1, 2. Anni ira i awayyana nga iyavu na totolay?

 MAHILIG nga makkiavu i abbarabbing. Awayyam nga tabbagan ira, ngem makkiavu mangana uli ira, ‘Ngatta?’ Nu natabbag mu ngana, kagiadda mangana, ‘Ngatta kunnari?’

² Sittam ngamin egga pakkiavu tam​—abbing onu adulto. Baka makkiavu ittam nu anni i kanattam, passinnuttam onu gatangattam. Onu egga i importante ira nga pakkiavu tam meyannung ta pattolay anna ta mappange. Ngem nu ariattam makontentu ta tabbag danaw nga pakkiavu, awayyana nga magimmang ittam makkiavu.

3. Ngatta abbattan na aru nga totolay nga ariadda malegan i tabbag ta importante ira nga pakkiavuda?

³ Egga kari ta Biblia i tabbag ta importante ira nga pakkiavu tam? “Wan,” kunna karuan, ngem abboda nga kuruga mariga malippawa i Biblia. Nonopadda nga danuri papari onu manuddu tu relihion laman i makatabbag ta pakkiavu ira. Mappasiran gapa i karuan nga aminan nga ariadda ammu i tabbag. Kunnatukka kari gapa?

4, 5. Anni i importante ira nga pakkiavu mu? Ngatta ariammu nakuan magimmang nga alegan i tabbag tatun ira?

⁴ Baka kayà mu mammuan i tabbag ira ta pakkiavu, gitta na: Anni i gakkag na pattolè? Angngayakku nu matay ngà? Anni i itchura na Dios? Kinagi na malalaki nga Mestru nga si Jesus: “Makkiddaw kamu ay keddak-kamu. Magaleg kamu ay makaleg kamu. Mattotto kamu ta puerta ay mavukatan.” (Mateo 7:7) Ariammu magimmang nga alegan i tabbag ira nga mapattalakkammu.

⁵ Wan, nu ariammu magimmang nga “magaleg,” malegammu i tabbag ira ta Biblia. (Proverbio 2:1-5) Mabi  laman malippawa danaw nga tabbag. Uffunan naka na magigiammum tapenu mapeggan tu mas magayayya nga pattolay sangawe anna makakkasta nga iddanama ta mappange. Gigiammuattam i tadday nga pakkiavu nga pakaguluan na aru nga totolay.

6. Ngatta manono na karuan nga awan tu paki-alam na Dios ta pazziga-rigada?

⁶ Nonopan na aru nga tolay nga awan tu paki-alam na Dios nittam. Kagiadda nga nu talaga ayatan ittam na Dios, ari nakuan tu kunnaw i mundo. Maski sitaw, egga i gerra, pallullussaw, anna ziga-riga. Mattaki i totolay, mazziga-riga, anna matay. Yayya nga manono na karuan, ‘Nu talaga ayatan ittam na Dios, ngatta arianna pagimmangan ngamin danaw nga ziga-riga?’

7. (a) Kunnasi ininfluwensian na relihioso ira nga lider i totolay nga kurugan nga awan tu allo na Dios? (b) Ngatta makasiguradu ittam nga ari tu Dios i makalliwa ta marake nga mesissimmu?

⁷ Nu mittan, influwensian na relihioso ira nga lider i totolay tapenu kurugan nga awan tu allo na Dios. Nu egga i marake nga nesimmu, kagiadda nga uray yatun na Dios. Plano na Dios yatun kudda. Kada kagiadda yatun, kakuruganna, pala-paliwatadda i Dios. Ngem ituddu na Biblia nga i Dios ay ari vuluvuga nga paggafuan na kinamarake. Kagian nittam na Santiago 1:13 nga ari purueban na Dios i maski sinni ta marake ira nga gannug. Kagianna: “Nu matenta i tolay, ari nga mepangngo tu kagian na, ‘I Dios ay tentan nà [onu, puruebannà].’ Ta i Dios ay ari nga matenta ta marakay anna ari yaya nga manenta.” Kayà kagian natun nga maski ari nga pagimmangan na Dios i mesissimmu nga kinamarake, ari tu yayya i nagangngua tatun ira. (Bibbigan i Job 34:10-12.) Mangusa ittam tu angngarigan.

