1, 2. Sinni i karuan nga kofun ni Jehova?

 SINNI i kayà mu nga kofun? Siempre, yuri i magustuammu. Yuri i kasundu mu anna kasundu naka gapa. Yuri i masippo nga tolay anna kayà mu i ugalina ira.

² Egga i karuan nga tolay nga pinili ni Jehova nga Dios bilang kofunna. Angngariganna, si Abraham ay tadday ta kokkofun ni Jehova. (Isaias 41:8; Santiago 2:23) Nagustuan gapa ni Jehova si David. Kinagina nga si David ay ‘tolay nga meddu ta futuna.’ (Kingngua 13:22) Si profeta Daniel gapa ay “nabala-balor” kani Jehova.​—Daniel 9:23.

3. Ngatta nabbalin tu kofun ni Jehova da Abraham, David, anna Daniel?

³ Ngatta nabbalin tu kofun ni Jehova da Abraham, David, anna Daniel? Kinagi ni Jehova kani Abraham: “Nagginna ka ta ngaral ku.” (Genesis 22:18) Si Jehova ay kofun danuri mapakalinno nga mattuppal nisa. Awayyana nga mabbalin yayya tu kofun maski na interu nga nasion. Niyesplika ni Jehova ta nasion na Israel: “Mattuppal kamu niakan, ay mabbalin ngà tu Diosnu, anna mabbalikkamu tu ilì.” (Jeremias 7:23) Yayya nga mawag gapa tu mattuppal ka kani Jehova nu kayà mu nga mabbalin yayya tu kofummu.

4, 5. Kunnasi nga protektan ni Jehova i kokkofunna?

⁴ Kagian na Biblia nga magala-aleg si Jehova tu tiansa “tapenu ipasingan i sikanna para ta buu i futuda nga masserbi sa.” (2 Cronicas 16:9) Ta Salmo 32:8, nipromesa ni Jehova ta kokkofunna: “Ituddù nikaw i mepangngo nga lakaram-mu, tudduan anna tabarangngat-taka.”

 ⁵ Egga i makapangngua nga kalaban nga kayàna ittam fugaddan ta pabbalittam tu kofun ni Jehova. Ngem kayà na Dios nga protektan ittam. (Bibbigan i Salmo 55:22.) Bilang kokkofun ni Jehova, passerbiattam yayya ta interu futu tam. Mammakatalo tam nisa maski ta mariga ira nga situasion. Makkomfiansa gapa ittam kagitta na salmista. Niturana meyannung kani Jehova: “Ammù tu kanayun nga kavulu ku i YAFU; aranni yaya, ay awan tu pakavurungak-ku.” (Salmo 16:8; 63:8) Kunnasi ittam fugaddan ni Satanas nga mabbalin tu kofun na Dios?

6. Anni i akusasion ni Satanas ta totolay?

⁶ Ta Kapitulo 11 nagigiammu tam nga kinuestion ni Satanas si Jehova anna inakusanna nga laddug yayya anna ari yayya patas gafu ta arianna nipamavulun kada Adan anni Eva nga maddesision lagapa nu anni i mapia anna nu anni i marake. Ituttuddu nittam na libru na Biblia nga Job nga aka-akusan gapa ni Satanas danuri maya nga mabbalin tu kofun na Dios. Palawanan ni Satanas nga massesserbi laman ira ta Dios megafu ta bentaha nga malada Nisa, ari tu gafu ta ayatadda Yayya. Kakkagian paga ni Satanas nga meyarayyuna ta Dios i maski sinni. Ammuattam nu anni i magigiammu tam kani Job anna nu kunnasi yayya prinotektan ni Jehova.

7, 8. (a) Anni i nangibilangan ni Jehova kani Job? (b) Anni i kinagi ni Satanas meyannung kani Job?

⁷ Sinni si Job? Masippo yayya nga tolay nga nattolay ma-3,600 nga dagun i nappasa. Kinagi ni Jehova nga tatun nga tiempo, awan tu megitta kani Job ta davvun. Dakal i respeto ni Job ta Dios, anna ikalussona i marake. (Job 1:8) Wan, si Job ay kurug nga kofun ni Jehova.

⁸ Inakusan ni Satanas si Job nga massesserbi yayya ta Dios gafu laman ta makasarili nga motibo. Kinagi ni  Satanas kani Jehova: “Ari kari nga iyeyegu mu yayya anna i tangabbalayanna anna i ngamin nga pakkukuana? Binendisionammu i trabahu na limana, anna minaru i aya-ayamna ta davvun. Ngem, tapenu moli gapa, sonnatammu i limam anna wawwanammu i ngamin nga egga sa, ay siguradu nga ibariaw naka ta mismu nga arubammu.”​—Job 1:10, 11.

9. Anni i nipamavulun ni Jehova nga kuan ni Satanas?

⁹ Inakusan ni Satanas si Job nga massesserbi kanu yayya kani Jehova gafu ta malana kani Jehova. Kakkagian paga ni Satanas nga mawayyana nga fugaddan si Job ta passerbi kani Jehova. Ari minanugu si Jehova kani Satanas, ngem nipamavulunna kani Satanas nga purueban nu kurug nga kofun ni Job si Jehova gafu ta ayana Nisa.

