1, 2. Sitaw i pakalegattam tu proteksion ta maddaggun?

 NONOPAN nga lumalakag ka ta lawan durante nga mappange i bagiu. Mazzibbo ngana i langi, mamegafu nga makkili-kila anna magarugug. Kabalinna, nagurang tu masikan. Nagaleg ka tu pallirumammu. Nabanna-bannayakka ta nakaleg ka tu memammo anna mamaga nga lugar!

² Kunnatun gapa i situasiottam ta maddaggun. Maggragrabe i kondision na mundo. Baka manono mu, ‘Sitaw i pakalegakku tu proteksion?’ Nitura na salmista na Biblia: ‘Kagiakku ta YAFU, “Sikaw i mangiyegu anna mamaliag niakan. Sikaw i Dios ku nga ek-ku pammakatalakkan.”’ (Salmo 91:2) Wan, mabanna-bannayan ittam ni Jehova ta problema tam ira sangawe, anna iddanna ittam tu makakkasta nga iddanama ta mappange.

3. Kunnasi tam pabbalinan nga pakiyegutan si Jehova?

³ Kunnasi ittam protektan ni Jehova? Moffunanna ittam nga arubangan i maski anni nga problema tam, anna mas makapangngua yayya anne ta maski sinni nga mamappeligro nittam. Maski nu egga marake nga mesimmu nittam sangawe, makasiguradu ittam nga pakappian noka ni Jehova i nadaral ta mappange. Kunnaw i pamasikan nittam na Biblia: “Ari kamu nga umarayyu ta aya na Dios.” (Judas 21) Mawag tu mattalupaddiattam nga madukko kani Jehova tapenu malawà tam i uffunna taw ira nga mariga nga tiempo. Ngem kunnasi tam makua yatun?

4, 5. Kunnasi nga nipasingan ni Jehova i ayana nittam?

⁴ Tapenu makapattalupaddian nga madukko kani Jehova, mawag tu matindiattam nu kunnasi kadakal i ayana  nittam. Nonopan i ngamin nga kingngua ni Jehova para nittam. Niyawana i makapabbaw nga davvun anna pinannuna yatun tu magaganas nga mulu-mula anna aya-ayam. Niddanna gapa ittam tu masingngo nga makan anna marenu nga danum. Gukaban na Biblia, nituddu nittam ni Jehova i ngaganna anna i meddu ira nga kualidadna. I kapianan ta ngamin, nipasinganna i ayana nittam tagga ta zinogna i meddu nga Anana, si Jesus, ta davvun tapenu matay para nittam. (Juan 3:16) Megafu paga tatun nga sakrifisio, egga makakkasta nga iddanama tam ta mappange.

⁵ Niyunnug gapa ni Jehova i Mesianiko nga Pappatulan, tadday nga gobiernu ta langi nga mamangultimu ta ngamin nga ziga-riga. Pabbalinan na Pappatulan i davvun tu paraiso, nu sitaw mannanayun nga mattolay tu memammo anna magayayya i ngamin. (Salmo 37:29) Nipasingan paga ni Jehova i ayana nittam gukaban na panuddu nittam ta kapianan nga pattolay nga posible ta maddaggun. Imbitanna paga ittam nga makimallo nisa, anna kanayun yayya nga sigga-paran nga magginna ta dasal tam ira. Manawag i pinangipasingan ni Jehova tu ayana ta kada tadday nittam.

6. Kunnasim ipasingan i aya mu kani Jehova?

⁶ Kunnasim ipasingan i aya mu kani Jehova? Ipasingan nga mappabalo ka ta ngamin nga kingnguana para nikaw. Ngem kaddaraddam ta aru sangawe i ari nga minappabalo. Kunnatun gapa tagga ta egga ta davvun si Jesus. Mittan, inuru ni Jesus i mafulu nga mallepproso, ngem tattadday laman i nappabalo nisa. (Lucas 17:12-17) Kayà tam parigan i lalaki nga nappabalo kani Jesus. Kayà tam kanayun i mappabalo kani Jehova.

7. Kunnasi nakuan i konag na aya tam kani Jehova?

⁷ Mawag tam gapa nga ipasingan i aya tam kani Jehova. Kinagi ni Jesus ta disipulosna nga mawag tu ayatadda si Jehova ta interu futuda, interu kararua, anna interu nga nono da. (Bibbigan i Mateo 22:37.) Anni i kebalinan natun?

8, 9. Kunnasi tam mepasingan kani Jehova nga ayatattam yayya?

 ⁸ Makalanno ngana kari nga basta kagiattam nga ayatattam si Jehova? Ari. Nu ayatattam si Jehova ta interu futu, kararua, anna nono tam, ipasingattam i aya tam sa gukaban na kukukuattam. (Mateo 7:16-20) Manawag nga ituddu na Biblia nga nu ayatattam i Dios, kuattam gapa i bili-bilinna. Mariga kari yatun? Ari, megafu ta “ari gammabba tu mariga nga tuttulan” i bili-bilin ni Jehova.​—Bibbigan i 1 Juan 5:3.

