1. Anni nga popular nga pakimallo i gigiammuattam?

 MINILLION nga totolay i makannammu ta popular nga pakimallo nga Amami, onu Pakimallo na Yafu. Inusa ni Jesus yaw nga pakimallo tapenu tudduan i disipulosna nu kunnasi makimallo. Anni i nipakimallona? Ngatta importante nittam yaw nga pakimallo?

2. Anni i tallu nga importante nga gannug nga nituddu ni Jesus nga ipakimallo tam?

² Kinagi ni Jesus: “Kunnoye gafu i akkimallo nu: ‘Ama mi nga egga ta langi, marayaw [onu, mapakasanto] paray i ngagam-mu; maparattal paray i Pammagurem. Makua i urem toye ta davvun ta kunne ta langi.’” (Bibbigan i Mateo 6:9-13.) Ngatta nituddu ni Jesus nga ipakimallo tam yatun nga tallu nga gannug?​—Innan i Endnote 20.

3. Anni i mawag tam mammuan meyannung ta Pappatulan na Dios?

³ Nagigiammu tam nga Jehova i ngagan na Dios. Nammuattam gapa i uray na Dios para ta totolay anna ta davvun. Ngem anni i kayà kagian ni Jesus ta pakkagina: “Maparattal paray i Pammagurem”? Gigiammuattam ngana nu anni i Pappatulan [onu, Pammaguray] na Dios, nu anni i kuan natun, anna nu kunnasi natun mapakasanto i ngagan na Dios.

4. Anni i Pappatulan na Dios, anna sinni i Patul natun?

⁴ Nangipataddag si Jehova tu gobiernu ta langi anna si Jesus i pinilina nga Patul. Yaw nga gobiernu ay tukuyan na Biblia nga Pappatulan na Dios. Si Jesus i “Patul na ngamin nga patul, anna Yafu na ngamin nga yafu.” (1 Timoteo 6:15) Mas makasta i makua ni Jesus anne ta  maski sinni nga mammaguray nga tolay, anna mas makapangngua yayya maski nu mapattaradday i ngamin nga mammaguray.

5. Sitaw i dian na gobiernu na Dios? Anni i pammagurayan natun?

⁵ Kuarenta aggaw kabalin nga napaginnolay si Jesus, nanoli yayya ta langi. Nappasa i tiempo, pinabbalin yayya ni Jehova tu Patul na Pappatulan. (Kingngua 2:33) Egga ta langi i gobiernu na Dios anna pammagurayan natun noka i interu davvun. (Nepakannammu 11:15) Yari tu tukuyan na Biblia i Pappatulan na Dios nga ‘Pammaguray ta langi.’​—2 Timoteo 4:18.

6, 7. Ngatta mas mapia si Jesus anne ta maski sinni nga patul nga tolay?

⁶ Kagian na Biblia nga si Jesus i kapianan ta maski sinni nga patul nga tolay megafu ta “yaya laman i ari nga matay.” (1 Timoteo 6:16) Matay i ngamin nga mammaguray nga totolay, ngem ari vuluvuga matay si Jesus. Mannanayun noka i ngamin nga mapia nga kuan ni Jesus para nittam.

⁷ Neprofesiya ta Biblia nga patas anna minangngikabbi noka nga Patul si Jesus: “Mattalupaddian noka nisa i espiritu ni Jehova, i espiritu na sirib anna na pakalippawa, i espiritu na panabarang anna na kinasikan, i espiritu na pakannammu anna na paganassing kani Jehova. Magayayya yayya noka ta paganassing kani Jehova. Arianna noka ibase i panentensiana ta masinganna, onu i pangivuyana [onu, panabaranna] ta maginnana. Patas noka i panentensiana ta pobre.” (Isaias 11:2-4) Kayà mu kari i kunnatun nga patul?

