TAPE moffunan ittam nga mammammu i Mesias, nangiyawa si Jehova tu aru nga detalye meyannung ta keyana, ministerio, anna patay na nepromesa nga Mamalliag. Natuppal ngamin kani Jesu-Cristo yaw ira nga profesiya na Biblia.  Makapabbaw ta eksakto anna detalyado i ketuppal na yatun ira. Tape mapakurug, ikonsidera tam i karuan nga profesiya nga nangilammuyag nu anni i mesimmu ta keyana anna kabbing na Mesias.

Neprofesiya ni profeta Isaias nga maggafu ta gaka-gaka ni Patul David i Mesias. (Isaias 9:7) Natuppal talaga yatun ta naggafu si Jesus ta gaka ni David.​—Mateo 1:1, 6-17.

 Neprofesiya gapa ni profeta Mikias nga mabbaling tu mammaguray yatun nga abbing anna meyana yaya ta “Betlehem Efrata.” (Mikias 5:2) Dua nga ili ta Israel i magalan tu Betlehem turi ta tiempo na nekeyana ni Jesus. I tadday ay aranni ta Nazaret, ta sigaran nga rehion na Israel. Aranni gapa ta Jerusalem na Juda i mekadua. Efrata i dati nga ngagan na Betlehem nga aranni ta Jerusalem. Eksakto nga natuppal i profesiya megafu ta tatun mismu nga neyana si Jesus!​—Mateo 2:1.

Ikagi paga na tadday nga profesiya ta Biblia nga nagalan “naggafu ta Ehipto” i Ana na Dios. Neyangay ta Ehipto si Jesus turi ta kabbing na tape ari mapatay ni Herodes. Netoli laman turi ta natay ngana si Herodes. Natuppal gafu i profesiya.​—Oseas 11:1; Mateo 2:15.

Ta chart ta pahina 200, egga ira detalye meyannung ta Mesias ta katurakan ira nga nelista ta gukag na titulo nga “Profesiya.” Ikumparam yaw ta katurakan nga nelista gapa ta titulo nga “Ketuppalan.” Nu kuammu yatun, mas mapasikan i attalòmu ta kinakurug na Biblia.

Durante nga gigiammuammu yaw ira nga teksto, takkilalammu nga netura i profesiya ira magatu nga daguragun nige nga neyana si Jesus. Nekagi ni Jesus: “Ngamin i meyannung niakan nga nitura ni Moises anna profeta ira tuange ta egga ta Salmo ira ay mawag tu maparulo.” (Lucas 24:44) Kagitta na pakurugan mismu na Biblia, natuppal talaga i ngamin nga detalye na profesiya!