1. Sinni laman i makekagi nittam nu kunnasi dayawan i Dios?

 ARU nga relihion i makkagi nga ira i mangituddu ta kinakurug meyannung ta Dios. Ngem imposible yatun, megafu ta dumu-duma i ituttuddu na relihion ira nu sinni i Dios anna nu kunnasi yayya dayawan. Kunnasi tam mammuan i fustu nga paddayaw ta Dios? Si Jehova laman i makekagi nittam nu kunnasi yayya nga dayawan.

2. Anni i kuattam tapenu mammuan nu kunnasi dayawan i Dios?

² Niyawa nittam ni Jehova i Biblia tapenu magigiammu tam nu kunnasi yayya nga dayawan. Gigiammuammu gafu i Biblia, anna uffunan naka ni Jehova nga alippawatan anna iyaplika i tuttudduna megafu ta ikavurungan naka.​—Isaias 48:17.

3. Anni i kayà na Dios nga kuattam?

³ Kagian na karuan nga alawatan na Dios i ngamin nga relihion, ngem ari tu kunnatun i nituddu ni Jesus nittam. Kinagina: ‘Ari tu ngamin i makkagi niakan, “Afu, Afu,” ay makatallung ta Pappatulan ta langi, nu ari danuri laman i mangngua ta uray na Yamà.’ Importante gafu nittam nga gigiammuan nu anni i uray na Dios anna kuan yatun. Serioso nga gannug yaw megafu ta nikumpara ni Jesus danuri totolay nga ari tumuttul ta Dios ta kriminal ira “nga minattagaruli” [“magaggangngua tu marake,” NW ].​—Mateo 7:21-23.

4. Anni i kinagi ni Jesus meyannung ta pangngua ta uray na Dios?

⁴ Kinagi ni Jesus nittam nga ari tu kanayun nga mabi nga kuan i uray na Dios. Kinagina: “Tullung kamu ta atazzi nga trangka. Ta i trangka nga mappange ta infiernu [“kadaral,” NW ] ay alawa, anna mapia i dalan nga mappange  tari; ay aru i totolay nga lumakag taw nga dalan. Ngem atazzi i trangka anna mariga i dalan nga mappange ta inango nga adde ta ngangangay. Ay pigi-piga laman nga tolay i makaleg taw nga dalan.” (Mateo 7:13, 14) I pattallung ta atazzi nga trangka, onu i fustu nga paddayaw ta Dios ay mappange ta mannanayun nga inango. I pattallung ta alawa nga trangka, onu i mali nga paddayaw ta Dios ay mappange ta patay. Ngem manaki ni Jehova nga matay i maski sinni. Iddanna tu tiansa i ngamin tapenu gigiammuan i meyannung nisa.​—2 Pedro 3:9.

5. Kunnasim makannammuan nu sinni danuri fustu i paddayoda ta Dios?

⁵ Nituddu ni Jesus nga makannammuattam nu sinni danuri fustu i paddayoda ta Dios. Makua tam yatun gukaban na pangammu ta klase ira na vungada, nga masingan ta kuru-kurugadda anna ta “kukukuad-da.” Kinagi ni Jesus: “Mapia i vunga na mapia nga kayu anna marakay gapa i vunga na marakay nga kayu.” (Mateo 7:16, 17) Ari kayà kagian naw nga perfekto danuri maddayarayaw ta Dios. Ngem kanayun nga kuan na aripan ira na Dios i adde na mawayyada tapenu makua i fustu. Gigiammuattam ngana nu anni i makoffun nittam tapenu makannammuan nu sinni danuri fustu i paddayoda ta Dios.

6, 7. Ngatta nebase ta Biblia i kurug nga paddayaw? Anni i ituddu nittam na ehemplo ni Jesus?

⁶ Nebase nakuan ta Biblia i paddayaw tam. Kagian na Biblia: “Ngamin i egga ta Masanto nga Tura ay naggafu ta Dios, ay masserbi ta pangituddu ta kurug, pangivuya ta makaliwa, panunung ta ugo, anna pangituddu ta matunung nga attolay, tapenu i masserbi ta Dios ay awan tu pakkurangan na anna agga-paran nga mangngua ta ngamin nga mapia.” (2 Timoteo 3:16, 17) Nitura ni apostol Pablo ta Cristiano ira: “Turi ta pakaginna nu ta uvovug na  Dios nga em-mi nga pinalappa nikamu, inalawa anna kinurug nu tu yaw ay uvovug na Dios, ari tu uvovug laman na tolay.” (1 Tesalonica 2:13) I kurug nga paddayaw ay nebase laman ta Uvovug na Dios, i Biblia. Ari yaw nebase ta ideya na totolay, tradision, onu ta maski anni.

⁷ Nebase ta Uvovug na Dios i ngamin nga nituddu ni Jesus. (Bibbigan i Juan 17:17.) Kanayun nga apanna ta Katurakan i itabba-tabbagna. (Mateo 4:4, 7, 10) Tuttulan na kurug ira nga aripan na Dios i ehemplo ni Jesus anna ibaseda ta Biblia i ngamin nga tudduda.

