1-3. Anni i nefukutattam ngamin, anna kunnasi ittam palawanan ni Jehova?

 NONOPAMMU nga nasentensiakka nga mefuku ta interu pattolem gafu ta krimen nga ariammu kingngua. Awan vuluvuga tu tiansam nga mapalawan. Awan ngana tu iddanamam, anna awan ngana tu makuam. Ngem turi ta nakkafi ngana i nono mu, nammuammu nga egga i tolay nga makawayya nga mangilawan nikaw anna nipromesana nga uffunan naka! Anni i matageno mu?

² Sittam ngamin ay nefuku ta patay. Maski anni i kuattam, ariattam makatammang. Ngem egga i pakapangngua ni Jehova nga palawanan ittam ta patay. Nipromesana nga affutanna i ngamin nga kontrana. Kagian na 1 Corinto 15:26 nga “i patay i urian nga mapatulu.”

³ Nonopan ngana laman i banna-bannay nga matageno mu sonu ariammu ngana ikavurungan i patay! Ari laman tu pawanan ni Jehova i patay. Paginnolayanna gapa noka danuri natay ngana. Nonopammu nu anni i kebalinan natun nikaw. Nipromesana: “Maginnolay noka i minatem.” (Isaias 26:19) Yatun i tukuyan na Biblia nga paginnolay.

4. (a) Anni i mamanna-bannay nittam nu matayan ittam tu kafamilia onu kofun? (b) Sinni danuri madukko nga kofun ni Jesus?

⁴ Nu matayan ittam tu kafamilia onu madukko nga kofun, mariga nga attamman i taki anna daddam. Gittana awan tu awa-awayya tam. Awan tu makua  tam tapenu metoli i inangona. Ngem banna-bannayan ittam na Biblia. (Bibbigan i 2 Corinto 1:3, 4.) Ikonsidera tam i tadday nga angngarigan nga mangipasingan nga kakayà ni Jehova anna ni Jesus nga paginnolayan i iddeddukattam. Ta kegga ni Jesus ta davvun, kanayunna nga bisitan si Lazaro anna i wawwaragina nga da Marta anni Maria. Madukko nga kofun ni Jesus ira nga tallu. Kagian na Biblia: “Kuruga iddukan ni Jesus i mawwaragi nga Marta, Maria anni Lazaro.” Ngem tadday aggaw, natay si Lazaro.​—Juan 11:3-5.

5, 6. (a) Anni i reaksion ni Jesus ta pakasinganna nga marraddam i familia anna kokkofun ni Lazaro? (b) Ngatta mabanna-bannayan ittam ta reaksion ni Jesus?

⁵ Minay si Jesus tapenu banna-bannayan da Marta anni Maria. Ta pakaginna ni Marta nga duttal si Jesus, zinafunna yayya ta lawan na siudad. Magayayya yayya nga masingan si Jesus, ngem kinagina sa: “Afu, nu egga ka nakuan taw, ari maffugag nga natay i wagì.” Abbo ni Marta nga urian ngana i dattal ni Jesus. Kabalin natun, nasingan ni Jesus nga tumatangi gapa si Maria. Ta pakasinganna nga marraddam i ngamin, natakitan yayya tapus siminangi. (Juan 11:21, 33, 35) Natagenona i nepallo nga daddam nu matayan ittam.

⁶ Mabanna-bannayan ittam gafu ta ammu tam i matageno ni Jesus nu meyannung ta patay. Parehu i matageno ni Jesus anna na Yamana. (Juan 14:9) Egga i pakawayya ni Jehova nga permanente nga pawanan i patay, anna arannina ngana nga kuan yatun.

7, 8. Ngatta manaki ni Marta nga ipalsa i batu ta netanamman ni Lazaro, ngem anni i kingngua ni Jesus?

⁷ Turi ta zimittal si Jesus ta netanamman ni Lazaro,  naserran i pattallungan tu daka-dakal nga batu. Kinagi ni Jesus: “Arian nu i batu.” Ngem manaki ni Marta gafu ta appa-ta-aggaw ngana nga netanam si Lazaro. (Juan 11:39) Arianna ammu nu anni i mappapange nga kuan ni Jesus tapenu uffunan si Lazaro.

