NEBILIN ta Cristiano ira nga iselebrada i Memorial na patay ni Cristo. Magalan gapa yaw nga okasion tu “i Pamugag na Yafu.” (1 Corinto 11:20) Kunnasi ka-importantena yatun? Kada anni anna kunnasi nga meselebra?

Pinegafuanan mismu ni Jesus yaw nga selebrasion turi ta gabi na 33 C.E. ta Paskua na Judio. I Paskua ay selebrasion nga mangiperaddam ta nekapalliag na Israelita ira ta Ehipto. Meselebra yatun kada dagun, ta meka-14 aggaw na vulan na Nisan ta kalendario na Judio. Tape makalkula yatun nga petsa, ininnaggan na Judio ira i spring equinox. Yaw i aggaw nga parehas nga ma-12 oras i nawag kunne na gapa i zibbo. I ollu nga new moon nga aranni ta spring equinox i pamegafuanan na vulan na Nisan. Ta meka-14 aggaw, meselebra i Paskua kabalin na pallammag na bilag.

Neselebra ni Jesus i Paskua kavulu i apostoles na, kabalinna, pinapanona si Judas Iscariote, tapus neselebrada i Pamugag na Yafu. Yaw nga pamugag i nanali ta Paskua na Judio yari tu mawag nga meselebra mamittan ta kada dagun.

Kagian na Ebanghelio ni Mateo: “Nanga si Jesus tu pan, tapus kabalinna nga nakkiddaw tu pamendision, ginaddagadduana, anna neyawana ta disipulos na, tapus nekagina: ‘Apannu,  kanannu. Yaw kebalinanna i baggì. Nanga gapa tu kopa, nabbalabalo tapus neyawana nira, anna nekagina: ‘Minukkamu, sikamu ngamin, ta yaw kebalinanna i dagà nga ‘daga na pakkasinabban,’ nga mevuvvu megafu ta aru nga totolay para ta kapakoma na liwi-liwà.’”​—Mateo 26:26-28, NW.

Mangurug i karuan nga pinabbalin ni Jesus i pan tu literal nga pattag na anna i binarayang tu mismu nga dágana. Ngem buu gamma paga i baggi ni Jesus turi ta kabalinna nga neyawa i pan. Talaga kari nga kinnan anna ininum na apostoles i literal nga pattag anna dága ni Jesus? Ari, megafu ta kanibalismo yatun anna kontra ta dorob na Dios. (Genesis 9:3, 4; Levitico 17:10) Segun ta Lucas 22:20 [NW ], nekagi ni Jesus: “Yaw nga kopa, kebalinanna i bagu nga pakkasinabban megafu ta dagà, nga mevuvvu para nikamu.” Nabbalin kari i kopa tu literal nga “bagu nga pakkasinabban”? Imposible yatun, megafu ta i pakkasinabban ay tadday nga pakitratu, ari tu gannug nga masingan.

Yatutta parehas laman nga simbolo i pan anna binarayang. Isimbolo na pan i perfekto nga baggi ni Jesus. Nangiyusa si Jesus tu pan nga navuna ta Paskua. Napadday yatun nga awan tu lebadurana. (Exodo 12:8) Maruddu nga usan na Biblia i lebadura nga mangisimbolo tu liwa onu kadaral. Isimbolo gafu na pan i perfekto nga baggi nga nesakrifisio ni Jesus. Awan tu liwâna.​—Mateo 16:11, 12; 1 Corinto 5:6, 7; 1 Pedro 2:22; 1 Juan 2:1, 2.

Isimbolo na uzzin nga binarayang i daga ni Jesus. Yatutta i daga i namabbalin ta bagu nga pakkasinabban tu legal. Kinagi ni Jesus nga mevuvvu i dágana “para ta kapakoma na liwi-liwa.” Mebilang gafu i totolay tu marenu ta pagimamma na Dios anna malagum ta bagu nga pakkasinabban kani Jehova. (Hebreo 9:14; 10:16, 17) Yaw nga pakkasinabban, onu kontrata i namabbalin nga posible para ta 144,000 matalo nga Cristiano nga umay ta langi. Masserbi i kada tadday nira bilang patul anna pari ta langi tape mabendisionan i ngamin nga totolay.​—Genesis 22:18; Jeremias 31:31-33; 1 Pedro 2:9; Nepakannammu 5:9, 10; 14:1-3.

Sinni laman i kuman anna minum ta emblema ta Memorial? Siempre, danuri parte na bagu nga pakkasinabban​—nelangitan  i iddanamada​—i mapamavulunan nga kuman tu pan anna minum tu binarayang. I masanto nga espiritu na Dios i mangumbinsi ta tadday nga yaya ay napili nga mabbalin tu patul nga umay ta langi. (Roma 8:16) Malagum gapa ira ta pakkasinabban na Pappatulan kavulu si Jesus.​—Lucas 22:29.

Kunnasi gapa danuri egga iddanamana nga mattolay tu mannanayun ta Paraiso nga davvun? Mattuppal ira ta bilin ni Jesus anna magatende ira ta Pamugag na Yafu ngem ariadda kuman anna minum tu emblema. Kada dagun, kabalin na pallammag na bilag ta Nisan 14, iselebra na Saksi ira ni Jehova i Pamugag na Yafu. Mabalor ta ngamin nga Cristiano yaw nga selebrasion maski nu baddi laman ta interu mundo i nelangitan i iddanamana. Awayya tam ngamin daddamman taw nga okasion i kadakallan nga aya nga nepasingan ni Jehova anna ni Jesu-Cristo.​—Juan 3:16.