8, 9. Ngatta ari mepangngo nga paliwatan i Dios ta problema tam ira? Mangusa tu angngarigan.

 ⁸ Angngariganna, nonopan i tadday nga kabataan nga lalaki nga kavulu na maganana ta baleda. Iddeddukan yayya na yamana anna sinudduanna yayya nu kunnasi maddesision tu makasta. Ngem, narrebelde yatun nga kabataan kontra ta yamana tapus nanaw ta baleda. Marake i kinikkingnguana yari tu magulu i pattolena. Paliwatammu kari i yamana ta nesimmu megafu ta arianna finugaddan i anana nga manaw ta baleda? Siempre ari! (Lucas 15:11-13) Kagitta natun nga yama, ari gapa fugaddan na Dios i totolay nu piliadda nga marrebelde anna mangngua tu marake. Yatutta nu egga i marake nga mesimmu, daddammattam nga ari tu i Dios i nagangngua tatun. Ari tu mepangngo nga paliwatan i Dios.

⁹ Egga i makasta nga rason nu ngatta ari paga pinagimmang na Dios i marake nga mesissimmu. Ta Kapitulo 11, magigiammum nu anni i kagian na Biblia meyannung taw. Ngem makasiguradu ka nga ayatan ittam na Dios anna ari vuluvuga nga yayya i makalliwa ta problema tam ira. Kakuruganna, yayya laman i makasolba tatun.​—Isaias 33:2.

10. Ngatta makasiguradu ittam nga alsan noka na Dios i ngamin nga kinamarake?

¹⁰ Masanto i Dios. (Isaias 6:3) Marenu anna makasta i ngamin nga kukukuanna. Yari tu makapattalo ittam nisa. Ari tu kunnatun i totolay. Nu mittan, magangngua ira tu marake. Maski paga lagu i pinakamapattalakkan nga lider ay awan tu pakapangnguana nga solban i ngamin nga perwisiu nga kingngua na marake nga totolay. Awan tu maski sinni nga egga i pakapangnguana nga kagitta na Dios. Egga i pakapangngua na Dios anna pakkaragana nga solban noka i perwisiu nga nakua na marake nga  totolay. Permanente noka nga alsanna i ngamin nga kinamarake.​—Bibbigan i Salmo 37:9-11.

11. Anni i matageno na Dios ta pazziga-riga mu?

¹¹ Anni i matageno na Dios nu masinganna i mesissimmu ta mundo anna i pazziga-riga mu? Ituddu na Biblia nga ‘ayatan na Dios i kinahustisia.’ (Salmo 37:28, NW ) Yatutta talaga importante nisa nu anni i fustu anna nu anni i mali. Ikalussona nu mazziga-riga i totolay. Kagian na Biblia nga “narraddam i futuna” turi ta nasinganna nga napannu tu kinamarake i mundo ta nappasa. (Genesis 6:5, 6) Ari nanguli i Dios. (Malakias 3:6) Kagian na Biblia nga talaga ikavurungan naka na Dios.​—Bibbigan i 1 Pedro 5:7.

12, 13. (a) Ngatta ayatan anna ikabbi tam i tanakuan, anna anni i matageno tam ta ziga-riga ta mundo? (b) Ngatta makasiguradu ittam nga alsan noka na Dios i ngamin nga ziga-riga anna kawan na hustisia?

¹² Kagian paga na Biblia nga pinaratu ittam na Dios segun ta imahena. (Genesis 1:26) Kayàna kagian nga egga i makasta ira nga kualidad tam nga kagittana. Yari tu nu ikabbi mu i inosente nga mazziga-riga, mas gafu nga ikakkabbi ira na Dios nu masinganna ira! Ngatta makagi tam yatun?