⁹ Nu kuattam i ipakua ira ni Jehova, mabbalin tu magayayya anna kontentu i pattoletam. (Isaias 48:17, 18) Ngem anni i makoffun tapenu makapattalupaddiattam nga madukko kani Jehova? Ammuattam.

10. Ngatta mawag tu ariammu immangan nga maggigiammu meyannung kani Jehova?

¹⁰ Kunnasi ka nabbalin tu kofun ni Jehova? Gukaban na paggigiammum tu Biblia, mas nakannammuammu si Jehova anna napeggan tu pakikkofun nisa. Yaw nga pakkofun ay gittana afi nga kayà mu nga tulu-tuloy nga magganga. Nu kunnasi nga mawag tu maduppangan i afi tapenu ari maddo, mawag tu ariammu immangan nga maggigiammu meyannung kani Jehova tapenu kanayun nga maladda i pakkofunnu dua.​—Proverbio 2:1-5.

11. Anni i efekto nikaw na magigiammum ira ta Biblia?

¹¹ Durante nga tulu-tuloy nga gigiammuammu i Biblia, egga ira magigiammum nga talaga makatukkal ta futum. Innan nu anni i natageno na dua nga disipulos ni Jesus tagga ta niyesplikana nira i profesiya ira na Biblia. Kinagida: “Yatun gabba tu ke-pia na annagenappat-ta turi ta ipakanawag na nitta i Masanto nga Tura ta kegga tam ta dalan!”​—Lucas 24:32.

12, 13. (a) Anni i posible nga mesimmu ta aya tam ta Dios? (b) Kunnasi tam mapattalupaddian nga mapatu i aya tam kani Jehova?

¹² Nu kunnasi nga natukkal i futu na disipulos ni Jesus  turi ta nalippawada i Katurakan, baka kunnatun gapa i natageno mu nga ayayya tagga ta namegafum nga malippawa i Biblia. Nakoffun yaw tapenu makannammuammu si Jehova anna ayatammu yayya. Manaki mu nga mallamming yaw nga aya.​—Mateo 24:12.

¹³ Oras tu kofun naka ngana na Dios, mawag tu mappursigi ka nga pattalupaddianan nga maladda i pakkofunnu. Mawag tu tulu-tuloy nga maggigiammu ka meyannung nisa anna kani Jesus anna nonopan tu mapia danatun anna nu kunnasim meyaplika ta pattolem. (Juan 17:3) Kada bibbigan onu gigiammuammu i Biblia, iyavu ta baggim: ‘Anni i ituddu naw niakan meyannung kani Jehova nga Dios? Ngatta mawag tu ayatakku yayya ta interu futù anna kararuà?’​—1 Timoteo 4:15.

14. Kunnasi makoffun i pakimallo tapenu mattalupaddian nga masikan i aya tam kani Jehova?

¹⁴ Nu egga madukko nga kofummu, kanayukka nga makiyuvovug nisa, anna yatun i mamattalupaddian ta  maladda nga pakkofunnu. Kunnatun gapa, nu kanayuttam nga makiyuvovug kani Jehova ta pakimallo, yatun i mamattalupaddian nga masikan ta aya tam nisa. (Bibbigan i 1 Tesalonica 5:17.) Makakkasta nga regalu maggafu ta nelangitan nga Yama tam i pakimallo. Mawag nga kanayuttam makibbida nisa tu naggafu ta futu tam. (Salmo 62:8) Ariattam nakuan itotoli i memoriadu nga pakimallo, nu ari, mawag tu sinsero ittam ta kagiattam. Kurug nga nu tulu-tuloy ittam nga maggigiammu tu Biblia anna napafutuan nga makimallo, mapattalupaddiattam nga masikan i aya tam kani Jehova.

15, 16. Kunnasim imammatan i trabahu nga pallayyagayya?

¹⁵ Nu kayà tam mattalupaddian nga madukko kani Jehova, mawag gapa nga ipakiyuvovug tam ta tanakuan i nagigiammu tam ta Biblia. Makakkasta nga pribilehio i pakkagi ta tanakuan meyannung kani Jehova. (Lucas 1:74) Responsibilidad gapa yatun nga niyawa ni Jesus ta ngamin nga kurug nga Cristiano. Mawag nga ilayyagayya na kada tadday nittam i mapia nga dumug na Pappatulan na Dios. Nakuam kari ngana yatun?​—Mateo 24:14; 28:19, 20.

¹⁶ Natageno ni apostol Pablo nga nabala-balor i pallayyagayya; inagalanna yatun nga tadday nga “minas.” (2 Corinto 4:7, NW ) I pangikagi ta tanakuan meyannung kani Jehova anna ta gakkagna i pinaka-importante nga trabahu nga makuam. Passerbi yatun kani Jehova, anna tagibaloranna i makuam para nisa. (Hebreo 6:10) Makabenefisio gapa nikaw i pallayyagayya kunne na gapa turi ira ta magginna nikaw megafu ta moffunammu i tanakuan anna i baggim nga maddukko kani Jehova anna mapeggan tu mannanayun nga inango. (Bibbigan i 1 Corinto 15:58.) Egga kari paga i tanakuan nga trabahu nga mas mamagayayya nikaw?

