1, 2. (a) Kunnasi nga mabbalin tu mabalor nikaw i regalu? (b) Ngatta i tavvu i kakastan nga regalu na Dios?

 ANNI i kapianan nga regalu nga nalawà mu? Ari kawagan nga mangina i regalu tapenu tagibalorammu. Nu mapagayayya naka na regalu onu talaga kawagammu yatun, magga appresiammu yatun.

² Ta ngamin nga niregalu na Dios nittam, egga i tadday nga mas mawag tam anne ta maski anni. Yaw i kakastan nga regalu na Dios ta totolay. Taw nga kapitulo, magigiammu tam nga zinog ni Jehova i Anana, si Jesu-Cristo, tapenu makapattolay ittam tu mannanayun. (Bibbigan i Mateo 20:28.) Gukaban na paddog ni Jehova kani Jesus ta davvun bilang tavvu, napakurugna nga talaga iddeddukanna ittam.

3. Ngatta matay i totolay?

³ I tavvu i usan ni Jehova tapenu mapalubbangan i totolay ta liwa anna patay. (Efeso 1:7) Tapenu malippawa nu ngatta kawagan i tavvu, mawag tu ammuattam i nesimmu ta hardin na Eden rinivu dagun i nappasa. Nakaliwa i ollu nga magana tam, da Adan anni Eva. Megafu ta nakaliwa ira, natay ira. Matay ittam gapa megafu ta namana tam i liwa tannira.​—Innan i Endnote 9.

4. Sinni si Adan, anna anni i neyawa nisa?

⁴ Turi ta pinaratu ni Jehova i ollu nga lalaki nga si Adan, makakkasta i niyawana nisa. Niddanna si Adan tu perfekto nga inango. Perfekto i nono anna baggina.  Arianna vuluvuga mattaki, mallakay, anna matay. Megafu ta pinaratu ni Jehova si Adan, gittana yama ni Adan si Jehova. (Lucas 3:38) Kanayun nga nakiyuvovug si Jehova nisa. Niyesplika tu mapia na Dios kani Adan i ekspektanna nisa anna niddanna yayya tu makapagayayya nga trabahu.​—Genesis 1:28-30; 2:16, 17.

5. Anni i kayà kagian na Biblia nga naparatu si Adan “ta imahe na Dios”?

⁵ Naparatu si Adan “ta imahe na Dios.” (Genesis 1:27) Niddan yayya ni Jehova tu kualidad ira nga egga Sa, gitta na aya, sirib, hustisia, anna pakapangngua. Niddanna si Adan tu lallaguray nga mappili. Ari tu robot si Adan. Pinaratu yayya na Dios nga makapappili nu anni i fustu onu mali. Nu pinili ni Adan nga tuttulan i Dios, mannanayun nakuan i pattolena ta Paraiso.

6. Turi ta ari sinuttul ni Adan i Dios, anni i nawawan sa? Kunnasi ittam nafektan natun?

⁶ Turi ta ari sinuttul ni Adan i Dios anna nasentensian tu patay, daka-dakal i nipagana. Nawawanna i espesial nga pakikkofunna kani Jehova, i perfekto nga pattolena, anna i Paraiso nga paddiananna. (Genesis 3:17-19) Pinili da Adan anni Eva nga ari ginnan i Dios, yayya nga awan tu iddanamada. Megafu ta kingngua ni Adan, “egga ta utun na davvun i pattagaruli, ay i katagarulian na i nangirattal ta patay.” Gafu tatun, “nawwara i patay ta ngamin nga totolay megafu ta nattagaruli ngamin i totolay.” (Roma 5:12) Turi ta nakaliwa si Adan, ‘nilakuna’ i baggina tuange nittam ta pakka-aripan ta liwa anna patay. (Roma 7:14, NW ) Egga paga kari i iddanama tam? Wan, egga.

7, 8. Anni i tavvu?

⁷ Anni i tavvu? Egga i dua nga kebalinan na tavvu.  Ollu, i tavvu ay balor nga mepaga tapenu matavvu i tadday nga tolay onu matubus i tadday nga gannug. Mekadua, i tavvu ay balor nga panakkag onu danios ta nadaral.

⁸ Awan tu tolay nga makeyawa tu danios ta dakal nga perwisiu nga kingngua ni Adan turi ta nakaliwa yayya anna nirattalna i patay nittam. Ngem egga i kingngua ni Jehova tapenu mapaliag ittam ta liwa anna patay. Gigiammuattam nu kunnasi makua na tavvu yatun anna i benefisio tam tatun.

