1. Anni i gakkag na Dios para ta davvun?

MAKAKKASTA i gakkag ni Jehova para ta davvun. Kayana nga mapannu i davvun tu magayayya anna magawa-gawayyan nga totolay. Kagian na Biblia tu “nammula si Jehova nga Dios tu hardin ta Eden” anna “pinattugu onu pinattalovuna . . . i kada klase na kayu nga mekemmemmi nga innan anna mapia nga kanan.” Kabalin nga pinaratu na Dios i ollu nga lalaki anna babay, da Adan anna Eva, nepena ira ta kuruga makakkasta nga paddianan anna kinagina nira: “Maggaka kamu anna umaru kamu, pannuannu i davvun anna imagurayannu.” (Genesis 1:28; 2:8, 9, 15) Yari tu gakkag na Dios nga mapeggan tu ana i totolay, palawadda i hardin adde ta mabbalin tu Paraiso i interu davvun, anna tangngalladda i aya-ayam.

2. (a) Kunnasi tam makasiguradu nga matuppal i gakkag na Dios para ta davvun? (b) Segun ta Biblia, sinni i mattolay tu mannanayun?

² Para nikaw, matuppal kari noka i gakkag na Dios para ta totolay nga maddian ta paraiso nga davvun? “Nakagî ngana yatun,” nedeklara na Dios, “tuppalakku gapa.” (Isaias 46:9-11; 55:11) Wan, siguradu nga matuppal i gakkag na Dios! Kinagina tu “finormana i davvun tapenu paddianan, arianna pinaratu yatun nga awan tu sesserbina.” (Isaias 45:18) Sinni i kaya na Dios nga maddian ta davvun? Kunnasi kabayag nga mattolay ira? Tumabbag i Biblia:  “I matunung ira ay irensiad-da i davvun, anna maddian ira taw tu mannanayun.”​—Salmo 37:29; Nepakannammu 21:3, 4.

3. Anni i miserable ira nga mesissimmu ta davvun, anna anni ira nga pakkiavu i palattuaganna?

³ Manawag nga ari paga natuppal yaw. Mattaki anna matay i totolay; marralaban anna mappipinnatay paga lagu ira. Egga ari tu makasta nga nesimmu. Ngem siguradu nga ari tu ginakkag na Dios nga kunnaw i pabbalinan na davvun! Anni panô nesimmu? Ngatta ari paga natuppal i gakkag na Dios? Awan tu libru na historia i makekagi nittam gafu ta namegafu ta langi i problema.

4, 5. (a) Sinni talaga i nakiuvovug kani Eva gukaban na serpiente? (b) Kunnasi nga mabbalin tu minakkoko i respetadu anna mapammakatalakkan nga tolay?

⁴ Kagian na ollu nga libru na Biblia i tadday nga kumokkontra nga limittuag ta hardin na Eden. Nagalan yaya tu “i serpiente” ngem neruma ta karuan nga ayam. Kagian gapa na ultimo nga libru nga yaya “i nagalan tu Diablo anna Satanas, i minannabag ta interu nga mapaddianan nga davvun.” Nagalan gapa yaya tu “i orihinal nga serpiente.” (Genesis 3:1; Nepakannammu 12:9, NW ) Neyusa na makapangngua nga anghel, onu ari masingan nga espiritu nga pinaratu, i serpiente tapenu makiuvovug kani Eva, kagitta na malalaki nga tolay nga mamalawan tu ngaralna ta tammina nga asassana onu puppet. Siguradu nga egga yatun nga espiritu nga persona turi ta pinaratu na Dios i davvun para ta totolay.​—Job 38:4, 7.

⁵ Megafu ta perfekto i ngamin nga pinaratu na Dios, sinni gafu i namaratu taw nga “Satanas” nga “Diablo”? Manawag gafu nga pinabbalin na tadday nga makapangngua nga espiritu nga ana na Dios i baggina tu Diablo. Kunnasi nga posible yatun? Bueno, posible nga mabbalin tu minakkoko i respetadu anna mapammakatalakkan nga tolay. Kunnasi? Awayyana  nga ipamavulun na tadday nga tolay tu mabbalin tu marake i pakkaraga ta futuna. Nu kanayun nga nonopanna i meyannung tatun, mas maduppangan i marake nga pakkaragana. Sonu egga oportunidad, awayyana nga ituppal i marake nga agganonona.​—Bibbigammu i Santiago 1:13-15.

