nga maturu 6,000 nga “Mappasensia Kamu”! nga Rehional nga Kombension ta interu mundo ta maturu tu 500 nga lengguahe. Nakua i ollu tatun ira nga in-person nga kombension turi ta Mayo 12-14, 2023.

Maturu tu 1,800 i nagatende ta kombension ta Newburgh Assembly Hall of Jehovah’s Witnesses ta Newburgh, New York, U.S.A. Tadday tatun si Sister Khrystine Torres. Kinagi na: “Turi ta kinagi na tserman nga ‘Malawa kamu,’ nappoppo i ngamin nga nagatende. Magayayya i ngamin ta makkaravulu ngana ira nga magatende.” Kunnaw gapa i kinagi ni Brother Duane Smith nga nagatende gapa tatun: “Matageno mu nga excited i ngamin. Talaga magayayya i wawwaragi nga makkaravulu.”

Na-baptize si Sister Jessica Dolcemascolo ta pandemic, yari tu ari paga yayya vuluvuga naka-atende ta in-person nga kombension. Kunnaw i makagi na ta ekspiriensa na: “I pagayayya nga natageno ku ta pagatendè ay gitta na pakasingakku ta best friend ku nga nabayag ku ngana nga ari nasingan.” Kunnaw gapa i kinagi na 18-anios nga si Sister Noemi Tinajero nga na-baptize taw nga dagun: “Masingammu i magayayya nga familia anna makkorofun. . . . Gitta na paraiso ngana.”

Nakayakan na aru i tema na programa. Kunnaw i kinagi ni Brother Sam Huh: “Marigatan i aru ta nittam nga mappasensia. Iperaddam natun nga parigattam i kakkasta nga kualidad ni Jehova nga pappasensia.” Kinagi gapa ni Sister Frenchie Smith: “Nagigiammù taw nga kombension nu kunnasi nga makoffun i pasensia ta ngamin nga aspeto na pattolè. Praktikal i interu nga programa.”

Talaga napagaram i ngamin nga nagatende ta ollollu nga kombension nga nakua taw nga dagun ta Newburgh, New York! Excited ittam anna i minillion paga ta interu mundo nga mabenefisiowan ta neprepara ira nga espiritual nga makan ta mappange ira nga vulan.​—Salmo 122:1.