1, 2. Ngatta makagim nga espesial nga regalu i pakimallo, anna ngatta mawag tam ammuan nu anni i ituddu na Biblia meyannung tatun?

 BALABADDI i mundo kumpara ta uniberso. Nu innan ni Jehova i mundo, gittana tanga-turu laman ta tanga-baldi nga danum i ngamin nga totolay ta ngamin nga nasion. (Salmo 115:15; Isaias 40:15) Maski paga balabaddi ittam kumpara ta uniberso, kagian na Salmo 145:18, 19: “Aranni yaya ta ngamin nga magagal sa—ta ngamin nga napafutu i pagagal da. Iyawa na i mawag na ngamin nga mammakakua sa; ginnan na i pakimallo da anna paliaran na ira.” Kuruga dakal nga pribilehio yatun nittam! Kayà na makapangngua nga Namaratu nga si Jehova nga maddukko nittam, anna kayàna nga ginnan i pakimallo tam ira. Wan, i pakimallo ay pribilehio, tadday nga espesial nga regalu ni Jehova ta kada tadday nittam.

² Ngem ginnan ittam laman ni Jehova nu apprubanna i akkimallo tam. Kunnasi tam makua yatun? Innattam nu anni i kagian na Biblia meyannung ta pakimallo.

3. Ngatta makimallo ka kani Jehova?

³ Kayà ni Jehova nga makimallo ka onu makiyuvovug ka nisa. Ngatta makagi tam yatun? Fabor bi nga bibbigan i Filipos 4:6, 7. Nonopan yatun nga meddu nga imbitasion. Talaga interesadu nikaw i Mammaguray ta uniberso anna kayàna nga ikagim nisa i mataga-tageno mu anna i problemam ira.

4. Kunnasi nga paladdan na regular nga pakimallo i pakikkofummu kani Jehova?

⁴ Uffunan ittam na pakimallo tapenu mapeggan tu  meggo nga pakikkofun kani Jehova. Nu kanayun nga maguvovug i makkofun meyannung ta nononopadda, pakavurungadda, anna mataga-tagenoda, mas malladda i pakkofudda. Kunnatun gapa i pakimallo kani Jehova. Ta Biblia, kakkagian ni Jehova nikaw i nononopan anna mataga-tagenona, kunne na gapa i kuanna ta mappange. Nu kanayukka nga makiyuvovug nisa, mekagim maski i kononaggammu. Durante nga kuammu yatun, mas malladda i pakikkofummu kani Jehova.​—Santiago 4:8.

5. Ngatta makagi tam nga ari ginnan ni Jehova i ngamin nga pakimallo?

⁵ Ginnan kari ni Jehova i ngamin nga pakimallo? Ari. Ta tiempo ni profeta Isaias, kinagi ni Jehova ta Israelita ira: “Maski nu mamippiga kamu maddasal, ari ngà magginna; napannu i limi-limanu tu daga.” (Isaias 1:15) Yayya nga nu ariattam magimmugug, baka makangngua ittam tu gannug ira nga mangiyarayyu nittam kani Jehova, anna gafu tatun, arianna ginnan i pakimallo tam ira.

6. Ngatta importante i pangurug? Kunnasim pakurugan nga egga i pangurug mu?

 ⁶ Nu kayà tam nga ginnan ni Jehova i pakimallo tam, mawag tu mangurug ittam nisa. (Marcos 11:24) Niyesplika ni apostol Pablo: “Nu awan tu angngurug na tolay, arian na nga awayya nga mapagayaya i Dios. Ta i sinni laman nga umaranni ta Dios ay mawag tu kurugan na tu egga i Dios ay tu bala-balattan na Dios danuri i magaleg sa.” (Hebreo 11:6) Ngem kurang i basta pakkagi nga egga i pangurug tam. Mawag tu pakurugattam i pangurug tam gukaban na inaggaw nga panuttul kani Jehova.​—Bibbigan i Santiago 2:26.

7. (a) Ngatta mapakalinno anna marespeto ittam nakuan nu makimallo kani Jehova? (b)  Kunnasi tam mepasingan nga sinsero ittam nu makimallo?