8. Ngatta ammu tam nga egga noka i kakavvulu ni Jesus nga mammaguray?

⁸ Pilippiga laman nga tolay i pinili na Dios nga makipammaguray kani Jesus ta gobiernu ta langi. Angngariganna,  kinagi ni apostol Pablo kani Timoteo: ‘Nu magattattam ittam ta ziga-riga, makipammaguray ittam gapa noka sa.’ (2 Timoteo 2:12) Piga i patul nga makipammaguray kani Jesus?

9. Piga i kakavvulu ni Jesus nga mammaguray? Kanni nga nigafu na Dios nga pilian ira?

⁹ Kagitta na nagigiammu tam ta Kapitulo 7, neddan si apostol Juan tu sirmata nga nasinganna si Jesus bilang Patul ta langi kavulu i 144,000 paga nga patul. Sinni danatun nga 144,000? Niyesplika ni Juan nga ‘nemarka ta frenteda i ngagan na Kordero [si Jesus] anna i ngagan na Yama na.’ Kinagina paga: “Mevulu-vulu ira sangoye ta Kordero ta maski sitaw nga angayan na. Ta ngamin nga sinolay, ira i natavvu.” (Bibbigan i Nepakannammu 14:1, 4.) Matalo nga Cristiano danaw nga 144,000 nga pinili na Dios nga ‘mammaguray ta tanga-ravvunan’ kavulu si Jesus. Sonu matay ira, mapaginnolay ira nga umay ta langi. (Nepakannammu 5:10) Ta tiempo na apostoles, namegafu ngana nga nappili si Jehova tu matalo ira nga Cristiano nga mabbalin tu parte natun nga grupo na 144,000 nga patul.

10. Ngatta makagi tam nga kuruga ayatan ittam ni Jehova ta pappilina kani Jesus anna ta 144,000 nga mammaguray ta totolay?

¹⁰ Kuruga ayatan ittam ni Jehova yari tu nappili yayya tu totolay nga makipammaguray kavulu si Jesus. Makasta noka i pammaguray ni Jesus megafu ta malippawana ittam. Naekspiriensana i nabbalin tu tolay anna nazziga-riga. Kinagi ni Pablo nga si Jesus ay “ari tu tadday nga ari nga makatageno ta kalaray na kata-katolay tam” megafu ta “nappasan na ngamin i gannug na tentasion ta kunne nittam.” (Hebreo 4:15; 5:8) Naekspiriensa gapa na 144,000 i nabbalin tu tolay. Nagattam gapa ira ta kina-imperfekto anna taka-taki. Yari tu makasiguradu  ittam nga malippawa noka ni Jesus anna na 144,000 i mataga-tageno tam kunne na gapa i problema ira nga ara-arubangattam.

11. Ngatta sinudduan ni Jesus i disipulosna nga ipakimalloda nga makua i uray na Dios ta langi?

¹¹ Sinudduan ni Jesus i disipulosna nga ipakimalloda nga makua i uray na Dios ta langi. Ngatta? Nagigiammu tam ta Kapitulo 3 nga narrebelde si Satanas nga Diablo kani Jehova. Kabalin na rebelyon ni Satanas, nipamavulun ni Jehova nga maddian yayya anna i ari matalo nga anghel ira, onu demonio ira, tu piga nga tiempo ta langi. Yatutta ari tu ngamin nga egga ta langi ay magaggangngua ta uray na Dios. Ta Kapitulo 10, mas magigiammu tam i meyannung kani Satanas anna ta demoniona ira.

12. Anni i dua nga importante nga mesimmu segun ta Nepakannammu 12:10?

¹² Niyesplika na Biblia nga sonu mappatul si Jesus ta Pappatulan na Dios, makiggerra yayya kani Satanas. (Bibbigan i Nepakannammu 12:7-10.) Kagian na versikulo 10 i dua nga importante nga mesimmu. Mamegafu nga mammaguray i Pappatulan na Dios anna si Jesu-Cristo i Patul. Kabalinna, mapapanaw si Satanas ta langi anna metabbo ta davvun. Magigiammu tam ta tumunug nga nesimmu ngana danaw.

