1, 2. Ngatta dakal nga pribilehio i maddasal, anna ngatta mawag tu ammuattam i ituttuddu na Biblia meyannung tatun?

BALABADDI laman i planeta nga davvun nu mekumpara ta dakadakal nga uniberso. Kakuruganna, para kani Jehova, ‘nga Namaratu ta langi anna davvun,’ gitta na patak na danum laman ta baldi i totolay na nasa-nasion. (Salmo 115:15; Isaias 40:15) Maski nu kunnatun, kagian na Biblia: “Aranni yaya ta ngamin nga magagal sa—ta ngamin nga napafutu i pagagal da. Iyawa na i mawag na ngamin nga mammakakua sa; ginnan na i pakimallo da anna paliaran na ira.” (Salmo 145:18, 19) Nonopammu nu anni i kebalinanna yatun! Aranni nittam i makapangngua-ta-ngamin nga Namaratu anna ginnanna ittam nu “napafutu i pagagal” tam sa. Awayya tam umaranni ta Dios gukaban na pakimallo. Fugurammu yatun nga pribilehio!

² Ngem tape ginnan ni Jehova i pakimallo tam, mawag tu maddasal tam nga mekunnay ta kayàna. Tape makua tam gafu yatun, mawag tu malippawa tam i ituttuddu na Biblia meyannung ta pakimallo. Importante nga mammuattam i kagian na Biblia, megafu ta makoffun i pakimallo tape makaranni tam kani Jehova.

3. Anni i tadday nga rason nu ngatta mawag nga maddasal tam kani Jehova?

³ Tadday nga rason nu ngatta mawag nga maddasal tam kani Jehova ay megafu ta nekagina nga kuattam yatun. Netabarang na Uvovug na: ‘Arian nu nga kavurungan i anni laman nga gannug. Ngem ta ngamin nga pakimallo nu nga kanayun nga mavulunan ta pabbala-balo, kiddawan nu ta Dios i mawag nu. Ay iyawa na Dios nikamu i imammo na nga ari malippawa na tolay. Yaw i manangngal ta nono anna giffutuan nu gukaban ni Cristo Jesus.’ (Filipos 4:6, 7) Siguradu nga kakayà tam nga alawatan yaw nga probision nga neyawa na Katannangan nga Mammaguray ta uniberso!

4. Kunnasi nga mapaladda na regular nga pakimallo i pakikofuttam kani Jehova?

⁴ Mapaladda i relasiottam kani Jehova nu regular nga maddasal tam. Yatun i tadday paga nga rason nu ngatta maddasal tam. Kanayun nga makka-uvovug i kurug nga makkofun, ari laman nu egga kawagadda. Ikavurungadda i kataggitadday, anna mas malladda i pakkofudda durante nga ikakkagida i ngamin nga kavurungadda, panageno, anna egga ta nonoda.  Nu karuan, kunnatun gapa i situasion nu meyannung ta pakikofuttam kani Jehova nga Dios. Aru i nagigiammum taw nga libru meyannung kani Jehova, ta personalidad, anna ta gakkag na ira. Nannammuammu nga kurug nga persona yaya anna awayyam makikofun sa. Gukaban na pakimallo, mekagim i egga ta nono anna i egga ta kononaggammu ta nelangitan nga Yamam. Durante nga kuammu yatun, mas maddukko ka kani Jehova.​—Santiago 4:8.

5. Ngatta ari nga ginnan ni Jehova i ngamin nga pakimallo?

⁵ Ginnan kari ni Jehova i ngamin nga pakimallo? Ikonsideram i nekagina ta rebelyoso ira nga Israelita turi ta kaggawan ni profeta Isaias: “Maski nu mamippiga kamu maddasal, ari ngâ magginna; napannu i limanu tu daga.” (Isaias 1:15) Yari tu, egga ira kukukuattam nga makagafu nu ngatta ari ginnan na Dios i pakimallo tam. Tape ginnan gafu na Dios i pakimallo tam, mawag tu tuppalattam i ikikkiddona.

6. Anni i pinaka-importante nga kawagan tapenu ginnan na Dios i pakimallo tam, anna kunnasi tam makua yatun?

⁶ I pangurug i pinaka-importante nga kawagan. (Bibbigammu i Marcos 11:24.) Netura ni apostol Pablo: “Nu awan tu angngurug na tolay, arian na nga awayya nga mapagayayya i Dios. Ta sinni laman nga umaranni ta Dios ay mawag tu kurugan na tu egga i Dios ay tu bala-balattan na Dios danuri i magaleg sa.” (Hebreo 11:6) Ari nga makalanno nga mangurug tam nga egga Dios, nga gigginnan anna tattabbaganna i pakimallo tam. Masingan i napafutuan nga pangurug ta kukukuattam. Mawag nga ipasingattam i manawag nga ebidensia nga egga pangurug tam gukaban na kukukuattam ta kada aggaw.​—Santiago 2:26.

