1. Anni nga pakimallo i ikonsidera tam?

FAMILIAR i totolay ta interu mundo ta dasal nga Amami onu Pakimallo na Yafu, kunna karuan. Parehu nga tukuyanna yatun i modelo nga pakimallo nga netuddu mismu ni Jesus. Napannu tu kebalinan yatun nga pakimallo, anna makoffun i pangikonsidera ta tallu nga kiddaw nga nakagi tatun tape mas aru paga i magigiammum meyannung ta talaga nga ituttuddu na Biblia.

2. Anni i tallu nga gannug nga netuddu ni Jesus ta disipulos na nga ipakimalloda?

² Ta gafu na yaw nga modelo nga pakimallo, netuddu ni Jesus: “Kunnoye gafu i akkimallo nu: ‘Ama mi nga egga ta langi, marayaw paray i ngagam mu; maparattal paray i Pammagurem. Makua i urem toye ta davvun ta kunne ta langi.’” (Mateo 6:9-13) Anni i importansia na yaw nga tallu nga kiddaw?

3. Anni i mawag nga mammuattam meyannung ta Pappatulan na Dios?

³ Aru ngana i nagigiammu tam meyannung ta ngagan na Dios nga Jehova. Nagigiammu tam gapa i uray na Dios​—nu anni ngana i nakuana anna i kuanna paga para ta totolay. Anni gafu i tukuyan ni Jesus turi ta nekagi na nga ipakimallo tam: “Maparattal paray i Pammagurem”? Anni i Pammaguray onu Pappatulan na Dios? Kunnasi nga marayaw i ngagan na Dios, onu mapabbalin tu masanto sonu naparattal ngana  yatun? Kunnasi nga mekunnay i dattal na Pappatulan ta pagangngua tu uray na Dios?

4. Anni i Pappatulan na Dios, anna sinni i Patul na yatun?

⁴ I Pappatulan na Dios ay gobierno nga nepataddag na Dios nga Jehova ta langi nga pammagurayan na Patul nga pinilina. Sinni i Patul na Pappatulan na Dios? Si Jesu-Cristo. Bilang Patul, mas makapangngua si Jesus anne ta ngamin nga mammaguray nga tolay anna nagalan yaya tu “Patul na ngamin nga patul anna Yafu na ngamin nga yafu.” (1 Timoteo 6:15) Egga pakapangnguana nga mangipatuppal tu mas makasta nga gannagannug anne ta maski sinni nga mammaguray, maski paga i kapianan nira ngamin.

5. Sitaw i pammagurayan na Pappatulan na Dios, anna anni i sakup na?

⁵ Sitaw nga mammaguray i Pappatulan na Dios? Bueno, sitaw kari i dian ni Jesus? Siguradu nga meraddammammu nga natay yaya ta pakazigarigatan nga estaka, tapus napaginnolay. Kabalin na 40 nga aggaw, nappalangi yaya. (Kingngua 2:33) Manawag gafu nga egga ta langi i Pappatulan na Dios. Yari tu, tukuyan na Biblia yatun tu nelangitan nga Pappatulan. (2 Timoteo 4:18) Maski nu egga ta langi i Pappatulan na Dios, interu nga davvun i sakup na.​—Bibbigammu i Nepakannammu 11:15.

6, 7. Ngatta si Jesus i kapianan nga Patul?

⁶ Ngatta si Jesus i kapianan nga Patul? I tadday nga rason, ari yaya pulus matay. Nu mekumpara si Jesus ta tolay nga patul, kagian na Biblia nga “yaya laman i ari nga matay onu imortal anna maddian ta nawag nga awan tu makaranni sa.” (1 Timoteo 6:16) Kebalinanna yaw nga manayun i ngamin nga mapia nga kuan ni Jesus. Makasiguradu tam nga magangngua yaya tu mas aru nga gannagannug nga pakabenefisiowan na totolena.

