1, 2. (a) Anni i pagimamma na aru nga totolay ta trabahuda? b) Anni nga pagimamma i ipagaram na Biblia?

ARU nga totolay i awan ngana tu ganasda nga mattrabahu. Ariadda kayà i inaggaw nga mattallung megafu ta apaddu nga oras na pattrabahu. Kunnasi nga mapaguyu i kunnatun nga totolay nga magayayà ta trabahuda?

² Ipagaram na Biblia i positibo nga pagimamma ta malappò nga pattrabahu. Kagianna nga bendision i trabahu kunne na gapa i resultana. Netura ni Solomon: “Kada tadday nakuan ay kuman anna minum anna magayayà ta ngamin nga malappò nga pattrabahuna. Regalu yatun na Dios.” (Eclesiastes 3:13) Megafu ta ayatan anna kanayun nga nonopan ni Jehova i pammakapianattam, kayàna nga magayayà ittam ta pattrabahu tam anna mabenefisiowan ta resultana. Tape makapattalupaddiattam ta ayâna, mawag tu mattoletam nga mekunnay ta pagimamma anna prinsipiona ira meyannung ta trabahu.​—Bibbigammu i Eclesiastes 2:24; 5:18.

3. Anni ira nga pakkiavu i matabbag taw nga kapitulo?

³ Taw nga kapitulo, matabbag i appa nga pakkiavu: Kunnasi tam nga magayayà ta malappò nga pattrabahu? Anni ira nga trabahu i ari mepangngò ta kurug ira nga Cristiano? Kunnasi tam mabalanse i sekular nga trabahu anna i espiritual ira nga aktibidad tam? Anni i pinaka-importante nga trabahu tam? Nige nga matabbag yatun, ammuattam labbi  nu sinni i dua nga ehemplo na kapianan nga mattrabahu ta interu uniberso​—si Jehova nga Dios anna si Jesu-Cristo.

4, 5. Kunnasi nga nepasingan ta Biblia nga si Jehova i kapianan nga mattrabahu?

⁴ Si Jehova i Kapianan nga Mattrabahu. Kagian na Genesis 1:1: “Ta gafa-gafu, pinaratu na Dios i langa-langi anna i davvun.” Turi ta nakumpleto ni Jehova i pamaratu ta ngamin nga ganna-gannug ta davvun, kinagina nga “makakkasta yatun.” (Genesis 1:31) Kebalinanna nga kuruga nakontento yaya ta ngamin nga pinaratuna ta davvun. Megafu ta magayayà nga Dios si Jehova, siguradu nga nagayayà yaya ta napakaru nga kingnguana.​—1 Timoteo 1:11.

⁵ Ari vuluvuga magimmang nga mattrabahu i malappò nga Dios tam. Nappasa i apaddu nga tiempo kabalin na nekeparatu na davvun, kinagi ni Jesus: “Awan tu immang na Yamà nga makatara-trabahu.” (Juan 5:17) Anni paga i tara-trabahuan ni Jehova? Maski nu egga yaya ta langi, igiggiya anna tangnga-tangngallanna i totolay ta davvun. Egga i ‘bagu nga pinaratuna,’ danuri sinullò na espiritu nga Cristiano ira nga kavulu ni Jesus nga mammaguray ta langi. (2 Corinto 5:17) Ari yaya nga magimmang nga mattrabahu adde ta metuppal i gakkagna ta totolay​—malawà danuri mangayà sa i mannanayun nga inangò ta napabagu nga mundo. (Roma 6:23) Fermi nga magayayà si Jehova ta resultana yaw nga trabahu. Minillion i mangala-alawà ta mensahe na Pappatulan nga neyaranni na Dios, kabalinna, inulida i pattoleda tape makapattalupaddiadda ta ayâna.​—Juan 6:44.

6, 7. Anni i makasta nga reputasion ni Jesus ta malappò nga pattrabahu?