7. (a) Ngatta mawag tu marespeto tam nu maddasal kani Jehova? (b) Kunnasi tam nga mepasingan i mapakalinno anna napafutuan nga pakimallo ta Dios?

⁷ Ikikkiddaw gapa ni Jehova nga napafutuan anna sipapakalinno i akkimallo tam sa. Ari kari tu aru i rasottam  tape mapakalinno nga makiuvovug kani Jehova? Nu mapamavulunan i tadday nga tolay nga makiuvovug ta patul onu ta presidente, maruddu nga irespetona i atannang nga posision na mammaguray. Nu kunnatun i kuattam nu umaranni ta tolay, mas paga nu umaranni tam kani Jehova! (Salmo 138:6) Mawag laman tu kunnatun ta yaya i “Makapangngua-ta-ngamin nga Dios.” (Genesis 17:1) Nu maddasal tam ta Dios, mawag tu takkilalattam i alalinno nga paddiattam. I kunnatun nga pappakalinno i mamaguyu gapa nittam nga napafutuan nga maddasal, ari tu metotoli, anna nakabisadu laman.​—Mateo 6:7, 8.

8. Anni i kawagan tape mekunnay i kukukuattam ta pakimallo tam?

⁸ Mawag gapa nga mekunnay i kukukuattam ta pakimallo tam tapenu ginnan ittam na Dios. Inanaman ni Jehova nga kuattam i adde na mawayya tam tape metuppal i idasa-dasal tam. Angngariganna, nu maddasal tam nga “iddan nakami ta kanan nga mawag mi toye nga aggaw,” mawag tu mallallappo tam nga mattrabahu ta maski anni nga pagalegan. (Mateo 6:11; 2 Tesalonica 3:10) Nu ikikkiddaw tam nga malabanan i tadday nga tentasion, mawag nga arayyuattam i makatenta ira nga situasion. (Colosas 3:5) Fuera paga taw ira nga ikikkiddaw na Dios, egga paga ira pakkiavu meyannung ta pakimallo nga mawag nga matabbag.

9. Sinni i paddasallattam, anna sinni i pangidalanattam?

⁹ Sinni nga Dios i paddasallattam? Netuddu ni Jesus ta disipulos na ira nga maddasal ta ‘Ama nga egga ta langi.’ (Mateo 6:9) Mawag gafu nga maddasal tam laman kani Jehova. Ngem ikikkiddaw gapa ni Jehova tu daddammattam i posision na tattadday nga Anâna, si Jesu-Cristo. Kagitta na nagigiamu tam ta Kapitulo 5, nadog si Jesus ta davvun tape matavvu tam ta liwa anna patay. (Juan 3:16; Roma 5:12) Yaya i natunno nga Katannangan nga Pari anna Ukum. (Juan 5:22;  Hebreo 6:20) Yatutta ituddu nittam na Katurakan nga maddasal gukaban ni Jesus. Nekagi mismu ni Jesus: “Sakan i dalan, i kinakurug, anna i inango. Awan tu makangay ta Yama nu ari nga gukaban niakan.” (Juan 14:6, NW ) Mawag gafu tu maddasal tam laman kani Jehova gukaban na Anâna tapenu matabbag i pakimallo tam.

10. Ngatta ari tu kawagan i nerumuruma nga postura nu maddasal tam?

¹⁰ Egga kari kawagan nga nerumuruma nga postura nu maddasal tam? Awan. Ari nga ikikkiddaw ni Jehova i espesipiko nga posision na lima onu baggi. Ituttuddu na Biblia nga malawa i paddasal tam ta maski anni nga marespeto nga postura. Awayya tam nga makkummag, magitubang, manaddag, mappalittukag onu mappalentug. (1 Cronicas 17:16; Nehemias 8:6; Daniel 6:10; Marcos 11:25) Mas importante i fustu nga motibo na futu, ari tu i nerumuruma nga postura nga masingan na tanakuan. Kakuruganna, awayya tam maddasal tu ababba anna silensio maski sitaw i diattam, durante nga kuattam i inaggaw nga trabahu tam onu nu egga nesimmu nga ari tam ekspektan. Ginnan ni Jehova i kunnatun ira nga pakimallo, maski nu ari ammu na totolay ta pallevu tam nga maddasal tam gabba.​—Nehemias 2:1-6.