9. Anni nga tavvu i mawag nga mepaga?

⁹ Awan tu maski sinni nittam i makapanavvu ta perfekto nga inango nga nawawan ni Adan. Ngatta? Megafu ta imperfekto ittam ngamin. (Salmo 49:7, 8) Mawag nga perfekto gabbalaman nga inango na tolay i mepaga nga tavvu. Yayya nga nagalan yatun nga “eksakto nga panavvu.” (1 Timoteo 2:6, NW ) Parehu nakuan i balorna ta inango nga nawawan ni Adan.

10. Kunnasi neyawa ni Jehova i tavvu?

¹⁰ Kunnasi nga niyawa ni Jehova i tavvu? Zinog ni Jehova ta davvun i iddeddukanna nga Ana. Yaw nga Anana, si Jesus, i pinaka-ollu nga pinaratuna. (1 Juan 4:9, 10) Sigga-paran si Jesus nga panawan i Yamana anna i posisionna ta langi. (Filipos 2:7) Niyali ni Jehova si Jesus ta davvun nga naggafu ta langi, anna neyana si Jesus tu perfekto nga tolay, awan tu liwana.​—Lucas 1:35.

11. Kunnasi matavvu na tadday nga tolay i ngamin?

¹¹ Nawawan na ollu nga lalaki, si Adan, i perfekto nga pattolay para ta ngamin nga totolay turi ta arianna  sinuttul si Jehova. Egga paga kari i perfekto nga tolay nga makalsa tu patay ta ngamin nga gaka ni Adan? Wan. (Bibbigan i Roma 5:19.) Si Jesus, nga ari vuluvuga nakaliwa ay niyawana i perfekto nga inangona bilang tavvu. (1 Corinto 15:45) Meyusa i perfekto nga inangona tapenu alsan i patay ta ngamin nga gaka ni Adan.​—1 Corinto 15:21, 22.

12. Ngatta mawag tu grabe i kaziga-riga ni Jesus?

¹² Mabibbig ta Biblia nu kunnasi naziga-riga si Jesus nigena natay. Grabe i nikalatigona, nepato ta kayu, anna inattammanna i sisinu anna mataki nga kapatay. (Juan 19:1, 16-18, 30) Ngatta mawag tu grabe i kaziga-riga ni Jesus? Megafu ta kinagi ni Satanas nga awan tu tolay nga mattalupaddian nga matalo ta Dios nu grabe i kapuruebana. Napakurug ni Jesus nga makapammakatalo i perfekto nga tolay ta Dios maski ta grabe nga kaziga-riga. Nonopan ngana laman i ayayya ni Jehova kani Jesus!​—Proverbio 27:11; innan i Endnote 15.

13. Kunnasi nga nepaga i tavvu?

¹³ Kunnasi nga nepaga i tavvu? Niyawa ni Jesus i balor na inangona ta Yamana. Turi ta Nisan 14, dagun 33 C.E. ta kalenda na Judio, nipamavulun ni Jehova nga patayan si Jesus na kalabanna ira. (Hebreo 10:10) Tallu aggaw kabalin natun, pinaginnolay ni Jehova si Jesus, ari tu tolay, nu ari, bilang espiritu. Tapus, ta panoli ni Jesus ta Yamana ta langi, nipresentana i balor na perfekto nga inangona kani Jehova bilang tavvu. (Hebreo 9:24) Sangawe ta nepaga ngana i tavvu, egga ngana i tiansa tam nga mapalubbangan ta liwa anna patay.​—Bibbigan i Roma 3:23, 24.

14, 15. Anni i kuattam tapenu mapakoma i liwi-liwa tam?

¹⁴ Nabbenefisio ittam ngana ta kakastan nga regalu na Dios. Innattam nu kunnasi ittam mabbenefisio ta maddaggun anna ta mappange.

¹⁵ Mapakoma i liwi-liwa tam. Mariga nga kuan i fustu ta ngamin nga tiempo. Makkamali ittam, anna nu mittan makakagi anna makakua ittam tu ari makasta. (Colosas 1:13, 14) Kunnasi ittam mapakoma? Mawag tu napafutuan i pabbabawi tam ta nakaliwatattam anna sigga-pakalinno nga makkiddaw tu pamakoma kani Jehova. Kabalinna, makapattalo ittam nga mapakoma i liwi-liwa tam.​—1 Juan 1:8, 9.