17. Ngatta ari metalattan i trabahu nga pallayyagayya?

 ¹⁷ Ari metalattan i trabahu nga pallayyagayya. Mawag nga ‘ilammuyag tam i uvovug’ anna ‘aggaparan ittam nga mallayyagayya.’ (2 Timoteo 4:2) Mawag tu maginna na totolay i meyannung ta Pappatulan na Dios. Kagian na Biblia: “Aranni ngana i dakal nga aggaw ni Jehova! Aranni ngana anna kuruga paspas i dattalna!” I panuppalan ay “ari nga matalattan!” (Zefanias 1:14; Habakuk 2:3) Wan, araranni ngana nga daralan ni Jehova i marake nga mundo ni Satanas. Nige mesimmu yatun, mawag nga maabisowan i totolay tapenu mapilida nga masserbi kani Jehova.

18. Ngatta mawag nga dayawattam si Jehova kavulu i kurug ira nga Cristiano?

¹⁸ Kayà ni Jehova nga dayawattam yayya kavulu na kurug ira nga Cristiano. Kagian na Biblia: “Ay nonopat-tam nu kunnasi na pakka-uffu-uffut-tam nga mangipasingan ta aya anna pangngua ta mapia. Ariat-tam nga immangan i paggarammammung tam, kagitta na kuan na karuan ira. Makkapasa-pasikan ittam lallagu tu nono, netallugaring ta masingat-tam tu aranni ngana i Aggaw na Yafu.” (Hebreo 10:24, 25) Kuattam nakuan i adde na mawayya tam nga magatende ta ngamin nga study. Iddan ittam na study ira tu tiansa tapenu makkapaga-pagaram anna makkapasa-pasikan tu nono.

19. Anni i makoffun tapenu ayatattam i kapangngurug tam?

¹⁹ Nu maki-study ka, makaleg ka tu mapia nga kokkofun nga manguffun nikaw ta passerbim kani Jehova. Madduruma nga wawwaragi i makilalam nga kagittam nga magaggangngua tu adde na mawayyada tapenu maddayaw ta Dios. Kagittam gapa ira nga imperfekto anna makkamali. Nu makkamali ira, sigga-paran nakuan nga pakomammu ira. (Bibbigan i Colosas 3:13.) Kanayun nga maffokus ta makasta ira nga ugali na kapangngurug tam, megafu ta makoffun nikaw yatun tapenu ayatammu ira anna mas maddukko ka kani Jehova.

20, 21. Anni i “kurug nga pattolay”?

²⁰ Kayà ni Jehova i pinakamakasta nga pattolay para ta ngamin nga kokkofunna. Ituddu na Biblia nittam nga i pattoletam ta mappange ay nerumu-ruma kumpara ta pattoletam ta maddaggun.

²¹ Ta mappange, mattolay ittam tu mannanayun, ari laman tu 70 onu 80 nga dagun. Mapeggan ittam tu “inango nga adde ta ngangangay” nu sitaw egga i perfekto nga gawa-gawayyan, imammo, anna pagayayya ta makakkasta nga paraiso. Yatun i tukuyan na Biblia nga “kurug nga pattolay.” Nipromesa ni Jehova nga iyawana nittam yaw nga kurug nga pattolay, ngem kuattam nakuan i ngamin nga mawayya tam sangawe tapenu “mala” yatun.​—1 Timoteo 6:12, 19.

22. (a) Kunnasi tam ‘mala i kurug nga pattolay’? (b) Ngatta ariattam vuluvuga mepappangngo para ta mannanayun nga inango?

²² Kunnasi tam ‘mala i kurug nga pattolay’? Mawag tu ‘mangngua ittam ta mapia’ anna ‘marriku ta mapia nga pangnga-pangngua.’ (1 Timoteo 6:18) Kayà kagian natun nga iyaplika tam i nagigiammu tam ta Biblia. Ngem i kurug nga pattolay ay ari tu nakadepende ta mismu laman nga appursigi tam. Ariattam vuluvuga mepappangngo para ta mannanayun nga inango. Libre yatun nga regalu ni Jehova ta matalo nga aripanna ira, tadday nga angngarigan na “ari nga kapaga-pagan nga pagallo na.” (Roma 5:15) Kakayà na nelangitan nga Yama tam nga iyawa yaw nga regalu ta matalo ira nga aripanna.

23. Ngatta mawag tu fustu ira i desisiommu sangawe?

²³ Iyavu ta baggim, ‘Daya-dayawakku kari i Dios segun ta kayàna?’ Nu egga ira mawag mu nga ulian, mawag tu kuammu ngana insigida danatun. Nu maddepende ittam kani Jehova anna kuan i adde na mawayya tam nga tuppalan yayya, mabbalin si Jehova nga akkiyegutattam. Pattalupaddiananna nga arayyu ta peligro i matalo nga totolena  durante ta pangurianan nga aggaw na marake nga mundo ni Satanas. Siguraduan paga ni Jehova nga mattolay ittam tu mannanayun ta Paraiso, gitta na nepromesana. Wan, awayyam mapeggan tu kurug nga pattolay nu fustu ira i desisiommu sangawe!