⁷ Mawag tu mapakalinno anna marespeto ittam nu makimallo kani Jehova. Ngatta? Nu makiyuvovug ittam ta patul onu ta presidente, siguradu nga marespeto ittam. Si Jehova i Makapangngua-sa-ngamin nga Dios, yayya nga ari kari nga mas marespeto anna mapakalinno ittam nakuan nu makiyuvovug nisa? (Genesis 17:1; Salmo 138:6) Sinsero ittam nakuan gapa anna napafutuan nga makimallo kani Jehova, ari tu para-parehu onu pakatotoli i kakkagiattam.—Mateo 6:7, 8.

8. Nu ipakimallo tam kani Jehova i tadday nga gannug, anni paga i mawag nga kuattam?

⁸ Nu ipakimallo tam i tadday nga gannug, mawag tu kuattam i adde na mawayya tam nga itrabahu yatun. Angngariganna, nu ipakimallo tam kani Jehova i inaggaw nga pakawagattam, ariattam mattala-talakag nga basta innaggattam nga iyawa ni Jehova i ngamin nittam maski nu ariattam pinabbannagan yatun. Mawag tu mallallappo anna akseptattam i maski anni nga trabahu nga awayya tam nga kuan. (Mateo 6:11; 2 Tesalonica 3:10) Anna nu makimallo ittam  kani Jehova tapenu meyemmang i gannug nga marake, mawag tu lillitattam i maski anni nga situasion nga makatenta nittam. (Colosas 3:5) Gigiammuattam ngana sangawe i pakkiavu ira meyannung ta pakimallo.

9. Sinni nakuan i pappakimallokattam? Anni i ituddu nittam na Juan 14:6 meyannung ta pakimallo?

⁹ Sinni nakuan i paddasallattam? Sinudduan ni Jesus i disipulosna nga makimallo ta ‘Ama tam nga egga ta langi.’ (Mateo 6:9) Kunna paga: “Sakan i dalan, i kurug, anna inango. Awan tu makangay ta Yama nu ari labbi nga umay niakan.” (Juan 14:6) Yari tu makimallo ittam laman kani Jehova gukaban ni Jesus. Anni i kayà kagian na makimallo gukaban ni Jesus? Tapenu alawatan ni Jehova i pakimallo tam ira, mawag tu irespeto tam i espesial nga posision ni Jesus nga naggafu kani Jehova. Kagitta na nagigiammu tam, minay si Jesus ta davvun tapenu ipaliag ittam ta liwa anna patay. (Juan 3:16; Roma 5:12) Sinunno gapa ni Jehova si Jesus bilang Atannang nga Pari anna Hues.​—Juan 5:22; Hebreo 6:20.

10. Mawag kari i espesial nga postura nu makimallo ittam? Iyesplika.

¹⁰ Egga kari kawagan nga postura nu makimallo ittam? Awan. Ari ikiddaw ni Jehova nga mawag tu mappalittukag, magitubang, onu tumaddag ittam nu makimallo. Ituddu na Biblia nittam nga puede tam makibbida nisa ta maski anni nga marespeto nga postura. (1 Cronicas 17:16; Nehemias 8:6; Daniel 6:10; Marcos 11:25) Nu makimallo ittam, ari gafu tu i postura i importante kani Jehova, nu ari, i marespeto anna napafutuan nga pakimallo. Puede tam makimallo tu masikan onu silensio maski sitaw i diattam anna maski anni nga oras ta aggaw onu gabi. Nu makimallo ittam kani Jehova, makapattalo ittam nga ginnanna ittam maski awan tu tolay nga magginna nittam.​—Nehemias 2:1-6.

