Blood fractions. Naggafu yatun ta appa nga parte na daga​—red cells, white cells, platelets, anna plasma. Angngariganna, egga protina nga hemoglobin na red cells. Egga ira produkto nga naggafu ta hemoglobin na ayam onu tolay nga meyusa ngana ta panguru ta pasiente nga nawawanan tu aru nga daga onu egga acute anemia na.

Plasma​—90 porsiento nga danum​—egga tatun i aru nga hormone, ari tu organiko nga asin, enzyme, anna substansia, kasali ngana i mineral anna i asukar. Yaw gapa i mamabbalay ta daga, egga gapa taw i antibodies nga mallaban ta takì, anna protina nga kagitta na albumin. Nu posible nga neyalitan tu takì i tadday, awayyana tu ireseta na doktor i pappatubbo tu gamma globulin nga naggafu ta plasma na tolay nga egga ngana imiunidadna ta kunnatun nga takì. I white blood cells ay awayyana tu paggafuan na interferon anna interleukin nga meyusa tape moruan i kanser anna infeksion megafu ta virus.

Mepangngò kari nga alawatan na Cristiano i panguru nga mangiyusa tu blood fractions? Awan tu espesipiko nga detalye nga kagian na Biblia, yari tu personal nga desision yatun nga maddepende ta konsensia. Pammanakitan na karuan i ngamin nga blood fractions. Irasodda nga i bilin na Dios ta Israel  gari nga mawag tu mevuvvu “ta davvun” i daga na tadday nga ayam. (Deuteronomio 12:22-24) Alawatan gapa na karuan i panguru nga mangiyusa tu blood fractions ngem pammanakitadda i mappatubbo tu puro nga daga onu primero nga partena. Awayyana tu irasodda nga ari ngana nga itaddaggan na blood fractions i inangò na pinaratu nga naggafuanna yatun.

Nu maddesisiokka meyannung ta blood fractions, iyavumu ta baggim: Ammù kari nga nu pammanakitakku i ngamin nga blood fractions, kebalinanna nga pinammanakitakku ngana gapa i produkto ira nga egga blood fractions na nga meyusa tape malabanan i taka-takì onu mabbalay i daga tape magimmang i paddaga? Meyesplikà kari ta doktor ku nu ngatta alawatakku onu ari i pangiyusa tu tadday onu karuan paga nga blood fractions.

Pagopera. Kasali taw i hemodilution anna cell salvage. Ta hemodilution, melisi i daga ta baggi na pasiente, tapus matalianan tu volume expander, kabalinna, metoli gabbalaman ta pasiente. Ta cell salvage, monnug i daga nga mawawan ta pasiente durante nga maopera tapus metoli gabbalaman sa. Malà, mapakarennuan onu matara, tapus metoli ta pasiente i daga nga naggafu ta bigagna onu ta body cavity. Megafu ta nadduruma i metodo na doktor ira ta pangiyusa taw, mawag tu ammuan na Cristiano i metodo nga usan na doktorna.

Nu maddesision meyannung taw, iyavumu ta baggim: ‘Nu melisi i karuan nga dagà ta lawan na baggì tapus awayyana paga  tu mapagimmang yatun, alawatan kari na konsensià nga parte lagapa na baggì yatun nga daga nga ari ngana tu kawagan nga mevuvvu “ta davvun”? (Deuteronomio 12:23, 24) Ari panò nga madapingan i nasanay-Biblia nga konsensià nu durante nga moperannà ay mangàda tu dagà tapus kivuadda tu medisina, kabalinna, metoli ta baggì? Ammù kari nga nu pammanakitakku i ngamin nga panguru nga meyusa i dagà ay kebalinanna nga ariakku alawatan i pab-blood test, hemodialysis, onu i heart-lung bypass machine?’

 Personal nga desision lagapa na Cristiano nu anni i makua ta dagana durante nga maopera yaya. Kunnatun gapa ta medikal nga pangeksamen anna metodo na panguru nga kawagan i pangà tu baddi nga daga, tapus makivuan tu medisina, kabalinna, metubbo uli ta baggi.