13. Anni i nesimmu ta langi turi ta napapanaw tatun si Satanas?

¹³ Kagian na Biblia i ayayya na matalo ira nga anghel turi ta napapanaw ta langi si Satanas tuange ta demoniona ira. Mabibbig tam: “Yatun tu magayaya kamu ngana, sikamu ngamin nga egga tatun ta langi!” (Nepakannammu 12:12) Permanente ngana i imammo anna pattaradday ta langi megafu ta ngamin ngana nga egga tari ay magaggangngua ta uray na Dios.

14. Anni i nesimmu ta davvun turi ta napapanaw ta langi si Satanas?

 ¹⁴ Ngem nerumu-ruma i pattolay taw ta davvun. Marake i mesissimmu ta totolay megafu ‘ta minulug i Demonio’ nga “nepallo i batù na, megafu ta ammu na tu pigo ngana laman i nabattang sa nga tiempo!” (Nepakannammu 12:12) Grabe i poray ni Satanas. Napapanaw ngana yayya ta langi, anna ammuna nga aranni ngana yayya nga madaral. Yari tu kuanna i ngamin nga mawayyana tapenu mangirattal tu gulu, taki, anna ziga-riga ta tangaravvunan.

15. Anni i uray na Dios ta davvun?

¹⁵ Ngem ari nanguli i uray na Dios ta davvun. Kayàna lagapa nga mattolay tu mannanayun i perfekto nga totolay ta paraiso nga davvun. (Salmo 37:29) Kunnasi gafu nga makua yaw na Pappatulan na Dios?

16, 17. Anni i ituddu nittam na Daniel 2:44 meyannung ta Pappatulan na Dios?

¹⁶ Neprofesiya ta Daniel 2:44: “Ta kaggawan danuri patul ira, mamataddag noka i Dios na langi tu tadday nga pappatulan nga ari vuluvuga madaral noka. Yaw nga pappatulan ay ari noka meyawa ta maski sinni nga tanakuan nga totolay. Daralan anna pangultimuan noka natun ngamin danaw nga pappatulan, ay yaw laman i mattalupaddian adde noka.” Anni i ituddu naw nga profesiya nittam meyannung ta Pappatulan na Dios?

¹⁷ Ollu, ituddu natun nittam nga mamegafu mammaguray i Pappatulan na Dios “ta kaggawan danuri patul ira.” Kayàna kagian, egga paga i gobiernu ira ta davvun sonu mammaguray i Pappatulan. Mekadua, mannanayun i Pappatulan na Dios anna ari vuluvuga nga talianan na tanakuan nga gobiernu. Mekatallu, maggerra noka i Pappatulan na Dios anna i gobiernu ira naw nga mundo. Mangaffu i Pappatulan na Dios anna yatun laman noka i  gobiernu nga mammaguray ta tangaravvunan. Mapeggan ngana noka tu kapianan nga gobiernu i totolay.

18. Kunnasi nga talianan na Pappatulan na Dios i pammaguray ta davvun?

¹⁸ Kunnasi nga talianan na Pappatulan na Dios i pammaguray ta davvun? Nige na ultimu nga gerra, nga magalan tu Armagedon, influwensian na demonio ira i “ngamin nga patul ira ta tanga-ravvunan tapenu pattaraddayad-da ira nga makiggerra noka nu duttal i dakal nga Aggaw na Dios nga Makapangngua sa Ngamin.” Wan, makiggerra noka i gobiernu na totolay kontra ta Pappatulan na Dios.​—Nepakannammu 16:14, 16; innan i Endnote 10.

19, 20. Ngatta mawag tam i Pappatulan na Dios nga mammaguray ta interu davvun?

¹⁹ Ngatta mawag tam i Pappatulan na Dios? Egga i tallu nga rason. Ollu, minakkaliwa ittam, yayya nga mattaki anna matay ittam. Ngem kagian na Biblia nga sonu mammaguray i Pappatulan na Dios, mattolay ittam noka tu mannanayun. Ta kakuruganna, kagian na Juan 3:16: “Kuruga iddukan na Dios i mundo. Yatun tu zinog na i tattadday nga Ana na, tapenu ngamin i mangurug sa ay ari nga matay nu ari matolay ira adde ta ngangangay.”

