1. Ngatta mawag nga gigiammuattam i meyannung ta anghel?

TAPE mammammu tam i tadday nga tolay, mawag tu kilala tam i familiana. Kunnatun gapa ta pangammu kani Jehova. Mawag tu ammammu tam i angheles nga miembro na familiana ta langi. Ta Biblia, nagalan i angheles nga “ána na Dios.” (Job 38:7) Nu kunnatun, anni i responsibilidadda ta gakkag na Dios? Egga kari papel da ta historia na totolay? Makoffun kari nikaw i angheles? Nu wan, kunnasi?

2. Sinni i namaratu ta angheles, anna kunnasi káruda?

² Minagatu nga beses nga nakagi ta Biblia i anghel. Innattam i karuan ira taw tape aru paga i magigiammu tam meyannung ta anghel. Sinni i namaratu ta anghel? Kagian na Colosas 1:16: ‘Ta gafu sa [Jesu-Cristo], naparatu ngamin nga ganna-gannug nga egga ta langi tuange ta utun na davvun.’ Yari tu sinaggitadday nga pinaratu ni Jehova i kada anghel gukaban na kaka nga Anâna. Kunnasi karu na angheles? Kagian na Biblia nga egga minagatu nga million nga angheles, anna makapangngua ira ngamin.​—Salmo 103:20. *

3. Anni i kagian nittam na Job 38:4-7 meyannung ta angheles?

 ³ Kagian nittam na Uvovug na Dios nga turi ta naparatu i davvun, “nakkariaw ta paddayarayaw i ngamin nga ana na Dios.” (Job 38:4-7) Dati ngana gafu nga egga i angheles nige nga naparatu i tolay, nige paga na nekeparatu na davvun. Yaw nga teksto ta Biblia ipasinganna paga nga egga panageno na angheles ta kagianna nga “sigga-ayayya nga naddayarayaw ira.” Pansinammu nga nagayayya i “ngamin nga ana na Dios.” Tatun nga tiempo, parte na mattaradday nga familia i ngamin nga angheles. Makkaravulu ira nga masserbi kani Jehova nga Dios.

4. Anni i pamakurug ta Biblia nga interesadu i matalo nga angheles ta kukukuan na totolay?

⁴ Namegafu paga turi ta nasingan na matalo nga angheles i nekeparatu na ollu nga totolay, interesadu ngana ira ta dumakadakal nga familia na tolay anna ta ketuppal na gakkag na Dios. (Proverbio 8:30, 31; 1 Pedro 1:11, 12) Ngem ta pappasa na tiempo, nasingadda nga aru nga totolay i ari ngana masserbi ta minaggiddu nga Namaratu nira. Siguradu nga narraddam i matalo nga angheles megafu taw. Ngem nu egga maski tadday laman nga masserbi uli kani Jehova, magayayya ira. (Lucas 15:10) Megafu ta fermi nga ikavurungan na angheles danuri masserbi ta Dios, mantindiattam ngana nu ngatta kanayun ira nga neyusa ni Jehova tape pagaramman anna protektan i matalo nga aripanna na davvun. (Bibbigammu i Hebreo 1:7, 14.) Gigiammuattam i karuan nga angngarigan.

5. Anni ira nga angngarigan ta Biblia i mamakurug ta panguffun na anghel?

⁵ Dua nga anghel i nanguffun kani Lot anna ta babbay nga anâna nga mallawan ta marakay nga siudad na Sodoma anna Gomora tape mapalliag ira ta kadaral na. (Genesis 19:15, 16) Kabalin na aru nga siglo, netabbo ta kueba na leon si Daniel ngem ari nga nadannal. Kinagina: “Zinog na Dios ku  i anghel na nga nanallag ta simu na leon ira.” (Daniel 6:22) Turi ta ollu-siglo C.E., pinalawan na anghel si apostol Pedro ta affukutan. (Kingngua 12:6-11) Fuera paga tatun, pinagaram na anghel si Jesus ta gafu na ministeriona ta davvun. (Marcos 1:13) Turi ta araranni ngana i patay ni Jesus, egga nappasingan sa nga anghel nga “namasikan ta nono na.” (Lucas 22:43) Siguradu nga nabannabannayan si Jesus tatun nga mariga nga tiempo na pattolena!

