1, 2. Ngatta ayatammu si Jehova nga Dios?

AYATAMMU kari i Dios? Nu nededikam ngana i baggim kani Jehova nga Dios, siguradu nga wan i tabbagmu! Mepangngo laman gapa nga ayatattam yaya. Kagian na 1 Juan 4:19 nga “i Dios i ollu nga nangaya nittam,” yari tu ayatattam si Jehova megafu ta yaya i ollu nga nangipasingan tu ayâna nittam.

² Si Jehova i ollu nga nangipasingan tu ayâna nittam. Pinaddianna ittam ta makakkasta nga davvun. Iyawàna i material ira nga kawagattam. (Mateo 5:43-48) Mas paga tatun, sustinianna i espiritual ira nga kawagattam. Neyawàna nittam i Biblia nga Uvovugna. Fuera paga tatun, kayàna nga makimallo tam sa. Ipasiguraduna nga ginnanna ittam anna iyawàna i masanto nga espirituna nga manguffun nittam. (Salmo 65:2; Lucas 11:13) I pinaka-importante ta ngamin, nesakrifisiona i tattadday nga Anàna tape matavvu tam ta liwà anna patay. Kurug nga makapabbaw yatun nga ayâ nga nepasingan ni Jehova!​—Bibbigammu i Juan 3:16; Roma 5:8.

3. (a) Anni i kawagan nga kuattam tape makapattalupaddian ta ayâ na Dios? (b) Anni nga importante nga pakkiavu i mawag nga ikonsidera tam, anna pakalegattam tu tabbagna?

³ Kayà ni Jehova nga mannanayun nga mabenefisiowattam ta ayâna. Ngem nakadepende yatun nittam. Ipagaram  na Biblia: “Ari kamu nga umarayyu ta aya na Dios . . . nga mangiyawa nikamu ta ngangangay nga inango.” (Judas 21) Kebalinan na “ari kamu nga umarayyu” nga egga i kawagan nga kuattam tape makapattalupaddian ta ayâ na Dios. Masingan nakuan ta kukukuattam i ayâ tam sa. Ikonsidera tam gafu yaw nga importante nga pakkiavu: ‘Kunnasì nga mepasingan i ayâku ta Dios?’ Malegan i tabbag ta netura ni apostol Juan: “Ta nu ayatat-tam i Dios, parulattat-tam gapa i bili-bilin na, ay ari gammabba tu mariga nga tuttulan danaw.” (1 Juan 5:3) Mawag tu alippawatattam tu mapia i kebalinanna yaw ira nga uvovug megafu ta kayà tam ipasingan tu talaga nga ideddukattam si Jehova.

4, 5. (a) Anni i kebalinan na “ayatat-tam i Dios”? (b) Kunnasi nga namegafu i napafutuan nga ayâmu ta Dios?

⁴ “Ayatat-tam i Dios”​—anni i kayà kagian ni apostol Juan turi ta neturana yaw? Tukuyanna i monag nga ayâ tam ta Dios. Meraddammammu kari nu kunnasi nga namegafu i ayâmu kani Jehova?

⁵ Daddammammu turi ta ollu nga nagigiammum i kinakurug meyannung kani Jehova anna ta gakkagna ira, tapus nangurugka. Nalippawàmu nga maski nu neyanà tam nga nesina ta Dios megafu ta imperfekto tam, nevuka ni Jehova i dalan tape marensia tam i mannanayun nga inango anna metoli nittam i kinaperfekto nga nawawan ni Adan. (Mateo 20:28; Roma 5:12, 18) Namegafu gapa nga inapresiam i kadakal na nesakrifisio ni Jehova ta nepangidogna ta tattadday nga Anàna tape matay para nikaw. Natukkal i futum ta konag na ayâna nikaw yari tu inayàmu gapa yaya.​—Bibbigammu i 1 Juan 4:9, 10.

