Ekspektan ni Jehova nga mattalupaddian nga matalò i sigga-atawan ira ta tabbada. Turi ta kinasalna i ollu nga lalaki anna babay, kinagina: I “lalaki” ay “metadday ta atawana, anna mabbalin ira nga tattadday nga pattag.” Kinagi gapa yatun ni Jesus anna neyamunna: “Arian na gafu nga awayya tu paggungayan na tolay i pinattaday na Dios.” (Genesis 2:24; Mateo 19:3-6) Yari tu imammatan ni Jehova anna ni Jesus i pagatawa nga  pattadday nga patay laman i awayyana nga mamassinna. (1 Corinto 7:39) Serioso nga gannug i diborsio megafu ta sagrado nga unnug i pagatawa. Kakuruganna, kalussaw ni Jehova i paddiborsio nga awan tu nebase-Biblia nga rasonna.​—Malakias 2:15, 16.

Anni nga situasion nga ipamavulun na Biblia i diborsio? Bueno, kalussaw ni Jehova i seksual nga immoralidad. (Genesis 39:9; 2 Samuel 11:26, 27; Salmo 51:4) Kakuruganna, kala-kalussona i seksual nga immoralidad yari tu ipamavulunna i paddiborsio megafu tatun. (Para ta kepakanawag na gannug ira nga kasali ta seksual nga immoralidad, innammu i Kapitulo 9, parapo 7.) Ipamavulun ni Jehova ta inosente nga atawa nga maddesision nu makitadday paga yaya ta atawana onu makidiborsio. (Mateo 19:9) Yatutta nu makidiborsio i inosente nga atawa, ari nga kalussaw ni Jehova yatun. Ngem maski nu kunnatun, ari nga ipagaram na kongregasion Cristiano i diborsio. Kakuruganna, egga ira situasion nga awayyana tu mapaguyu i inosente nga atawa nga mattalupaddian ta nakaliwà nga atawana, nerulay nu napafutuan i pabbabawi na atawana. Ngem siempre, nu nebase-Biblia i pakidiborsio na Cristiano, personal nga desisionna lagapa nu anni i kuanna anna mawag tu alawatanna i maski anni nga resultana.​—Galacia 6:5.

Ta karuan nga kuruga mariga nga situasion, naddesision i karuan nga Cristiano nga makisinna onu makidiborsio maski nu ari nga nakakua tu seksual nga immoralidad i atawada. Ta kunnatun nga situasion, ibilin na Biblia nga i nakisinna “mawag tu ari ngana nga maki-atawa, onu ari, makkatoli gabbalaman ira.” (1 Corinto 7:11) Ari tu puede makitawa onu mangatawa uli yatun nga Cristiano. (Mateo 5:32) Ikonsidera tam taw i karuan nga grabe nga situasion nga awayyana tu kebaseyan na passinna.

Ari nga passuporta. Awayyana tu kuruga maziga ngana i familia anna awan ngana tu kanadda megafu ta ari ira nga suportan na atawa nga lalaki maski nu mawayyana gamma nga kuan yatun. Kagian na Biblia: “I tolay nga pagurayan na i . . . kabbalay na, ay nallikuran na i angngurug na anna mas marakay anne paga ta ari nga Cristiano.” (1 Timoteo 5:8) Nu ari nga manguli i  atawa nga lalaki, awayyana tu legal nga makisinna i babay para ta pammakapiananna anna na ánana. Siempre, mawag tu imbestigan tu mapia na elder ira nu kurug i akusasion nga ari nga suportan na lalaki i familiana. Awayyana tu ma-disfellow i Cristiano nu pagurayanna i familiana.

Grabe nga pisikal nga pangabuso. Awayyana tu daddannalan na minangngabuso nga atawa i atawana yari tu mappeligro i gawagawayyanna onu maski paga i inangòna. Nu Cristiano i minangngabuso nga atawa, mawag tu imbestigan na elder ira ta kongregasion nu kurug yatun. Awayyana tu ma-disfellow i tadday megafu ta pappata-patu anna pangabusona.​—Galacia 5:19-21.

Mappeligro i espiritualidad. Awayyana tu kanayun nga fugaddan na tadday i atawana nga manuttul ta kurug nga paddayarayaw onu pilitanna paga lagu i atawana nga kuan i mekontra ta bilin na Dios. Nu kunnatun, awayyana tu maddesision i mappepeligro nga atawa nga legal nga makisinna tape matuttulna i uray na Dios, ari tu i uray na tolay.​—Kingngua 5:29.

Ta kunnatun nga grabe nga situasion, awan nakuan tu mangumbinsi ta inosente nga atawa nga makisinna onu mattalupaddian nga makikavulu ta atawana. Maski nu awayya na manakam ta espiritual nga kokkofun anna na elder ira nga mangiyawa tu nebase-Biblia nga tabarang, ariadda ammu i ngamin nga detalye na mesissimmu ta magatawa. Si Jehova laman i makanammu ta ngamin. Siempre, ari nga mekakua na atawa nga Cristiano nga babay si Jehova onu i unnug na pagatawa nu ama-amunganna laman i problemada nga magatawa tape laman makisinna. Ammu ni Jehova nu mamaddapadday laman i tadday tu istoria tape makisinna maski nu ilimagna yatun. Kakuruganna, “ngamin i gannug ay vuka anna vullag ta arubang na Dios nga mamanunnu noka nittam.” (Hebreo 4:13) Ngem nu nabayag ngana nga mesissimmu yatun ta magatawa, awan nakuan tu makkritika ta atawa nga naddesision nga makisinna kabalinna nga kingngua i ngamin nga solusion. Ta panguriananna, “sittam ngamin noka ay tumaddag ta arubang na Dios tapenu panunnutan na ittam.”​—Roma 14:10-12.