1, 2. (a) Kunnasi nga mabbalin tu mabalor nikaw i regalu? (b) Ngatta i tavvu i pinakamabalor nga regalu nga awayyam malawa?

ANNI i pinakamabalor nga regalu nga nalawamu ngana? Ari tu mawag nga mangina i regalu tapenu mabbalin tu importante. Ta kakuruganna, ari gamma nga magukug i balor na regalu segun ta kanginana. Ngem nu mangiyawa yatun tu pagayayya nikaw onu talaga nga kawagammu, mabbalin yatun tu mabalor nikaw.

² Ta ngamin nga regalu nga kayamu nga malawa, egga i tadday nga nerumuruma ta ngamin. Yatun i regalu na Dios ta totolay. Aru nga gannagannug i neyawa nittam ni Jehova, ngem i sakrifisio nga tavvu ni Jesu-Cristo nga Anâna i pinakamabalor nga regaluna. (Bibbigammu i Mateo 20:28.) Mammuattam taw nga kapitulo nga i tavvu i pinakamabalor nga regalu nga awayyam malawa. Megafu taw, mapeggakka tu ari mabaloran nga pagayayya anna meyawana i kuruga kawagammu ta pattolay. I tavvu i talaga kadakallan nga pangipasingan ni Jehova tu ayâna nikaw.

3. Anni i tavvu, anna anni mawag nga malippawa tam tape maapresia i balor na yaw nga regalu?

³ Ta simple nga uvovug, i tavvu i neyusa ni Jehova tape mapalliag, onu matavvu, i totolay ta liwâ anna patay. (Efeso 1:7) Tape malippawa tam i kebalinanna yaw nga tuddu na Biblia, mawag nga ammuattam nu anni nesimmu gari ta hardin na Eden. Maappresia tam laman nga mabalor i regalu nga tavvu nu malippawa tam nu anni i nawawan ni Adan turi ta nattagaruli yaya.

4. Anni ira i bentaha ni Adan megafu ta perfekto i inangona?

⁴ Turi ta pinaratu ni Jehova si Adan, iniddanna yaya tu kuruga importante nga gannug—perfekto nga inango. Nonopammu nu anni ira bentahana yaw kani Adan. Megafu ta perfekto i baggi anna nonôna, ari yaya pulus mattaki, mallakay, onu matay. Bilang perfekto nga tolay, egga espesial nga relasionna kani Jehova. Kagian na Biblia nga si Adan ay “ana na Dios.” (Lucas 3:38) Meggo i relasion ni Adan kani Jehova, kagitta na relasion na ana ta minaggiddu nga yamana. Direkta nga nakiuvovug si Jehova kani Adan, anna iniddanna yaya tu makapagayayya ira nga trabahu anna kinagina sa nu anni i mawag nga kuanna.​—Genesis 1:28-30; 2:16, 17.

5. Anni i kaya kagian na Biblia ta nekeparatu ni Adan “ta imahe na Dios”?

⁵ Naparatu si Adan “ta imahe na Dios.” (Genesis 1:27) Ari na kaya kagian yatun tu kamukâna i Dios. Nagigiammu tam ta Kapitulo 1 nga si Jehova ay Espiritu​—ari masingan. (Juan 4:24) Yatutta awan tu pisikal nga baggi ni Jehova; awan tu pattag anna dágana. Megafu ta naparatu si Adan ta imahe na Dios, egga ira kualidad na nga kagitta na Dios, gitta na aya, sirib, kinahustisia, anna pakapangngua. Egga paga importante nga negittan ni Adan ta Yamana. Egga sa i pakawayya nga mappili. Yari tu, ari nga  robot si Adan nga kuanna nu anni laman i nakaprograma nga kuanna. Awayyana lallagu maddesision anna mappili nu anni mapia anna marake. Nu pinilina i nattuppal ta Dios, nattolay nakuan yaya tu mannanayun ta Paraiso nga davvun.

