Passaludo ta bandera. Mangurug i Saksi ira ni Jehova nga tadday nga forma na paddayarayaw i pakkummag onu passaludo ta bandera, nga mangipasingan tu maggafu ta nasion onu ta liderna i kapaliag, ari nga ta Dios. (Isaias 43:11; 1 Corinto 10:14; 1 Juan 5:21) Si Patul Nabucodonosor na Babilonia i tadday ta kunnatun nga lider. Tapenu dayawan yaya na totolay ta pakapangngua anna relihioso nga debosionna, namataddag yaya tu daka-dakal nga imahe anna finuersana nga makkummag ira nu maginnada i musika. Ngem ari nga nakkummag ta imahe i tallu nga Hebreo​—Sidrac, Mesac, anna Abednego​—maski paga nu patayadda ira.​—Daniel, kapitulo 3.

Ta kaggawattam, “i bandera i pinaka-simbolo na nasionalismo anna yatun i pinaka-importante nga gannug nga dayarayawan na mangurug ta nasionalismo,” netura na historiador nga si Carlton Hayes. “Alsan na lallaki i sumbreruda nu metalebag i bandera; tapus bilang paddayaw ta bandera, nattura i minabberso ira tu kansion tapus makkansion tu himno i abbarabbing.” Nekagina paga nga egga gapa selebrasion mekunnay ta nasionalismo, kunne na gapa ta “santo anna bayani” ira anna “templo” ira onu groto. Ta publiko nga seremonia ta Brazil, kinagi na ministro-heneral na suddalu: “Kuruga mekakua anna madayarayaw i bandera . . . nu kunnasi nga madayarayaw i nakeyanakan nga lugar.” Wan, “sagrado  i bandera, nga kagitta na krus,” kinagi na The Encyclopedia Americana.

Nakagi paga tatun nga ensayklopedia nga i national anthem ay “pangipasingan tu ayâ ta nasion anna maruddù nga kasali tatun i pakkiddaw tu pangigiya anna papproteksion ta magili onu ta mammaguray tatun.” Ariattam gafu makagi nga ari tu rasonable i aripan ira ni Jehova nu imammatadda nga relihioso i seremonia ira na nasion nga kasali i passaludo ta bandera anna national anthem. Kakuruganna, kunnaw i kagian nittam na The American Character meyannung ta pammanakì na ána na Saksi ira ni Jehova nga massaludo ta bandera onu mangitabba tu pammakatalò ta eskuela ira ta Estados Unidos: “Ta natturunug nga kaso, kinumpirma na Korte Suprema nga narelihiosuan yaw ira nga inaggaw nga ritual.”

Maski nu ari nga makiparte i aripan ira ni Jehova ta kunnatun ira nga ari nebase-Biblia nga seremonia, irespetoda i kepangngattan na totolay nga magangngua tu kunnatun. Ikakuada gapa i bandera na nasion bilang simbolo anna imammatadda i “egga ta gobiernu” nga masserbi nga “doroban na Dios.” (Roma 13:1-4) Yatutta tuttulan na Saksi ira ni Jehova i tabarang nga makimallò “para ta patul ira tuange ta ngamin nga mammaguray.” Ngem kuattam yatun “tapenu memammo i attolay tam, anna tapenu nespirituan anna marayaw ngamin i pagguyu-guyu tam.”​—1 Timoteo 2:2.

Pabboto nu eleksion. Irespeto na kurug ira nga Cristiano nu mabboto i karuan. Ariadda mapprotesta kontra ta eleksion, anna makikooperada ta nangaffù nga pulitiko. Ngem determinado ira nga mattalupaddian nga neutral onu awan tu paboradda nu meyannung ta pulitikal ira nga isyu ta nasa-nasion. (Mateo 22:21; 1 Pedro 3:16) Anni i mepangngo nga kuan na Cristiano ta lugar ira nga mepilit i pabboto onu grabe ngana i lussaw ta totolay nga ari umay ta presinto tape mabboto? Nonopammu nga minay ta tanà na Dura da Sidrac, Mesac, anna Abednego. I Cristiano nga mepa-arubang ta kunnatun, awayyana gafu lagapa nga umay ta presinto nu ipamavulun na konsensiana. Ngem siguraduanna nakuan  nga mattalupaddian yaya nga neutral. Mawag tu daddammanna yaw nga annam nga prinsipio:

1. ‘Ari nga kukua na mundo’ i disipulos ni Jesus.​—Juan 15:19.

2. I Cristiano ira i mangibaggi kani Cristo anna ta Pappatulanna.​—Juan 18:36; 2 Corinto 5:20.

3. Para-parehu i angngurug na kongregasion Cristiano, anna meggò i pakkaravulùda megafu ta ayâ nga kagitta na ayâ ni Cristo.​—1 Corinto 1:10; Colosas 3:14.

4. Ta anni laman nga kuan na ofisial, egga gapa tattabbagan tatun na nangiboto ira.​—Daddammammu i prinsipio ira ta 1 Samuel 8:5, 10-18 anna 1 Timoteo 5:22.

5. Para kani Jehova, yaya mismu i nallikuran na Israelita ira turi ta nekiddoda nga mapeggan ira tu tolay nga mammaguray nira.​—1 Samuel 8:7.

6. Mawag nga egga lallaguray na Cristiano ira nga makiyuvovug meyannung ta Pappatulan na Dios ta ngamin nga totolay nga nadduruma i pulitikal nga pagimammada.​—Mateo 24:14; 28:19, 20; Hebreo 10:35.

Serbisio Sibil. Ta karuan nga nasion, ikiddaw na gobierno nga masserbi ta komunidad danuri ari nga makiparte ta serbisio militar ta unag na piga vulan onu ragun. Nu mepa-arubattam ta kunnatun, makimallò anna makitabarang ittam ta manakam ta espiritual nga kapangngurug tam, kabalinna, maddesisiottam mekunnay ta konsensia tam.​—Proverbio 2:1-5; Filipos 4:5.

Kagian na Biblia nga mawag tu “minakkimoray ira anna agga-paran ira nga mangngua ta anni laman nga mapia,” ta gobierno anna ta mammaguray ira, “ay tu massissippo anna minangngikakua ira.” (Tito 3:1, 2) Megafu tatun, iyavu tam ta baggi tam: ‘Mekompromisò kari i Cristiano nga neutralidad ku onu mabbalinnà tu parte na falso nga relihion nu alawatakku yatun nga serbisio sibil?’ (Mikias 4:3, 5; 2 Corinto 6:16, 17) ‘Marigatannà kari nga tuppalan onu baka ariakku paga lagu matuppal i responsibilidad ku bilang Cristiano megafu tatun  nga serbisio?’ (Mateo 28:19, 20; Efeso 6:4; Hebreo 10:24, 25) ‘Onu mangiyawà kari niakan i iskediul na kunnatun nga serbisio tu tiansa nga mapalawa i espiritual ira nga aktibidad ku, nga awayyana tu makapappayunir ngà?’​—Hebreo 6:11, 12.

Nu ipamavulun na konsensia na tadday nga Cristiano nga alawatan i serbisio sibil anne ta mappefukù, irespeto nakuan yatun na kapangngurugna. (Roma 14:10) Ngem nu manakìna nga kuan yatun nga serbisio, mawag tu irespeto lagapa na tanakuan yatun nga desisionna.​—1 Corinto 10:29; 2 Corinto 1:24.