6. Kunnasi nga mepasingan i kurug nga ayâ, anna napaguyuka nga kuan i anni megafu ta ayâ ta Dios?

⁶ Ngem pamegafuanan laman yatun na kurug nga ayâmu kani Jehova. Ari laman tu basta panagenò i ayâ; ari laman gapa nga basta uvovug. I kurug nga ayâ ta Dios ay mas paga ta basta pangikagi tu, “ideddukakku si Jehova.” Kagitta na pangurug, masingan i kurug nga ayâ gukaban na annangngua. (Santiago 2:26) Mepasingattam i ayâ gukaban na pagangngua tu ganna-gannug nga makapagayayà ta tolay nga ayatattam. Yatutta, turi ta namegafu nga inayàmu i nelangitan nga Yamam nga si Jehova, napaguyuka nga mattolay segun ta kayàna. Bawtisado ka kari ngana nga Saksi? Nu wan, i monag nga ayâ anna kinamatalòmu kani Jehova i rason nu ngatta nakuam yatun nga pinaka-importante nga desision. Nededikam i baggim kani Jehova tape  kuan i urena, tapus nappabawtisoka bilang simbolo na dedikasiommu. (Bibbigammu i Roma 14:7, 8.) Kasali i tumunug nga kinagi ni apostol Juan ta pattuppal taw nga napafutuan nga tabba.

7. Anni i karuan nga bili-bilin na Dios? Anni i kasali ta pattuppal taw nga bili-bilin?

⁷ Nepakanawag ni Juan i kebalinan na pangayà ta Dios: ‘Parulattat-tam i bili-bilinna.’ Anni i bili-bilin na Dios? Nangiyawà nittam si Jehova tu karuan nga espesipiko nga bilin gukaban na Uvovugna, i Biblia. Angngariganna, igammana i pagillellaw, seksual nga immoralidad, idolatria, pakkokò, anna palladdug. (1 Corinto 5:11; 6:18; 10:14; Efeso 4:28; Colosas 3:9) Kasali ta pattuppal ta bili-bilin na Dios i pattolay mekunnay ta manawag nga moral nga estandarte ira na Biblia.

8, 9. Kunnasi tam nga mammuan nu anni i makapagayayà kani Jehova maski nu awan tu direkta nga bilin na Biblia? Mangiyawà tu angngarigan.

⁸ Ngem tape mapagayayà tam si Jehova, mawag tu ari laman nga espesipiko nga bili-bilinna i tuppalattam. Ari tu istrikto si Jehova nga kada pagguyyuattam ay egga espesipiko nga bilin onu dob. Yari tu kada aggaw, awayyana nga mepa-arubattam ta situasion nga awan tu espesipiko nga bilin na Biblia. Nu kunnatun, kunnasi tam gafu mammuan nu anni i makapagayayà kani Jehova? Egga ta Biblia i manawag ira nga pakasingannan nu anni i pagimammana ta ganna-gannug. Ta paggigiammu tam tu Biblia, mammuattam i kayà ni Jehova anna i kalussona ira. (Bibbigammu i Salmo 97:10; Proverbio 6:16-19) Mapaddumam anna malippawàmu nu anni ira nga ugali anna annangngua i tagibaloranna. Nu umaru i magigiammu tam ta personalidad anna ta dala-dalan ni Jehova, mas nga metonos tam i desision anna kukukuattam  ta appana-panonòna. Yari tu maski mepa-arubattam ta situasion nga awan mabba tu espesipiko nga bilin na Biblia, mammuattam lagapa nu anni i “ikaya na Yafu nga ipakua” nittam.​—Efeso 5:17.

⁹ Angngariganna, awan tu direkta nga bilin nga mangigamma nittam nga maggiraw tu pelikula onu programa ira ta TV nga egga parralaban, panattazzi, onu seksual nga immoralidadna. Ngem kawagattam kari talaga i espesipiko nga dob kontra ta paggiraw tu kunnatun? Ammu tam i pagimamma ni Jehova taw nga ganna-gannug. Manawag i kagian nittam na Uvovugna: “Ikalussaw [ni Jehova] danuri mangaya ta panattazzi.” (Salmo 11:5, NW) Kagian paga na Hebreo 13:4 nga “panunnutan na Dios danuri i maggannug tuange ta manallaw anna makidallaw.” Nu nonopattam yaw tu mapia, malippawà tam i kayà ni Jehova. Ariattam gafu maggiraw tu maski anni nga mangipasingan tu ganna-gannug nga ikalussaw ni Jehova. Ammu tam nga magayayà si Jehova nu lillitattam i pagiraw ira nga makadaping ta moral ngem pabbalbalinan na totolay ta mundo nga marenu. *

10, 11. Ngatta kayà tam nga mattuppal kani Jehova, anna anni klasena nga pattuppal?

