KAPITULO 35

Kunnasi Ngà Mabbalin tu Kofun na Dios?

Megafu ta marake nga nappasan ni Jeremy, naappresia na i importansia na pakikkofun ta Dios. Kinagi na: “Turi ta 12 i dagukku, pinanawan nakami na yamà. Tadday nga gabi, nakimemallo ngà kani Jehova nga manoli nakuan si yamà.”

Gafu ta daddam ni Jeremy, pinegafuanan na nga bibbigan i Biblia. Turi ta nabibbig na i Salmo 10:14 (NW), natukkal i futu na. Kinagi na teksto meyannung kani Jehova: “Umaranni nikaw i kakkallo ira nga biktima; uffunammu i abbing ira nga awan tu yama da.” Kinagi ni Jeremy: “Kagitta na kikkibbidan nà ni Jehova anna ikakkagi na nga yayya i manguffun niakan; yayya i Yamà. Awan ngana tu kapianan nga yama anne nisa!”

MASKI nu kaparehum tu situasion si Jeremy onu ari, kagian na Biblia nga ikaya ni Jehova nga mabbalikka tu kofun na. Kakurugan na, kinagi na Biblia: “Umaranni kamu ta Dios, ay umaranni yaya nikamu.” (Santiago 4:8) Nonopammu nu anni i kebalinan natun: Maski nu ariammu nga masingan si Jehova, anna ari yayya tu kagitta na kokkofummu ira, ikaya na nga makikkofukka nisa!

Kawagan i pappursigi ta pakikkofun ta Dios. Angngarigan na: Tapenu dumakal i maseta, mawag nga regular mu yatun nga bayatan onu bisibitan anna ipem yatun ta mepangngo nga lugar nga paddakallan na. Kunnatun gapa ta pakikkofun ta Dios. Anni i awayyam kuan tapenu malladda i pakkofun nu?

I Importansia na Paggigiammu tu Biblia

Kawagan ta pakkofun i komunikasion—pagginna anna pagistoria. Kunnatun gapa ta pakikkofun ta Dios. Magginna ittam ta kakkagian na Dios nu bibbigan anna gigiammuattam i Biblia.​—Salmo 1:2, 3.

Awayya na tu ari ka mahilig mabbibbig. Aru nga kabataan i mas kayà da i maggiraw tu TV, maggayam, onu mappasiar kavulu i kokkofudda. Ngem nu kayà mu nga makikkofun ta Dios, mawag nga tuttulammu i ngamin nga kagian na. Kawagan nga magginna ka ta nisa gukaban na paggigiammum ta Uvovug na.

Ariammu nga mavurung. Ari nga mamakadammo i paggigiammu tu Biblia. Siguradu nga magustuammu yatun maski nu ariammu kuruga hilig i maggigiammu. I ollu nga kuammu, mawag tu egga i iskediul mu ta paggigiammu tu Biblia. Kinagi na tadday nga babay nga si Lais: “Egga i iskediul ku. Kada pallukag ku ta umma, mabbibbig ngà tu tadday nga kapitulo na Biblia.” Tanakuan gapa i rutina na 15-anios nga si Maria. Kinagi na, “Kada gabi mabbibbig ngà tu maski piga laman nga versikulo nige ngà makkatrug.”

Tapenu makegafu ka tu sarilim nga iskediul ta paggigiammu, innan i kahon nga “ Gigiammuammu i Bibliam.” Itura mu gapa ta gukag nu sonu anni ka nga makapaggigiammu tu Uvovug na Dios tu maski 30 minuto onu mas apaddu paga.

․․․․․

Awayya na nga egga ngana i iskediul mu. Ngem sonu pegafuanammu ngana i maggigiammu, matageno mu nga ari kanayun nga mabi mantindian i Biblia. Awayya na nga umanugu ka ta kinagi na 11-anios nga si Jezreel, “Mariga malippawa i karuan nga parte na Biblia anna ari kuruga nga makapa-interes.” Ari nakuan nga makkafi i nono mu nu kunnatun i matageno mu. Kanayummu nakuan nonopan nga i paggigiammu tu Biblia ay pagginna ta kofummu nga si Jehova nga Dios. Nu mappursigi ka nga maggigiammu tu Biblia, mabbalin yatun nga makapagayayya anna mabenefisiowakka tatun!

