1-3. Anni ira i iyavu na tanakuan meyannung ta patay, anna anni i tabbag na karuan nga relihion?

 NIPROMESA na Biblia nga duttal i tiempo nga “awan ngana noka tu matay.” (Nepakannammu 21:4) Ta Kapitulo 5, nagigiammu tam nga posible nittam i mannanayun nga inango megafu ta tavvu. Ngem matay paga i tolay. (Eclesiastes 9:5) Yayya nga i tadday ta importante nga meyavu tam, ‘Anni i mesimmu nittam nu matay ittam?’

² Importante i tabbag tatun mas ngana nu matayan ittam. Baka manono tam: ‘Sitaw ngana nangngayanna? Masingi-singanna kari ittam? Moffunanna kari ittam? Masingattam paga kari yayya uli?’

³ Nadduruma i tabbag na relihion tatun ira nga pakkiavu. Egga i mangituddu nga nu masippo ka, umay ka ta langi ngem nu marake ka, matuggi ka ta infiernu. Kagian na karuan nga nu matay ka, mabbalikka tu espiritu anna makavulu mu i kafamiliam nga natay ngana. Kagian gapa na karuan nga kabalimmu nga matay anna masentensian, meyana ka uli, onu mattolay ka uli ta tanakuan nga baggi, awayyana nga tanakuan nga tolay onu ayam.

4. Anni nga ideya meyannung ta patay i ituttuddu na nadduruma nga relihion?

⁴ Gittana nadduruma i ituttuddu na relihion ira. Ngem maggi ngamin nira tadday laman i ideya na tudduda. Itudduda nga nu matay i tolay, egga i parte na baggina nga matolay paga. Kurug kari yatun?

5, 6. Anni i mesimmu nu matay ittam?

⁵ Ammu ni Jehova i mesimmu nu matay ittam, yatutta kinagina nittam nga nu matay i tolay, mangultimu ngana i inangona. Patay i kabalittag na inango. Nu matay i tolay, awan tu maski anni nga parte na baggina i mesina nga tulu-tuloy nga mattolay. * Nu matay ittam ariattam ngana makasingan, makaginna, anna makanono.

⁶ Nitura ni Patul Solomon nga “i natay ira ay awan ngana vuluvuga tu ammuda.” Ari makatageno i natay tu aya onu lussaw, anna “awan tu trabahu onu plano onu pakannammu onu sirib ta Attanamman.” (Bibbigan i Eclesiastes 9:5, 6, 10.) Kagian na Biblia nittam nga nu matay i tolay, “ari ngana yayya makapannono.”​—Salmo 146:4, NW.

7. Anni i kinagi ni Jesus meyannung ta patay?

⁷ Turi ta natay si Lazaro nga kofun ni Jesus, kinagina ta disipulosna: “Agga-katurug si Lazaro nga kofut-tam.” Ngem ari kayà kagian ni Jesus nga magibannag laman si Lazaro. Kinagi paga ni Jesus: “Natay ngana si Lazaro.” (Juan 11:11-14) Yari tu nikumpara ni Jesus i patay ta pakkatrug. Arianna kinagi nga egga ta langi si Lazaro onu nakavuluna i kafamiliana ira nga natay ngana. Arianna kinagi nga matuttuggi si Lazaro ta infiernu onu meyana ta tanakuan nga baggi onu ayam. Lallagu, neyarig si Lazaro ta tadday nga masingngo i katrugna. Mittan, nikumpara mangana ni Jesus i patay ta pakkatrug. Turi ta pinaginnolena i ana nga babay ni Jairo, kinagina, “ari yatun nga natay ngem nakkaturug laman.”​—Lucas 8:52, 53.

8. Kunnasi i pakannammu tam nga ari tu pinaratu na Dios i totolay tapenu matay?

 ⁸ Tagga ta pinaratu na Dios da Adan anni Eva, ginakkagna kari nga matay ira gabbalaman? Ari! Pinaratu ira ni Jehova tapenu magayayya ira nga mattolay tu mannanayun nga perfekto i gawa-gawayyadda. Turi ta pinaratu ni Jehova i totolay, niddanna ira tu pakkaraga nga mattolay tu mannanayun. (Eclesiastes 3:11) Manaki na magana nga masingan nga mabbako onu mallakay i ánada anna kabalinna, matay ira. Kunnatun gapa i matageno ni Jehova para nittam. Ngem nu pinaratu ittam na Dios nga mattolay tu mannanayun, ngatta matay ittam?