11. Anni ira i gannug nga awayya tam ipakimallo kani Jehova?

 ¹¹ Anni i awayya tam ipakimallo? Awayya tam ipakimallo kani Jehova i maski anni nga anugutanna. Kagian na Biblia: “Tangngagan [onu, ginnan] na ittam ta anni laman nga kiddawat-tam sa nga metuttul ta uray na.” (1 Juan 5:14) Awayya tam kari nga ipakimallo i personal ira nga gannug? Wan. I pappakimallo kani Jehova ay kagitta nakuan na pakiyuvovug ta madukko nga kofun. Awayya tam kagian kani Jehova i ngamin nga egga ta nono anna futu tam. (Salmo 62:8) Awayya tam ipakimallo nga iddanna ittam tu makapangngua nga masanto nga espirituna tapenu uffunan ittam nga kuan i fustu. (Lucas 11:13) Awayya tam paga makkiddaw kani Jehova tu sirib tapenu makapaddesision tu mapia, anna makkiddaw tu sikan tapenu marubang i problema ira. (Santiago 1:5) Ikiddaw tam nakuan kani Jehova nga pakomanna i liwi-liwa tam. (Efeso 1:3, 7) Ipakimallo tam nakuan gapa i tanakuan​—i familia tam anna i wawwaragi ta kongregasion.​—Kingngua 12:5; Colosas 4:12.

12. Anni nakuan i pinaka-importante ta pakimallo tam ira?

¹² Anni nakuan i pinaka-importante ta pakimallo tam? Si Jehova anna i urena. Napafutuan nakuan nga mappabalo ittam nisa ta ngamin nga kingnguana para nittam. (1 Cronicas 29:10-13) Ammu tam yaw megafu ta sinudduan ni Jesus i disipulosna nu kunnasi i makimallo ta keggana ta davvun. (Bibbigan i Mateo 6:9-13.) Kinagina nga ollu labbi nga ipakimalloda nga mapakasanto nakuan i ngagan na Dios, kayàna kagian, matratu nga sagradu onu marenu. Kabalinna, nipasingan ni Jesus nga ipakimallo tam nakuan nga duttal i Pappatulan na Dios anna makua i uray ni Jehova ta interu davvun. Kinagi ni Jesus nga olluattam labbi danatun nga importante nga gannug nige tam ipakimallo i personal ira nga pakawagattam. Nu pagolluattam  si Jehova anna i urena ta pakimallo tam ira, mepasingattam nu anni i pinaka-importante nittam.

13. Kunnasi nakuan kapaddu i pakimallo tam?

¹³ Kunnasi nakuan kapaddu i pakimallo tam? Awan tu kinagi na Biblia. Awayyana nga ababba onu apaddu i pakimallo tam depende ta situasion. Angngariganna, awayya tam makimallo tu ababba nige tam kuman ngem mas apaddu nu mappabalo ittam kani Jehova onu  nu ikagi tam nisa i vuru-vuruttam. (1 Samuel 1:12, 15) Manaki tam i makimallo tu apaddu tapenu laman manga tu atension na totolay, gitta na kingngua na karuan ta kaggawan ni Jesus. (Lucas 20:46, 47) Ari nga mapagayayya si Jehova ta kuddanatun nga pakimallo. Importante nisa i napafutuan nga pakimallo.

14. Mamippiga ittam nakuan nga makimallo, anna anni i ituddu nittam naw meyannung kani Jehova?

¹⁴ Mamippiga ittam nakuan nga makimallo? Kayà ni Jehova nga kanayun ittam nga makiyuvovug nisa. Kagian na Biblia nga mawag tu ‘maddasal ta maski anni nga tiempo,’ ‘maddasal ta ngamin nga tiempo,’ anna “aggaw-gabi nga makadasa-dasal.” (Roma 12:12; 1 Tesalonica 5:17; 1 Timoteo 5:5) Kanayun nga agga-paran si Jehova nga ginnan ittam. Awayya tam mappabalo nisa kada aggaw ta aya  anna kinavuka-palagna. Puede tam gapa makkiddaw nisa tu giya, sikan, anna banna-bannay. Nu talaga tagibalorattam i pribilehio tam nga makimallo kani Jehova, usattam i ngamin nga tiansa tapenu makiyuvovug nisa.