Importante i Pakimallo

Makibbida tam i Dios gukaban na pakimallo. Makakkasta nga regalu i pakimallo! Mawayyam nga kibbidan si Jehova ta maski anni nga oras, anna sigga-paran yayya kanayun nga magginna nikaw. Ikaya na nga kannammuan i ikagim nisa. Yatutta ipagaram na Biblia: “Ta ngamin nga pakimallo nu nga kanayun nga mavulunan ta pabbala-balo, kiddawan nu ta Dios i mawag nu.”​—Filipos 4:6.

Gitta na kagian na teksto, aru ira i awayya tam ikagi kani Jehova. Nelagum tatun i problema, pakavurungan, anna gannug ira nga ipappabalo tam. Ari kari nga mappabalo ka ta kofummu ira nu egga i makasta nga kingngua da para nikaw? Awayyam gapa nga kuan yatun kani Jehova nga mas aru i kiningngua na para nikaw kumpara ta kokkofummu ira.​—Salmo 106:1.

Ilistam ta gukag i gannug ira nga ipappabalo mu kani Jehova.

․․․․․

Siguradu nga egga ira i tiempo nga magana-anassikka anna mavuru-vurukka. Kagian na Salmo 55:22: “Ipammakatalo mu ta YAFU i vuru-vurung mu ira, ay mala mu i pangiyegu na; arian na vuluvuga nga itulu tu i matunung nga tolay ay maffu.”

Ilista ta galli ira i pakavurungammu ira nga ikaya mu nga ilagum ta pakimallo mu.

․․․․․

Ekspiriensa

Egga paga i mawag nga kuattam ta pakikkofuttam ta Dios. Nitura na salmista nga si David: “I pia na YAFU ay en-nu mismu nga kakkapan [onu, purueban].” (Salmo 34:8) Nitura ni David i meka-34 na Salmo kabalin na nga neparubang ta delikadu nga situasion. Nattammang yayya megafu ta kayà yayya nga patayan ni Patul Saul. Ari laman tu yatun, mawag na paga i mattagu ta lugar nga dian na kalaban na ira nga Filisteo. Turi ta nappeligro ngana i inango na, nagappappe yayya nga ulapa yari tu napaliag yayya.​—1 Samuel 21:10-15.

Ari nga ninono ni David nga napaliag yayya megafu ta kalalaki na, nu ari, niyawa na i dayaw kani Jehova. Ta nakagi nga salmo, nitura na: “Nakimallo ngà ta YAFU ay sinabbag nà, ta ngamin nga ikassing ku ay pinaliag nà.” (Salmo 34:4) Megafu ta ekspiriensa mismu ni David, makagi na ta tanakuan nga “i pia na YAFU ay en-nu mismu nga kakkapan.” *

Naekspiriensam ngana kari i panguffun ni Jehova? Nu egga, itura mu yatun ta gukag. Daddamman: Ari nga kawagan nga emosional i ekspiriensam. Nonopan i simple ira nga bendision nga nalawa mu ta kada aggaw, maski nu gitta na ari kuruga importante i karuan tatun.

․․․․․

Awayya na nga i magana mu i nanuddu nikaw meyannung ta Biblia. Nu kunnari, bendision yatun. Ngem kawagammu lagapa i makikkofun mismu ta Dios. Nu ariammu paga napegafuanan, makoffun i mabibbig mu ira taw. Bendisionan ni Jehova i pappursigim. Kagian na Biblia: “Makkiddaw kamu ay keddak-kamu. Magaleg kamu ay makaleg kamu.”​—Mateo 7:7.

[Footnote]

TEMA NGA TEKSTO

“Magayayya danuri sigga-nono ta espiritual nga kawagadda.”​—Mateo 5:3, NW.

TIP

Nu mabbibbig ka tu appa nga pahina na Biblia kada aggaw, mabalimmu yatun ta tanga-ragun.