⁶ Nabayag ngana nga makasta i reputasion ni Jesus ta malappò nga pattrabahu. Nigena nga minay ta davvun,  nasserbi yaya ta Dios bilang “malalaki nga mattrabahu” ta pammaratu ta ngamin nga ganna-gannug nga “egga ta langi tuange ta utun na davvun.” (Proverbio 8:22-31; Colosas 1:15-17) Ari yaya nga nagimmang ta malappò nga pattrabahu turi ta egga yaya ta davvun. Maski nu mabbing, nagigiammuna ngana i mappataddag tu balay, yari tu nammammu yaya bilang “i karpinteru.” * (Marcos 6:3) Madammo yaw anna kawagan i malalaki nga mattrabahu​—lalu ngana ta awan paga tu pappatistisan, paggatangan tu materiales, anna de-kuryente ira nga remienta gari. Manonòmu kari si Jesus nga yaya mismu i mangà tu kayu nga usanna? Awayyana tu yaya mismu i maggappò anna manguggung tatun adde ta pattrabahuanna. Manonòmu kari yaya nga mappataddag tu babalay—magangngua anna mangikabit tu ulu na balay, mamadday tu puerta tuange ta muwebles ira? Personal nga naekspiriensa ni Jesus i pakkakontento ta malappò anna malalaki nga pattrabahu.

⁷ Nerumu-ruma i lappò ni Jesus ta pallayyagayya. Kuruga okupadu yaya taw nga importante nga trabahu ta unag na tallu-gaddua nga dagun. Awan tu sinayanna nga tiempo, megafu ta kakayàna nga mas aru nga totolay i malayyagayyanna. Umu-umma paga laman ay mallayyagayya ngana adde paga ta gabi. (Lucas 21:37, 38; Juan 3:2) “Ta ili-ili anna babario ay nallayya-gayya ta Mapia nga Dumug meyannung ta Pammaguray na Dios.” Nilakag ni Jesus i ginatù nga kilometro ta ginavù nga dala-dalan tape melayyagayya i makasta nga dumug.

8, 9. Ngatta nagayayà si Jesus ta malappò nga pallayyagayyana?

⁸ Nagayayà kari si Jesus ta malappò nga pallayyagayyana? Wan! Nangibini yaya tu vukal na kinakurug, nga nebattanna nga magatab ngana. I pamarulò ta uray na Dios i  namasikan kani Jesus yari tu maski ari ngana kuman, metuppalna laman i trabahuna. (Juan 4:31-38) Nonopammu i ayayà ni Jesus turi ta kabalin na ministeriona ta davvun, yari tu nakagina ta Yamana: “Nipasingak-ku ngana i dayom toye ta utun na davvun, ta netuppal ku ngana i nipakuam niakan.”​—Juan 17:4.

⁹ Kurug nga si Jehova anna si Jesus i kapianan nga ehemplo na pagayayà ta malappò nga pattrabahu. I ayâ tam kani Jehova i mamaguyu nittam nga “parigan i Dios.” (Efeso 5:1) I ayâ tam kani Jesus i mamaguyu nittam nga ‘tuttulan yaya’ tu mapia. (1 Pedro 2:21) Gigiammuattam gafu nu kunnasi tam nga magayayà ta malappò nga pattrabahu.

10, 11. Anni i makoffun tape positibo i pagimammàmu ta trabahu?

¹⁰ Parte na pattolay na kurug ira nga Cristiano i sekular nga trabahu. Kakayà tam nga makontento anna makatagenò tu pagayayà ta trabahu tam ngem kurug nga mariga yatun nu ari tam kayà i sekular nga trabahu tam. Nu kunnatun, anni i makoffun tape magayayà ta pattrabahu?

¹¹ Positibo nga pagimamma. Ari tam kanayun nga moli i situasion ngem awayya tam nga ulian i pagimamma tam. Makoffun ta pabbalin nga positibo ta trabahu i pannonò tu mapia ta pagimamma na Dios. Angngariganna, nu padre-de-familia ka, nonopammu nga makoffun i trabahum tape meyawàmu i material nga kawagan na familiam, maski nu tagibaddikan yatun na karuan. Dakal gafu nga gannug ta Dios i passustento ta familiam. Kagian na Biblia nga “mas marakay anne paga ta ari nga Cristiano” i tolay nga arianna sustentuan i familiana. (1 Timoteo 5:8) Nu nonopammu nga makoffun i trabahum tape metuppalmu i responsibilidadmu nga neyawà na Dios, matagenòmu i pagayayà nga ari matagenò na katrabahum.