6. (a) Kunnasi nga protektan na angheles i aripan ira na Dios ta kaggawattam? (b) Anni ira nga pakkiavu i gigiammuattam?

⁶ Ta kaggawattam, ari ngana nga mappasingan i angheles ta aripan na Dios. Maski nu ari ira masingan na totolay, protektan lagapa na makapangngua nga anghel na Dios i aripanna, nerulay ta gannug nga mamappeligro ta espiritualidad. Kagian na Biblia: “Tangngallan na anghel danuri i mangikakua ta YAFU, anna paliaran na ira ta ngamin nga peligro.” (Salmo 34:7) Ngatta kuruga makapabannay nittam yatun? Megafu ta egga ira demonio nga maya manaral ta pangurug tam! Sinni ira? Naggafuadda? Anni i kukukuadda nga mamappeligro nittam? Tape matabbag yatun nga pakkiavu, ammuattam labbi i nesimmu turi ta gafu na historia na tolay.

7. Kunnasi karu na napattallikug ni Satanas ta passerbi ta Dios?

⁷ Nagigiammu tam ta Kapitulo 3 nga tadday nga anghel i nakkaraga nga mammaguray yari tu narrebelde ta Dios. Nagalan yaw nga anghel tu Satanas nga Diablo. (Nepakannammu 12:9) Ta lagum na 16 nga siglo kabalinna nga sinabag si Eva, maggi ngamin nga totolay i napattallikug ni Satanas ta passerbi ta Dios fuera ta karuan ira nga matalo, gitta da Abel, Enoc, anna Noe.​—Hebreo 11:4, 5, 7.

8. (a) Kunnasi nga nabbalin tu demonio i karuan nga angheles? (b) Anni i kingngua na demonio ira tape makalisi ta delubio turi ta tiempo ni Noe?

⁸ Turi ta tiempo ni Noe, narrebelde i karuan nga angheles kani Jehova. Pinanawadda i lugar da ta nelangitan nga familia  na Dios, tapus nazzittag ira ta davvun, anna nabbaggi ira tu tolay. Ngatta? Mabibbig tam ta Genesis 6:2: “Nasingan na ána na kurug nga Dios nga guguapa i babbay nga ana na totolay. Yari tu namegafu ira nga nappili tu inatawada, ngamin nga nagustuadda.” Ngem ari nepamavulun ni Jehova nga Dios nga mattulu-tuloy yaw nga marake nga kukukuan na angheles pati i resultana nga kinamarakay. Nangirattal yaya tu delubio ta interu davvun nga nanaral ta ngamin nga marakay nga tolay anna namaliag ta matalo ira nga aripanna. (Genesis 7:17, 23) Megafu tatun, nafuersa i rebelde nga angheles onu demonio ira nga panawan i nepattaggan nga baggida anna nanoli ta langi bilang espiritu. Sinuportadda i  Diablo, nga nabbalin tu “prinsipe na demonio ira.”​—Mateo 9:34.

9. (a) Anni i nesimmu ta demonio ira ta panolida ta langi? (b) Anni i ammuattam meyannung ta demonio ira?

⁹ Turi ta nanoli ta langi i rebelde nga angheles, ariadda ngana awayya nga mabbalin tu parte na familia na Dios, kagitta ni Satanas nga mammaguray nira. (2 Pedro 2:4) Mainfluwensiadda lagapa i totolay maski nu ariadda ngana mawayya i makapabbaggi tu tolay. Ta kakuruganna, gukaban na demonio ira, matabag ni Satanas i tanga-ravvunan. (Nepakannammu 12:9; 1 Juan 5:19) Kunnasi? Aru i usan na demonio ira nga mangilloko ta totolay. (Bibbigammu i 2 Corinto 2:11.) Ammuattam i karuan ira taw.

10. Anni i espiritismo?

¹⁰ Usan na demonio i espiritismo tape melogo i totolay. Egga koneksion na espiritismo ta demonio ira, direkta man onu gukaban na espiritista. Igamma na Biblia i espiritismo anna tabarangnganna ittam nga umarayyu ta ngamin nga gannug nga konektadu tatun. (Galacia 5:19-21) Usan na demonio i espiritismo nu kunnasi nga usan na gumaggimanango i appan. Mangiyusa i gumaggimanango tu nadduruma nga appan tape makagafu tu nadduruma nga klase na manango. Mangiyusa gapa i demonio tu nadduruma nga klase na espiritismo tape mainfluwensiadda i ngamin nga totolay.

