TA ORIHINAL nga lengguahe nga naketurakanna, maturu tu 70 beses nga neyusa na Biblia i Hebreo nga termino nga sheʼohlʹ anna Griego nga katumbas na nga haiʹdes. Parehas nga egga koneksionna yatun ta patay. Ngem ta karuan nga lengguahe, awan tu termino nga parehas ta kebalinan na termino nga sheʼohlʹ anna haiʹdes. Neyusa na Ibanag nga Biblia i “livun,” “infiernu,” onu “lugar na natay.” Anni kari talaga kebalinanna yatun? Innattam nu kunnasi nga neyusa yatun ta nadduruma nga teksto ta Biblia.

Kagian na Eclesiastes 9:10: “Awan tu trabahu onu plano onu pakannammu onu sirib ta angngayammu nga Tanam [“Sheol,” footnote].” Kebalinanna kari nga i Sheol ay partikular, onu indibidual nga livun nga pangitanamman ta natay nga ideddukattam? Ari. Mangiyusa i Biblia tu tanakuan nga Hebreo anna Griego nga termino nu tukuyanna i partikular nga attanamman, onu livun. Arianna nga usan i sheʼohlʹ anna haiʹdes. (Genesis 23:7-9; Mateo 28:1) Ari gapa nga usan na Biblia i termino nga “Sheol” para ta livun nga naketanamman na magaru nga natay, kagitta na attanamman na familia onu i dakal nga avvu nga ketanamman na magaru.​—Genesis 49:30, 31.

Anni gafu nga lugar i tukuyan na “Sheol”? Kagian na Biblia nga tukuyan na “Sheol,” onu “Hades,” i mas daka-dakal paga anne ta alalawa nga attanamman. Angngariganna, kagian na Isaias 5:14 nga “pinadakal na Tanam, onu Sheol, i baggina anna nevukana tu mapia i simûna nga awan tu pagaddetanna.” Maski nu gitta na napakaru nga natay ngana i kinnan na Sheol, kanayun lagapa nga mabisin yaya. (Proverbio 30:15, 16) Ari tu kagitta na literal nga sementeryo nga mapannu tu natay, “ari pulus nga mabattug i Tanam.” (Proverbio 27:20) Kaya na kagian, ari pulus nga mapannu i Sheol. Awan tu pagaddetanna. Ari gafu tu literal nga lugar nga egga espesipiko nga lokasionna i Sheol, onu Hades. Piguratibo nga attanamman yatun nga dian na aru nga totolay nga agga-katurug ta patay.

Makoffun nittam i tuddu na Biblia meyannung ta paginnolay tape mas malippawa tam i kebalinan na “Sheol” anna “Hades.” Usan na Biblia i Sheol anna Hades nu tukuyanna i patay nga  egga iddanamana nga maginnolay. * (Job 14:13; Kingngua 2:31; Nepakannammu 20:13) Ipasingan paga na Biblia nga parehas nga egga ta Sheol, onu Hades danuri nasserbi kani Jehova anna i aru nga bilang na ari nasserbi sa. (Genesis 37:35; Salmo 55:15) Yatun i rason nu ngatta ituttuddu na Biblia nga egga “paginnolay na matunung anna ari matunung.”​—Kingngua 24:15, NW.