1. Anni i gakkag na Dios para ta totolay?

 MAKAKKASTA i gakkag na Dios para ta totolay. Pinaratuna i ollu nga lalaki anna babay, da Adan anni Eva nga maddian ta makakkasta nga laguerta. Ginakkagna nga maggaka ira, tapenu pabbalinan tu paraiso i interu mundo, anna tangngalladda i aya-ayam.​—Genesis 1:28; 2:8, 9, 15; innan i Endnote 6.

2. (a) Ngatta ammu tam nga kuan ni Jehova i ginakkagna? (b) Sinni i maddian taw ta davvun anna kunnasi kapaddu?

² Para nikaw, duttal kari noka i tiempo nga maddian ittam ta paraiso? Kagian ni Jehova nittam: “Ginakkag ku yatun, tuppalakku gapa.” (Isaias 46:9-11; 55:11) Wan, kuanna i ginakkagna anna awan tu makefugag nisa. Kinagi ni Jehova nga egga i rason nu ngatta pinaratuna i mundo. “Arianna pinaratu yatun nga awan tu sesserbina.” (Isaias 45:18) Kayàna nga mapannu i mundo tu totolay. Anni nga klase na totolay i kayà na Dios nga mattolay taw, anna kunnasi kapaddu? Kagian na Biblia: “I matunung [onu, minattuppal] ira ay irensiad-da i davvun, anna maddian ira taw tu mannanayun.”​—Salmo 37:29; Nepakannammu 21:3, 4.

3. Megafu ta mattaki anna matay i totolay, anni gafu i meyavu mu?

³ Ngem mattaki anna matay i totolay ta maddaggun. Ta aru nga lugar, marralaban anna mapparatay ira. Siguradu nga ari tu yaw i gakkag na Dios. Anni gare i nesimmu? Ngatta kunnatun? Biblia laman i makeyesplika.

4, 5. (a) Sinni i nakiyuvovug kani Eva gukaban na iraw ta hardin na Eden? (b) Kunnasi mabbalin tu koko i masippo nga tolay?

⁴ Kagian nittam na Biblia nga egga i kalaban na Dios  nga “mangagan tu Demonio, onu Satanas.” Nangusa si Satanas tu iraw tapenu makiyuvovug kani Eva ta hardin na Eden. (Nepakannammu 12:9; Genesis 3:1) Pinalawanna nga gittana yari iraw talaga i makikkiyuvovug.​—Innan i Endnote 7.

⁵ Yayya nga, i Dios kari i namaratu kani Satanas nga Diablo? Ari! Dati yayya nga anghel nga egga ta langi turi ta niprepara na Dios i mundo para kada Adan anni Eva. Nanguli yayya anna nabbalin tu Demonio. (Job 38:4, 7) Posible kari yatun? Bueno, kunnasi kari nga mabbalin tu koko i tadday nga masippo nga tolay? Ari yayya neyana tu koko. Ngem kinaragatanna, onu nikayàna i gannug nga arianna nga kukua. Agga-nonona yatun, yari tu nassikan i mali nga pakkaragana. Kabalinna, turi ta egga i tiansana, kinokona yatun. Pinabbalinna tu koko i baggina.​—Bibbigan i Santiago 1:13-15; innan i Endnote 8.

6. Kunnasi nabbalin tu kalaban na Dios i tadday nga anghel?

⁶ Kunnaw i nesimmu tatun nga anghel. Turi ta pinaratu ni Jehova da Adan anni Eva, kinagina nira nga maggaka ira anna ‘pannuadda i davvun.’ (Genesis 1:27, 28) Posible nga nanono natun nga anghel, ‘Awayyana nga sakan i dayawan danaw nga totolay imbes tu si Jehova!’ Gafu ta agga-nonona yatun, mas kinaragatanna i kukua ni Jehova. Kayà natun nga anghel nga dayawan yayya na totolay. Nalladdug yayya kani Eva yari tu nelogo si Eva. (Bibbigan i Genesis 3:1-5.) Ta pangnguana tatun, nabbalin yayya tu Satanas nga Diablo, nga kalaban na Dios.