⁷ Ikonsidera tam yaw nga profesiya na Biblia meyannung kani Jesus: “Maddian sa i espiritu ni Jehova, i espiritu na sirib  anna pakalippawa, i espiritu na tabarang anna sikan, i espiritu na pakannammu anna paganassing kani Jehova. Makaleg yaya tu pagayayya ta paganassing kani Jehova. Arianna mangukum gukaban laman na masinganna, onu manunung gukaban laman na maginnana. Ukumanna i minappakalino gukaban na kinatunung. Anna ta kinatunung ay ukumanna i masippo ira ta davvun.” (Isaias 11:2-4) Ipasinganna yatun ira nga uvovug nga matunung anna minaggallallo nga Patul si Jesus. Kayamu kari i kunnatun nga mammaguray?

8. Sinni ira i makipammaguray kani Jesus?

⁸ Yaw paga i tadday nga kinakurug meyannung ta Pappatulan na Dios: Ari laman tu si Jesus i mammaguray. Egga kakavuluna. Kinagi ni apostol Pablo kani Timoteo: ‘Nu magattattam ittam ta ziga-riga, makipammaguray ittam gapa noka sa.’ (2 Timoteo 2:12) Wan, makipammaguray kani Jesus ta nelangitan nga Pappatulan si Pablo, Timoteo, anna i karuan paga nga matalo nga pinili na Dios. Piga i meddan tu kunnatun nga nerumuruma nga pribilehio?

9. Piga i makipammaguray kani Jesus, anna kanni i pinammegafu na Dios nga nappili?

⁹ Kagitta na nevuruvura ta Kapitulo 7, nasirmata ni apostol Juan “i Kordero [Jesu-Cristo] tuange ta 144,000 nga totolay nga kakavvulu na nga agga-taddag ta Vukig na Sion [i enggrande nga posisionna ta langi]. Nemarka ta frente na totolay i ngagan na Kordero anna i ngagan na Yama na.” Sinni ira yatun nga 144,000? Kinagi mismu nittam ni Juan: “Ay mevulu-vulu ira sangoye ta Kordero ta maski sitaw nga angayan na. Ta ngamin nga sinolay, ira i natavvu tu kunna ollollu nga netavvung ta Dios tuange ta Kordero.” (Nepakannammu 14:1, 4) Wan, matalo ira nga disipulos ni Jesu-Cristo nga napili tape makipammaguray sa ta langi. Kabalidda nga mapaginnolay ta langi, “mammaguray ira ta tanga-ravvunan” kavulu ni Jesus. (Nepakannammu 5:10) Namegafu paga turi ta kaggawan na apostol ira, nappili i Dios tu matalo ira nga Cristiano tape makompleto i 144,000.

10. Ngatta pangipasingan tu aya i unnug na Dios nga mammaguray si Jesus pati i 144,000 ta tangaravvunan?

 ¹⁰ Pangipasingan tu aya i unnug na Dios nga mammaguray si Jesus pati i 144,000 ta tangaravvunan. Ngatta? Megafu ta nappasan ni Jesus i nabbalin tu tolay anna nazzigariga. Kinagi ni Pablo nga si Jesus ay “ari tu tadday nga ari makatageno ta kalaray na kata-katolay tam, ta nappasan na ngamin i gannug na tentasion ta kunne nittam, ngem ari yaya nga nattagaruli.” (Hebreo 4:15; 5:8) Nazzigariga gapa i kakavuluna nga mammaguray anna nagattattam bilang tolay. Nilabanadda i kina-imperfekto anna inattammadda i ngamin nga klase na taki. Siguradu gafu nga mantindiadda i problema nga mepaarubang ta totolay.