¹⁰ Anni i rason nu ngatta tuppalattam i bili-bilin na Dios? Ngatta kayà tam nga mattolay kagaggaw mekunnay ta pagimamma na Dios? Tuppalattam yatun ari laman nga tape malisiattam i marake ira nga resultana. (Galacia 6:7) Mattuppal tam kani Jehova tape mepasingattam i ayâ tam sa. Nu kunnasi nga kakayà na abbing nga mapagayayà i Yamana, kakayà tam gapa nga mapagayayà si Jehova. (Salmo 5:12) Yaya i Yama tam, yari tu iddukattam yaya. Makeyawà nittam tu kurug nga pagayayà i pakannammu nga awayya tam ‘malawà i  fabor ni Jehova.’ (Proverbio 12:2) Awan ngana tu tanakuan nga paggafuan na kunnatun nga pagayayà.

¹¹ Mattuppal tam gafu ari laman nga megafu ta mafeffuersa tam onu egga kondision na pattuppal tam. * Ariattam gapa pippilian i bilin nga kayà tam tuppalan megafu laman ta kombiniente nittam onu ariattam marigatan nga kuan yatun. Napafutuan nakuan i pamarulò tam. (Roma 6:17) Kagitta na salmista, makagi tam gapa: “Pagayaya ku i mamarulo ta dorob mu, ta danaw ay kuruga ayatak-ku.” (Salmo 119:47) Wan, kakayà tam nga mattuppal kani Jehova. Mepangngo laman nga ikiddona nittam i napafutuan anna sigga-paran nga pattuppal tam sa. (Deuteronomio 12:32) Kayà tam nga ikagi gapa nittam ni Jehova i kagitta na kinagina meyannung ta patriarka nga si Noe nga nammakatalò ta aru nga dekada: “Kingngua ni Noe i ngamin nga nebilin na Dios sa. Talaga nga sinuttulna.”​—Genesis 6:22.

12. Kunnasi nga makapagayayà ta futu ni Jehova i pattuppal tam?

¹² Anni i matagenò ni Jehova ta sigga-paran nga pattuppal tam? Kagian na Uvovugna nga ‘mapagayayà tam i futuna.’ (Proverbio 27:11) Talaga kari nga makapagayayà ta futu na Katannangan nga Yafu ta uniberso i pattuppal tam? Siguradu nga wan, anna egga makasta nga rason ni Jehova nga magayayà! Pinaratu ittam ni Jehova nga egga lallagurena. Kebalinanna yaw nga awayya tam lagapa mappili nu anni i kayà tam​—nu mattuppal tam ta Dios onu ari. (Deuteronomio 30:15, 16, 19, 20) Kuruga magayayà si Jehova nu ariattam mapilitan nga mattuppal sa megafu ta napafutuan nga ayâ. (Proverbio 11:20) Pippiliattam gapa i kapianan nga pattolay.

13, 14. Ngatta nakagi nga ‘ari tu mariga nga tuttulan’ i bili-bilin na Dios? Anni i nekegittanna yaw?

¹³ Egga nepasiguradu nittam ni apostol Juan meyannung ta bili-bilin ni Jehova: “Ari gammabba tu mariga nga tuttulan danaw.” I Griego nga termino nga netransleyt tu “mariga nga tuttulan” ta 1 Juan 5:3, literal nga kebalinanna nga “madammo.” * Kunnaw gapa i mabibbig ta tanakuan nga Biblia: “Ari tu mamakadammo nittam i bili-bilinna.” (New English Translation) Rasonable anna ari nga mamakadammo i bili-bilin ni Jehova. Ari tu imposible nga matuppal yatun na imperfekto nga totolay.