10. Kunnasi nga pinarigatan ni Satanas si Job? Anni i reaksion ni Job?

¹⁰ Ollu, gafu kani Satanas, nakoko onu nadaral i ngamin nga ayam ni Job. Kabalinna pinatay ni Satanas i magaru ta aripan ni Job. Nawawan ni Job i ngamin. Ta ultimu nga pangatake ni Satanas, pinatena i mafulu nga ána ni Job gukaban na bagiu. Ngem nattalupaddian nga matalo kani Jehova si Job. “Ta ngamin taw, ari nga nakaliwa si Job, ni tu nipaliwana ta Dios i anni laman nga marake.”​—Job 1:12-19, 22.

11. (a) Anni paga i kingngua ni Satanas kani Job? (b) Anni i reaksion ni Job?

¹¹ Ari nga nagimmang si Satanas. Kinuestionna i Dios gukaban na pakkagina: “Pattakitammu i tulang anna pattagna, ay siguradu nga ibariaw naka ta mismu nga arubammu.” Yayya nga pinavvutali ni Satanas si Job, nga sumussussu i takina. (Job 2:5, 7) Nammakatalo mangana si Job kani Jehova. Kinagina: “Adde sonu matay ngà, ariakku wawwanan [onu, daralan] i integridad ku!”​—Job 27:5.

12. Kunnasi napakurug ni Job nga laddug si Satanas?

 ¹² Awan vuluvuga tu ammu ni Job meyannung ta akusasion ira ni Satanas, ni tu ammuna nu ngatta sobra i pazziga-rigana. Abbona nga si Jehova i naggafuan na problemana ira. (Job 6:4; 16:11-14) Ngem maski kunna, nattalupaddian nga matalo si Job kani Jehova. Napakurug gafu ngana nga ari tu makasarili si Job. Ayatan ni Job i Dios, yatutta kofun yayya na Dios. Kinaladdug i ngamin nga akusasion ni Satanas!

13. Anni i resulta na kinamatalo ni Job?

¹³ Maski nu ari nga ammu ni Job i mesissimmu ta langi, matalo yayya ta Dios anna pinakurugna nga laddug si Satanas. Binendisionan ni Jehova si Job gafu ta matalo yayya nga kofun.​—Job 42:12-17.

14, 15. Anni i akusasion ni Satanas ta ngamin nga totolay?

¹⁴ Makagigiammu ka tu importante ira nga leksion ta nesimmu kani Job. Sangawe, aka-akusan ittam ni Satanas nga masserbi ittam kani Jehova megafu laman ta bentaha ira nga mala tam Nisa. Kunnaw i kakkagian ni Satanas ta Job 2:4: “Iyawa na tadday nga tolay i ngamin nga egga sa para ta inangona.” Ari laman tu si Job gafu i aka-akusan ni Satanas nga makasarili, nu ari, i ngamin nga totolay. Ginatu nga dagun kabalin nga natay si Job, iinsultuan lagapa ni Satanas si Jehova anna aka-akusanna danuri massesserbi nisa. Magigiammu tam yaw ta Proverbio 27:11, nu sitaw mabibbig tam i kiddaw ni Jehova: “Mammasirib ka, ana ku, anna pagayayyatammu i futù, tapenu matabbag ku yuri i manutturia [onu, mangi-insulto] niakan.”

¹⁵ Puedem pilian nga tuttulan si Jehova anna mabbalin tu matalo nga kofunna, tapenu mapakurug nga laddug si Satanas. Maski nu mawag nga dakal i uliammu ta pattolem tapenu mabbalin nga kofun na Dios, yatun i  kapianan nga desision nga makuam! Ngem mawag tu desididu ka nga kuan yatun. Kakkagian ni Satanas nga ari ka mammakatalo ta Dios nu egga problemam. Ilologona ittam tapenu likurattam i Dios. Kunnasi?

16. (a) Anni ira i metodo ni Satanas tapenu fugaddan i totolay ta passerbi kani Jehova? (b) Anni i awayya nga kuan na Diablo tapenu pagimmangan naka ta passerbi kani Jehova?

¹⁶ Usu-usan ni Satanas i nadduruma nga metodo tapenu mafugaddanna ittam nga makikkofun ta Dios. Umatake yayya “kagitta na mangngana-nganangngar nga leon nga magaleg ta kanan na.” (1 Pedro 5:8) Ariammu gafu makaddag nu fugaddan naka na kokkofummu, kafamiliam, onu i tanakuan paga ta paggigiammum tu Biblia anna ta pangngua tu fustu. Gittana matageno mu nga inatake naka ni Satanas. * (Juan 15:19, 20) Pabbalinan gapa ni Satanas i baggina nga “kagitta na anghel na nawag!” Yari tu awayyana nga ilogona ittam tapenu ariattam tuttulan si Jehova. (2 Corinto 11:14) Tadday paga nga metodo ni Satanas tapenu pagimmanganna ittam nga masserbi kani Jehova ay i pangipatagenona nittam nga ari ittam kualipikadu nga masserbi ta Dios.​—Proverbio 24:10.