6. Anni i nawawan ni Adan turi ta ari nattuppal ta Dios, anna anni i efekto na yaw ta gaka-gaka na?

⁶ Manawag gafu, turi ta ari nattuppal si Adan ta Dios anna nasentensian nga matay, nappaga yaya tu kuruga mangina. Gafu ta nattagaruli, nawawanna i perfekto nga inangona pati paga i ngamin nga bentahana. (Genesis 3:17-19) Kaddaraddam, nawawanna gapa i perfekto nga inango para nakuan ta gaka-gakána. Kagian na Uvovug na Dios: “Megafu ta tadday nga tolay [Adan], egga ta utun na davvun i pattagaruli, ay i katagarulian na i nangirattal ta patay. Ay nawwara i patay ta ngamin nga totolay megafu ta nattagaruli ngamin i totolay.” (Roma 5:12) Wan, nakarensia tam ngamin tu tagaruli kani Adan. Yatun i gafuna nga kinagi na Biblia tu nabbalin yaya anna i gaka-gakána tu “aripan” na tagaruli anna patay. (Roma 7:14) Awan ngana tu iddanama da Adan anna Eva megafu ta pinilida mismu nga ari mattuppal ta Dios. Ngem kunnasi ngana i gaka-gakáda, pati sittam?

7, 8. Anni i dua nga kebalinan na tavvu?

⁷ Pinalliag ni Jehova i totolay gukaban na tavvu. Anni i tavvu? Egga dua nga kebalinan na tavvu. Ollu, i tavvu ay i balor nga mepaga tapenu matavvu i tadday nga tolay onu masaká i tadday nga gannug. Megitta yaw ta balor nga mepaga tapenu matavvu i nakidnap nga abbing. Mekadua, i tavvu i balor nga pattakkab, onu pappaga ta balor na tadday nga gannug. Meyarig yatun ta daños. Angngariganna, nu egga nadaral na tadday nga tolay, mawag nga paganna i eksakto nga balor na gannug nga nadaral.

 ⁸ Kunnasi nga mapagan i daka-dakal nga nawawan ni Adan nga namerwisio nittam ngamin, tape mapalubbangattam ta pangaripan na liwâ anna patay? Gigiammuattam i meyannung ta tavvu nga neyawa ni Jehova anna nu kunnasi naka mabenefisiowan yaw.

9. Anni nga tavvu i kawagan?

⁹ Gafu ta perfekto nga inango i nawawan, ari nga mapagan na imperfekto nga inango i balor na yatun. (Salmo 49:7, 8) Kawagan i tavvu nga kaparehu na balor na nawawan. Mekunnay yaw ta prinsipio na perfekto nga hustisia nga kagian na Uvovug na Dios: “Inango ta inango.” (Deuteronomio 19:21) Anni gafu i makatavvu ta balor na perfekto nga kararua, onu inango nga nawawan ni Adan? Perfekto nga inango lagapa i kawagan nga tavvu.​—1 Timoteo 2:6.

10. Kunnasi nga neyawa ni Jehova i tavvu?

¹⁰ Kunnasi nga neyawa ni Jehova i tavvu? Zinog na i tadday ta perfekto nga espiritu nga anâna ta davvun. Ngem ari nga zinog ni Jehova i maski sinni laman ta espiritu nga pinaratu. Zinog na i pinakamabalor sa, i tattadday nga Anâna. (Bibbigammu i 1 Juan 4:9, 10.) Sigga-anugu nga pinanawan na Ana i nelangitan nga paddiananna. (Filipos 2:7) Segun ta nagigiammu tam ta nappasa nga kapitulo, nagangngua tu milagro si Jehova turi ta neyalina i inango na Anâna ta san ni Maria. Gukaban na masanto nga espiritu na Dios, neyana si Jesus bilang perfekto nga tolay nga awan tu narensiana nga tagaruli.​—Lucas 1:35.

11. Kunnasi nga matavvu na tadday nga tolay i minillion nga totolay?

¹¹ Kunnasi nga matavvu na tadday nga tolay i minillion nga totolay? Bueno, kunnasi kari nga nabbalin tu minattagaruli i minillion nga totolay? Daddammammu nga megafu ta pattagaruli ni Adan, nawawanna i pinakamabalor nga perfekto nga inangona. Yari tu, arianna mepamana  yatun ta gaka-gakána. Lallagu, tagaruli anna patay laman i mepamanana. Si Jesus, “i pangurianan nga Adan,” ay egga perfekto nga inangona bilang tolay anna ari vuluvuga nattagaruli. (1 Corinto 15:45) Kaya na kagian, si Jesus i nanali ta paddian ni Adan tapenu mapalliag tam. Megafu ta perfekto nga pattuppal ni Jesus ta Dios gukaban na pangisakrifisio ta perfekto nga inangona, napaganna i balor na tagaruli ni Adan. Nakeyawa gafu si Jesus tu iddanama ta gaka-gaka ni Adan.​—Roma 5:19; 1 Corinto 15:21, 22.