11. Ngatta kinagi ni Jesus ta disipulos na nga mawag tu ipakimalloda nga makua nakuan i uray na Dios ta langi?

¹¹ Turi ta kinagi ni Jesus ta disipulos na nga ipakimalloda nga umay nakuan i Pappatulan na Dios, kinagina gapa nga mawag tu ipakimalloda nga makua i uray na Dios “ta davvun ta kunne ta langi.” Egga ta langi i Dios, anna kanayun nga kuan na matalo nga anghel ira i uray na. Ngem, nagigiammu tam ta Kapitulo 3 nga egga marakay nga anghel nga nagimmang nga nagangngua tu uray na Dios anna sinabag na da Adan anna Eva. Ta Kapitulo 10, aru paga i magigiammu tam ta ituttuddu na Biblia meyannung tatun nga marakay nga anghel nga nammuattam tu si Satanas nga Diablo. Si Satanas anna i anghel ira nga pinilida i nakikavulu sa—nga nagalan tu demonio​—ay napamavulunan nga maddian ta langi tu manganannuan. Yari tu, tatun nga tiempo ari tu ngamin nga egga ta langi ay magaggangngua tu uray na Dios. Nanguli yatun turi ta namegafu nga nammaguray i Pappatulan na Dios. Nakigerra kani Satanas si Jesu-Cristo, i bagu-netrono nga Patul.​—Bibbigammu i Nepakannammu 12:7-9.

12. Anni i dua nga importante nga nesimmu i nakagi ta Nepakannammu 12:10?

¹² Yaw nga profesiya i mangikagi nu anni mesimmu: “Ay  naginnà i masikan nga ngaral ta langi nga nakkagi, ‘Zimittal ngana i pamaliag na Dios tam! Ipasingan na ngana i pakapangngua na nga kunna patul! I Cristo na ay nipasingan na ngana i pakawayya na! Ta napapanaw ngana ta langi yuri mamali-paliwa [Satanas] ta wawwagi tam ira ta arubang na Dios tam ta aggaw-gabi.’” (Nepakannammu 12:10) Napansin mu kari tatun nga bersikulo i dua nga importante nga nesimmu? Ollu, namegafu ngana nga nammaguray si Jesus ta Pappatulan na Dios. Mekadua, napapanaw si Satanas ta langi anna napatavvar ta davvun.

13. Anni i resultana turi ta napapanaw si Satanas ta langi?

¹³ Anni i resultana yatun nga dua nga nesimmu? Nu meyannung ta nesimmu ta langi, mabibbig tam: “Yatun tu magayaya kamu ngana, sikamu ngamin nga egga tatun ta langi!” (Nepakannammu 12:12) Wan, magayayya i matalo nga anghel ira megafu ta awan ngana si Satanas anna i demoniona ira ta langi. Ngamin ngana nga egga tari ay matalo kani Jehova nga Dios. Egga ngana manayun nga imammo anna pattaradday tari. Makua ngana ta langi i uray na Dios.

14. Anni i nesimmu megafu ta napatavvar si Satanas ta davvun?

¹⁴ Kunnasi gapa ta davvun? Kinagi na Biblia: “Ngem pakallallo kamu, sikamu nga egga ta utun na davvun tuange ta bebay ira. Ta minulug nikamu i Demonio, nga nepallo i batù onu gazzi na, megafu ta ammu na tu pigo onu ababba ngana laman i nabattang sa nga tiempo!” (Nepakannammu 12:12) Grabe lussaw ni Satanas megafu ta napapanaw ta langi anna ababba ngana laman i nabattang nga tiempona. Megafu ta gazzina, ginulu-guluna i davvun, yari tu aru i pazzigariga anna “pakallallo” nga mesissimmu. Aru paga i magigiammu tam meyannung tatun ta tumunug nga kapitulo. Ngem, baka iyavu tam​—kunnasi gafu nga ituppal na Pappatulan i uray na Dios ta davvun?

15. Anni i uray na Dios para ta davvun?

¹⁵ Nonopammu i uray na Dios ta davvun. Nagigiammum yatun ta Kapitulo 3. Nepasingan na Dios ta Eden nga uray  na nga mabbalin tu paraiso i interu davvun anna mapannu tu matunung nga totolay nga ari matay. Megafu kani Satanas, nakaliwa da Adan anna Eva, yari tu ari natuppal i uray na Dios ta davvun ngem ari nga nanguli yatun. Gakkag lagapa ni Jehova nga “i matunung ira ay irensiad-da i davvun anna maddian ira taw tu mannanayun.” (Salmo 37:29) Ituppal yatun na Pappatulan na Dios. Kunnasi?