11. Anni ira nga personal nga pakavurungan i awayya tam ipakimallo?

¹¹ Anni i awayya tam ipakimallo? Nekagi na Biblia: “Tangngagan onu ginnan na ittam ta anni laman nga kiddawat-tam sa nga metuttul ta uray na.” (1 Juan 5:14) Yari tu awayya tam ipakimallo i maski anni nga metuttul ta uray ni Jehova. Kayàna kari nga ipakimallo tam sa i personal nga kavurungattam? Siempre! I appakimallo kani Jehova ay kagitta na pakiuvovug ta madukko nga kofun. Awayya tam ikagi ta Dios i “ngamin nga vuru-vurung” tam. (Salmo 62:8) Mepangngo gapa nga kiddawattam i uffun na masanto nga espiritu tape makua tam i fustu. (Lucas 11:13) Awayya tam gapa ipakimallo i sirib nga naggafu ta Dios tape igiyana ittam ta makasta nga desision anna maattammattam i zigariga. (Santiago 1:5) Nu makaliwa tam, mawag tu makkiddaw  tam tu pammakoma na Dios base ta sakrifisio ni Cristo. (Efeso 1:7, 8) Siempre, ari laman gapa nakuan nga puru personal nga pagintresan i ipakimallo tam. Mawag tu ipakimallo tam gapa maski i tanakuan nga totolay​—i kafamilia kunne na gapa ta kapangngurug tam ira.​—Kingngua 12:5; Colosas 4:12.

12. Kunnasi tam nga mepasingan ta pakimallo tam nga mas importante nittam i gannagannug meyannung ta Dios?

¹² Mawag tu olluattam nga ipakimallo i gannagannug meyannung kani Jehova. Megafu ta pia na Dios, siguradu nga aru i rason tape napafutuan nga dayarayawattam yaya anna mappabalo sa. (1 Cronicas 29:10-13) Ta modelo nga pakimallo nga egga ta Mateo 6:9-13, netuddu ni Jesus nga ipakimallo tam tu marayaw paray i ngagan na Dios, kebalinanna, mebilang nga sagrado, onu masanto. (Bibbigammu.) Netudduna paga nga ipakimallo tam nga umay nakuan i Pappatulan na Dios anna makua nakuan i urena ta davvun nu kunnasi nga natuppal ta langi. Navuyâna laman i personal ira nga kiddaw turi ta nabalinna ngana nga nakagi i meyannung ta importante nga gannagannug meyannung kani Jehova. Mepasingattam gapa nga ari tu baggi tam laman i nononopattam nu olluattam labbi i Dios nige na personal ira nga kawagan.

13. Anni i kagian na Biblia meyannung ta kapaddu na pakimallo?

¹³ Kunnasi kapaddu nakuan na pakimallo tam? Awan tu nekagi na Biblia nga mawag nga kapaddu na personal onu publiko nga paddasal. Awayyana nga ababba i pakimallo tam nige nga kuman anna awayyana gapa nga apaddu i personal nga paddasal tam tape mevuvvu tam i ngamin nga egga ta futu tam kani Jehova. (1 Samuel 1:12, 15) Ngem kondenan ni Jesus danuri minaggappappe nga apapaddu i pakimalloda tape masingan ira na tanakuan. (Lucas 20:46, 47) Ari nga mamagayayya kani Jehova i kunnatun nga pakimallo. I importante ay napafutuan nga pakimallo. Maddepende gafu ta pakawagan anna situasion i kapaddu na pakimallo.

14. Anni i kaya kagian na Biblia ta pangipagaram na nga ‘ari tam magimmang ta pakimallo,’ anna anni i makapabannay meyannung taw?

 ¹⁴ Kada anni tam makimallo? Ipagaram nittam na Biblia nga ‘ari tam magimmang ta pakimallo.’ (Colosas 4:2) Siempre, arianna kaya kagian nga puru maddasal ngana laman i kukukuattam. Ipagaram lallagu na Biblia i regular nga appakimallo kani Jehova. Kanayun nga mappabalo megafu ta pia na nittam, anna makkiddaw tu pangigiyana, pamannabannay, anna sikan. (Roma 12:12; 1 Tesalonica 5:17) Ari kari tu makapabannay nga awayya tam maddasal kanayun kani Jehova anna awan tu limitasion na kapaddu na appakimallo tam sa? Nu talaga apresiattam yatun nga pribilehio, aprobetsattam i kada oportunidad nga maddasal ta nelangitan nga Yama tam.