11. Anni i pallavvun, anna ngatta mawag nga arayyuattam?

¹¹ I pallavvun i tadday nga appan nga usan na demonio. Anni i pallavvun? Yaw i pamurueba nga ammuan i mesimmu ta mappange. Karuan nga klase na pallavvun ay astrolohia, pangiyusa tu baraha nga tarot, paningan ta bola nga kristal, pagipalag, anna i pangivuruvura tu tatageno. Maski nu pagabbo na karuan nga awan tu peligro na pallavvun, pakurugan na Biblia nga i minallavvun ay makipattrabahu ta marakay ira nga espiritu onu demonio.  Angngariganna, nakagi ta Kingngua 16:16-18 i “babay nga sinallungan na marakay nga espiritu” nga “nangiyawa sa tu pakapangngua na nga mallavva-lavvun.” Ngem nawawanna yaw nga pakapangnguana turi ta napalawan i demonio nga egga sa.

12. Ngatta delikadu i pakiuvovug ta natay?

¹² I pakiuvovug ta natay i tadday paga nga usan na demonio ira nga mangilloko ta totolay. Maruddu nga mailloko taw nga laddug nga tuddu i maraddam ira nga natayan. Awayya na espiritista nga mangiyawa tu informasion onu maguvovug nga kagiggitta na boses na natay. Megafu tatun, aru nga totolay i mangurug nga siggamatolay paga i natay ira anna makoffun ta maraddam nga totolay i pakiuvovug nira tape mabannabannayan ira. Ngem ta kakuruganna, laddug anna delikadu yaw nga pamannabannay. Ngatta? Megafu ta awayya na demonio ira nga parigan i boses na natay anna mangiyawa tu informasion meyannung ta natay. (1 Samuel 28:3-19) Fuera paga tatun, nagigiammu tam ta Kapitulo 6 nga awan ngana tu ammu na natay. (Salmo 115:17) Yari tu i  “sinni laman nga makiuvovug ta natay” ay nelogo ngana na demonio anna nakakua ngana tu mekontra ta uray na Dios. (Bibbigammu i Deuteronomio 18:10, 11; Isaias 8:19) Magimmugug ka gafu tape malillitammu yaw nga delikadu nga appan na demonio.

13. Anni i nakua ngana na aru nga totolay nga dati maganassing ta demonio?

¹³ Ari laman nga mangilologo i demonio ira, ana-anassingadda paga i totolay. Ammu ni Satanas anna na demoniona ira nga ababba ngana laman i nabattang nga tiempo nige na kadaral da, yari tu kuadda ngana i pinakamarakay nga mawayyada. (Nepakannammu 12:12, 17) Maski nu kunnatun, rinivu nga totolay i ari ngana maganassing ta demonio ira. Kunnasida nga nakua yatun? Anni i awayya nga kuan na tadday nga tolay maski nu nainfluwensian ngana na espiritismo?

14. Kunnasi tam labanan i influwensia na demonio ira kagitta na kingngua na Cristiano ira turi ta ollu-siglo?

¹⁴ Ituddu nittam na Biblia nu kunnasi labanan i demonio ira anna nu kunnasi iyemmang i espiritismo. Ikonsideram i ehemplo na Cristiano ira turi ta ollu-siglo ta siudad na Efeso. Nainfluwensian na espiritismo i karuan nira nige nga nabbalin tu Cristiano. Anni i kingnguada turi ta naddesision ngana ira nga iyemmang i espiritismo? Kagian na Biblia: “Napakaru turi ta salamangkeru ira i nangiyangay ta libru da ira anna sinuggi da.” (Kingngua 19:19) Gukaban na panaral da ta libru ira na mahika, nangipasingan danuri babbagu nga Cristiano tu makasta nga ehemplo para ta mayà nga labanan i demonio ira. Mawag nga daralan na tolay nga mayà masserbi kani Jehova i ngamin nga konektadu ta espiritismo. Kasali tatun ira i libru, magazina, pelikula, poster, anna musika nga meyannung ta espiritismo. Mawag paga nga itabbo i anting-anting ira anna i tanakuan paga nga meyusa tape maprotektan kanu ta demonio.​—1 Corinto 10:21.