16, 17. Anni i kagian nittam na Daniel 2:44 meyannung ta Pappatulan na Dios?

¹⁶ Ikonsidera tam i profesiya ta Daniel 2:44. Mabibbig tam tatun: “Ta kaggawan danuri patul ira, mamataddag i Dios na langi tu pappatulan nga ari vuluvuga madaral. Ni tu meyawa yaw nga pappatulan ta tanakuan nga totolay. Daralanna ngamin ira yaw nga pappatulan anna iyangena i panuppaladda, ay mannanayun yaw noka.” Anni i kaya na kagian yaw meyannung ta Pappatulan na Dios?

¹⁷ Ollu, ikagina nittam nga mepataddag i Pappatulan na Dios ta “kaggawan danuri patul ira,” onu durante nga mammaguray paga laman i karuan nga pappatulan. Mekadua, ikagina nittam nga mattalupaddian ta mannanayun yatun nga Pappatulan. Ari yatun nga maffu onu tallianan na tanakuan nga gobierno. Mekatallu, egga noka gerra ta nallatanan na Pappatulan na Dios anna pappatulan ira taw ta mundo. Mangaffu noka i Pappatulan na Dios. Panguriananna, yatun ngana laman sangaw i tattadday nga gobierno ta tangaravvunan. Kabalinna, memammatan na totolay i kapianan nga pammaguray nga ariadda paga pulus nasingan.

18. Anni i pagagal ta ultimo nga gerra ta nallatanan na Pappatulan na Dios anna gobierno ira na mundo?

¹⁸ Aru i makagi na Biblia meyannung ta ultimo nga gerra ta nallatanan na Pappatulan na Dios anna gobierno ira taw nga mundo. Angngariganna, itudduna nga durante nga umara-aranni i panuppalan, mangiwara i marakay ira nga espiritu tu kinaladdug tape mailloko i “ngamin nga patul ira ta tanga-ravvunan.” Para ta anni nga gakkag? “Tapenu pattaraddayad-da ira [i patul ira] nga makiggerra noka nu duttal  i dakal nga Aggaw na Dios nga Makapangngua sa Ngamin.” Mapattaradday i patul ira “ta lugar nga mangagan tu Armagedon ta uvovug na Hebreo.” (Nepakannammu 16:14, 16) Megafu ta nakagi tatun nga dua nga bersikulo, i ultimo nga gerra ta nallatanan na gobierno na tolay anna Pappatulan na Dios ay magalan tu gerra na Armagedon.

19, 20. Anni i makefugag ta ketuppal na uray na Dios ta davvun?

¹⁹ Anni i metuppal na Pappatulan na Dios gukaban na Armagedon? Nonopammu uli nu anni i uray na Dios ta davvun. Ginakkag na Dios nga mapannu i davvun tu perfekto anna matunung nga totolay nga masserbi sa ta Paraiso. Anni i makefugag ta kesimmuna yatun? Ollu, minattagaruli ittam, mattaki anna matay. Ngem, nagigiammu tam ta Kapitulo 5 nga natay si Jesus para nittam tapenu mattolay tam tu mannanayun. Baka meraddammammu paga i netura ta Ebanghelio ni Juan: “Kuruga iddukan na Dios i mundo. Yatun tu zinog na i tattadday nga Ana na, tapenu ngamin i mangurug sa ay ari nga matay nu ari mattolay ira adde ta ngangangay onu mannanayun.”​—Juan 3:16.

