1. Ngatta nekiddaw na Etiope nga ofisial na korte nga mabawtisowan yaya?

‘AZZOYE i danum! Egga kari paga makagurun ta kabawtisò?’ Yatun i nepakkiavu na Etiope nga ofisial na korte turi ta ollu-siglo. Pinakurug sa na Cristiano nga si Felipe tu si Jesus i  nepromesa nga Mesias. Megafu ta natukkal i futú na lalaki nga Etiope ta nagigiammuna ta Katurakan, kayàna ngana insigida nga mabawtisowan!​—Kingngua 8:26-36.

2. Ngatta mawag nga nonopammu tu mapia i meyannung ta bawtismo?

² Nu ginigiammum tu mapia i nappasa ira nga kapitulo na yaw nga libru kavulu i Saksi ni Jehova, baka mepakkiavumu ngana gapa, ‘Anni i makefugag niakan nga mappabawtiso?’ Nannammuammu ngana i meyannung ta promesa na Biblia nga mannanayun nga inango ta Paraiso. (Lucas 23:43; Nepakannammu 21:3, 4) Nalippawamu ngana gapa nu anni i mesimmu ta natay ira anna i iddanama nga paginnolay. (Eclesiastes 9:5; Juan 5:28, 29) Awayyana nga um-umeka ngana ta study anna napakurug mu mismu nga i Saksi ni Jehova i kurug nga relihion. (Juan 13:35) I pinaka-importante ta ngamin, awayyana nga namegafu ka ngana nga mapeggan tu personal nga relasion kani Jehova nga Dios.

3. (a) Anni i nebilin ni Jesus ta disipulos na? (b) Kunnasi nga makua i bawtismo ta danum?

³ Kunnasim mepasingan nga kayàmu masserbi ta Dios? Nebilin ni Jesus ta disipulos na: “Umay kamu gafu ta ngamin nga totolay . . . anna pabbalinan nu ira tu disipulo. Bawtisowan nu ira.” (Mateo 28:19) Nepasingan mismu ni Jesus i makasta nga ehemplo gukaban na nekabawtisona ta danum. Ari yaya nga nawawwarsian tu danum, anna ari laman nga basta nevuvvu i danum ta uluna. (Mateo 3:16) Naggafu ta Griego nga termino i uvovug nga “bawtiso” nga kebalinanna “ilammag ta danum.” Kebalinan gafu na fustu nga kabawtiso tape mabbalin tu Cristiano ay i pangilammag ta interu nga baggi ta danum.

4. Anni i kebalinan na bawtismo ta danum?

⁴ Mawag tu mabawtisowan ta danum ngamin danuri maya nga mapeggan tu relasion kani Jehova nga Dios. I bawtismo ay publiko nga pangideklara ta pakkaragamu nga masserbi ta Dios. Ipasinganna yatun nga magayayyaka nga kuan i uray ni  Jehova. (Salmo 40:7, 8) Ngem egga ira mawag nga kuammu tape kualipikadoka nga mabawtisowan.

5. (a) Anni i ollu nga kawagan tape kualipikado nga mabawtisowan? (b) Ngatta importante i pagatende ta study?

⁵ Nakuam ngana i ollu nga kawagan. Kunnasi? Gukaban na regular nga paggigiammum tu Biblia, nammammum si Jehova nga Dios anna si Jesu-Cristo. (Bibbigammu i Juan 17:3.) Ngem aru paga i mawag nga gigiammuammu. Kaya na Cristiano nga ‘mapannuan tu naespirituan nga ka-uto anna pakalippawa tapenu kannammuan i uray’ na Dios. (Colosas 1:9) Tape makua yaw, dakal i meuffun na pagatende ta study na Saksi ira ni Jehova. Importante nga “ariat-tam nga immangan i paggaram-mammung tam.” (Hebreo 10:24, 25) Moffunan naka na regular nga paki-study tape mammammum i Dios.