¹⁴ Kunnaw i nekegittanna: Nappoffun nikaw i kofummu ta pagalìna ta tanakuan nga balay. Aru nga karton i mawag nga meyalì. Nalappaw i karuan nga awayya akkatan na maski tadday laman, ngem madammo i karuan nga mawag tu dua i mangakkà. Ikagi nikaw na kofummu nu anni ira i iyalìmu. Ipakattuna kari nikaw i karton nga ammuna tu ariammu makattu? Ari. Manakìna nga matakitan onu marigatakka. Kunnatun gapa i minangngiddu anna masippo nga Dios tam. Awan tu bilinna nga mariga para nittam nga tuppalan. (Deuteronomio 30:11-14) Arianna vuluvuga ipakattu nittam i kunnatun nga madammo nga obligasion. Matindian ni Jehova i limitasiottam megafu ta “ammu na i nikaparatu tam; ammu na tu gavu ittam laman.”​—Salmo 103:14.

15. Kunnasi tam makasiguradu nga para ta pammakapianattam i dorob ni Jehova?

 ¹⁵ Imposible nga mamakadammo i bili-bilin ni Jehova; talaga nga pammakapianattam yatun. (Bibbigammu i Salmo 32:8.) Yari tu nakagi ni Moises ta Israelita ira: “Nebilin nittam ni Jehova nga tuttulattam ngamin yaw nga dorob, anna tape maganassittam kani Jehova nga Dios para ta kanayun nga pammakapianattam, tape mattalupaddiattam nga sigga-matolay, kagittana taw nga aggaw.” (Deuteronomio 6:24) Makasiguradu tam gapa nga mannanayun nga pammakapianattam i dorob nga neyawa ni Jehova. Imposible nga kiddawan ni Jehova i mamakadammo nittam. Awan tu adde na pakannammu ni Jehova nga Dios. (Roma 11:33) Ammuna gafu nu anni i kakastan para nittam. Personipikasion gapa na ayâ si Jehova. (1 Juan 4:8) Napavulunan tu ayâ i ngamin nga kakkagian anna kukukuanna. Yaw i nebaseyan na ngamin nga bili-bilin nga neyawana ta aripanna ira.

16. Kunnasi tam nga matuppal lagapa i bili-bilin na Dios maski nu imperfekto anna napalevutattam tu marake nga influwensia?

¹⁶ Ngem ari na gapa kayà kagian nga malogon laman nga mattuppal ta bilin na Dios. Ariattam mappa-influwensia ta marake nga mundo nga “egga ta pammaguray na Demonio.” (1 Juan 5:19) Mawag tu labanattam i kina-imperfekto tape ariattam matenta nga ari mattuppal ta dorob na Dios. (Roma 7:21-25) Ngem ariattam matenta megafu ta ayatattam i Dios. Bendisionan ni Jehova danuri mamakurug ta ayâda sa gukaban na pattuppalda. Iyawàna i masanto nga espirituna ta “totolay nga makimoray” sa. (Kingngua 5:32) Mamalattuag yatun nga espiritu tu mapia nga vungu-vunga​—kualidad ira nga makoffun nittam tape matuttul i bili-bilin na Dios.​—Galacia 5:22, 23.

17, 18. (a) Anni i gigiammuattam taw nga publikasion? Anni i ipatalattò ta nono tam durante nga kuattam yatun? (b) Anni i magigiammu ta tumunug nga kapitulo?

 ¹⁷ Gigiammuattam taw nga publikasion i prinsipio ira ni Jehova, moral ira nga estandartena, anna aru paga nga ganna-gannug nga mangipasingan nu anni i urena. Durante nga kuattam yatun, ipatalattò tam ta nonò tam i importante nga ganna-gannug. Daddammattam nga ari ittam nga fuersan ni Jehova nga tuppalan i bili-bilin anna prinsipiona ira. Kayàna nga napafutuan i pattuppal tam sa. Ariattam kattamman nga kayà ni Jehova nga mattoletam mekunnay ta urena tape malawà tam i aru nga bendision ta maddaggun, nga mattuppal ta mannanayun nga inango. Nonopattam gapa nga tiansa tam nga mepasingan nu kunnasi kadakal na ayâ tam kani Jehova gukaban na napafutuan nga pattuppal tam sa.

¹⁸ Nangiyawà nittam si Jehova tu konsensia tape mapadduma tam i mapia ta marake. Ngem tape mabbalin yatun tu mapattalakkan nga giya, mawag tu masanay i konsensia tam. Yatun i magigiammu ta tumunug nga kapitulo.