12. Ngatta pakabenefisiowan i pabbalin tu malappò anna mapammakatalakkan?

 ¹² Pabbalin tu malappò anna mapammakatalakkan. Marresulta tu aru nga bendision nu malappò ka anna nu kuammu tu mapia i trabahum. Tagibaloran na amo ira i malappò anna malalaki ira nga mattrabahu. (Proverbio 12:24; 22:29) Bilang kurug nga Cristiano, mawag tu mapammakatalakkattam gapa ta trabahu. Ariattam makkokò, mangiyusa tu materiales para ta personal, onu kurangan i oras na pattrabahu tam. (Efeso 4:28) Nagigiammu tam ta nappasa nga kapitulo nga pakabenefisiowan i pabbalin tu mapammakatalakkan. Siguradu nga mapattalakkan i empleyado  nga mapammakatalakkan. Maski nu ari mapansin na amo i malappò nga pattrabahu tam, magayayà tam lagapa ta “marenu i konsensia” tam anna mapagayayà tam i Dios nga ideddukattam.​—Hebreo 13:18; Colosas 3:22-24.

13. Anni i resulta na makasta nga kondukta tam ta trabahu?

¹³ Pannonò nga makedayaw ta Dios i kondukta tam. Siguradu nga maobserba na tanakuan nu kanayun nga tuttulattam i atannang nga estandarte na kondukta na Cristiano ta trabahu. Anni i resultana? “Mepasingan i pia na tuttuddu nga meyannung ta Dios nga Mammaliag nittam.” (Tito 2:9, 10) Wan, mas magustuan na karuan i paddayarayotam nu masingadda i mapia nga kondukta tam. Nonopammu ngana laman nu anni i matagenòmu nu naginteres i katrabahum ta kinakurug megafu ta makasta nga ehemplom! I pinaka-importante: Egga kari paga mas nabalor anne ta pakannammu nga makedayaw anna mamagayayà kani Jehova i makasta nga konduktam?​—Bibbigammu i Proverbio 27:11; 1 Pedro 2:12.

14. Anni i makoffun nittam ta pappili tu trabahu?

¹⁴ Ari nga nangiyawà i Biblia tu detalyadu nga instruksion nu anni i mepangngò onu ari, nga sekular nga trabahu. Arianna gapa kayà kagian nga alawatattam ngana i maski anni nga klase na trabahu. Makoffun i Biblia tape makapili tam tu makasta nga trabahu nga mamagayayà ta Dios anna malillitattam i trabahu nga mamallussaw sa. (Proverbio 2:6) Nu mappili tam tu trabahu, egga dua nga pakkiavu nga mawag tu nonopattam.

15, 16. Anni i dua nga pakkiavu nga mawag tu nonopattam nu mappili tam tu trabahu?

¹⁵ Mekiddaw kari taw nga trabahu nga kuakku i igamma na Biblia? Manawag nga igamma na Biblia i pakkokò, palladdug, anna pagangngua tu idolo. (Exodo 20:4; Kingngua 15:29; Efeso 4:28; Nepakannammu 21:8) Pammanakitattam  i trabahu nga posible nga mekiddaw nga kuattam yatun. Megafu ta ayâ tam kani Jehova, ariattam pulus alawatan i trabahu nga konektadu ta annangngua nga igamma na Dios.—Bibbigammu i 1 Juan 5:3.

¹⁶ Mabbalinnà kari tu kasabwat onu promotor na marake nga annangngua nu kuakku yatun nga trabahu? Angngariganna, ari gapa tu marake i trabahu nga sekretaria. Ngem kunnasi nu meyawatan i tadday nga Cristiano tu trabahu ta  opisina na pappatayan tu lotto? Awayyana tu ari nga direkta nga mallaku yaya tu tiket. Ngem ari tamma nga suportan lagapa na trabahuna i passugal nga mangipagaram tu pakkelug onu i pabbalin tu kakkam​—gannug nga mekontra ta Biblia? (Efeso 5:3-5) Megafu ta ayatattam si Jehova, manakì tam nga makiparte ta annangngua nga igamma na Biblia.