8. Anni i nituddu ni Jesus nittam meyannung ta paddayaw kani Jehova?

⁸ Si Jehova laman nakuan i dayawattam. “Sikaw, nga mangngagan tu Jehova, sikaw laman i Katannangan ta interu nga davvun,” kagian na Salmo 83:18, NW. Kayà ni Jesus nga makannammuan na totolay nu sinni i kurug nga Dios, anna nitudduna nira i ngagan na Dios. (Bibbigan i Juan 17:6.) Kinagi ni Jesus: “Daya-rayawam-mu i Yafu nga Dios mu, anna yaya laman i passerbiam-mu!” (Mateo 4:10) Bilang aripan gafu na Dios, tuttulattam i ehemplo ni Jesus. Si Jehova laman i dayawattam anna usattam i ngaganna ta pakimallo anna ta paddayaw tam. Ituddu tam gapa ta tanakuan i ngagan na Dios anna nu anni i gakkagna para nittam.

9, 10. Kunnasi tam mepasingan i aya tam ta kataggi-tadday?

⁹ Mawag nga napafutuan nga makka-aya-aya ittam. Nituddu ni Jesus ta disipulosna nga ayatadda i kataggi-tadday. (Bibbigan i Juan 13:35.) Ari importante nu anni i lahi tam, i kultura tam, onu maski paga mariku onu pobre ittam. I aya tam nakuan ta kataggi-tadday i mamattaradday nittam nga kunna mawwaragi. (Colosas 3:14) Yari tu ariattam makiggerra anna mamatay tu tolay. Kagian na Biblia: “Yaw i manawag nga nadduman na ána na Dios anna ána na Demonio: i sinni laman nga ari nga mangngua ta  tunung anna ari nga mangaya ta wagi na ay ari tu ana na Dios.” Kinagina paga: “Mawag tu makka-aya-aya ittam. Ariat-tam nga parigan si Cain nga tolay na Demonio, ta pinatay na i mismu nga wagi na.”​—1 Juan 3:10-12; 4:20, 21.

¹⁰ Usattam i tiempo, sikan, anna material ira nga pakkukua tam tapenu uffunan anna pagaramman i kataggi-tadday. (Hebreo 10:24, 25) Kagian na Galacia 6:10: “Kuat-tam i mapia ta ngamin nga ikattolay tam.”

11. Ngatta mawag tu alawatattam nga si Jesus i dalan mappange ta Dios?

¹¹ Mawag tam mattuppal kani Jesus megafu ta yayya laman i dalan mappange ta Dios. Kagian na Biblia: “Awan tu tanakuan nga pakalerat-tam ta kapaliag nu ari kani Jesus laman, ta awan ngana tu tanakuan nga ngagan ta interu mundo nga niyawa na Dios tu makapaliag nittam.” (Kingngua 4:12) Ta Kapitulo 5 naw nga libru, nagigiammu tam nga zinog ni Jehova si Jesus tapenu itavvung i inangona para ta minammarulo nga totolay. (Mateo 20:28) Pinili ni Jehova si Jesus nga mappatul ta davvun. Yatutta kagian na Biblia nittam nga mawag tu mattuppal ittam kani Jesus nu kayà tam i mattolay tu mannanayun.​—Bibbigan i Juan 3:36.

12. Ngatta ariattam makisali ta pulitika?

¹² Ariattam nakuan makisali ta pulitika. Ari nakisali si Jesus ta pulitika. Turi ta nabista yayya, kinagina ta Romano nga mammaguray nga si Pilato: “I pammagurayak-ku ay awan toye ta utun na davvun.” (Bibbigan i Juan 18:36.) Kagitta ni Jesus, matalo ittam ta nelangitan nga Pappatulan na Dios, anna megafu taw, maski sitaw i nasiottam, ariattam vuluvuga makisali ta pulitika. Ngem, nibilin na Biblia nittam nga tuttulattam i “mammaguray ira nga egga ta gubiernu.” (Roma 13:1) Tuttulattam i dorob na nasion nga paddianattam. Siempre, nu mekontra danatun ta dorob na Dios, parigattam i apostoles, nga  nakkagi: “Mawag tu kurugam-mi i Dios anne ta tolay.”​—Kingngua 5:29; Marcos 12:17.

13. Anni i ilayyagayya tam meyannung ta Pappatulan na Dios?

¹³ Mangurug ittam nga Pappatulan na Dios laman i solusion ta problema ira na mundo. Kinagi ni Jesus nga melayyagayya i “Mapia nga Dumug na Pammaguray na Dios” ta interu mundo. (Bibbigan i Mateo 24:14.) Awan tu gobiernu na tolay i makangngua ta ituppal noka na Pappatulan na Dios para nittam. (Salmo 146:3) Nituddu ni Jesus nga ipakimallo tam i Pappatulan na Dios turi ta kinagina: “Maparattal paray i Pammagurem. Makua i urem toye ta davvun ta kunne ta langi.” (Mateo 6:10) Kagian na Biblia nittam nga daralan noka na Pappatulan na Dios i ngamin nga gobiernu na tolay anna “yaw laman i mattalupaddian adde noka.”​—Daniel 2:44.

