Ta 1 Corinto 6:1-8, nakagi ni Pablo i meyannung ta paddemanda ta kapangngurug. Narraddam yaya ta metaggu na karuan nga wawwaragi ta Corinto nga “maddemanda ta hues ira nga ari mangurug ta Dios.” (Bersikulo 1) Nangiyawà si Pablo tu rason nu ngatta mawag nga makka-areglo i Cristiano ira ta unag na kongregasion, ari nakuan ira nga makkademanda ta korte. Ikonsidera tam i karuan nga rason nu ngatta kunnaw i tabarang na Biblia. Ammuattam gapa i karuan nga situasion nga ari tu kasali taw nga bilin.

Nu egga ariattam pakka-anugutan meyannung ta negosio, ikagumattam nga areglowan yatun mekunnay ta dala-dalan ni Jehova, ari nga ta mismu nga pagimamma tam. (Proverbio 14:12) Kagitta na nepasingan ni Jesus, mas makasta nga solban insigida i ari nga pakka-anugutan nige nga dumakal yatun. (Mateo 5:23-26) Ngem kaddaraddam ta itaga-taggà na karuan nga Cristiano i makipporfia, nga iyaddèda paga ta korte. Kinagi ni Pablo: “I kunnatun nga pakkadema-demanda nu ay mangipasingan tu naffu nga napittanan i angngurug nu.” Ngatta? Megafu ta daralan na kunnatun nga paddemanda i makasta nga reputasion na kongregasion anna i Dios nga dayarayawattam. Mawag gafu tu ipafutu tam i kinagi ni Pablo: “Ari kari mas mapia nu attamman nu laman ngana i katazza-tazzi anna kadara-darogas nu?”​—Bersikulo 7.

Nekagi paga ni Pablo nga nangiyawà i Dios tu mapia nga unnug ta kongregasion nu kunnasi nga solban i aru nga ari pakka-anugutan. I elder ira ay Cristiano nga lallaki nga nabbalin tu masirib megafu ta pakannammuda ta kinakurug ta Biblia, anna kinagi ni Pablo tu ira i “makannammu nga mangareglo ta kaso [na] mawwaragi ta angngurug” nu “meyannung ta pattolay.” (Bersikulo 3-5) Nepasingan ni Jesus nga i ari nga pakka-anugutan megafu ta madammo nga liwà, kagitta na pamaraparake anna pangilloko, ay mawag tu masolba mekunnay taw nga tallu nga gannug: ollu, pappursigian nakuan na ari nakka-anugu nga solban i problemada ta nallatanadda lagapa; mekadua, nu  ariadda paga nakka-anugu maski nu kiningnguda ngana i ollu, mangivulùda tu tadday onu dua nga testigu; anna i mekatallu, iyaddèda i problema ta elder ira ta kongregasion.​—Mateo 18:15-17.

Siempre, ari gapa tu mawag nga mabbalin tu abogadu onu negosiante i elder ira anna ariadda mawag tu mangiyawà tu tabarang nga nebase ta dorob na gobierno. Ariadda gapa mangikagi tu kondision nu kunnasi nga solban i ari pakka-anugutan. Uffunadda lallagu ira nga iyaplika i prinsipio na Biblia anna umanugu ta memammò nga solusion. Ta komplikadu ira nga situasion, awayyada nga makkonsulta ta manangngal ta sirkito onu ta panga nga opisina. Ngem egga ira situasion nga ari tu sakup na tabarang ni Pablo. Anni i karuan taw?

Nu karuan, awayyana tu simple nga pormalidad onu legal nga dakkuà laman i paddemanda tape memammo nga masolba i problema nga awan tu dehadu. Angngariganna, baka yaw laman i kawagan tape makapaddiborsio, malawà i kepangngattan nga manangngal ta anà, mammuan i kawagan nga meyawà nga sustento, malà i benefisio ta insurance, mesali ta kreditor ira ta kaso meyannung ta nabangkrap nga kumpania, anna tape mapakurug i ultimo nga testamento. Egga gapa ira situasion nga baka manonò na tadday nga Cristiano nga mawag nga makkontra-demanda tape maprotektan yaya ta tadday nga demanda. *

Nu awan gamma tu pappoporfia tatun nga demanda, ari nga mekontra yatun ta tabarang ni Pablo. * Ngem siempre, mawag tu prayoridad na Cristiano i kedayaw na ngagan ni Jehova kunne na gapa ta imammo anna pattaradday ta kongregasion. Ayâ i ollu nga pakasingannan nu sinni i kurug nga disipulos ni Cristo, megafu ta ‘i ayâ . . . ay ari tu makkaraga ta pammakapian laggapa na baggi.’​—1 Corinto 13:4, 5; Juan 13:34, 35.