6. Kunnasi karu na pakannammu ta Biblia i kawagammu nigem nga mabawtisowan?

⁶ Siempre, ariammu kawagan nga ammuan labbi ngamin i egga ta Biblia nigem nga mabawtisowan. Egga pakannammu na Etiope nga ofisial na korte, ngem kawaganna i uffun tape malippawana i karuan nga parte na Katurakan. (Kingngua 8:30, 31) Kagitta na Etiope, aru paga i mawag nga gigiammuammu. Kakuruganna, awan pulus tu pagaddetan na paggigiammu meyannung ta Dios. (Eclesiastes 3:11) Ngem nigem nga mabawtisowan, mawag nga ammuammu anna kurugammu i pammegafuanan ira nga tuttuddu na Biblia. (Hebreo 5:12) Angngariganna, i kinakurug meyannung ta mesimmu ta natay anna i importansia na ngagan na Dios anna i Pappatulanna.

7. Anni nakuan i efekto nikaw na paggigiammu tu Biblia?

⁷ Ngem kurang i basta pakannammu laman ta “nu awan tu angngurug na tolay, arian na nga awayya nga mapagayayya i Dios.” (Hebreo 11:6) Kagian nittam na Biblia nga “nangurug anna nabawtisowan” i taga-Corinto turi  ta naginnada i mensahe nga nelayyagayya na Cristiano ira. (Kingngua 18:8) Nu kunnatun, ta paggigiammum tu Biblia, mawag nga mapeggakka tu pangurug nga yatun i nainspiran nga Uvovug na Dios. Gukaban na paggigiammu tu Biblia, mangurug ka nakuan ta promesa ira na Dios anna ta makepalliag nga tavvu ni Jesus.​—Josue 23:14; Kingngua 4:12; 2 Timoteo 3:16, 17.

8. Anni i mamagaram nikaw nga ikagi ta tanakuan i nagigiammum?

⁸ Durante nga dumakadakal i pangurug ta futum, ariammu ngana magaggaddan nga ari kagian ta tanakuan i nagigiammum ira. (Jeremias 20:9) Siguradu nga mapagaram ka nga mangikagi ta tanakuan i meyannung ta Dios anna ta gakkag na ira.​​—Bibbigammu i 2 Corinto 4:13.

9, 10. (a) Sinni ira i awayyam pangikagianan ta nagigiammum nga kinakurug ta Biblia? (b) Anni i mawag nga kuammu nu kayàmu ngana i mevulun ta organisado nga pallayyagayya na Saksi ni Jehova?

⁹ Awayyam mamegafu nga ikagi i nagigiammum nga kinakurug ta Biblia ta paparientes, kokkofun, kakarruba, anna katrabahum. Sonu kua, baka kayàmu ngana gapa i makikavulu ta organisado nga pallayyagayya na Saksi ni Jehova. Nu kunnatun i matagenomu, ari ka mappasiran nga kagian yatun ta Saksi nga mattuttuddu nikaw. Nu kualipikado ka ngana nga mevulun nga mallayyagayya, dua nga elder ta kongregasion i makiuvovug nikaw kavulu i mattuddu nikaw ta Biblia.

¹⁰ Makoffun yaw nikaw tape mas mammammum i elder ira nga mappastor ta karneru ira na Dios. (Kingngua 20:28; 1 Pedro 5:2, 3) Nu masingan na elder ira nga nalippawamu i pammegafuanan nga tuttuddu na Biblia, iyaplikam ta pattolem i prinsipio ira na Biblia, anna kayàmu ngana talaga nga mabbalin tu Saksi ni Jehova, ikagida nikaw nga kualipikado ka ngana nga mevulun nga mallayyagayya bilang ari-bawtisado nga manangilayyagayya tu mapia nga dumug.

11. Anni i mawag nga kuan na tadday nige nga mapamavulunan nga mevulun nga mallayyagayya?

 ¹¹ Ngem awayyana nga egga paga kawagan nga ulliammu ta pattolem anna ta annangnguam tape kualipikado ka nga mevulun ta pallayyagayya. Kasali taw i pangiyemmammu ta itaga-tagum nga aggangngua. Yatutta nigem kiddawan i pabbalin tu ari-bawtisado nga manangilayyagayya, mawag tu lillitammu i makakua tu madammo nga liwa, kagitta na seksual nga immoralidad, pagillellaw, anna pangabuso tu droga.​—Bibbigammu i 1 Corinto 6:9, 10; Galacia 5:19-21.