14. Sinni i kurugammu nga fustu i paddayoda ta Dios?

¹⁴ Sangaw ta nammuammu ngana i fustu nga paddayaw ta Dios, iyavu mu ta baggim: ‘Sinni i mangibase ta tuttudduda ta Biblia? Sinni i mangiyammammu ta ngagan na Dios? Sinni danuri napafutuan nga makka-aya-aya anna mangurug nga si Jesus i zinog na Dios tapenu ipaliag ittam? Sinni danuri ari makisali ta pulitika? Sinni i mangilayyagayya nga Pappatulan laman na Dios i makasolba ta problema tam ira?’ Danuri laman Saksi ni Jehova.​—Isaias 43:10-12.

15. Anni i mawag nga kuattam nu kayà tam nga alawatan na Dios i paddayaw tam?

¹⁵ Ari makalanno nga basta mangurug ittam nga egga i Dios. Maski paga i demonio ira, kurugadda nga egga i Dios, ngem ariadda mattuttuppal nisa. (Santiago 2:19) Nu kayà tam nga alawatan na Dios i paddayaw tam, mawag tu ariattam laman mangurug nga egga i Dios, nu ari, kuattam gapa i ipakuana.

16. Ngatta mawag tu panakitattam i falsu nga relihion?

 ¹⁶ Tapenu alawatan na Dios i paddayaw tam, mawag tu panakitattam i falsu nga relihion. Nitura ni profeta Isaias: “Mallawakkamu ta tangngana, pattalupaddianannu nga marenu i bagginu.” (Isaias 52:11; 2 Corinto 6:17) Yari tu mawag tam nga panakitan i maski anni nga konektadu ta falsu nga paddayaw.

17, 18. Anni i “Madumu-rumug nga Babilonia,” anna ngatta mawag tu panawammu ngana yatun insigida?

¹⁷ Anni i falsu nga relihion? Tukuyan natun i maski anni nga relihion nga mangituttuddu tu paddayaw ta Dios nga mekontra ta Uvovugna. Nagalan ta Biblia i falsu nga relihion nga “Madumu-rumug nga Babilonia.” (Nepakannammu 17:5) Ngatta? Kabalin na Delubio ta kaggawan ni Noe, aru nga falsu nga relihioso nga tuttuddu i namegafu ta siudad na Babilonia. Nawwara ta interu mundo danatun nga falsu nga tuttuddu. Angngariganna, maddayaw i taga-Babilonia ta dios ira nga nagrupo tu sinaggi-tallu. Ta maddaggun gapa, aru nga relihion i mangituddu nga i Dios ay Trinidad, ngem manawag nga ituttuddu na Biblia nga tattadday laman i kurug nga Dios, si Jehova, anna si Jesus i Anana. (Juan 17:3) Mangurug gapa danuri totolay ta Babilonia nga egga i parte na baggi na tadday nga tolay nga tulu-tuloy nga matolay kabalin nga matay i baggi anna yatun nga parte na baggi ay puede nga maparigatan ta infiernu. Ari tu kurug yatun.​—Innan i Endnote 14, 17, 18, anna 19.

¹⁸ Niprofesiya na Dios nga aranni ngana nga madaral i ngamin nga falsu nga relihion. (Nepakannammu 18:8) Malippawa mu kari nu ngatta mawag tu panawammu ngana insigida i falsu nga relihion? Kayà ni Jehova nga kuammu yatun adde ta egga paga i tiansam.​—Nepakannammu 18:4.

19. Nu piliammu nga masserbi kani Jehova, kunnasi naka tangngallan?

¹⁹ Nu piliammu nga panawan i falsu nga relihion anna  masserbi kani Jehova, awayyana nga egga ira i kofun onu kafamiliam nga ariadda matindian i desisiommu anna posible nga marigatakka megafu tatun. Ngem ariannaka pagurayan ni Jehova. Mabbalikka tu parte na interu mundo nga familia na minillion nga totolay nga napafutuan nga makka-aya-aya, anna egga i tiansam nga mattolay tu mannanayun ta napabagu nga mundo na Dios. (Marcos 10:28-30) Puede nga danuri kofun anna kafamiliam nga nangontra ta desisiommu nga masserbi kani Jehova ay maddesision noka nga maggigiammu tu Biblia.

20. Ngatta importante nga fustu nakuan i paddayaw ta Dios?

²⁰ Ari ngana mabbayag, daralan noka na Dios i ngamin nga kinamarake anna mammaguray ta interu mundo i Pappatulanna. (2 Pedro 3:9, 13) Makakkasta yatun noka nga tiempo! Dayawan noka na ngamin si Jehova segun ta kayàna nga paddayaw tam nisa. Yari tu importante nga magguyu ka ngana sangawe anna fustu nakuan i paddayom ta Dios.