¹³ Ituddu nittam na Biblia nga “i Dios ay aya.” (1 Juan 4:8) Ngamin nga kuan na Dios ay megafu ta aya. Yayya nga, egga i aya tam megafu ta egga i aya na Dios. Nonopan yaw: Nu egga i pakapangnguam, alsammu kari ngamin nga pazziga-riga anna kawan na hustisia ta mundo? Siempre alsammu, megafu ta pangaya mu ta totolay. Kunnasi gapa i Dios? Egga i pakapangnguana, anna megafu ta ayatanna ittam, alsanna i ngamin nga ziga-riga  anna kawan na hustisia. Makasiguradu ka nga ngamin nga promesa na Dios nga nakagi ta gafu naw nga libru ay mesimmu noka! Ngem tapenu makapattalo taw ira nga promesa, mawag tu mas makilalam paga i Dios.

14. Anni i ngagan na Dios, anna ngatta mawag nga usattam yatun?

¹⁴ Anni i ollu nga ikagim nu kayà mu makikkofun ta tanakuan? I ngagammu. Egga kari i ngagan na Dios? Ituddu na aru nga relihion nga “Dios” onu “Yafu” i ngaganna, ngem ari tu ngagan ira yatun. Titulo laman danatun, gitta na “patul” onu “presidente.” Kinagi na Dios nittam nga Jehova i ngaganna. Kagian na Salmo 83:18 (NW ): “Mammuan nakuan na totolay nga sikaw, nga mangngagan tu Jehova, sikaw laman i Katannangan ta interu nga davvun.” Rinivu nga beses nga inusa na nattura ta Biblia i ngagan na Dios. Kayà ni Jehova nga mammuammu i ngaganna anna usammu yatun. Kinagina nikaw i ngaganna tapenu mabbalikka tu kofunna.

15. Anni i kayà kagian na ngagan ni Jehova?

¹⁵ Monag i kebalinan na ngagan na Dios nga Jehova. Kayàna kagian nga makua na Dios i maski anni nga promesana anna matuppalna i planona.  Awan tu makefugag nisa. Si Jehova laman i mepangngo taw nga ngagan. *

16, 17. Anni i kayà kagian na (a) “Makapangngua-sa-ngamin”? (b) “Patul adde noka”? (c) “Namaratu”?

¹⁶ Kagitta na nebibbig, kunnaw i kagian na Salmo 83:18 (NW ) meyannung kani Jehova: “Sikaw laman i Katannangan.” Kagian gapa na Nepakannammu  15:3 (NW ): “Grande anna makapabbaw i kingnguam ira, Dios nga Jehova, i Makapangngua-sa-ngamin. Matunung anna kurug i dala-dalammu, Patul adde noka.” Anni i kayà kagian na titulo nga “Makapangngua-sa-ngamin”? Kayàna kagian nga mas makapangngua si Jehova anne ta maski sinni ta interu uniberso. I titulo gapa nga “Patul adde noka,” kayàna kagian nga mannanayun i keggana. Niyesplika na Salmo 90:2 nga mannanayun nga Dios yayya gari ngana, anna mannanayun nga Dios adde noka. Talaga makapabbaw yatun!

¹⁷ Si Jehova laman i Namaratu. Kagian na Nepakannammu 4:11: “Yafu anna Dios mi! Mekunnay nikaw i kekakua, dayaw anna pakapangngua! Ta pinaro mu ngamin i adde na; megafu ta paka-urem laggapa, pinaro mu anna sinolem ira.” Wan, namegafu ta anghel ira ta langi adde ta biti-bitun tuange ta vunga na kakayu anna ta manango ta bebay​—si Jehova i namaratu ta ngamin nga manono mu!

18. Ngatta nonopan na karuan nga ariadda awayya nga makikkofun ta Dios? Anni i kagian na Biblia meyannung tatun?

¹⁸ Nu mabibbig na karuan i meyannung ta makapabbaw ira nga kualidad ni Jehova, maganassing ira anna manonoda, ‘Kuruga makapangngua i Dios, atatannang, anna ararayyu yayya, anni gapa i paki-alamna niakan?’ Ngem kunnatun kari i kayà na Dios nga matageno tam? Ari vuluvuga. Kayà ni Jehova i makikkofun nittam. Kagian na Biblia nga i Dios ay ‘ari tu arayyu ta kataggi-tadday nittam.’ (Kingngua 17:27) Kayà na Dios nga umaranni ka nisa, anna nipromesana nga ‘umaranni yayya nikaw.’​—Santiago 4:8.