12. Ngatta kawagan i pabbabawi?

¹² Egga paga ira i kawagan nigem nga mabawtisowan. Kinagi ni apostol Pablo: “Mabbabawi kamu . . . manoli kamu ta Dios tapenu pakoman nakamu ta katagarulian nu ira.” (Kingngua 3:19) Kebalinan na pabbabawi nga marraddam megafu ta kingnguam. Mepangngo laman i pabbabawi nu dati nga immoral i pattolay na tadday. Ngem nu dati gamma nga marenu ta moral, kawagan lagapa yatun. Ngatta? Megafu ta minattagaruli ngamin nga totolay anna kawagadda i pammakoma na Dios. (Roma 3:23; 5:12) Nigem naggigiammu tu Biblia, ariammu paga ammu i uray na Dios. Yari tu kunnasi nga makagim nga mekunnay ta uray na Dios i dati nga pattolem? Yatun i rason nu ngatta kawagan i pabbabawi.

13. Anni i pakkumberte?

¹³ Kabalin na pabbabawi, mawag i pakkumberte, onu ‘panoli.’ Kurang i basta marraddam laman. Mawag tu panawammu i dati nga marake nga annangnguam anna determinado ka nakuan ngana nga kuan i fustu. Kawagan i pabbabawi anna pakkumberte nigem nga mabawtisowan.

14. Anni i importante nga kuammu nigem mabawtisowan?

¹⁴ Egga paga i tadday nga kawagan nga makua nige na bawtismo. Mawag tu idedikam i baggim kani Jehova nga Dios.

15, 16. Anni i kaya kagian na pangidedikam ta baggim ta Dios, anna anni i rason nu ngatta kuammu yatun?

 ¹⁵ Nu idedikam i baggim kani Jehova nga Dios gukaban na napafutuan nga pakimallo, ipromesam nga yaya laman i passerbiammu tu mannanayun. (Deuteronomio 6:15) Ngatta gapa ta kaya na tadday nga kuan yatun? Tape matabbag yatun, nonopammu i bagitolay nga mangayaya ta maginganay. Durante nga mammammuna anna masinganna i makasta ira nga ugali na babay, mas nga iddukanna yaya. Siempre, natural laman nga ikiddona nga makkasal ngana ira dua. Kurug, i pangatawa, kebalinanna i aru nga responsibilidad. Ngem megafu ta aya, kuan na lalaki yatun nga importante nga gannug.

¹⁶ Turi ta nammammum anna nagigiammum nga ayatan si Jehova, napagaram ka nga iyawa sa i ngamin nga egga nikaw nga awan tu pabbabawyammu. Ngamin nga maya tumuttul kani Jesu-Cristo nga Ana na Dios, mawag tu “kattaman onu pallikuran na i baggi na.” (Marcos 8:34) Pallikurattam i baggi tam nu siguraduattam nga ari tu i personal nga pakkaraga i makefugag nittam nga mattuppal kanayun ta Dios. Nigem gafu mabawtisowan, mawag tu uray na Dios i pinaka-importante nikaw.​—Bibbigammu i 1 Pedro 4:2.

17. Ngatta magalanganin i karuan nga maddedika ta Dios?

¹⁷ Magalanganin i karuan nga maddedika kani Jehova megafu ta maganassing ira nga kuan yatun nga serioso nga desision. Awayyana nga mavurung ira nga egga tattabbagadda ta Dios bilang dedikado nga Cristiano. Mavurung ira nga ariadda matuppal i uray ni Jehova anna maparraddam da yaya. Yari tu pagabboda tu mas makasta nu ari ngana laman ira maddedika ta Dios.

18. Anni i mamagaram nikaw nga maddedika kani Jehova?

¹⁸ Durante nga magigiammum nga ayatan si Jehova, mapagaram ka nga maddedika sa, anna kuan i ngamin  nga mawayyam tape makapattoleka mekunnay ta dedikasiommu. (Eclesiastes 5:4) Nu nededikam ngana i baggim, siguradu nga kayàmu “mattolay nga kanayun nga mekunnay anna makapagayaya ta Yafu.” (Colosas 1:10) Megafu ta ayâmu ta Dios, ariammu pulus nonopan tu mariga nga kuan i uray na Dios. Siguradu nga umanugu ka kani apostol Juan nga nangitura: “Nu ayatat-tam i Dios, parulattat-tam gapa i bili-bilin na, ay ari gammabba tu mariga nga tuttulan danaw.”​—1 Juan 5:3.

