1. Anni i awayyana nga manono mu kabalimmu nga magigiammu tu mapia yaw nga libru?

 ARU ngana i nammuammu nga kinakurug ta Biblia gafu ta paggigiammum taw nga libru, gitta na i promesa na Dios nga mannanayun nga inango, i kondision na natay, anna i iddanama nga paginnolay. (Eclesiastes 9:5; Lucas 23:43; Juan 5:28, 29; Nepakannammu 21:3, 4) Baka magata-atende ka ngana gapa ta study na Saksi ira ni Jehova anna mangurug ka nga tuttuttuladda i kurug nga paddayaw. (Juan 13:35) Awayyana gapa nga egga ngana i madukko nga pakikkofummu kani Jehova, anna naddesisiokka nga kayà mu ngana yayya nga passerbian. Yatutta  awayyana nga manono mu, ‘Anni ngana gafu i kuakku tapenu makapasserbi ngà ta Dios?’

2. Ngatta kayà na ofisial nga taga-Etiopia i mappabawtiso?

² Kunnatun i nanono na tadday nga ofisial nga taga-Etiopia ta tiempo ni Jesus. Ari nabbayag kabalin na paginnolay ni Jesus, nilayyagayyan na disipulona nga si Felipe yatun nga ofisial. Pinakurug nisa ni Felipe nga si Jesus i Mesias. Fermi nga napaguyu yatun nga taga-Etiopia ta nagigiammuna yayya nga insigida nga kinagina: ‘Azzoye i danum! Egga paga kari i makagurun ta kabawtisò?’​—Kingngua 8:26-36.

3. (a) Anni i nibilin ni Jesus ta disipulosna? (b) Kunnasi nakuan i kabawtiso na tadday nga tolay?

³ Manawag nga ituddu na Biblia nga nu kayà mu i masserbi kani Jehova, mawag tu mappabawtiso ka. Nibilin ni Jesus ta disipulosna: “Umay kamu gafu ta ngamin nga totolay ta ngamin nga lugu-lugar anna pabbalinan nu ira tu disipulò. Bawtisowan nu ira.” (Mateo 28:19) Nipasingan gapa ni Jesus mismu i ehemplo gukaban na pappabawtisona. Interu nga baggina i nelammag ta danum, ari laman tu nawawwarsian i uluna. (Mateo 3:16) Sangawe, nu mappabawtiso i tadday nga Cristiano, mawag gapa nga melammag ta danum i interu nga baggina.

4. Anni i ipasingan na bawtismom ta tanakuan?

⁴ Nu mappabawtiso ka, ipasingammu ta tanakuan nga talaga kayà mu i mabbalin tu kofun na Dios anna passerbian yayya. (Salmo 40:7, 8) Yatutta awayyana nga manono mu, ‘Anni i mawag tu kuakku tapenu mabawtisowan ngà?’

5. (a) Anni i ollu labbi nga kuammu nige mu mabawtisowan? (b) Ngatta importante nga magatende ka ta study ira na Saksi ni Jehova?

⁵ Nige ka nga mabawtisowan, mawag tu kannammuammu si Jehova anna si Jesus. Kukukuammu ngana  yaw tagga ta nigafum nga gigiammuan i Biblia. (Bibbigan i Juan 17:3.) Ngem ari tu makalanno yatun. Kagian na Biblia nga mawag tu mapeggakka tu “kurug nga pakannammu anna pakalippawa” ta uray ni Jehova. (Filipos 1:9) Moffunan naka na pagatendem ta study ira na Saksi ni Jehova tapenu mas maddukko ka kani Jehova. Yatun i tadday ta importante nga rason nu ngatta mawag tu regular ka nga magatende ta study ira.​—Hebreo 10:24, 25.

6. Kunnasi i karu na mawag tu kannammuammu ta Biblia nigem nga mabawtisowan?

⁶ Siempre, ari ekspektan ni Jehova nga mammuammu i ngamin nga egga ta Biblia nige mu mappabawtiso. Arianna nikiddaw ta ofisial nga taga-Etiopia nga gigiammuanna labbi ngamin nigena mappabawtiso. (Kingngua 8:30, 31) Kakuruganna, awan tu pagaddetan na paggigiammu meyannung ta Dios. (Eclesiastes 3:11) Ngem nigem mabawtisowan, mawag labbi nga ammuan anna akseptammu i primeru ira nga tuddu na Biblia.​—Hebreo 5:12.