6. Kunnasi nga nabbalin tu Satanas nga Diablo i makapangngua nga espiritu nga ana na Dios?

⁶ Kunnatun i nesimmu kani Satanas nga Diablo. Naginnana i kinagi na Dios kani Adan anna Eva nga maggaka ira ana pannuadda i davvun tu gaka-gaka da. (Genesis 1:27, 28) Awayyana nga nanono ni Satanas, ‘anni kasta na nu sakan i dayarayawan na totolay ari tu i Dios!’ Yari tu marake i motibo nga nallattuag ta futuna. Panguriananna, sinentana si Eva gukaban na pangikagina sa tu kinaladdug meyannung ta Dios. (Bibbigammu i Genesis 3:1-5.) Yatun i gafuna nga nabbalin yaya tu “Diablo,” nga kebalinanna “Mamaraparake,” anna “Satanas” nga kebalinanna “Kumokkontra.”

7. (a) Natta natay da Adan anna Eva? (b) Ngatta mallakay anna matay i ngamin nga gaka ni Adan?

⁷ Gukaban na kinaladdug anna pangilloko, nasulsulan ni Satanas nga Diablo da Adan anna Eva nga ari mattuppal ta Dios. (Genesis 2:17; 3:6) Natay ira megafu tatun segun ta kinagi na Dios nga mesimmu nu ariadda magginna. (Genesis 3:17-19) Megafu ta nabbalin tu imperfekto si Adan turi ta nakaliwa yaya, narensia ngamin na gakana i liwa. (Bibbigammu i Roma 5:12.) Awayya tam igitta i situasion ta tadday nga orma nga meyusa ta pallutu tu tinapay. Nu egga kuppi na orma, anni pabbalinan na kada tinapay nga melutu ta orma? Egga lagapa kuppina. Ta kunnatun gapa, kada tolay egga narensiana nga “kuppi” na kina-imperfekto ni Adan. Yatun i gafuna nga mallakay anna matay i ngamin nga totolay.​—Roma 3:23.

8, 9. (a) Anni i hamun ni Satanas? (b) Ngatta ari insigida pinatay na Dios i rebelde ira?

⁸ Nangiyorollu tu rebelyon si Satanas turi ta sinulsulanna da Adan anna Eva nga ari magginna ta Dios. Kokkontranna i  pammaguray ni Jehova. Kagitta na kakkagianna: ‘Marake nga mammaguray i Dios. Laddug yaya anna iyetuna i mapia ta sakupna ira. Ari nga kawagan na totolay i Dios. Mawayyada i maddesision nu anni i mapia anna marake para ta baggida. Mas makasta paga i pattuppaladda nu sakan i mammaguray nira.’ Kunnasi nga inarubang na Dios yatun nga makainsulto nga hamun? Egga i mangikagi nga pinatay ngana laman  nakuan na Dios i narrebelde ira. Ngem matabbag na kari yatun i hamun ni Satanas? Mapakurug kari nga fustu i pammaguray na Dios?

⁹ Gafu ta perfekto i hustisia ni Jehova, arianna insigida pinatay i rebelde ira. Naddesision yaya tu mawag nga pappasan i tiempo tapenu interamente nga matabbag i hamun ni Satanas anna mapakurug nga laddug i Diablo. Yari tu nepamavulun na Dios nga pammagurayan na totolay i baggida ta nabinnay nga tiempo nga egga ta influwensia ni Satanas. Mepakanawag ta Kapitulo 11 nu ngatta kunnatun i kingngua ni Jehova anna nu ngatta nepamavulunna nga mappasa i nabinnay nga tiempo nige na nga solban yatun. Ngem makasta nga nonopattam: Rasonable kari nga kurugan da Adan anna Eva si Satanas, nga awan mabba vuluvuga tu mapia nga kingnguana para nira? Fustu kari nga kurugadda tu manattazzi anna minalladdug si Jehova, i nangiyawa ta ngamin nga egga nira? Anni kuammu nu sikaw i egga tari?

10. Kunnasim masuportan si Jehova tapenu matabbag i hamun ni Satanas?

¹⁰ Makasta nga nonopan yaw ira nga pakkiavu, gafu ta mepaarubang i kataggitadday nittam ta parehu nga isyu. Wan, egga tiansam nga suportan si Jehova tapenu matabbag i hamun ni Satanas. Alawatammu si Jehova bilang i Mammagurem tapenu makoffun ka nga mamakurug tu laddug si Satanas. (Salmo 73:28; bibbigammu i Proverbio 27:11.) Ngem makapadismaya gafu ta piga laman ta binillion nga totolay ta mundo i nagangngua tu kunnatun. Palattuaganna yaw nga importante nga pakkiavu, Talaga kari nga ituttuddu na Biblia nga si Satanas i mammaguray ta mundo?