9. Ngatta fustu laman i bilin na Dios kada Adan anni Eva?

⁹ Kinagi ni Jehova kani Adan ta hardin na Eden: “Awayyam kanan i vunga na kada kayu ta hardin adde ta mabattug ka. Ngem mawag nga ariammu kuman tu vunga na kayu nga pakannammuan ta mapia anna marake, ta siguradu nga matay ka ta aggaw nga kumakka tatun.” (Genesis 2:9, 16, 17) Ari tu mariga nga tuttulan yatun nga manawag nga bilin, anna egga i kepangngattan ni Jehova nga ikagi kada Adan anni Eva nu anni i mapia anna nu anni i marake. Nu tuttuladda si Jehova, mepasingadda nga irespetoda i autoridadna. Mepasingadda paga nisa i appabaloda ta ngamin nga niyawana nira.

10, 11. (a) Kunnasi nilogo ni Satanas da Adan anni Eva? (b) Ngatta awan tu kapakoma ta kingngua da Adan anni Eva?

¹⁰ Kaddaraddam, pinili da Adan anni Eva nga ari ginnan si Jehova. Kinagi ni Satanas kani Eva: “Kurug kari nga kinagi na Dios nga ari kamu kuman ta vunga na kada kayu ta hardin?” Simibbag si Eva: “Awayyami nga kuman ta vunga na kayu ira ta hardin. Ngem kinagi na Dios meyannung ta vunga na kayu nga egga ta tangnga na hardin: ‘Ari kamu kuman tatun anna ariannu siggeran; ta matay kamu nu kanannu yatun.’”​—Genesis 3:1-3.

¹¹ Tapus kinagi ni Satanas: “Siguradu nga ari kamu matay. Ta ammu na Dios nga ta mismu nga aggaw nga kumakkamu tatun, mavukatan i matanu anna mabbalikkamu tu kagitta na Dios nga makannammu ta mapia anna marake.” (Genesis 3:4-6) Kayà ni Satanas nga nonopan ni Eva nga awayyana lagapa i maddesision para ta baggina nu anni i mapia anna nu anni i marake. Nalladdug paga si Satanas kani Eva ta mesimmu nu kuman yayya. Kinagi ni Satanas nga ari matay si Eva, yari tu kinnan ni Eva i vunga anna niddanna i atawana. Ammu da Adan anni Eva nga  kinagi nira ni Jehova nga ariadda kanan i vunga. Turi ta kinnadda yatun, pinilida nga ari ginnan i manawag anna mepangngo nga bilin. Ta pakkakadda, nipasingadda nga ariadda nirespeto i meddu nga nelangitan nga Yamada. Awan vuluvuga tu kapakoma na kingnguada!

12. Ngatta kaddismaya nga ari nirespeto da Adan anni Eva si Jehova?

¹² Talaga kaddismaya nga ari nirespeto na ollu nga magana tam i Namaratu nira! Anni i matageno mu nu makasta i pinamadakal mu ta ána mu tapus narrebelde ira nikaw anna kinontrada i nipakuam nira? Ari kari tu mataka-taki yatun?

13. Anni i kayà kagian ni Jehova turi ta kinagina kani Adan, “ta gavu i panoliammu”?

¹³ Turi ta nakaliwa da Adan anni Eva, nawawan i tiansada nga mattolay tu mannanayun. Kinagi ni Jehova kani Adan: “Megafu ta gavu ka ay ta gavu i panoliammu.” (Bibbigan i Genesis 3:19.) Kebalinan natun nga manoli ta gavu si Adan, nga gittana gari ta ari paga yayya naparatu. (Genesis 2:7) Turi ta nakaliwa si Adan, natay yayya anna napawan ngana.