7. Anni i neyuffun nikaw na paggigiammum tu Biblia?

⁷ Kagian na Biblia: “Nu awan tu angngurug na tolay, arian na nga awayya nga mapagayaya i Dios.” (Hebreo 11:6) Mawag mu gafu i pangurug nige mu mabawtisowan. Kagian nittam na Biblia nga naginna danuri taga-siudad na Corinto tagga i nituddu ira na disipulos ni Jesus anna megafu tatun, “nangurug anna nabawtisowan” ira. (Kingngua 18:8) Kunne na gapa, noffunan naka na paggigiammum tu Biblia nga mapeggan tu pangurug ta promesa ira na Dios anna ta pakawayya na sakrifisio ni Jesus nga ipaliag ittam ta liwa anna ta patay.​—Josue 23:14; Kingngua 4:12; 2 Timoteo 3:16, 17.

8. Ngatta kayà mu ngana ikagi ta tanakuan i magiggigiammum?

⁸ Durante nga umara-aru i magigiammum ta Biblia  anna masingi-singammu nu anni i meyuffun natun ta pattolem, mas gapa nga dumaka-dakal i pangurug mu. Kayà mu ngana gapa nga ikagi ta tanakuan i magiggigiammum. (Jeremias 20:9; 2 Corinto 4:13) Ngem sinni ira i pangikagianammu?

9, 10. (a) Sinni ira i awayyana nga ollu nga pangikagianammu ta magiggigiammum? (b) Anni i kuammu nu kayà mu ngana nga mallayyagayya kavulu i kongregasion?

⁹ Awayyana nga kayà mu nga ikagi ta familiam, kokkofun, karrubam, onu katrabahum i magiggigiammum. Makasta yatun, ngem kanayun nakuan nga masippo anna meddu ka. Duttal i tiempo nga puedem ngana mevulu ta kongregasion ta pallayyagayya. Nu matageno mu nga kayà mu ngana nga kuan yatun, awayyam makibbida ta Saksi nga manuddu nikaw ta Biblia anna ikagim nisa nga kayà mu ngana nga mallayyagayya kavulu i kongregasion. Nu masinganna nga kualipikadu ka ngana anna nu mattoleka ngana segun ta estandarte ira na Biblia, vulutan naka nga makiyuvovug ta dua nga elder na kongregasion.

¹⁰ Anni i mesimmu tatun? Dua nga elder i makibbida nikaw tapenu ammuadda nu malippawa anna kurugammu i primeru ira nga tuddu na Biblia, nu talaga tuttuttulammu i kakkagian na Biblia ta inaggaw nga pattolem, anna nu kayà mu ngana talaga i mabbalin tu tadday ta Saksi ni Jehova. Daddamman nga i elder ira i manangngal ta ngamin nga miembro na kongregasion, kasali ka ngana, yari tu ariammu maganassing nga makiyuvovug nira. (Kingngua 20:28; 1 Pedro 5:2, 3) Kabalin natun, ikagi nikaw na dua nga elder nu awayyam ngana nga pegafuanan i mallayyagayya kavulu na kongregasion.

11. Ngatta importante nga manguli nige nga mallayyagayya kavulu i kongregasion?

¹¹ Awayyana nga ipakanawag nikaw na elder ira nga egga paga ira i mawag nga uliammu nige mu nga makikavulu  ta kongregasion nga mallayyagayya. Ngatta importante nga kuan danatun nga panguli? Megafu ta nu ipakiyuvovug tam ta tanakuan i meyannung ta Dios, irepresenta tam si Jehova anna mawag tu makedayaw nisa i pattoletam.​—1 Corinto 6:9, 10; Galacia 5:19-21.

12. Ngatta mawag tu mabbabawi i ngamin nga totolay?

¹² Egga paga i mawag tu kuammu nige mu mabawtisowan. Kagian ni apostol Pedro: “Mabbabawi kamu gafu anna manoli kamu ta Dios tapenu pakoman nakamu ta katagarulian nu ira.” (Kingngua 3:19) Anni i kayà kagian na mabbabawi? Kayà kagian natun nga kuruga maraddam ittam ta nakua tam ira nga liwa. Angngariganna, nu imoral i pattolem, mawag mu gafu i mabbabawi. Anna maski nu kingnguam i adde na mawayyam tapenu kuan i matunung, mawag mu lagapa i mabbabawi, megafu ta makaliwa ittam ngamin anna mawag tu makkiddaw tu pamakoma ta Dios.​—Roma 3:23; 5:12.