11, 12. (a) Kunnasi nga i tentasion kani Jesus pakuruganna nga si Satanas i mammaguray ta mundo? (b) Anni paga i mamakurug tu si Satanas i mammaguray ta mundo?

¹¹ Ari vuluvuga nga pinaddudan ni Jesus tu si Satanas i mammaguray ta mundo. Gukaban na milagro, nepasingan ni Satanas kani Jesus “i pappatulan ta utun na davvun  tuange ta ngamin nga makapabbaw nga egga nira.” Kabalinna nepromesa ni Satanas kani Jesus: “Iyawa ku nikaw ngamin danaw nu mappalittukag ka ta arubang ku anna daya-rayawam-mà.” (Mateo 4:8, 9; Lucas 4:5, 6) Nonopammu yaw. Mabbalin kari tu tentasion kani Jesus yatun nu ari tu si Satanas i mammaguray taw ira nga pappatulan? Ammu ni Jesus nga kukua ni Satanas ngamin yaw ira nga gobierno ta mundo. Kinontra nakuan yatun ni Jesus nu ari tu kurug nga si Satanas i egga ta likug na yatun ira nga gobierno.

¹² Siempre, si Jehova i makapangngua-ta-ngamin nga Dios, i Namaratu ta makapabbaw nga uniberso. (Nepakannammu 4:11) Ngem awan vuluvuga tu kinagi na Biblia tu si Jehova nga Dios onu si Jesu-Cristo i mammaguray taw nga mundo. Kakuruganna, espesipiko nga kinagi ni Jesus tu si Satanas “i mammaguray toye ta mundo.” (Juan 12:31; 14:30; 16:11) Kagian paga na Biblia tu si Satanas nga Diablo i “dios noye na mundo.” (2 Corinto 4:3, 4) Meyannung taw nga kumokkontra, onu Satanas, netura na Cristiano nga apostol nga si Juan: “I mundo ay egga ta pammaguray na Demonio.”​—1 Juan 5:19.

13. Ngatta kawagan i bagu nga mundo?

¹³ Ta kada mappasa nga dagun, mas mappeligro i mundo. Napannu i mundo tu maggegerra nga armada, darogas nga politiko, magappappe nga lider na relihion, anna minaddakarake nga kriminal. Imposible nga manguli paga i interu mundo. Ipakannammu na Biblia nga aranni ngana i tiempo nga alsan na Dios i marakay nga mundo sonu duttal i gerra na Armagedon. Matallianan yaw tu matunung nga mundo.​—Nepakannammu 16:14-16.

14. Sinni i pinili na Dios nga Mammaguray ta Pappatulanna? Kunnasi nga neprofesiya yaw?

¹⁴ Pinili na Dios nga Jehova si Jesu-Cristo bilang Patul ta Pappatulanna, onu gobierno ta langi. Nabinnay ngana nga neprofesiya na Biblia: “Neyana nittam i tadday nga abbing,  neyawa nittam i tadday nga ana nga lalaki; mepaabaga sa i pammaguray. Magalan yaya tu . . . Prinsipe na Imammo. Awan tu pagaddetan na pallawa na pammagurena anna na imammo.” (Isaias 9:6, 7, footnote) Meyannung taw nga gobierno, netuddu ni Jesus nga ipakimallo na tagatuttulna: “Maparattal paray i Pammagurem. Makua i urem toye ta davvun ta kunne ta langi.” (Mateo 6:10) Kagitta na masingattam ta tumunug nga kapitulo, aranni ngana nga alsan na Pappatulan na Dios i ngamin nga gobierno ta mundo, anna yatun i manali ta ngamin nga gobierno. (Bibbigammu i Daniel 2:44.) Kabalinna, pabbalinan na Pappatulan na Dios tu paraiso i interu davvun.

15. Anni i “bagu nga davvun”?

¹⁵ Nepasiguradu na Biblia: “Ngem innaggat-tam i nitabba na Dios nga bagu nga langi anna bagu nga davvun nga pammagurayan na katunung.” (2 Pedro 3:13; Isaias 65:17) Nu mittan, nu mabibbig ta Biblia i uvovug nga “davvun,” kebalinanna i totolay nga maddian ta davvun. (Genesis 11:1) Yari tu i matunung nga “bagu nga davvun” ay vukkalan na totolay nga paboran na Dios.