19. Ngatta ari ka nakuan maganassing nga maddedika ta Dios?

¹⁹ Ariammu kawagan nga mabbalin tu perfekto nigem maddedika ta Dios. Ammu ni Jehova i limitasiommu anna arianna pulus kiddawan i ariammu makaya. (Salmo 103:14)  Kayàna nga masingan nga kuammu i urena yari tu suportan anna uffunan naka. (Bibbigammu i Isaias 41:10.) Makasiguraduka nga nu mattalo ka kani Jehova, “tununganna i dala-dalammu.”​—Proverbio 3:5, 6.

20. Ngatta mawag nga ari laman tu sikaw i makannammu nga naddedika ka ngana kani Jehova?

²⁰ Yaw ira nga nagigiammum i makoffun nikaw nga sigga-pakimallo nga maddedika kani Jehova. Mawag gapa nga  ngamin danuri mangiddu talaga kani Jehova ay mangipasingan tu publiko nga ‘pangilammuyag ta angngurug da.’ (Roma 10:10) Kunnasim nga makua yatun?

21, 22. Kunnasim nga makua i publiko nga pangideklara ta pangurug mu?

²¹ Ipakannammum ta koordineytor na elder ira ta kongregasionnu nga kayàmu ngana mappabawtiso. Egga ira elder nga mangirepaso nikaw ta pakkiavu ira meyannung ta pammegafuanan nga tuttuddu na Biblia. Nu umanugu ira nga kualipikado ka ngana, ikagida nikaw nga awayyam ngana mabawtisowan ta tumunug nga asembli. * Kada asembli, egga palappa nga mangipakanawag ta kebalinan na bawtismo. Kabalinna, egga dua nga simple nga pakkiavu na ispiker nga tabbagan na mappabawtiso ira nga mangipasingan tu “publiko nga pangideklara” ta pangurug da.

²² I bawtismo mismu i mangipakannammu ta publiko nga dedikadoka ngana ta Dios anna taddeka ngana nga Saksi ni Jehova. Melammag ta danum i interu nga baggi na kandidato ira na bawtismo nga mangipasingan ta publiko nga dedikado ngana ira kani Jehova.

23. Anni i kebalinan na mabawtisowan ta ngagan na Yama, na Ana, anna na masanto nga espiritu?

²³ Nekagi ni Jesus nga mabawtisowan i disipulos na ta ngagan na Yama, na Ana, anna na masanto nga espiritu. (Mateo 28:19) Kebalinanna yatun nga akseptan na kandidato na bawtismo i awtoridad ni Jehova nga Dios anna ni Jesu-Cristo. (Salmo 83:18; Mateo 28:18) Alawatanna gapa i papel anna trabahu na masanto nga espiritu na Dios, onu i aktibo nga fuersa.​—Galacia 5:22, 23; 2 Pedro 1:21.

24, 25. (a) Anni i isimbolo na bawtismo? (b) Anni nga pakkiavu i mawag nga matabbag?

²⁴ Ngem ari laman tu basta pangilammag ta danum i  bawtismo. Egga kuruga importante nga isimbolona yatun. Isimbolo na kelammag ta danum nga natay ka ngana ta dati nga katakatolem. I kelattuag mu gapa ta danum, kebalinanna nga mattoleka ngana tape kuan i uray na Dios. Daddammammu nga kani Jehova ka nga naddedika, ari nga ta trabahu, gakkag, tanakuan nga totolay, onu ta tadday nga organisasion. I dedikasion anna bawtismom i pamegafuanan na kuruga madukko nga pakikofun ta Dios—tadday nga meggo nga relasion sa.—Salmo 25:14.

²⁵ Ari nga garantiya ta kapalliag i bawtismo. Netura ni apostol Pablo: “Talakkurugan nu nga ibalin i kapaliag nu—ta kurug nga agganassing anna ammakakua ta Dios.” (Filipos 2:12) Pamegafuanan laman i bawtismo. Ngem kunnasi ka nga makapattalupaddian ta aya na Dios? Matabbag yatun nga pakkiavu ta ultimo nga kapitulo.