15. Ngatta makkagi ittam nakuan tu “amen” ta ultimu na pakimallo?

¹⁵ Ngatta makkagi ittam nakuan tu “amen” ta ultimu na pakimallo? I kebalinan na termino nga “amen” ay “siguradu” onu “paray nakuan.” Pangipasingan yaw nga serioso anna sinsero ittam ta nipakimallo tam. (Salmo 41:13) Ituddu na Biblia nittam nga makasta gapa nga makkagi tu “amen,” maski silensio onu masikan, ta ultimu na publiko nga pakimallo tapenu ipasingan nga umanugu ittam ta nepakimallo.​—1 Cronicas 16:36; 1 Corinto 14:16.

16. Kurug kari nga tabbagan ni Jehova i pakimallo tam ira? Iyesplika.

¹⁶ Kurug kari nga tabbagan ni Jehova i pakimallo tam ira? Wan. Nagalan yayya ta Biblia nga “Minagginna tu pakimallo.” (Salmo 65:2, NW ) Gigginnan anna tattabbagan ni Jehova i sinsero ira nga pakimallo na minillion nga totolay, anna nadduruma i panabbagna tatun.

17. Kunnasi usu-usan ni Jehova i anghel anna i aripanna ira ta davvun tapenu tabbagan i pakimallo tam ira?

¹⁷ Usu-usan ni Jehova i anghel anna i aripanna ira ta davvun tapenu tabbagan i pakimallo tam ira. (Hebreo 1:13, 14) Aru nga totolay i naka-ekspiriensa ngana nga nakimallo tapenu malippawada nakuan i Biblia tapus ari nabbayag, egga i nabbisita nira tu Saksi ni Jehova. Ipasingan na Biblia nga makipapparte i anghel ira ta pangilammuyag ta “evanghelio” [“mapia nga dumug,” NW ] ta interu davvun. (Bibbigan i Nepakannammu 14:6.) Aru ngana gapa nittam i nakimallo kani Jehova meyannung ta espesipiko ira nga problema onu pakawagan  anna kabalinna nakalawa ittam tu uffun naggafu ta kapangngurug tam ira.​—Proverbio 12:25; Santiago 2:16.

18. Kunnasi usan ni Jehova i masanto nga espirituna anna i Biblia tapenu tabbagan i pakimallo ira?

¹⁸ Usu-usan ni Jehova i masanto nga espirituna tapenu tabbagan i pakimallo tam ira. Nu mappoffun ittam ta tadday nga problema, awayyana usan i masanto nga espirituna tapenu igiya anna pasikannan ittam. (2 Corinto 4:7) Usu-usan gapa ni Jehova i Biblia tapenu tabbagan i pakimallo tam ira anna uffunan ittam nga makapaddesision tu masirib. Nu bibbigattam i Biblia, makaleg ittam tu teksto ira nga makoffun nittam. Puede gapa nga egga i paguyuan ni Jehova nga makkomento ta study nga makkagi tu mawag nga maginna tam onu tadday nga elder ta kongregasion nga mangibillay nittam tu tadday nga punto ta Biblia.​—Galacia 6:1.

19. Ngatta gittana ari nga tattabbagan ni Jehova i pakimallo tam ira?

¹⁹ Nu mittan, baka manono tam, ‘Ngatta ari paga sinabbag ni Jehova i pakimallo ku ira?’ Daddamman, ammuna nu sonu anni anna nu kunnasi nga tabbagan i pakimallo tam ira. Ammuna nu anni i mawag tam. Baka mawag tu ipakimallo tam paga yatun tu piga nga tiempo tapenu mepasingattam nga napafutuan i nipakimallo tam nisa anna egga i pangurug tam nisa. (Lucas 11:5-10) Nu mittan, ari tu i ekspektattam i tabbag ni Jehova ta pakimallo tam. Angngariganna, awayya tam nga ipakimallo i tadday nga problema, ngem imbes nga alsanna yatun, iddanna lallagu ittam tu sikan tapenu maattamman yatun.​—Bibbigan i 2 Corinto 4:7.

20. Ngatta kanayun ittam nakuan nga makimallo kani Jehova?

²⁰ Anni ngana mabba nga pribilehio tam nga makimallo kani Jehova! Makasiguradu ittam nga ginnanna ittam. (Salmo 145:18) Anna nu kanayun nga napafutuan i pakimallo tam kani Jehova, mas malladda i pakikkofuttam nisa.