12. Anni i napakurug ni Jesus maski nu nazzigariga?

¹² Detalyado nga netura ta Biblia i zigariga nga inattamman ni Jesus nige na patena. Nalatigo yaya anna nepato ta pakazigarigatan nga estaka, kuruga nazzigariga adde ta natay. (Juan 19:1, 16-18, 30; Apendise, “Mepangngo Kari nga Mangiyusa tu Krus i Kurug ira nga Cristiano?”) Ngatta mawag tu mazzigariga si Jesus? Magigiammu tam ta kapitulo 11 i akusasion ni Satanas nga awan tu mattalupaddian nga matalô ta aripan ira ni Jehova nu mazzigariga ira. Gukaban na kinamatalo anna pagattam ni Jesus ta pazzigarigana, nakeyawa tu kakastan nga tabbag ta hamun ni Satanas. Megafu tatun, napakurug ni Jesus nga awayya na perfekto nga tolay nga egga pakawayyana nga mappili, i mattalupaddian nga matalô ta Dios, maski anni paga kuan na Diablo. Siguradu nga nagayayya si Jehova ta kinamatalo na meddu nga Anâna!​—Proverbio 27:11.

13. Kunnasi nga napagan i tavvu?

¹³ Kunnasi nga napagan i tavvu? Ta Nisan 14, 33 C.E. ta kalendario na Judio, nepamavulun na Dios tu matay i awan tu tagarulina nga Anâna. Mamippittan nga nesakrifisio ni Jesus i perfekto nga inangona ngem i efektona ay “adde noka.” (Hebreo 10:10) Ta meka-tallu nga aggaw kabalin na patay ni Jesus, pinaginnolay yaya ni Jehova bilang espiritu. Ta langi, neyarubang ni Jesus ta Dios i balor na perfekto nga inangona bilang tolay nga  nesakrifisio bilang tavvu katali na gaka-gaka ni Adan. (Hebreo 9:24) Inalawâ ni Jehova i balor na sakrifisio ni Jesus bilang tavvu nga kawagan tapenu mapalliag i totolay ta pangaripan na tagaruli anna patay.​—Bibbigammu i Roma 3:23, 24.

14, 15. Anni i mawag nga kuattam tapenu mapakoma ta katagarulian?

¹⁴ Maski nu minattagaruli tam, malawa tam lagapa i ari mabaloran ira nga bendision megafu ta tavvu. Ammuattam i karuan ta maddaggun anna mappange ira nga bendision megafu ta pinakamabalor nga regalu na Dios.

¹⁵ I kapakoma na tagaruli. Megafu ta narensia nga kina-imperfekto, marigatattam nga kuan nu anni i fustu. Makaliwa tam megafu ta kaga-kagian onu ta kukukuattam. Ngem gukaban na sakrifisio nga tavvu ni Jesus, “napakoma ittam ta katagarulian.” (Colosas 1:13, 14) Tape mapakoma ittam, mawag tu kurug i pabbabawi tam. Mawag tu sipapakalinno nga ipakimallo tam i pamakoma ni Jehova, mekunnay ta pangurug tam ta sakrifisio nga tavvu na Anâna.​—Bibbigammu i 1 Juan 1:8, 9.

16. Kunnasi nga nabbalin tu marenu i konsensia tam nga maddayarayaw ta Dios? Anni i importansia na kunnatun nga konsensia?

¹⁶ Marenu nga konsensia ta pagimamma na Dios. Nu ari tu marenu i konsensia tam, alistu tam laman nga makatageno tu kawan na iddanama anna kawan tu sesserbi. Megafu ta tavvu, napakoma i katagaruliattam. Yari tu maski nu imperfekto tam, marenu i konsensia tam nga maddayarayaw kani Jehova. (Hebreo 9:13, 14) Megafu taw, posible nga makiuvovug tam kani Jehova. Yatutta awayya tam makimallo sa maski anni nga oras. (Hebreo 4:14-16) Nu mapattalupaddian nga marenu i konsensia tam, mapeggattam tu memammo nga nono, respeto ta baggi, anna pagayayya.

17. Anni ira nga bendision i nabbalin tu posible megafu ta natay si Jesus para nittam?

 ¹⁷ Iddanama na mannanayun nga inango ta paraiso nga davvun. Kagian na Roma 6:23, NW: “I balo na tagaruli ay patay, ngem i regalu nga neyawa na Dios ay mannanayun nga inango gukaban ni Jesu-Cristo nga Yafu tam.” Nagigiammu tam ta Kapitulo 3 i bendision ira na mappange nga Paraiso ta davvun. (Nepakannammu 21:3, 4) Megafu ta natay si Jesus para nittam, posible ngamin yatun nga bendision kunne na gapa i mannanayun nga inango anna perfekto nga gawagawayyan. Tape malawa tam yatun, mawag tu ipasingattam i pappabalo ta regalu nga tavvu.