⁸ Nekarolig i batu, ay tu nikulle ni Jesus: “Lazaro, mallawak-ka”! Kakkadda-kaddag i tumunug nga nasingan da Marta anni Maria. “Nallawan si Lazaro nga agga-babbag tu sinnun i lima anna takki na ira.” (Juan 11:43, 44) Netoli i inango ni Lazaro! Nakavuluna uli i kafamilia anna kokkofunna. Maaffuria, matammi, anna makibbidada yayya. Talaga milagro yatun! Pinaginnolay ni Jesus si Lazaro.

9, 10. (a) Sinni i nangiyawa kani Jesus tu pakapangngua tapenu mamaginnolay tu totolay? (b) Ngatta importante nittam danatun nga paginnolay?

⁹ Sarili kari nga pakapangngua ni Jesus i inusana ta pamaginnolay? Ari. Nige pinaginnolay ni Jesus si Lazaro, nakimallo yayya kani Jehova, anna niddan yayya ni Jehova tu pakapangngua nga paginnolayan si Lazaro. (Bibbigan i Juan 11:41, 42.) Ari laman tu si Lazaro i napaginnolay. Kagian na Biblia nittam i meyannung ta 12-anios nga abbing nga babay nga magimmamatay. Desperadu ngana si Jairo nga yamana, yari tu nakimemallo si Jairo kani Jesus tapenu pammapian i anana. Yatun nga abbing i tattadday nga anana. Durante nga makiyuvovug si Jairo kani Jesus, minaranni i totolay nira anna kinagi na tadday nira: “Natay ngana i ana mu. Ariam-mu ngana istorbowan i Mestru.” Ngem kinagi ni Jesus kani Jairo: “Ari ka nga madduda; basta mangurug ka ay maginnolay i ana mu.” Nevulu si Jesus ta  balay ni Jairo. Ta paddattalda, nasingan anna naginna ni Jesus nga mattarangi i totolay. Kinagi ni Jesus nira: “Ari kamu nga tumangi; ari yatun nga natay ngem nakkaturug laman!” Awayyana nga nattaka i magana na abbing nu ngatta kinagi ni Jesus yatun. Nikiddaw ni Jesus nga manaw i totolay tapus nivuluna i yama anna yena ta kuarto nu sitaw agga-idda i anada. Sinammi ni Jesus i lima na abbing anna kinagina sa: “Nene, manguk-ka!” Nonopan ngana laman i ayayya na maganana turi ta gavva yayya nga limikka anna liminakag! Pinaginnolay ni Jesus i anada. (Marcos 5:22-24, 35-42; Lucas 8:49-56) Namegafu tatun nga aggaw, kada masingadda i anada, meraddammadda i kingngua ni Jehova para nira gukaban ni Jesus. *

¹⁰ Natay gabbalaman danuri pinaginnolay ni Jesus. Ngem importante danatun nga nabibbig tam megafu ta mangiyawa danatun tu kurug nga iddanama nittam. Kayà ni Jehova nga mamaginnolay tu natay, anna magga kuanna yatun.

11. Anni i ituddu nittam na Eclesiastes 9:5 meyannung ta patay ni Lazaro?

¹¹ Manawag i kagian na Biblia nga ‘awan vuluvuga tu ammu na natay ira.’ Kunnatun i nesimmu kani Lazaro. (Eclesiastes 9:5) Kagitta na kinagi ni Jesus, negitta laman si Lazaro ta nakkatrug. (Juan 11:11) ‘Awan vuluvuga tu ammu’ ni Lazaro durante nga agga-tanam.

12. Ngatta ammu tam nga kurug nga naginnolay si Lazaro?

 ¹² Turi ta pinaginnolay ni Jesus si Lazaro, aru i nakasingan tatun. Maski danuri kalaban ni Jesus ay ammuda nga nammilagro yayya. Matolay si Lazaro, anna pakurugan naw nga talaga nesimmu i pamaginnolay. (Juan 11:47) Kunne na gapa, aru i minay naningan kani Lazaro. Ta pakasingadda nisa, nangurug ngana ira nga si Jesus i zinog na Dios. Nikalussaw yatun na kalaban ira ni Jesus, yari tu ginakkagda nga patayan si Jesus pati si Lazaro.​—Juan 11:53; 12:9-11.