14. Ngatta matay ittam?

¹⁴ Nu nattuppal nakuan da Adan anni Eva ta Dios, matolay paga nakuan ira adde ta maddaggun. Ngem turi ta ari ira nattuppal, nakaliwa ira, anna natay gabbalaman. I liwa ay megitta ta grabe nga taki nga  namana tam ta ollu nga magana tam. Neyana ittam ngamin nga makaliwa, yayya nga matay ittam. (Roma 5:12) Ngem ari tu yatun i plano na Dios para ta totolay. Ari vuluvuga kayà na Dios nga matay i totolay, anna kagian na Biblia nga ‘kontra’ na Dios i patay.​—1 Corinto 15:25, 26.

15. Kunnasi ittam mapalubbangan na kinakurug meyannung ta patay?

¹⁵ I kinakurug meyannung ta patay i mamalubbang nittam ta aru nga mali nga tuddu. Ituddu na Biblia nittam nga awan tu matageno na natay tu taki onu daddam. Ariattam ira makibbida, anna ariadda ittam makibbida. Ariattam moffunan i natay, anna ariadda ittam moffunan. Ariadda gapa ittam matakitan, yari tu ariattam maganassing nira. Ngem, ituddu na aru nga relihion nga sigga-matolay i natay ira ta tanakuan nga lugar anna moffunattam ira gukaban na pappaga ta pari onu lider ira na relihion tapenu mangidasal nira. Ngem ammu tam i kurug meyannung ta patay, ariattam ngana melogo tatun ira nga kinaladdug.

16. Anni nga kinaladdug i ituddu na aru nga relihion meyannung ta natay?

¹⁶ Usu-usan ni Satanas i falsu nga relihion tapenu malladdug nittam anna tapenu nonopattam nga sigga-matolay paga i natay ira. Angngariganna, ituddu na karuan nga relihion nga nu matay ittam, egga i parte na baggi tam nga mattolay ta tanakuan nga lugar. Kunnatun kari i ituddu na relihiommu, onu itudduna nu anni i kagian na Biblia meyannung ta natay? Usu-usan ni Satanas i kinaladdug tapenu iyarayyu i totolay kani Jehova.

17. Ngatta insulto kani Jehova i tuddu meyannung ta infiernu?

¹⁷ Kakkadda-kaddag i ituddu na aru nga relihion. Angngariganna, ituddu na karuan nga matuggi tu  mannanayun ta infiernu i marake nga totolay. Insulto kani Jehova yatun nga kinaladdug. Arianna vuluvuga ipamavulun nga marigatan tu kunnatun i totolay! (Bibbigan i 1 Juan 4:8.) Anni i matageno mu ta tolay nga kastiguanna i abbing gukaban na panuggi ta lima na abbing ta afi? Siguradu nga nonopammu nga awan tu allona. Magga manaki mu nga makilala yatun nga tolay. Kunnatun mismu i kayà ni Satanas nga matageno tam kani Jehova!

18. Ngatta ariattam nakuan ikassing i natay?

¹⁸ Ituddu na karuan nga relihion nga nu matay i tolay, mabbalin ira tu espiritu. Ituddu natun ira nga relihion nga mawag tu irespeto anna ikassittam paga lagu danuri espiritu megafu ta awayyada mabbalin tu makapangngua nga kofun onu grabe nga kalaban. Aru i mangurug tatun nga kinaladdug. Ikassidda i natay, yari tu ira i dayawadda imbes nga si Jehova. Daddamman nga awan tu matageno, masingan onu maginna na natay, yari tu ariattam nakuan ira ikassing. Si Jehova i Namaratu nittam. Yayya i kurug nga Dios, anna yayya laman nakuan i dayawattam.​—Nepakannammu 4:11.

19. Kunnasi ittam moffunan na pakannammu ta kinakurug meyannung ta patay?

¹⁹ Nu ammu tam i kurug meyannung ta patay, mapalubbangan ittam ta laddug nga tuttuddu na relihion. Yaw nga kinakurug i manguffun nittam tapenu malippawa i makkarasta nga promesa ni Jehova meyannung ta pattoletam anna ta mappange.

20. Anni i magigiammu tam ta tumunug nga kapitulo?

²⁰ Niyavu tagga na aripan na Dios nga mangngagan tu Job: “Nu matay i tolay, maginnolay kari paga uli?” (Job 14:14) Posible kari talaga nga maginnolay i natay? Kappagayayya i tabbag na Dios nittam ta Biblia. Magigiammu tam yatun ta tumunug nga kapitulo.