7. (a) Ngatta natay da Adan anni Eva? (b) Ngatta mallakay onu mabbako anna matay ittam?

⁷ Ari sinuttul da Adan anni Eva i Dios gukaban na pakkakadda ta vunga. (Genesis 2:17; 3:6) Nakaliwa ira kani Jehova, yayya nga natay ira gabbalaman, gitta na kinagi ni Jehova nga mesimmu nira. (Genesis 3:17-19) Minakkaliwa  [onu, minattagaruli] gapa i ána da Adan anni Eva, yari tu matay ira. (Bibbigan i Roma 5:12.) Tapenu malippawa tam nu kunnasi nabbalin tu minattagaruli i ána da Adan anni Eva, ikonsidera tam yaw nga angngarigan. Nonopammu nga mallutu ka tu tinapay ta orma nga nakupi. Siguradu nga meforma ta tinapay i kupi na orma. Kabalin nga ari sinuttul ni Adan i Dios, nabbalin yayya tu minattagaruli. Megafu ta gaka ittam ni Adan, nabbalin ittam ngamin tu minattagaruli, onu egga i “kupi” tam kagitta ni Adan. Megafu ta minattagaruli ittam ngamin, mallakay onu mabbako ittam anna matay.​—Roma 3:23; innan i Endnote 9.

8, 9. (a) Anni i kayà ni Satanas nga kurugan da Adan anni Eva? (b) Ngatta ari insigida nga pinatay ni Jehova i rebelde ira?

⁸ Narrebelde si Satanas kontra kani Jehova turi ta sinulsulanna da Adan anni Eva nga ari tuttulan i Dios. Kayàna nga kurugan da Adan anni Eva nga laddug si Jehova, nga marake yayya nga mammaguray anna iyetuna nira i kapianan. Kakkagian ni Satanas nga ari mawag na totolay i Dios tapenu kagian nira nu anni i kuadda, anna da Adan anni Eva lagapa nakuan i maddesision nu anni i fustu anna nu anni i mali. Anni gafu i kuan ni Jehova? Awayyana nga patayan i rebelde ira anna pagimmangan i rebelyon. Ngem mapakurug kari natun nga laddug si Satanas? Ari.

⁹ Yatutta, ari insigida nga pinatay ni Jehova i rebelde ira. Lallagu, niddanna tu tiempo i totolay nga pammagurayan i baggida. Pakurugan naw nga laddug si Satanas anna ammu ni Jehova nu anni i kapianan para ta totolay. Mas aru paga i magigiammu tam meyannung tatun ta Kapitulo 11. Ngem anni i makagim ta kingngua da Adan anni Eva? Mepangngo kari nga kurugadda si Satanas anna ari tuttulan i Dios? Naggafu kani Jehova i ngamin nga kukuada. Niddanna ira tu perfekto nga pattolay, makakkasta nga paddianan, anna makapagayayya nga trabahu. Ngem  awan vuluvuga tu kingngua ni Satanas nga makasta nira. Anni i kingnguam nu sikaw i egga tari?

10. Anni i importante nga pappili i mawag tu kuan na kada tadday nittam?

¹⁰ Ta maddaggun, egga gapa i pappiliattam tu kunnatun, anna nakadepende i inango tam ta piliattam. Awayya  tam pilian nga tuttulan si Jehova nga Mammaguray tam anna pakurugan nga laddug si Satanas. Onu awayya tam pilian nga si Satanas i mammaguray nittam. (Salmo 73:28; bibbigan i Proverbio 27:11.) Baddi ngana laman taw nga mundo i tumuttul ta Dios. Kakuruganna, ari tu i Dios i mammaguray ta mundo. Sinni gafu?

11, 12. (a) Anni i magigiammu tam ta pangiyofer ni Satanas ta mundo kani Jesus? (b) Anni ira nga teksto i mangipasingan nga si Satanas i mammaguray ta mundo?