13. Ngatta makasiguradu ittam nga mapaginnolay ni Jehova i natay?

¹³ Kinagi ni Jesus nga “ngamin i natay ira” ay mapaginnolay. (Juan 5:28) Yari tu ngamin danuri egga ta memoria ni Jehova i mapaginnolay. Ngem tapenu mapaginnolay ni Jehova i tadday, mawag tu meraddammanna i ngamin nga detalye meyannung nisa. Makuana kari talaga yatun? Daddamman nga binillion i biti-bitun ta uniberso. Ngem kagian na Biblia nga ammu ni Jehova i ngagan na kada bitun. (Bibbigan i Salmo 147:4, 5.) Nu meraddammanna i ngagan na kada bitun, siguradu gafu nga alistuna laman nga meraddamman i ngamin nga detalye meyannung turi ira ta paginnolayanna. Pinaka-importante, pinaratu ni Jehova i ngamin, yari tu ammu tam nga egga i pakapangnguana nga paginnolayan i natay.

14, 15. Anni i ituddu nittam na kinagi ni Job meyannung ta paginnolay?

¹⁴ Nangurug ta paginnolay i matalo nga si Job. Niyavuna: “Nu matay i tolay, maginnolay kari paga uli?” Kinagina paga kani Jehova: “Magagal ka noka, ay tu tabbagattaka. Kanappammu noka i kingngua na limi-limam.” Wan, ammu ni Job nga iinnaggan ni Jehova i tiempo sonu paginnolayanna i natay ira.​—Job 14:13-15.

 ¹⁵ Anni i panageno mu ta iddanama nga paginnolay? Baka manono mu, ‘Kunnasi gapa danuri kafamilià anna kokkofukku nga natay, mapaginnolay kari gapa ira?’ Mabanna-bannayan ittam ta pakannammu nga talaga kakayà ni Jehova nga paginnolayan i natay ira. Innattam nu anni i kagian na Biblia nu sitaw noka i paddianadda anna nu sinni danuri mapaginnolay.

16. Kunnasi noka i klase na pattolay danuri mapaginnolay ta davvun?

¹⁶ Ta nappasa, nakavulu uli danuri napaginnolay i kafamilia anna kokkofudda taw ta davvun. Mesimmu gapa yatun ta mappange, ngem mas makasta noka. Ngatta? Megafu ta danuri mapaginnolay ta davvun ay egga i tiansada nga mattolay tu mannanayun anna ari uli matay. Mattolay gapa ira noka ta mundo nga mas makasta anne ta maddaggun. Awan ngana noka tu gerra, krimen, anna taka-taki.

17. Sinni noka danuri mapaginnolay?

¹⁷ Sinni danuri mapaginnolay? Kinagi ni Jesus nga “ngamin i natay ira ay maginna da i ngaral na, anna mallalawan ira ta livud-da.” (Juan 5:28, 29) Kagian nittam na Nepakannammu 20:13: “Pinalawan na bebay ngamin i natay nga egga sa anna pinalawan gapa na Patay tuange ta Hades nga dian na natay ira ngamin i natay nga egga nira.” (Innan i Endnote 19) Wan, binillion noka nga totolay i maginnolay uli. Kinagi gapa ni apostol Pablo: “Ngamin i totolay, mapia [“matunung,” NW ] onu marakay [“ari matunung,” NW ], ay maginnolay noka.” (Kingngua 24:15) Anni i kebalinan natun?

18. Sinni danuri “matunung” nga mapaginnolay noka?

 ¹⁸ Nelagum ta “matunung” danuri matalo nga aripan ni Jehova nga nattolay nige minay ni Jesus ta davvun. Mapaginnolay noka taw ta davvun da Noe, Abraham, Sara, Moises, Ruth, anna si Ester. Mabibbig ta Hebreo kapitulo 11 i karuan taw nga lallaki anna babbay. Kunnasi gapa danuri matalo nga aripan ni Jehova  nga natay ta kaggawattam? “Matunung” gapa ira, yatutta mapaginnolay ira noka.