17. Ngatta mattuppal tam kani Jehova?

¹⁷ Nu mattuppal tam kani Jehova, mapakurug tam nga laddug si Satanas. Anni i makoffun nittam tapenu mabbalin tu minattuppal? Kagian na Biblia: “Mawag tu ayatannu si Jehova nga Diosnu ta interu futunu  anna ta interu kararuanu anna ta interu sikannu.” (Deuteronomio 6:5) Mattuppal tam kani Jehova megafu ta ayatattam yayya. Durante nga dumakal i aya tam kani Jehova, kakayà tam nga kuan i ngamin nga ikiddona nga kuattam. Nitura ni apostol Juan: “Ta nu ayatat-tam i Dios, parulattat-tam gapa i bili-bilin na, ay ari gammabba tu mariga nga tuttulan danaw.”​—1 Juan 5:3.

18, 19. (a) Anni ira i marake nga gannug nga kakkagian nittam ni Jehova nga ariattam kuan? (b) Ngatta makasiguradu tam nga ari ikiddaw ni Jehova i tadday nga gannug nga ariattam makua?

¹⁸ Ngem anni ira i marake nga gannug nga kakkagian nittam ni Jehova nga ariattam kuan? Egga ira i angngarigan ta kahon nga “ Ikalussom i Kalussaw ni Jehova.” Baka nonopammu ta gafu nga ari gapa tu marake i karuan tatun. Ngem nu bibbigammu i teksto ira ta Biblia anna pannonopan tu mapia, malippawa mu i sirib na pattuppal ta dorob ni Jehova. Awayyana nga matageno mu nga egga i mawag nga uliammu. Maski nu mariga nu mittan, nu  kuammu danatun nga panguli, mapeggakka tu imammo anna pagayayya nga meyawa na pabbalin tu matalo nga kofun na Dios. (Isaias 48:17, 18) Ngatta ammu tam nga posible nga makua danatun nga panguli?

¹⁹ Ari vuluvuga ikiddaw ni Jehova i gannug nga ariattam makua. (Deuteronomio 30:11-14) Bilang kurug nga Kofun, mas ammammuna ittam anne ta pakannammu tam ta baggi tam. Ammuna i kalalakian anna i pakkafiattam ira. (Salmo 103:14) Pagaramman ittam ni apostol Pablo: “Pammakatalakkan i Dios, anna arian na nga ipamavulun tu duttal nikamu i tentasion nga arian nu awayya nga affutan. Ta oras na katenta nu, iddan nakamu na Dios ta sikan nu nga magattam tapenu melilli kamu ta kataga ta tentasion.” (1 Corinto 10:13) Makapakkomfiansa ittam nga kanayun ittam pasikannan ni Jehova nga kuan i fustu. Iyawana “i ari nga maguku-gukug nga pakapangngua” tapenu moffunakka nga magattam ta mariga ira nga situasion.​—2 Corinto 4:7.

20. Anni ira nga kualidad i mawag nga parigattam, anna ngatta?

²⁰ Nu kayà tam nga mabbalin nga kofun ni Jehova, mawag nga immangattam nga kuan i gannug ira nga kalussona, ngem mas paga tatun i mawag nga kuattam. (Roma 12:9) Danuri kofun na Dios ay ayatadda i ayatanna. Mabibbig danatun ta Salmo 15:1-5. (Bibbigan.) Parigan na kokkofun ni Jehova i kualidadna ira anna ipasingadda i “aya, pagayayya, imammo, pappasensia, kinasippo, kinapia, pangurug, kinalumamo, pangifugag ta baggi.”​—Galacia 5:22, 23, NW.

21. Kunnasim magigiammu nga ipasingan i kualidad ira nga kayà na Dios?

²¹ Kunnasim magigiammu nga ipasingan i kualidad ira nga kayà na Dios? Mawag nga gigiammuammu i kayà ira ni Jehova gukaban na regular nga pabbibbig anna paggigiammu tu Biblia. (Isaias 30:20, 21) Durante nga kukukuammu yatun, dumakal i aya mu kani Jehova anna yatun i mamaguyu nikaw nga mattuppal nisa.

22. Anni i resultana nu mattuppal ka kani Jehova?

²² I panguli ira nga kuammu ta pattolem ay megitta ta pangari ta dana nga sinnummu anna pangiyusa ta bagu. Kagian na Biblia nga mawag nga ‘arian nu ngana i dana nga kata-katolay nu’ anna baruasiannu i bagginu tu “bagu nga kata-katolay.” (Colosas 3:9, 10) Maski nu ari nga mabi yatun, nu kuattam danatun nga panguli anna magginna kani Jehova, nipromesana nga “dakal i balo” tam. (Salmo 19:11) Wan, pilian nga mattuppal kani Jehova anna pakurugan nga laddug si Satanas. Passerbian si Jehova, ari tu megafu ta maski anni nga bala-balo ta mappange, nu ari, megafu ta kurug nga iddukammu yayya. Nu kunnatun, mabbalikka tu kurug nga kofun na Dios!