¹¹ Ammu ni Jesus nu sinni talaga i mammaguray ta mundo. Mittan, “nipasingan na [Demonio] sa ngamin i pappatulan ta utun na davvun tuange ta ngamin nga makapabbaw nga egga nira.” Tapus nipromesa ni Satanas kani Jesus: “Iyawa ku nikaw ngamin danaw nu mappalittukag ka ta arubang ku anna daya-rayawam mà.” (Mateo 4:8, 9; Lucas 4:5, 6) Iyavu mu ta baggim, ‘Nu ari tu kukua ni Satanas yaw ira nga pappatulan, neyoferna kari yatun kani Jesus?’ Ari. Ngamin gafu nga gobiernu na totolay ay kukua ni Satanas.

¹² Baka manono mu: ‘Kunnasi nga si Satanas i mammaguray ta mundo? Ari kari tu si Jehova nga Makapangngua-sa-ngamin nga Dios i namaratu ta uniberso?’ (Nepakannammu 4:11) Wan, fustu yatun. Ngem manawag nga inagalan ni Jesus si Satanas bilang “mammaguray ta mundo.” (Juan 12:31; 14:30; 16:11) Inagalan gapa ni apostol Pablo si Satanas nga Diablo bilang “dios noye na mundo.” (2 Corinto 4:3, 4) Nitura gapa ni apostol Juan nga “i mundo ay egga ta pammaguray na Demonio.”​—1 Juan 5:19.

13. Ngatta mawag tam i napabagu nga mundo?

¹³ Mas nga maggragrabe sangawe i mundo. Napannu  tu gerra, korapsion, pagappappe, anna kinavayolente i mundo. Ari nga malsa na totolay danaw nga problema, maski kuadda i adde na mawayyada. Ngem aranni ngana nga daralan na Dios yaw nga marake nga mundo sonu Armagedon, anna taliananna yaw tu matunung nga napabagu nga mundo.​—Nepakannammu 16:14-16; innan i Endnote 10.

14. Sinni i pinili na Dios nga mabbalin tu Patul na Pappatulanna? Anni i niprofesiya na Biblia meyannung kani Jesus?

¹⁴ Pinili ni Jehova si Jesu-Cristo nga mabbalin tu Patul ta nelangitan nga gobiernuna, onu Pappatulan. Rinivu dagun i nappasa, niprofesiya na Biblia nga mammaguray si Jesus bilang “Prinsipe na Imammo” anna ari mangultimu i gobiernuna. (Isaias 9:6, 7) Sinudduan ni Jesus i disipulosna nga ipakimallo yaw nga gobiernu turi ta kinagina: “Maparattal paray i Pammagurem. Makua i urem toye ta davvun ta kunne ta langi.” (Mateo 6:10) Ta Kapitulo 8, magigiammu tam nu kunnasi daralan na Pappatulan na Dios i gobiernu ira na totolay. (Bibbigan i Daniel 2:44.) Kabalinna, pabbalinan na Pappatulan na Dios i mundo tu makakkasta nga paraiso.​—Innan i Endnote 11.

15. Anni i “bagu nga davvun”?

¹⁵ Nipromesa na Biblia: “Innaggat-tam i nitabba na Dios nga bagu nga langi anna bagu nga davvun nga pammagurayan na katunung.” (2 Pedro 3:13; Isaias 65:17) Mittan nu mabibbig ta Biblia i “davvun,” tukuyan natun i totolay nga maddian ta davvun. (Genesis 11:1) I tukuyan gafu na matunung nga “bagu nga davvun” ay i ngamin nga totolay nga tumuttul ta Dios anna bebbendisionanna.

16. Anni i makakkasta nga regalu na Dios turi ira ta maddian ta napabagu nga mundona, anna anni i kuattam tapenu mala tam yatun?

¹⁶ Nipromesa ni Jesus nga danuri maddian ta napabagu  nga mundo na Dios ay meddan noka tu “inango nga adde ta ngangangay.” (Marcos 10:30) Anni gafu i kuattam tapenu mala yaw nga regalu? Fabor bi nga bibbigan i Juan 3:16 anna 17:3 tapenu malegan i tabbag. Ammuattam nu anni i kagian na Biblia nu kunnasi i pattolay ta Paraiso nga davvun.