18. Ngatta kuruga mappabalo tam kani Jehova megafu ta tavvu?

¹⁸ Ngatta kuruga mappabalo tam kani Jehova megafu ta tavvu? Bueno, kuruga mabalor i regalu nu nesakrifisio na nangiyawa i tiempo, banna-bannag, onu kuartuna. Fermi i ayayya tam nu gukaban na regalu ay matageno tam i aya na nangiyawa tatun. I tavvu i pinakamabalor ta ngamin nga regalu, megafu ta dakadakal i nesakrifisio na Dios tape  meyawa yatun. Kagian na Juan 3:16: “Kuruga iddukan na Dios i mundo. Yatun tu zinog na i tattadday nga Ana na.” I tavvu i kadakallan nga ebidensia na aya ni Jehova nittam. Pakurugan na gapa yatun i aya ni Jesus, megafu ta sigga-anugu nga neyawana i inangona para nittam. (Bibbigammu i Juan 15:13.) Makumbinsi tam gafu nga ideddukan ittam mismu ni Jehova anna ni Jesus megafu ta regalu nga tavvu.​—Galacia 2:20.

19, 20. Kunnasim mepasingan nga tagibalorammu i regalu na Dios nga tavvu?

¹⁹ Kunnasim gafu nga mepasingan tu tagibalorammu i regalu na Dios nga tavvu? Ollu ta ngamin, ammuammu si Jehova, i nangiyawa tu tavvu. (Juan 17:3) Tape makuam yatun, makoffun nikaw i paggigiammu tu Biblia gukaban na yaw nga libru. Umunag i ayâmu kani Jehova durante nga mammammum yaya. Yatun nga aya i makoffun nikaw nga kuan i mamagayayya sa.​—1 Juan 5:3.

²⁰ Ipasingan i pangurug mu ta sakrifisio nga tavvu ni Jesus. Nakagi meyannung kani Jesus: “I sinni laman nga mangurug ta Ana na Dios ay egga sa i inango nga adde ta ngangangay onu mannanayun.” (Juan 3:36) Kunnasi nga mepasingattam i pangurug kani Jesus? Ari laman nga masingan ta uvovug i kunnatun nga pangurug. Kagian na Santiago 2:26: “Natay i angngurug nu awan tu annangngua.” Wan, masingan i kurug nga pangurug ta “annangngua ira,” onu ta kukukuattam. Mepasingattam i pangurug kani Jesus nu kuattam i adde na mawayya tam nga parigan yaya ari laman ta kakkagiattam nu ari kunne na gapa ta kukukuattam.​—Juan 13:15.

21, 22. (a) Ngatta mawag nga magatende tam ta passelebra ta Pamugag na Yafu kada dagun? (b) Anni i mepakanawag ta Kapitulo 6 anna 7?

²¹ Magatende ta passelebra tu Pamugag na Yafu kada dagun. Ta gabi na Nisan 14, 33 C.E., pinegafuanan ni Jesus i espesial nga selebrasion nga kagian na Biblia tu “i Pamugag na Yafu.” (1 Corinto 11:20; Mateo 26:26-28) Magalan  gapa yaw tu Memorial na patay ni Cristo. Kingngua ni Jesus yaw nga selebrasion tapenu moffunan i apostoles anna ngamin nga nabbalin tu Cristiano tapenu ariadda kattamman nga nesakrifisiona i inangona, onu kararuana bilang tavvu. Meyannung taw nga selebrasion, nebilin ni Jesus: “Kuan nu yaw tu panaddamman nu niakan.” (Lucas 22:19) I passelebra ta Memorial iperaddam na nittam i kadakal na aya nga nepasingan ni Jehova anna ni Jesus mekunnay ta tavvu. Mepasingattam i pappabalo ta tavvu nu magatende tam ta passelebra ta Memorial na patay ni Jesus kada dagun. *

²² Talaga nabalabalor i tavvu nga regalu ni Jehova. (2 Corinto 9:14, 15) Mabenefisiowan maski i natay ira. Mepakanawag yatun ta Kapitulo 6 anna 7.