16. Anni ira nga bendision i malawa danuri pinaboran na Dios, anna anni kuattam tapenu malawa yatun?

¹⁶ Nepromesa ni Jesus nga ta mappange nga bagu nga mundo, makalawa danuri pinaboran na Dios tu regalu nga “inango nga adde ta ngangangay onu mannanayun.” (Marcos 10:30) Bibbigammu ta Bibliam i Juan 3:16 anna 17:3, tapenu mammuammu i kinagi ni Jesus nga mawag nga kuattam tapenu makalawa tu inango nga mannanayun. Innattam ta Biblia i bendision ira nga malawa danuri kualipikado para ta makapabbaw nga regalu na Dios ta mappange nga Paraiso nga davvun.

17, 18. Kunnasi tam makasiguradu tu egga noka i imammo anna seguridad maski sitaw ta davvun?

¹⁷ Malsa noka i kinamarakay, gegerra, krimen, anna panattazzi. “I marakay ira ay mapawan . . . ngem i minappakalinno  ay irensiad-da i davvun.” (Salmo 37:10, 11) Egga noka i imammo gafu ta ‘pagimmangan na Dios i gerra ira ta tanga-ravvunan.’ (Salmo 46:9; Isaias 2:4) Kabalinna, nepasiguradu na Biblia nga “mannanayun paray ta katolay na i katunungan; mannanayun paray i imammo adde ta kegga na vulan.”​—Salmo 72:7.

¹⁸ Egga seguridad danuri maddayarayaw kani Jehova. Turi ta tiempo na Biblia, egga seguridad onu awan tu paganassingan na Israelita ira nu mattuppal ira ta Dios. (Levitico 25:18, 19) Anni kasta na gapa i mattolay ta Paraiso nga egga seguridad na!​—Bibbigammu i Isaias 32:18; Mikias 4:4.

19. Kunnasi tam makasiguradu nga abundansia noka i makan ta bagu nga mundo na Dios?

¹⁹ Awan noka tu pakkurang tu makang. “Aru paray i magatab onu maapit ta koman ira,” nekansion na salmista. “Matakkabban paray i kavukiran ta mula-mula.” (Salmo 72:16) Bendisionan noka na Dios nga Jehova i matunung na ira, anna mamalawan i davvun tu abundansia nga apit.​—Salmo 67:6.

20. Kunnasi tam makasiguradu nga mabbalin tu paraiso i interu davvun?

²⁰ Mabbalin noka tu paraiso i interu davvun. Mapataddaggan tu makakkasta nga babalay anna hardin i davvun nga zinaral na minattagaruli nga totolay. (Bibbigammu i Isaias 65:21-24; Nepakannammu 11:18) Ta pappasa na dagun, lumawa i parte na davvun nga nemorayan ngana adde ta i interu nga globo ay mabbaling tu makakkasta anna produktibo kagitta na hardin na Eden. Iyawa gapa na Dios i ngamin nga karagatan na kada gannug nga egga inangona.​—Salmo 145:16.

21. Anni i mangipasingan nga egga noka i imammo ta nallatanan na totolay anna aya-ayam?

²¹ Egga noka imammo ta nallatanan na totolay anna aya-ayam. Mavvurulu noka nga kuman i simaron anna masippo nga aya-ayam. Maski i baddi nga abbing arianna noka  ikassing i delikadu ira nga ayam.​—Bibbigammu i Isaias 11:6-9; 65:25.

22. Anni noka i mesimmu ta taki?

²² Mapawan noka i taki. Bilang Mammaguray na nelangitan nga Pappatulan na Dios, mas aru noka i uruan ni Jesus anne turi ta keggana ta davvun. (Mateo 9:35; Marcos 1:40-42; Juan 5:5-9) Yatun i gafuna nga “awan noka tu maski sinni nga mangikagi: ‘Mataki ngâ.’”​—Isaias 33:24; 35:5, 6.

23. Ngatta makapagayayya ta futu i paginnolay?

²³ Mapaginnolay noka i ideddukattam nga egga tiansada nga mattolay tu mannanayun. Mapaginnolay noka ngamin danuri nakkaturug ta patay nga egga ta memorya na Dios. Kakuruganna, kagian na Biblia tu “egga noka paginnolay na matunung anna ari matunung.”​—Kingngua 24:15, NW; bibbigammu i Juan 5:28, 29.

24. Anni i makagim ta pattolay ta Paraiso nga davvun?

²⁴ Anni mabba kasta na pattuppalan danuri maggigiammu meyannung ta Kadakallan nga Namaratu, si Jehova nga Dios, anna masserbi paga sa! I mappange nga Paraiso ta davvun i nepromesa ni Jesus ta kriminal nga kavuluna nga natay: “Makitappadiak-ka niakan ta Paraiso.” (Lucas 23:43) Megafu kani Jesu-Cristo, mabbalin tu posible ngamin yaw nga bendision, yari tu importante nga gigiammuattam i aru paga meyannung sa.