13. Anni i kayà kagian na ‘manoli ta Dios’?

¹³ Makalanno ngana kari nga basta marraddam ta nakuam ira? Ari. Kinagi ni Pedro nga mawag mu gapa nga ‘manoli ta Dios.’ Kayà kagian naw nga mawag tu iyemmattam ngana i maski anni nga marake nga annangngua anna kuattam ngana i fustu. Tapenu meyilustra yaw, imajinammu nga ollollum pagalaman nga mabbiahe mappange ta tadday nga lugar. Kabalinna, nadiskubrem nga mali balo i direksiommu. Anni gafu i kuammu? Magga magannano ka, magimmang, manoli, tapus maffunta ta fustu nga direksion. Kunnatun gapa, durante nga gigiammuammu i Biblia, madiskubrem nga egga i karuan nga annangngua onu gannug ta pattolem nga mawag tu uliammu. Sigga-parakka nakuan nga “manoli”​—kayàna kagian, mangngua tu kawagan ira nga panguli—​kabalinna, kuammu ngana i fustu.

14. Kunnasim nga idedika i baggim ta Dios?

¹⁴ Tadday paga nga importante nga kuammu nige mabawtisowan ay idedikam i baggim kani Jehova. Nu idedikam i baggim kani Jehova, ipromesam nisa gukaban na pakimallo nga yayya laman i dayawammu anna kuammu tu pinaka-importante ta pattolem i urena.​—Lucas 4:8.

15, 16. Anni i mamaguyu ta tadday nga tolay nga idedika i baggina ta Dios?

¹⁵ I pangipromesa nga si Jehova laman i passerbiammu ay gittana pangipromesa ta iddeddukammu nga yayya laman i kayà mu nga kavulu ta interu pattolem. Nonopan i bagitolay anna i maginganay nga makka-aya-aya. Durante nga mas mammammu na bagitolay i maginganay, magigiammuna nga ayatan yayya anna kayàna nga atawan. Maski nu serioso nga desision yaw, sigga-paran i bagitolay nga alawatan i responsibilidad gafu ta iddeddukanna i maginganay.

¹⁶ Durante nga mas makannammuammu si Jehova, magigiammum nga ayatan yayya anna kayà mu nga kuan i adde na mawayyam tapenu masserbi nisa. Yaw i mamaguyu nikaw nga mangipromesa gukaban na pakimallo nga passerbian yayya. Kagian na Biblia nga nu kayà na tadday nga tuttulan si Jesus, mawag nga “kattaman na i baggi na.” (Marcos 8:34) Anni i kebalinan natun? Kebalinan natun nga i pattuppal kani Jehova i mawag nga pinaka-importante ta pattolem. Mas importante i kayà ni Jehova anne ta kayà mu ira anna ta planom ira nga kuan.​—Bibbigan i 1 Pedro 4:2.

17. Ngatta ari idedika na karuan i baggida kani Jehova?

¹⁷ Egga karuan nga ari mangidedika ta baggida kani Jehova megafu ta baka ariadda matuppal i promesada nga  passerbian yayya. Manakida nga madismaya nira si Jehova, onu irasodda nga nu ari mabba ira nga dedikadu tannisa, awan tu tattabbagadda kani Jehova ta kukukuadda.

18. Anni i makoffun tapenu mari i assimmu nga madismaya si Jehova?

¹⁸ Makoffun i aya mu kani Jehova tapenu mari i assimmu nga madismaya yayya. Megafu ta ayatammu yayya, kuammu i ngamin tapenu matuppal mu i promesam nisa. (Eclesiastes 5:4; Colosas 1:10) Ariammu manono nga kitezziga nga kuan i uray ni Jehova. Nitura ni apostol Juan: “Nu ayatat-tam i Dios, parulattat-tam gapa i bili-bilin na, ay ari gammabba tu mariga nga tuttulan danaw.”​—1 Juan 5:3.