17, 18. Ngatta ammu tam nga memammo noka i interu davvun anna awan ngana tu ikassittam?

¹⁷ Mawawan ngana noka i kinamarake, gerra, krimen, anna kinavayolente. Awan noka tu maski sinni nga marake nga mabattang ta davvun. (Salmo 37:10, 11) I Dios ay “pagimmangan na i gerra ira ta tanga-ravvunan.” (Salmo 46:9; Isaias 2:4) Mapannu noka i davvun tu totolay nga mangaya ta Dios anna minattuppal nisa. Mannanayun noka i imammo.​—Salmo 72:7.

¹⁸ Awan ngana noka tu ikassing na ili ni Jehova. Ta tiempo na Biblia, nu tuttulan na Israelita ira i Dios, memmuguran ira megafu ta protektanna ira. (Levitico 25:18, 19) Ta Paraiso, ariattam noka maganassing ta maski anni onu maski sinni. Kanayun noka nga memammo i panageno tam!​—Bibbigan i Isaias 32:18; Mikias 4:4.

19. Ngatta makasiguradu ittam nga abundansia noka i makan ta napabagu nga mundo na Dios?

¹⁹ Abundansia noka i makan. “Aru paray i magatab ta koman ira; matakkabban paray i kavukiran.” (Salmo 72:16) “Napakaru i magatab ta akkomanan,” megafu ta “binendisionan ittam na Dios” nga Jehova.​—Salmo 67:6.

20. Ngatta makagi tam nga mabbalin noka tu paraiso i davvun?

²⁰ Mabbalin noka tu paraiso i interu mundo. Mapeggan noka i totolay tu makakkasta nga babalay anna laguerta. (Bibbigan i Isaias 65:21-24; Nepakannammu 11:18.) Mabbalin noka i interu mundo tu kagitta na kasta na hardin na Eden gari. Kanayun noka nga iyawa ni  Jehova i ngamin nga mawag tam. Kagian na Biblia meyannung sa: ‘Ari nga makkurang i iyawa mu nira; ngamin i pinaratu ay battugammu.’​—Salmo 145:16.

21. Ngatta makagi tam nga egga noka i imammo ta nallatanan na totolay anna aya-ayam?

²¹ Egga noka i imammo ta nallatanan na totolay anna aya-ayam. Ari ngana noka nga takitan na aya-ayam i totolay. Ari noka nga maganassing i abbarabbing, maski ta aya-ayam nga delikadu ta maddaggun.​—Bibbigan i Isaias 11:6-9; 65:25.

22. Anni noka i kuan ni Jesus ta mataki ira?

²² Awan ngana noka tu mataki. Ta kegga ni Jesus taw ta davvun, aru nga totolay i inuruna. (Mateo 9:35; Marcos 1:40-42; Juan 5:5-9) Ngem bilang Patul na Pappatulan na Dios, pammapianna noka i ngamin. Awan ngana noka tu makkagi: “Mataki ngà.”​—Isaias 33:24; 35:5, 6.

23. Anni noka i kuan na Dios ta natay ira?

²³ Maginnolay noka i natay ira. Nipromesa na Dios nga paginnolayanna noka i minillion nga natay. “Egga noka i paginnolay parehu na matunung anna ari matunung.”​—Kingngua 24:15, NW; bibbigan i Juan 5:28, 29, NW.

24. Anni i matageno mu meyannung ta paddian ta Paraiso?

²⁴ Egga i pappiliattam ngamin. Awayya tam nga gigiammuan i meyannung kani Jehova anna passerbian yayya, onu kuattam laman nu anni i kayà tam. Nu piliattam nga passerbian si Jehova, makakkasta i mappange tam. Turi ta nikiddaw na magimmamatay nga lalaki kani Jesus nga daddammanna yayya, nipromesa ni Jesus nisa: ‘Makitappaddiak-ka niakan ta Paraiso.’ (Lucas 23:43) Gigiammuattam paga i meyannung kani Jesu-Cristo anna nu kunnasina tuppalan i makapabbaw ira nga promesa na Dios.