17. (a) Anni ira i ikonsidera tam nu mappili tu trabahu? (Innammu i kahon nga  Alawatakku Pano i Trabahu?) (b) Kunnasi nga moffunan ittam na konsensia tam nga makapaddesision nga mamagayayà ta Dios?

¹⁷ Aru nga isyu meyannung ta trabahu i masolba nu alippawatan tu mapia i tabbag ta dua nga pakkiavu ta parapo 15 anna 16. Egga paga tanakuan nga gannug nga mawag tu ikonsidera tam nu mappili tu trabahu. * Ariattam  gapa ekspektan nga mangiyawà i mekatalò anna nannonò nga doroban tu bilin ta kada luttuag nga situasion. Taw nga kawagan i sirib. Nagigiammu tam ta Kapitulo 2 nga mawag tu matudduan anna masanay i konsensia tam gukaban na pangiyaplika ta Uvovug na Dios ta inaggaw nga pattoletam. Nu ‘mapenam tam nga maningan ta nadduman na mapia anna marakay,’ moffunan ittam na konsensia tam nga makapaddesision nga mamagayayà ta Dios. Makoffun gapa yatun tape makapattalupaddiattam ta ayâ na Dios.​—Hebreo 5:14.

18. Ngatta importante nga kanayuttam nga balanse ta espiritual?

¹⁸ Megafu ta “ziga-riga ta pangurianan ira nga aggaw,” marigatattam nga makapattalupaddian nga balanse ta espiritual. (2 Timoteo 3:1) Ari tu mabì i magaleg anna mattalupaddian ta trabahu. Bilang kurug nga Cristiano, ammu tam nga importante i mattrabahu tape masustentuan i familia tam. Ngem nu ariattam magimmugug, awayyana tu mainfluwensiattam ta materialistiko nga appana-panonò nga makefugag ta passerbi anna paddayarayaw tam ta Dios. (1 Timoteo 6:9, 10) Innattam nu kunnasi tam nga mabbalin tu kanayun nga balanse, tape masiguradu “i kapianan ta ngamin.”​—Filipos 1:10.

19. Ngatta mepangngò laman nga mattalò tam kani Jehova? Anni i malillitattam nu mattalò tam sa?

¹⁹ Kanayun nga mattalò kani Jehova. (Bibbigammu i Proverbio 3:5, 6.) Ari kari tu mepangngò gapa laman nga mattalò sa? Tutal, ikavurunganna ittam. (1 Pedro 5:7) Mas nga ammuna i kawagattam, anna ari tu ababba i limana nga manguffun. (Salmo 37:25) Makasta gafu nga magginna ittam ta tabarang na Uvovugna: “Iyarayyu nu i attolay nu ta pangaya ta kuartu, anna makkontento kamu ta anni laman nga egga nikamu. Ta kinagi na  Dios, ‘Ariat-taka vuluvuga nga panawan, ni et-taka nga pagurayan.’” (Hebreo 13:5) Napakurug ngana na aru nga massesserbi ta ngamin-tiempo i pakawayya na Dios nga mangiyawà tu pakawagadda ira ta pattolay. Nu kurug nga mattalò tam kani Jehova nga iyawàna i ngamin nga kawagattam, ariattam kuruga mavurung ta familia tam. (Mateo 6:25-32) Ariattam ipamavulun nga mapagurayattam  i espiritual nga aktibidad, kagitta na pallayyagayya anna paki-study, megafu laman ta trabahu tam.​—Mateo 24:14; Hebreo 10:24, 25.