15. Ngatta mawag tu ikagi tam i “Amen” kabalin na personal anna publiko nga pakimallo?

¹⁵ Ngatta mawag tu ikagi tam i “Amen” kabalin na pakimallo? I termino nga “amen,” kaya na kagian “siguradu,” onu “paray nakuan.” Ipasingan na ehemplo ira ta Biblia nga mepangngo i pangikagi tu “Amen” ta kabalin na personal anna publiko nga pakimallo. (1 Cronicas 16:36; Salmo 41:13) Ipasiguradu na pangivuyâ tam tu “Amen” kabalin na personal tam nga pakimallo nga napafutuan yatun. Kaya gapa kagian na pangikagi tam tu “Amen”​—nagallu man onu ari​—kabalin na publiko nga pakimallo, nga umanugu tam ta nepakimallo.​—1 Corinto 14:16.

16. Anni i masiguradu tam meyannung ta pakimallo?

¹⁶ Talaga kari nga tabbagan ni Jehova i pakimallo tam? Siempre gapa! Masiguradu tam nga tabbagan na “Minagginna tu pakimallo,” i napafutuan nga pakimallo na minillion nga totolay. (Salmo 65:2, NW ) Nadduruma i panabbag ni Jehova ta pakimallo tam.

17. Kunnasi nga usan ni Jehova i angheles anna aripanna ira ta davvun tape matabbag i pakimallo tam?

 ¹⁷ Usan ni Jehova i angheles anna i aripanna ira ta davvun tape matabbag i pakimallo. (Hebreo 1:13, 14) Aru ngana i eksperiensa nga nedasal na tadday nga tolay i uffun na Dios tape malippawa i Biblia tapus binisita yaya na Saksi ni Jehova. Yatun i tadday nga ebidensia na pangigiya na angheles ta trabahu nga pangilayyagayya ta Pappatulan. (Nepakannammu 14:6) Awayya nga usan ni Jehova i tadday nga kapangngurug tam nga manguffun nittam bilang tabbag ta pakimallo tam  ta tiempo nga kuruga makawag ittam.​—Proverbio 12:25; Santiago 2:16.

18. Kunnasi nga usan ni Jehova i masanto nga espiritu anna i Uvovug na tape matabbag i pakimallo na aripanna ira?

¹⁸ Usan gapa ni Jehova i masanto nga espiritu anna i Uvovug na tape matabbag i pakimallo na aripanna ira. Bilang tabbag ta pakkiddaw tam tu uffun tape maattamman i zigariga, mangiyawa yaya tu giya anna sikan gukaban na masanto nga espiritu. (2 Corinto 4:7) Maruddu nga egga ta Biblia i tabbag ta ipappakimallo tam nga giya. Gukaban na Biblia, iyawa ni Jehova i uffun tape makakua tam tu masirib nga desision. Malegattam i makoffun ira nga teksto ta personal nga paggigiammu tam tu Biblia anna durante nga mabbibbig tam tu publikasion ira kagitta na yaw nga libru. Awayyana nga maginna tam ta study onu ta komento na minangngikavurung nga elder ta kongregasion i mamasikan ira nga uvovug nga kawagattam.​—Galacia 6:1.

19. Anni i daddammattam nu gitta na ari natabbag i pakimallo tam?

¹⁹ Nu ari paga natabbag i pakimallo tam, arianna kaya kagian nga awan tu pakawayya ni Jehova nga tabbagan yatun. Daddammattam nga tabbagan ni Jehova i pakimallo ira metuttul ta urena anna ta mepangngo nga tiempo. Ammuna i kawagattam anna mas ammuna nu sonu anni tam nga kawagan yatun. Kayàna nga ariattam immangan i ‘makkiddaw, magaleg, anna mattotto.’ (Lucas 11:5-10) Ipasingan na kunnatun  nga determinasion nga napafutuan yatun nga pakkaraga tam anna kurug i pangurug tam. Fuera paga tatun, awayyana nga ariattam matagatageno i panabbag ni Jehova ta pakimallo tam. Angngariganna, nu makkiddaw tam tu uffun nu mazzigariga tam, arianna tabbagan yatun gukaban na pangalsana ta zigariga. Iddanna lallagu ittam tu sikan tape maattamman yatun.​—Bibbigammu i Filipos 4:13.

20. Ngatta mawag tu aprobetsattam tu mapia i mabalor nga pribilehio nga maddasal?

²⁰ Kunnatun ngana laman i appabalo tam megafu ta aranni i Namaratu ta alalawa nga uniberso ta totolay nga napafutuan nga maddasal sa! (Bibbigammu i Salmo 145:18.) Aprobetsattam nakuan tu mapia i mabalor nga pribilehio nga maddasal. Nu kuattam yatun, mas nga maddukko tam kani Jehova, i Minagginna tu pakimallo.