ANNI i ammum ta Aggaw na Pamanunnu? Aru i mangurug nga kataggitadday kanu nga umarubang ta trono na Dios i binillion nga kararua na natay. Tatun kanu nga masentensian i kada tolay. Nu masippo i tolay, mattolay kanu yaya ta langi, tapus i marake gapa ira ay umay ta infiernu tape mannanayun nga mazigarigatan. Ngem tanakuan i ituttuddu na Biblia meyannung taw nga periodo na tiempo. Segun ta Biblia, ari tu kananassing nga tiempo yatun, lallagu, tiempo na iddanama anna ketoli.

Mabibbig tam ta Nepakannammu 20:11, 12 i deskripsion ni apostol Juan ta Aggaw na Pamanunnu: “Nasingak-ku i tadday nga dakal anna furaw nga trono tuange turi ta agga-itubang sa. Napawan i langi anna davvun ta arubang na, anna ari ngana ira maleran ta maski sitaw. Ay nasingak-ku paga nga agga-taddag ta arubang na trono ngamin danuri i natay ngana, nga atatannang anna alinno i paddia-paddiad-da. Ay navullag i libru ira anna navullag gapa i tadday paga nga libru​—i libru na matolay. Nasentensian i natay ira segun ta kikkinggua da nga netura ta libru ira.” Sinni i nakagi taw nga Manentensia ta natay ira?

Si Jehova nga Dios i Katannangan nga Manentensia ta totolay. Ngem egga sinullona nga aktual nga manentensia. Segun ta Kingngua 17:31, kinagi ni apostol Pablo nga “dana ngana nga sinullo na [Dios] i aggaw nga pamanunnu na tu sigga-matunung ta totolay ta interu mundo gafu ta panullona ta tadday nga tolay nga  mamanunnu.” Si Jesu-Cristo i natunno nga manentensia. (Juan 5:22) Sonu anni gafu nga mamegafu i Aggaw na Pamanunnu? Kunnasi kabayag na?

Pakurugan na libru na Nepakannammu nga mamegafu i Aggaw na Pamanunnu ta kabalin na Armagedon, sonu nadaral ngana i sistema ni Satanas ta davvun. * (Nepakannammu 16:14, 16; 19:19–20:3) Kabalin na Armagedon, mefukù si Satanas anna i demoniona ira ta “avvu nga ari matuku-tukug i karalam na” ta unag na marivu nga dagun. Tatun nga tiempo, manentensia i 144,000 nga nelangitan i iddanamana anna “makipammaguray ira kani Cristo ta marivu nga dagun.” (Nepakannammu 14:1-3; 20:1-4; Roma 8:17) Ari tu aggaw nga egga 24 oras na i Aggaw na Pamanunnu. Mabbayag yatun tu marivu nga dagun.

Tatun nga daguragun, ‘mamanunnu ta matolay anna natay’ si Jesu-Cristo. (2 Timoteo 4:1) I “matolay” nga tukuyanna taw ay danuri “magaru nga totolay” nga mapalliag ta Armagedon. (Nepakannammu 7:9-17) Nasingan paga ni apostol Juan nga “agga-taddag ta arubang na trono ngamin danuri i natay ngana” tape masentensian. Kagitta na nepromesa ni Jesus, “ngamin i natay ira ay maginna da i ngaral na [Cristo], anna mallalawan ira ta livud-da” gukaban na paginnolay. (Juan 5:28, 29; Kingngua 24:15) Ngem masentensian kari ira segun ta marake nga kingnguada turi ta siggamatolay ira paga?

Segun ta sirmata ni apostol Juan, “navullag i libru ira,” tapus “nasentensian i natay ira segun ta kikkingngua da nga netura ta libru ira.” (Nepakannammu 20:12) Libru kari yaw na nappasa nga kikkingngua na tadday nga tolay? Ari. Ari nga mebase ta kikkingngua na tolay nigena nga natay i kapanunnuna. Kunnasi tam nga masiguradu yatun? Kagian na Biblia: “Nu matay i tadday nga tolay, mapalubbangan yaya ta pakawayya na katagarulian.” (Roma 6:7) Yari tu, awan ngana tu liwa danuri mapaginnolay ira. Isimbolo gafu na libru nu anni paga i kikkiddawan na Dios. Tape matolay tu mannanayun, danuri mapalliag ta Armagedon anna danuri mapaginnolay ira, mawag nga tuppaladda i dorob na Dios, kunne na gapa ta ngamin nga bagu nga ikiddaw ni Jehova ta unag na  marivu nga dagun. Yatutta, masentensian i kada tadday segun ta kuanna ta laguman na Aggaw na Pamanunnu.

Ta Aggaw na Pamanunnu, meddan i binillion nga totolay tu tiansa nga gigiammuan i meyannung ta Dios anna iyaplika i magigiammuda. Kebalinanna yaw nga egga noka programa nga pattuddu ta interu mundo. Kakuruganna, “magigiammu na residente na davvun i meyannung ta kinatunung.” (Isaias 26:9) Ngem ari tu ngamin ay manuppal ta uray na Dios. Kagian na Isaias 26:10: “Maski nu mapaboran i marakay, arianna magigiammu i kinatunung. Maski ta davvun na kinatunung magangngua tu kinamarakay, anna arianna masingan i makapabbaw nga pakapangngua ni Jehova.” Matay yaw ira nga marakay ta unag na Aggaw na Pamanunnu nga awan ngana tu iddanamada nga maginnolay uli.​—Isaias 65:20.

Ta pangultimuan na Aggaw na Pamanunnu, mabbalin tu perfekto ngamin nga matalo nga totolay. Metoli gafu ta Aggaw na Pamanunnu i dati nga perfekto nga paddiapaddian na davvun anna na totolay. (1 Corinto 15:24-28) Kabalinna, egga ultimo nga kapurueba. Mapalawan ta affukutan si Satanas tapus meddan tu ultimo nga tiansa nga mangilogo ta totolay. (Nepakannammu 20:3, 7-10) Malawa danuri ari melloko ni Satanas i ketuppal na promesa na Biblia ta Salmo 37:29: “I matunung ira ay irensiad-da i davvun, anna maddian ira taw tu mannanayun.” Wan, bendision noka ta ngamin nga matalo nga totolay i Aggaw na Pamanunnu!