AMMUM KARI . . . ?

I pabbibbig mu taw nga libru anna pattuttul mu ta nebase-Biblia ira nga tabarang na, pakurugan na nga interesadu nikaw si Jehova.​—Juan 6:44.

I KUAKKU!

Tapenu mas mabenefisiowan ngà ta pabbibbig ku ta Biblia, mawag tu ․․․․․

Tapenu regular ngà makimallo, mawag tu ․․․․․

I kayà ku iyavu ta magana ku meyannung taw ay ․․․․․

ANNI I MAKAGIM?

● Anni i kuammu tapenu mas magenjoy ka ta paggigiammum tu Biblia?

● Ngatta ikaya ni Jehova nga ginnan i pakimallo na imperfekto nga totolay?

● Kunnasim paga mas mapakasta i kualidad na pakimallo mu?

[Blurb]

“Turi ta kabbikku, itotolì i pakimallo ku. Ngem sangawe, ipakimallo ku i makasta anna i marake ira nga nesimmu ta tangaggaw. Megafu ta madduruma i mesimmu ta kadaggaw, mebità nga itotoli i pakimallo ku.”—Eve

[Kahon/​Letratu]

Gigiammuammu i Bibliam

1. Mappili ka tu rekord ta Biblia nga kayà mu bibbigan. Ipakimallo mu nga mantindiammu i bibbigammu.

  2. Bibbigammu tu mapia i rekord. Ariammu mappabibibi. Ta pabbibbig mu, iyusam i imahinasiommu nga gitta na egga ka tatun nga eksena. Kagitta na masingammu ira, maginnam i ngaral da, magug mu i paddag, anna masissimammu i makan. Pabbalinammu tu gitta na matotolay ta nono mu i ngamin nga eksena!

3. Pannonopammu tu mapia i nabibbig mu. Awayyam iyavu i tumunug ira:

● Ngatta nisali ni Jehova ta Biblia yaw nga rekord?

● Sinni ira nga karakter i makasta nga ehemplo, anna sinni gapa i ari makasta nga parigan?

● Anni ira i magigiammù ta nabibbig ku?

● Anni i ituddu na rekord meyannung kani Jehova anna ta pangituppal na ta ganna-gannug?

4. Makimallo kani Jehova. Ikagim nisa i nagigiammum ta Biblia anna nu kunnasim nga iyaplika yatun. Kanayukka nga mappabalo kani Jehova ta niregalu na i Uvovug na, i Biblia!

[Letratu]

“I uvovug mu ay kunna allamparan nga mangirollu niakan, anna tulu ta ek-ku ira nga laka-lakaran.”​—Salmo 119:105.

[Kahon/​Letratu]

Pagolluammu i Pinaka-importante

Awan ngana kari tu tiempom nga makimallo onu maggigiammu tu Biblia? Nu mittan, depende yatun ta prayoridad mu.

Puruebammu yaw: Manga ka tu baldi, anna mangipay ka tu darakal nga batu ta unag na. Tapus pannuammu yatun tu daga. Napannu ngana tu batu anna daga i baldim.

Sangawe, alsammu i nipem ta baldi, tapus itolim lagapa yatun ngem pappolluammu nga ipay i daga imbes tu i batu ira. Arianna makkasya, ari kari? Megafu ta pinagollum nga nipay i daga.

Anni i magigiammum? Kagian na Biblia: “Pilian i kapianan ta ngamin.” (Filipos 1:10) Nu piliammu nga pagolluan i ari kuruga importante nga gannug kagitta na dibersion, awan ngana tu lugar na importante ira nga gannug ta pattolem—i espiritual ira nga addetan. Ngem nu tuttulammu i tabarang na Biblia, siguradu nga egga i tiempom para ta Pappatulan anna para ta dibersion. Nakadepende yatun nu anni i pagolluammu nga ipay ta baldim!

[Letratu]

Tapenu dumakal i maseta mawag nga mappursigi ka nga tangngallan yatun, kunnatun gapa ta pakikkofun ta Dios