15. Anni i mawag nga kuattam tape malabanan i demonio ira?

 ¹⁵ Ta pappasa na piga nga dagun kabalin nga zinaral na Cristiano ira ta Efeso i libruda ta mahika, netura nira ni apostol Pablo: “Arubangat-tam toye ta utun na davvun . . . i marakay ira nga espiritu.” (Efeso 6:12) Ari nga nagimmang i demonio ira. Mangilologo ira adde ta kaggawattam. Anni gafu i mawag paga nga kuan danuri nga Cristiano? Kinagi ni Pablo: “Ilanno nu paga taw ira i pangurug tu kunna kalatag anna pagaddo nu ta ngamin nga umafa-afi nga pana na Demonio.” (Efeso 6:16) Nu mas maladda i kalatag na pangurug tam, mas malabanattam i demonio ira.​—Mateo 17:20.

16. Kunnasi tam mapasikan i pangurug tam?

¹⁶ Kunnasi tam gafu nga mapasikan i pangurug tam? Gukaban na paggigiammu tu Biblia. Nakadepende i katuyag na pader ta ladda na pundasion. Ta kunnari gapa, nakadepende i sikan na pangurug tam ta katuyag na pundasionna—i fustu nga pakannammu ta Uvovug na Dios, i Biblia. Nu inaggaw nga bibbigan anna gigiammuattam i Biblia, massikan i pangurug tam. Kagitta na matuyag nga pader, protektan ittam na masikan nga pangurug kontra ta influwensia na demonio ira.​—1 Juan 5:5.

17. Anni i mawag nga kuattam tape malabanan i demonio ira?

¹⁷ Anni paga i mawag nga kuan na Cristiano ira ta Efeso? Mawag da i proteksion megafu ta egga ira ta siudad nga napannu tu demonismo. Yari tu kinagi nira ni Pablo: “Kuan nu ngamin danaw nga sigga-pakimallo . . . ta pangirollu na Espiritu, makimallo kamu ta maski anni nga tiempo.” (Efeso 6:18) Megafu ta egga tam paga ta mundo nga napannu tu demonismo, mawag nga napafutuan nga ipakimallo kani Jehova i proteksionna tape malabanattam i demonio ira. Siempre, mawag nga usattam i ngagan ni Jehova nu maddasal tam. (Bibbigammu i Proverbio 18:10.) Mawag gafu tu kanayuttam nga ipakimallo: “Paliaran na kami ta Marakay,” si Satanas nga Diablo. (Mateo 6:13) Tabbagan  ni Jehova i kunnatun nga napafutuan nga pakimallo.​—Salmo 145:19.

18, 19. (a) Ngatta siguradu nga mangaffu tam ta paki-arubattam ta demonio? (b) Anni nga pakkiavu i matabbag ta tumunug nga kapitulo?

¹⁸ Delikadu i demonio ira, ngem ariattam maganassing nu labanattam i Diablo anna umaranni ta Dios gukaban na pagangngua tu urena. (Bibbigammu i Santiago 4:7, 8.) Limitadu laman i pakapangngua na demonio ira. Nakastigo ira turi ta kaggawan ni Noe, yari tu siguradu nga arubangadda noka i ultimo nga kapanunnuda. (Judas 6) Takkilalammu gapa nga protektan ittam na makapangngua nga angheles ni Jehova. (2 Patul Ira 6:15-17) Kakaya na angheles nga masingan tu nalabanattam i demonio ira. Pappagaramman ittam na matunung nga angheles. Mawag gafu tu mattalupaddian nga meggo i relasiottam kani Jehova anna ta matalo nga angheles nga familiana. Mawag nga arayyuattam gapa i ngamin nga klase na espiritismo anna kanayun nga iyaplika tam i tabarang na Uvovug na Dios. (1 Pedro 5:6, 7; 2 Pedro 2:9) Nu kuattam yatun, siguradu nga mangaffu tam ta paki-arubattam ta demonio ira.

¹⁹ Ngem ngatta ta nepamavulun na Dios i demonio ira anna i kinamarakay nga mamarpariga ta totolay? Matabbag yatun nga pakkiavu ta tumunug nga kapitulo.