Kada anni anna ngatta mawag tu mabbelo onu mattakkag tu ulu i Cristiano nga babay nu meyannung ta paddayarayona? Innattam i nainspiran nga netura ni Pablo meyannung taw. Nangiyawà yaya tu giya tape makapaddesisiottam tu fustu meyannung taw tapenu medayarayaw i Dios. (1 Corinto 11:3-16) Nepasingan ni Pablo i tallu nga mawag tu mekonsidera: (1) i aktibidad ira nga kawagan tu mangiyusa i babay tu takkag ta ulu, (2) i situasion ira nu ngatta mawag nga kuanna yatun, anna (3) i motibona ira ta panuttul taw nga prinsipio.

I aktibidad ira. Egga dua nga nakagi ni Pablo: pakimallò anna papprofesiya. (Bersikulo 4, 5) I pakimallò ay marespeto nga pakiergo kani Jehova. Ta kaggawattam, mebilang nga papprofesiya i maski anni nga nebase-Biblia nga pattuddu na ministro nga Cristiano. Kayà kari kagian ni Pablo nga mawag tu mattakkag i babay tu ulu kada makimallò onu mattuddu ta kinakurug ta Biblia? Ari. Depende yatun ta situasion.

I situasion ira. Ipasingan na kinagi ni Pablo i dua nga situasion onu nu kada anni nga mattakkag tu ulu i babay​—ta familia anna ta kongregasion. “I lalaki i pakimorayan na atawa na,” kinagi ni Pablo, “ngem i babay nga ari nga mabbelo nu maddasal onu mangilammuyag ta uvovug na Dios, ay ipasiranan na i atawa na.” (Bersikulo 3, 5) Ta unnug na familia, i  lalaki i sinunnò ni Jehova nga ulu onu pakiyafuan na babay. Ipasiranan na babay i atawana nu ari makimoray ta autoridadna anna nu kuanna i responsibilidad nga neyawà ni Jehova ta atawana. Angngariganna, nu egga situasion nga mawag tu mangikondukta yaya tu paggigiammu tu Biblia nga egga i atawana, mepasinganna i respeto nu mattakkag yaya tu ulu. Kuanna yatun maski nu ari nga bawtisado i atawana, megafu ta i lalaki i ulu na familia. * Nu makimallò yaya onu mattuddu nga egga i bawtisado nga menor-de-edad nga anàna nga lalaki, mattakkag gapa yaya tu ulu. Pangikakua yatun ta autoridad nga neyawà ta bawtisado nga lalaki nga miembro na kongregasion Cristiano, ari nga megafu ta i anàna i ulu na familia.

Kunnaw gapa i kinagi ni Pablo ta situasion ta kongregasion: “Nu egga maya nikamu nga makiddiskusion ta meyannung taw, yaw i makagì: ta paddaya-rayaw, awan tu tanakuan nga annangngua mi tuange ta [kongregasion] ira na Dios.” (Bersikulo 16) Ta kongregasion Cristiano, neyawà ta bawtisado nga lallaki i pakka-ulu. (1 Timoteo 2:11-14; Hebreo 13:17) Lallaki laman i awayyana nga mabbalin tu elder onu ministerial nga aripan tape mangalawà tu responsibilidad ta Dios nga manangngal ta karneruna ira. (Kingngua 20:28) Ngem nu karuan, egga ira situasion nga babay i magangngua ta negagangay nga kuan na bawtisado anna kualipikadu nga lalaki. Angngariganna, awayyana tu babay i mangiyollu ta miting nige na pallayyagayya nu awan tu kualipikadu nga bawtisado nga lalaki. Awayyana gapa nga mangikondukta tu paggigiammu tu Biblia maski nu egga i bawtisado nga lalaki. Megafu ta parte lagapa na kongregasion Cristiano yatun ira nga aktibidad, mawag tu mattakkag yaya tu ulu. Yatun i mangipasingan nga kukukuanna i negagangay nga kuan na lalaki.

Ngem aru gapa nga aspeto na paddayarayaw nga ari ngana tu mawag nga mattakkag tu ulu i babay. Angngariganna,  nu makkomento yaya ta study, nu mallayyagayya nga kavulu i atawana onu i tanakuan nga bawtisado nga lalaki, onu nu maggigiammu onu makimallò nga kavulu i ari-bawtisado nga ánana. Awayyana tu egga paga ira tanakuan nga luttuag nga situasion, ngem nu ari nga siguradu i babay nu anni i kuanna, mawag tu mar-research paga yaya. * Nu ari paga yaya nga siguradu, tapus pinaguyu yaya na konsensiana nga mattakkag yaya tu ulu, awan gapa tu marake tatun, kagitta na masingan ta letratu.

I motibo ira. Masingattam ta bersikulo 10 i dua nga rason nu ngatta mawag nga mattakkag tu ulu i Cristiano nga babay: “Megafu ta anghel ira gafu, mawag tu mabbelo i babay tu paningannan tu makimoray yaya ta atawa na.” Ollu, i nakagi nga “paningannan tu makimoray.” Mepasingan na babay i pangikakuana ta autoridad nga neyawà ni Jehova ta bawtisado nga lallaki ta kongregasion nu mattakag yaya tu ulu. Yari tu mepasinganna i ayâ anna pammakatalòna kani Jehova nga Dios. I meka-dua nga rason ay “megafu ta anghel ira.” Anni i efektona ta anghel i pattakkag na babay tu ulu?

Kayà na anghel ira nga masingan nga mekakua i autoridad ni Jehova ta interu nga organisasionna​—ta langi onu ta davvun. Mabenefisiowan gapa ira ta ehemplo na imperfekto nga totolay taw nga gannug. Megafu ta mawag tu makimoray gapa ira ta unnug ni Jehova​—nga ari nakua na aru nga anghel gari. (Judas 6) Ta kaggawattam, awayyana tu masingan na anghel ira nga mas ekspiriensadu i Cristiano nga babay, mas aru i ammuna, anna mas malalaki anne ta bawtisado nga lalaki ta kongregasion; ngem sigga-paran nga makimoray ta autoridad  na lalaki. Egga gapa situasion nga i Cristiano nga babay ay sinullò anna makavulu noka ni Cristo nga mangirensia. Masserbi noka yaya ta posision nga mas atannang anne ta angel ira anna mammaguray ta langi kavulu ni Cristo. Anni kastana nga ehemplo para ta angel ira! Kurug tu pribilehio para ta ngamin nga Cristiano nga babbay nga mangipasingan tu ehemplo na kinapakalinno gukaban na pabbalidda tu matalò anna minakkimoray!