APENDISE
Affutammu i Masturbasion
I masturbasion ay anangngua nga makadaral ta espiritualidad. Pabbalinanna yatun i tolay nga makasarili anna dapinganna i nonò. * I magangngua tatun, awayyana tu imammatanna i kasittolena nga mangiyawà laman sa tu seksual nga pagayayà. Para sa, ari ngana nga pangipasingan tu ayâ i sex. Imammatanna yatun nga paggafuan na manganannuan nga pagayayà anna tape mapagustuan i seksual nga pakkaragàna. Ngem temporario laman i kunnatun nga pagayayà. Kakuruganna, imbes nga matay nakuan i parte na baggina meyannung ta “paggannug, marakay nga appana-panono, [anna] nepattaggan nga pakkaraga na baggi,” mas lallagu tolayan yatun na masturbasion.—Colosas 3:5.
Netura ni apostol Pablo ta meddu nga kokkofunna: “Pakarennuat-tam i baggi anna espiritu tam ta anni laman nga makaparitta nittam. Kuat-tam tu awan tu pakkurangan na kasanto tam ta pattolay nga sigga-assing ta Dios.” (2 Corinto 7:1) Nu kuruga mariga para nikaw nga tuttulan yaw nga bilin, ari ka nakuan mawanan tu iddanama. “Minammakoma” anna minangnguffun si Jehova. (Salmo 86:5; Lucas 11:9-13) Kakuruganna, i pakkakonsensiam anna i determinasiommu nga iyemmang yaw nga maritta nga anangngua—maski nu kukukuammu paga aggi-mittan—ipasinganna nga makasta i ugalim. Nonopammu gapa nga “mas makawayya i Dios anne ta konsensia tam anna ammu na ngamin i adde na ganna-gannug.” (1 Juan 3:20) Kurug tu masingi-singan na Dios i liwi-liwà tam ngem ammuna i interu nga kata-katoletam. Megafu tatun, masingi-singan anna magigginnana i pakkiddaw tam tu allò. Yari tu ari ka magimmang nga sigga-pakalinno anna napafutuan nga makimallo ta Dios, kagitta na abbing nga makiyuffun ta yamana nu egga problemana. Bendisionannaka ni Jehova tu marenu nga konsensia. (Salmo 51:1-12, 17; Isaias 1:18) Siempre, mawag nga mangngua ka gapa tu positibo ira nga dakkua mekunnay ta pakimallòmu ira. Angngariganna, mappursigi ka nga lillitan i ngamin nga klase na pornograpia tuange ta marake nga kakavulu. *
Makiyuffukka nakuan ta Cristiano nga maganàmu onu ta tadday nga manakam ta espiritual anna minangngikavurung nga kofun nu tulu-tuloy paga laman i problemam ta masturbasion. *—Proverbio 1:8, 9; 1 Tesalonica 5:14; Tito 2:3-5.
^ par. 1 I masturbasion ay panattammi anna pangaffuria ta pribadu ira nga parte na baggi nga marresulta tu orgasmo.
^ par. 2 Magaru nga familia i nagangngua tu praktikal nga dakkua tape makontrolda i pangiyusa tu kompiuter gukaban na pangipay taw ta lugar nga masingan na ngamin. Giminatang gapa i karuan tu software tape ari nga makatallung i makadaral nga pabbibbigan onu pagiraw ta kompiuterda. Ngem ari nga kanayun nga mekatalò i kunnaw ira nga software.
^ par. 1 Para ta praktikal ira nga suhestion nu kunnasi nga malabanan i masturbasion, innan i artikulo nga “Ang mga Kabataan ay Nagtatanong . . . Paano Ko Maaalis ang Bisyong Ito?” ta Nobiembre 2006 isyu na Gumising!, anna pahina 178-182 na libru nga Ang mga Tanong ng mga Kabataan—Mga Sagot na Lumulutas, Tomo 1.