²⁰ I tadday paga nga rason, aru nga totolay i magaggangngua tu marakay. Malladdug ira, maddarogas, anna magaggangngua tu imoralidad. Ariadda kaya nga kuan i uray na Dios. Madaral i totolay nga magaggangngua tu kinamarakay sonu Armagedon​—gerra na Dios. (Bibbigammu i Salmo 37:10.) I tadday paga nga rason nu ngatta ari paga natuppal i uray na Dios ta davvun ay megafu ta ari nga ipagaram na gobierno ta totolay nga kuan yatun. Marake anna kurakut i aru nga gobierno anna ariadda maimorayan i sakup da ira. Prangka nga kinagi na Biblia: “Dinominaran na tolay i kasittolena ta pakadannalanna.”​—Eclesiastes 8:9.

21. Kunnasi nga ituppal na Pappatulan i uray na Dios ta davvun?

²¹ Kabalin na Armagedon, i Pappatulan na Dios ngana laman i mangimoray ta totolay. Ituppal na yatun nga Pappatulan i uray na Dios anna mangirattal tu makakkasta ira nga bendision. Alsanna si Satanas anna i demoniona ira.  (Nepakannammu 20:1-3) Gukaban na sakrifisio ni Jesus, ari ngana nga mattaki anna matay i matalo nga totolay. Lallagu, mattolay ira tu mannanayun bilang sakup na pammaguray na Pappatulan. (Bibbigammu i Nepakannammu 22:1-3.) Mapabbalin tu paraiso i davvun. Yari tu gukaban na Pappatulan ay metuppal i uray na Dios anna mapabbalin tu masanto i ngagan na Dios. Anni i kebalinanna yaw? Kaya na kagian nga ikakua noka na ngamin nga sakup na Pappatulan na Dios i ngagan ni Jehova.

22. Ngatta ari paga nammaguray i Pappatulan na Dios turi ta kegga ni Jesus ta davvun onu insigida turi ta kabalinna nga napaginnolay?

²² Turi ta kinagi ni Jesus ta disipulos na nga ipakimalloda i, “Maparattal paray i Pammagurem,” manawag nga ari paga nammaguray i Pappatulan tatun nga tiempo. Nammaguray kari ngana turi ta nanoli si Jesus ta langi? Ari, megafu ta parehas nga kinagi ni Pedro anna Pablo nga kabalin na nekapaginnolay ni Jesus, natuppal sa i profesiya ta Salmo 110:1: “Ta yafù nga patul kinagi na YAFU, ‘Magitubang ka ta ziwanak-ku adde tu i kontram ira ay mapatulu ku.’” (Kingngua 2:32-35; Hebreo 10:12, 13) Egga gafu tiempo na paginnag.

23. (a) Kanni nga namegafu nammaguray i Pappatulan na Dios? (b) Anni i magigiammu ta tumunug nga kapitulo?

²³ Kunnasi kapadduna? Turi ta meka-19 anna meka-20 siglo, sesenu nga nalippawa na estudiante ira na Biblia nga nangultimo i tiempo na paginnag turi 1914. (Meyannung taw  nga petsa, innammu i artikulo ta Apendise nga, “1914​—Importante nga Dagun ta Profesiya na Biblia.”) I neessimmu ira ta mundo nga namegafu turi 1914 pakuruganna nga fustu i pakalippawa na matalo ira nga estudiante na Biblia. Ipasingan na neketuppal na profesiya na Biblia nga turi 1914, nabbalin tu Patul si Cristo anna namegafu ngana nga nammaguray i nelangitan nga Pappatulan na Dios. Manawag gafu nga mattolay tam ngana ta lagum na “pigo onu ababba nga tiempo” nga nabattang para kani Satanas. (Nepakannammu 12:12; Salmo 110:2) Masiguradu tam gapa nga aranni ngana nga ituppal na Pappatulan i uray na Dios ta davvun. Makapagayayya kari nikaw yaw nga dumug? Kurugammu kari yaw? Uffunan naka na tumunug nga kapitulo tape mammuammu nga talaga nga ituttuddu yaw na Biblia.