19. (a) Kunnasi ka mabbalin tu kofun na Dios? (b) Anni i pinakakayà mu ta kualidad ira ni Jehova?

¹⁹ Kunnasi ka nga mabbalin tu kofun na Dios? Kagian ni Jesus: “Ay yaw i inango nga adde ta ngangangay [onu, mannanayun]: i pakannammu da tu sikaw i tattadday nga kurug nga Dios, anna i pakannammu da gapa kani Jesu-Cristo nga zinog mu.” (Juan 17:3) Tulu-tuloy nga maggigiammu tapenu makilalam si Jehova anna si Jesus. Meddakka noka tu mannanayun nga inango. Angngariganna, nagigiammu tam ngana nga “i Dios ay aya.” (1 Juan 4:16) Ngem aru paga i makkarasta nga kualidadna. Ituddu na Biblia nittam nga si Jehova ay “minangngikallo anna minangngikabbi, ari insigida nga mapporay anna abundansia ta matalo nga aya anna kinakurug.” (Exodo 34:6) Si Jehova ay ‘mapia anna minammakoma.’ (Salmo 86:5) Mapasensia anna matalo i Dios. (2 Pedro 3:9; 1 Corinto 1:9) Mas magigiammum paga yatun ira nga makasta nga kualidadna durante nga mabibbig mu i meyannung sa ta Biblia.

20-22. (a) Kunnasi ittam mabbalin tu kofun na Dios maski ariattam yayya masingan? (b) Anni nakuan i kuammu nu kayà na tanakuan nga iyemmammu i paggigiammu tu Biblia?

²⁰ Kunnasi ka maddukko ta Dios maski nu ariammu  yayya masingan? (Juan 1:18; 4:24; 1 Timoteo 1:17) Nu mabibbig mu i meyannung kani Jehova ta Biblia, mas malippawa mu i appana-panono anna mataga-tagenona. (Salmo 27:4; Roma 1:20) Durante nga umaru i magigiammum kani Jehova, mas ayatammu yayya anna mas maddukko ka nisa.

²¹ Malippawa mu gapa noka nga si Jehova i Yama tam. (Mateo 6:9) Yayya i naggafuan na inango tam, anna kayàna i makapagayayya nga pattolay para nittam. Yatun i kayà na meddu nga yama ta ánana. (Salmo 36:9) Wan, ituddu na Biblia nga awayyam mabbalin tu kofun ni Jehova. (Santiago 2:23) Fugurammu yatun. Si Jehova nga Namaratu ta uniberso, kayàna i makikkofun nikaw!

²² Baka kayà na karuan nga iyemmammu i paggigiammu tu Biblia. Mavurung ira nga uliammu i relihiommu. Ngem ariammu ipamavulun i maski sinni nga mangifugag ta pakikkofummu kani Jehova. Yayya i kapianan nga Kofun nga awayyam pakikkofunan.

23, 24. (a) Ngatta kanayuttam nakuan makkiavu? (b) Anni i ammuattam ta tumunug nga kapitulo?

²³ Durante nga gigiammuammu i Biblia, egga i gannug ira nga ariammu malippawa. Ariammu mappasiran nga makkiavu onu mappoffun. Kinagi ni Jesus nga mappakalinno ittam nakuan, kagitta na abbarabbing. (Mateo 18:2-4) Minakkiavu i abbarabbing. Kayà na Dios nga alegammu i tabbag ira. Yari tu gigiammuan tu mapia i Biblia tapenu masiguradum nga kurug i magiggigiammum.​—Bibbigan i Kingngua 17:11.

²⁴ Paggigiammu tu Biblia i kapianan nga makua tapenu magigiammu i meyannung kani Jehova. Ta tumunug nga kapitulo, ammuattam nu ngatta nerumu-ruma i Biblia ta maski anni nga libru.