16. Anni nakuan i kuattam tapenu marenu i konsensia tam?

¹⁶ Mapeggan ittam tu marenu nga konsensia. Nu makonsensia ittam ta kingngua tam, makatageno ittam tu pasiran, kawan tu iddanama anna serbi. Ngem ari nakuan makkafi i nono tam. Nu makkiddaw ittam tu pamakoma kani Jehova, makasiguradu ittam nga ginnan anna pakomanna ittam. (Hebreo 9:13, 14) Kayà ni Jehova nga ikagi tam nisa i maski anni nga problema anna pakkafiattam ira. (Hebreo 4:14-16) Nu kunnatun, marenu i konsensia tam ta arubang na Dios.

17. Anni ira nga bendision i posible megafu ta natay si Jesus para nittam?

¹⁷ Egga i iddanama tam nga mattolay tu mannanayun. “I balo na tagaruli ay patay, ngem i regalu nga iyawa na Dios ay mannanayun nga inango gukaban ni Jesu-Cristo nga Yafu tam.” (Roma 6:23, NW ) Megafu ta natay si Jesus para nittam, makapattolay ittam noka tu mannanayun anna mapeggan ittam tu perfekto nga gawa-gawayyan. (Nepakannammu 21:3, 4)  Ngem anni i mawag tu kuattam tapenu malawà yatun ira nga bendision?

18. Kunnasi tam masiguradu nga ayatan ittam ni Jehova?

¹⁸ Nonopan i nikatukkal na futum turi ta egga i narregalu nikaw tu makakkasta. I tavvu i kakastan nga regalu ta ngamin, anna dakal nakuan i appabalo tam kani Jehova megafu tatun. Kagian na Juan 3:16 nittam: “Kuruga iddukan na Dios i mundo. Yatun tu zinog na i tattadday nga Ana na.” Wan, dakal i aya ni Jehova nittam yari tu niyawana i iddeddukanna nga Ana, si Jesus. Ammu tam nga ayatan gapa ittam ni Jesus megafu ta sigga-anugu yayya nga natay para nittam. (Juan 15:13) I tavvu nakuan i mangumbinsi nikaw nga talaga ayatan naka ni Jehova anna ni Jesus.​—Galacia 2:20.

19, 20. (a) Kunnasi ka mabbalin tu kofun ni Jehova? (b) Kunnasim mepasingan nga alawatammu i sakrifisio nga tavvu ni Jesus?

¹⁹ Sangawe ta nagigiammum ngana i dakal nga aya na Dios nikaw, kunnasi ka mabbalin tu kofunna? Mariga ayatan i tadday nga ariammu ammammu. Kagian na Juan 17:3 nga posible nga kannammuammu si Jehova. Durante nga kukukuammu yatun, mas maponag i aya mu nisa, mapagayayya mu yayya, anna mabbalikka tu kofunna. Yari tu tulu-tuloy nga ammuan si Jehova gukaban na paggigiammu tu Biblia.​—1 Juan 5:3.

²⁰ Appresian i sakrifisio nga tavvu ni Jesus. Kagian na Biblia nga “i sinni laman nga mangurug ta Ana na Dios ay egga sa i inango nga adde ta ngangangay.” (Juan 3:36) Kunnasi tam mangurug? Nu kuattam i nituddu ni Jesus. (Juan 13:15) Kurang i basta laman pakkagi nga mangurug ittam kani Jesus. Tapenu appresian i tavvu,  mawag tu egga paga i kuattam. Mabibbig tam ta Santiago 2:26: “Natay i angngurug nu awan tu annangngua.”

21, 22. (a) Ngatta magatende ittam nakuan tu Memorial na patay ni Cristo? (b) Anni i gigiammuattam ta Kapitulo 6 anna 7?

²¹ Magatende ta Memorial na patay ni Cristo. Ta gabi nige natay si Jesus, nitudduna nga daddammattam i patena. Kuattam yaw kada dagun, anna magalan yaw tu Memorial onu “i Pamugag na Yafu.” (1 Corinto 11:20; Mateo 26:26-28) Kayà ni Jesus nga daddammattam nga nitavvuna i perfekto nga inangona para nittam. Kinagina: “Kuan nu yaw tu panaddamman nu niakan.” (Bibbigan i Lucas 22:19.) Nu magatende ka tu Memorial, ipasingammu nga neraddammammu i tavvu anna i dakal nga aya ni Jehova anna ni Jesus nittam.​—Innan i Endnote 16.

²² I tavvu i kakastan nga regalu nga malawà tam. (2 Corinto 9:14, 15) Mabbenefisio paga tatun nga nabalor nga regalu maski i minillion nga natay ngana. Ipakanawag na Kapitulo 6 anna 7 nu kunnasi nga posible yatun.