19. Ngatta ari ka nakuan maganassing nga maddedika kani Jehova?

¹⁹ Ari tu mawag nga perfekto ka tapenu mededikam i baggim kani Jehova. Arianna vuluvuga ekspektan nittam nga kuan i ariattam makua. (Salmo 103:14) Uffunan naka nga kuan i fustu. (Isaias 41:10) Mattalo ka kani Jehova ta interu nga futum, anna “tununganna i dala-dalammu.”​—Proverbio 3:5, 6.

20. Kabalimmu maddedika ta Dios, anni i tumunug nga dakkua?

²⁰ Para nikaw, preparadu ka ngana kari nga idedika i baggim kani Jehova? Kabalimmu nga idedika i baggim kani Jehova, preparadu ka ngana nga kuan i tumunug nga dakkua. Mawag tu mappabawtiso ka.

21, 22. Kunnasim nga ‘melammuyag ta pagara-arubangan na magaru’ i pangurug mu?

²¹ Ipakannammu ta koordineytor na elder ira ta kongregasionnu nga nidedikam ngana i baggim kani Jehova anna kayà mu ngana i mappabawtiso. Kabalinna, mappili yayya tu elder ira nga mangirepaso nikaw ta  primeru ira nga tuddu na Biblia. Nu umanugu ira nga kualipikadu ka ngana, kagiadda nikaw nga awayyam ngana mappabawtiso ta tumunug nga asembli onu kombension na Saksi ira ni Jehova. Ta asembli, egga i tadday nga palappa nga mangiyesplika ta kebalinan na bawtismo. Iyavu noka na ispiker i dua nga simple nga pakkiavu ta kandidato ira na bawtismo. Gukaban na pattabbag  mu tatun ira nga pakkiavu, ‘ilammuyag mu ta pagara-arubangan na magaru’ i pangurug mu.​—Mateo 10:32.

²² Kabalinna, mabawtisowan ka ngana. Melammag i interu baggim ta danum. Ngamin nga makasingan ta bawtismom ay mammuadda nga nidedikam ngana i  baggim kani Jehova anna taddeka ngana nga Saksi ni Jehova.

23. Anni i kayà kagian na mabawtisowan “ta ngagan na Yama, na Ana, anna na masanto nga espiritu”?

²³ Kinagi ni Jesus nga mabawtisowan i disipulosna “ta ngagan na Yama, na Ana, anna na masanto nga espiritu.” (Bibbigan i Mateo 28:19, NW.) Anni i kayà kagian natun? Kayàna kagian nga rekunnisiammu i autoridad ni Jehova anna i papel ni Jesus ta gakkag na Dios kunne na gapa nu kunnasi usan na Dios i masanto nga espirituna tapenu ituppal i urena.​—Salmo 83:18; Mateo 28:18; Galacia 5:22, 23; 2 Pedro 1:21.

24, 25. (a) Anni i isimbolo na bawtismo? (b) Anni i matabbag ta ultimu nga kapitulo?

²⁴ Egga i kuruga importante nga isimbolo na bawtismo. Nu melammag i interu baggim ta danum, isimbolona nga natay ka ngana ta dati nga klase na pattolem, onu pinanawammu ngana yatun. I kelattuag mu gapa ta danum, isimbolona nga mattoleka ngana tapenu kuan i uray na Dios. Ipasingan natun nga si Jehova ngana i passerbiammu. Daddamman nga naddedika ka, ari tu ta tadday nga tolay, organisasion, onu trabahu. Nidedikam ngana i pattolem kani Jehova.

²⁵ Uffunan naka na dedikasiommu tapenu makultiba i meggo nga pakikkofun ta Dios. (Salmo 25:14) Arianna kayà kagian natun nga mapaliag i tadday nga tolay gafu laman ta nappabawtiso yayya. Nitura ni apostol Pablo: “Talakkurugan nu nga ibalin i kapaliag nu​—ta kurug nga agganassing anna ammakakua ta Dios.” (Filipos 2:12) I bawtismo ay ollu laman nga dakkua nga mangirattal ta kapaliag. Ngem kunnasi ka mattalupaddian nga madukko kani Jehova? Tabbagan na ultimu nga kapitulo yatun nga pakkiavu.