20. Anni i kebalinan na naka-fokus nga mata? Kunnasim nga mapattalupaddian nga naka-fokus i matam?

²⁰ Pattalupaddianan nga naka-fokus i matam. (Bibbigammu i Mateo 6:22, 23.) Nu naka-fokus onu mapia i paningan na mata tam, kebalinanna nga simple i pattoletam. Naka-fokus i mata na Cristiano ta tattadday nga gakkag​—pagangngua tu uray na Dios. Nu naka-fokus gafu i mata tam, ariattam desperadu nga marriku anna mapeggan tu trabahu nga dakal i sueldona. Ariattam gapa mappa-influwensia ta awan tu immanna nga pakkaraga ta pinakabagu anna pinakamakasta kanu nga gannug nga mamagayayà nittam segun ta komersial ira. Kunnasim nga mapattalupaddian i naka-fokus nga mata? Ibitam i maggatù. Ariammu kuan tu komplikadu i pattolem megafu laman ta ganna-gannug nga mangufù tu aru nga tiempo. Ginnammu i tabarang na Biblia nga makontento nu egga ngana “kanan anna passinnut-tam.” (1 Timoteo 6:8) Mappursigi nga pasimplean paga i pattolem.

21. Anni nakuan i ipoppollu tam, anna ngatta?

²¹ Ipoppollum i espiritual nga ganna-gannug. Mawag tu egga prayoridad tam megafu ta limitadu laman i tiempo tam. Nu awan, mofù i nabalor nga tiempo tam ta ari kuruga importante nga ganna-gannug. Anni nakuan i ipoppollu tam? Aru i mangipoppollu ta mas atannang nga edukasion tape mapeggan ira tu propesion nga dakal i sueldona. Ngem nepagaram ni Jesus ta disipulosna: “Asiguran nu lagu nga aleran i meyannung ta Pammaguray na Dios.” (Mateo 6:33) Bilang kurug nga Cristiano, ipoppollu tam i Pappatulan na Dios. Mawag tu masingan ta pattoletam​—i pippilian, i prayoridad, anna i kukukuattam​—nga  mas nabalor nittam i Pappatulan anna i uray na Dios anne ta material anna sekular nga ganna-gannug.

22, 23. (a) Anni i pinaka-importante nga trabahu na kurug ira nga Cristiano, anna kunnasi tam mepasingan nga importante yatun nittam? (Innammu i kahon ta  “Nagayayà Anna Nakontento Ngà ta Desisiokku”) (b) Anni i determinado nga kuammu nu meyannung ta sekular nga trabahu?

²² Megafu ta araranni ngana i panuppalan, naka-fokus tam nakuan kanayun ta pinaka-importante nga trabahu na kurug nga Cristiano​—pallayyagayya anna pagangngua tu disipulo. (Mateo 24:14; 28:19, 20) Kagitta na Ehemplo tam nga si Jesus, kayà tam nga mabbalin tu kuruga okupadu taw nga makepaliag-inangò nga trabahu. Kunnasi tam mepasingan nga importante nittam yaw nga trabahu? Aru nga wawwaragi ta kongregasion i napafutuan nga mallayyagayya. Massesserbi gapa i karuan nga payunir onu misionero. Megafu ta ammu na aru nga maganà i importansia na espiritual nga karera, pagarammadda i ánada nga masserbi ta ngamin-tiempo. Magayayà kari gapa i matalikarag ira nga mangilayyagayya ta Pappatulan? Siempre gapa! Siguradu nga mattuppal tu pagayayà, pakkakontento, anna abundansia nga bendision i interu-futu nga passerbi kani Jehova.​—Bibbigammu i Proverbio 10:22.

²³ Aru nittam i mattrabahu tu aru nga oras tape masustentuan i familiada. Daddammammu nga kayà ni Jehova nga magayayà tam ta malappò nga pattrabahu. Magayayà tam ta trabahu nu mekunnay ta pagimamma anna prinsipiona i appana-panonò anna kukukuattam. Determinado tam nakuan gafu nga ari mangipamavulun nga ilillì ittam na trabahu tam ta pangituppal ta pinaka-importante nga trabahu​—i pangilayyagayya ta mapia nga dumug na Pappatulan na Dios. Nu ipoppollu tam yaw ta pattoletam, mepasingattam i ayâ tam kani Jehova anna makapattalupadiattam ta ayâna.