²⁰ I mekadua nga rason nu ngatta mawag tam i Pappatulan na Dios ay megafu ta napalevutan ittam na marake nga totolay. Aru i malladdug, minangngilloku, anna imoral. Awan tu makua tam tapenu fugaddan ira, ngem daralan ira noka na Dios. Danuri totolay nga tulu-tuloy nga mangngua tu marake ira nga gannug ay madaral noka ta Armagedon. (Bibbigan i Salmo 37:10.) I mekatallu nga rason nu ngatta mawag tam i Pappatulan na Dios ay megafu ta ari masolba na gobiernu na totolay i problema ira ta mundo, kurakut ira, anna awan tu alloda. Ari ira interesadu nga uffunan i totolay nga tuttulan  i Dios. Kagian na Biblia nga “dinominan na tolay i kasittolena ta pakaperwisiuwanna.”​—Eclesiastes 8:9.

21. Kunnasi siguraduan na Pappatulan nga matuppal noka i uray na Dios ta davvun?

²¹ Kabalin na Armagedon, siguraduan noka na Pappatulan na Dios nga matuppal i uray na Dios ta davvun. Angngariganna, metabbo si Satanas tuange ta demoniona ira ta avvu nga ari matuku-tukug i karalamna. (Nepakannammu 20:1-3) Awan ngana noka tu mattaki anna matay. Megafu ta tavvu, makapattolay noka tu mannanayun ta Paraiso i ngamin nga matalo. (Nepakannammu 22:1-3) Mapakasanto noka i ngagan na Dios megafu ta Pappatulan. Anni i kayà kagian natun? Mapakarenuan noka i reputasion na Dios. Dayawan noka na ngamin nga totolay i ngagan ni Jehova.​—Innan i Endnote 21.

22. Kunnasi tam nammuan nga ari insigida nabbalin tu Patul si Jesus turi ta keggana ta davvun onu kabalinna nga napaginnolay?

²² Tagga ta nituddu ni Jesus ta disipulosna nga ipakimalloda nga “maparattal paray i Pammagurem,” manawag nga ipasingan natun nga duttal pagalaman i Pappatulan na Dios. Ipataddag labbi ni Jehova i gobiernuna anna pabbalinanna nga Patul si Jesus. Nabbalin kari insigida  tu Patul si Jesus turi ta nanoli yayya ta langi? Ari, mawagna paga i maginnag. Kabalin nga napaginnolay si Jesus, manawag nga kinagi yaw da Pedro anni Pablo turi ta neyaplikada kani Jesus i profesiya ta Salmo 110:1. Ta profesiya kinagi ni Jehova: “Magitubang ka ta ziwanak-ku adde tu i kontram ira ay mapatulu ku.” (Kingngua 2:32-35; Hebreo 10:12, 13) Kunnasi kabayag i mawag tu innaggan ni Jesus nige yayya pabbalinan ni Jehova tu Patul?

23. (a) Kanni namegafu nammaguray si Jesus bilang Patul na gobiernu na Dios? (b) Anni i magigiammu tam ta tumunug nga kapitulo?

²³ Aru nga dagun nige na 1914, nalippawa ngana na tadday nga grupo na sinsero nga Cristiano nga importante yatun nga dagun ta profesiya na Biblia. Napakurug na nesimmu ira ta mundo namegafu ta 1914 nga fustu ira. Namegafu nga nammaguray bilang Patul si Jesus tatun nga dagun. (Salmo 110:2) Insigida kabalin natun, netabbo ta davvun si Satanas, anna ‘pigo ngana laman i nabattang sa nga tiempona!’ (Nepakannammu 12:12) Ta tumunug nga kapitulo, masingattam paga i aru nga ebidensia nga mattolay ittam ngana tatun nga tiempo. Magigiammu tam paga nga aranni ngana nga ituppal na Pappatulan na Dios i uray na Dios ta davvun.​—Innan i Endnote 22.