19. Sinni danuri “ari matunung”? Anni nga tiansa noka i iyawa ni Jehova nira?

¹⁹ Nelagum ta “ari matunung” danuri binillion nga totolay nga awan tu tiansada nga mammammu si Jehova. Maski paga natay ngana ira, ari lagapa ira nakattaman ni Jehova. Paginnolayanna ira noka, anna iddanna ira tu tiansa tapenu ammuan anna passerbian yayya.

20. Ngatta ari tu ngamin ay mapaginnolay?

²⁰ Kayà kari kagian naw nga ngamin nga natay ay mapaginnolay noka? Ari. Kinagi ni Jesus nga ari nga mapaginnolay danuri egga ta “Gehenna.” (Lucas 12:5, NW ) Sinni noka i maddesision nu mapaginnolay onu ari mapaginnolay i tadday? Si Jehova i ultimu nga Hues, ngem niddanna gapa tu autoridad si Jesus tapenu “manentensia ta matolay anna natay ira.” (Kingngua 10:42) Ari mapaginnolay danuri nahusgan nga marake anna nammanaki nga nanguli.​—Innan i Endnote 19.

21, 22. (a) Anni i pabbalinan danuri mapaginnolay nga umay ta langi? (b) Sinni i ollu nga tolay nga napaginnolay nga umay ta langi?

²¹ Kagian nittam na Biblia nga umay ta langi i karuan nga tolay. Nu mapaginnolay nga umay ta langi i tadday, ari ngana nga mattolay nga sigga-baggi. Kabalinna nga mapaginnolay, mabbalin yayya tu espiritu anna umay ta langi.

²² Si Jesus i ollu nga tolay nga nakalawa tu kunnaw nga klase na kapaginnolay. (Juan 3:13) Tallu aggaw kabalin nga natay si Jesus, pinaginnolay yayya ni Jehova. (Salmo 16:10; Kingngua 13:34, 35) Ari napaginnolay nga sigga-baggi si Jesus. Niyesplika ni apostol Pedro nga  si Jesus ay “napapatay nga pattag ngem napaginnolay nga espiritu.” (1 Pedro 3:18, NW ) Napaginnolay si Jesus bilang tadday nga makapangngua nga espiritu nga persona! (1 Corinto 15:3-6) Ngem kagian na Biblia nga ari laman tu yayya i mapaginnolay nga umay ta langi.

23, 24. Anni i mesimmu ta “pigi-piga laman” nga kinagi ni Jesus, anna piga i bilangda?

²³ Nige natay ni Jesus, kinagina ta matalo nga disipulosna: “Umay ngà mangiparan tu paddianan nu.” (Juan 14:2) Kayà kagian naw nga mapaginnolay i karuan ta disipulosna anna makavuluna ta langi. Piga ira? Kinagi ni Jesus nga “pigi-piga laman.” (Lucas 12:32) Kinagi ni apostol Juan i eksakto nga bilangda. Nasinganna si Jesus “tuange ta 144,000 nga totolay nga kakavvulu na nga agga-taddag ta [nelangitan nga] Vukig na Sion.”​—Nepakannammu 14:1.

²⁴ Sonu anni mapaginnolay i 144,000 nga Cristiano? Kagian na Biblia nittam nga mesimmu yaw sonu mammaguray ngana si Cristo ta langi. (1 Corinto 15:23) Mattolay ittam ngana tatun nga tiempo, anna aru ta 144,000 i napaginnolay ngana anna minay ta langi. Ta kaggawattam, egga paga nira i nabattang taw ta davvun. Nu matay ira, insigida ira mapaginnolay anna umay ta langi. Ngem, i magaru nga totolay ay mapaginnolay noka ta Paraiso nga davvun ta mappange.

25. Anni i magigiammu tam ta tumunug nga kapitulo?

²⁵ Aranni ngana nga palubbangan ni Jehova i ngamin nga totolay ta patay, anna mapawan ngana noka yatun! (Bibbigan i Nepakannammu 21:4.) Ngem anni i kuan danuri umay ta langi? Iyesplika na Biblia nga makipammaguray ira noka kani Jesus ta gobiernu ta langi. Mas aru paga i magigiammu tam tatun nga gobiernu ta tumunug nga kapitulo.