1. Kunnasi tam nga mabenefisiowan nu fustu i paddayarayaw tam ta Dios?

IKAVURUNGAN ittam ni Jehova nga Dios anna kayàna nga mabenefisiowattam ta naayâ nga pangigiyana. Nu fustu i paddayarayaw tam sa, magayayya anna malisiattam i aru nga problema. Bendisionan anna uffunanna gapa ittam. (Isaias 48:17) Napakaru nga relihion i makkagi nga ituttudduda i kinakurug meyannung ta Dios. Ngem nadduruma i ituttudduda nu sinni i Dios anna nu anni i ekspektanna nga kuattam.

2. Kunnasi tam nga mammuan i fustu nga paddayarayaw kani Jehova? Anni nga ilustrasion i makoffun nittam nga mangalippawa taw?

² Kunnasim mammuan i fustu nga paddayarayaw ta Dios? Ariammu kawagan nga tallungan i ngamin nga relihion tapus pakkumparammu i tuttudduda. Mawag laman nga gigiammuammu nu anni talaga i ituttuddu na Biblia meyannung ta kurug nga paddayarayaw. Tape meyilustra: Ta aru nga nasion, problema i feke nga kuartu. Nu neyawa nikaw i trabahu nga maningan nu feke i kuartu onu ari, kunnasim nga kuan yatun? Kabisaduammu kari i ngamin nga klase na feke? Ari. Mas makasta nu kabisaduammu i itsura na kurug nga kuartu. Nu ammum i itsura na kurug nga kuartu, ammum ngana gapa nu anni i feke. Nu ammu tam gapa i kurug nga relihion, makagi tam ngana nu falso i tadday nga relihion.

3. Segun kani Jesus, anni i mawag nga kuattam tape paboran ittam na Dios?

 ³ Importante nga dayawattam si Jehova segun ta kayana. Aru i mangurug nga makapagayayya ta Dios i ngamin nga relihion, ngem ari tu yatun i ituttuddu na Biblia. Kurang paga lagu i basta pakkagi nga Cristiano ka. Kinagi ni Jesus: “Ari tu ngamin i mangikagi niakan, ‘Afu, Afu,’ ay makatallung ta Pappatulan na langi, nu ari danuri laman mangngua ta uray na Yamà ta langi.” Tape paboran gafu ittam na Dios, mawag tu ammuattam i kayana nga kuattam, anna tuppalattam yatun. Inagalan ni Jesus danuri ari mangngua tu uray na Dios nga “minattagaruli.” (Mateo 7:21-23) Kagitta na feke nga kuartu, awan tu kuenta na falso nga relihion. I marake paga, talaga nga delikadu i kunnatun nga relihion.

4. Anni i kebalinan na dua nga dalan nga kinagi ni Jesus, anna sitaw i pattuppalanna yatun nga dalan?

⁴ Iniddan ni Jehova tu oportunidad i ngamin nga mattolay tu mannanayun. Ngem tape mattolay tu mannanayun ta Paraiso, mawag nga fustu i paddayarayaw tam ta Dios anna mattolay nga mamagayayya sa. Kaddaraddam ta aru i mammanakî nga magangngua tatun. Yari tu kinagi ni Jesus: “Mattallung kamu ta atazzi nga trangka, ta makaba i trangka anna alawa i dalan nga mappange ta kadaral, ay aru i mattallung taw; ngem atazzi i trangka anna mariga i dalan nga mappange ta inango, ay baddi laman i makaleg taw.” (Mateo 7:13, 14, NW ) Mappange ta mannanayun nga inango i kurug nga relihion. I falso nga relihion ay mappange ta kadaral. Manakî ni Jehova nga madaral i maski sinni, yari tu iniddanna tu oportunidad i ngamin nga totolay nga maggigiammu meyannung sa. (2 Pedro 3:9) Nu kunnatun gafu, i paddayarayaw tam ta Dios, kebalinanna i inango onu i patay tam.

5. Kunnasi tam mammuan i kurug nga relihion?

⁵ Kunnasi malegan i ‘dalan nga mappange ta inango’? Kinagi ni Jesus nga masingan i kurug nga relihion ta klase na pattolay na miembrona. “Kannammuannu ira megafu  ta kukukuad-da,” kinagina. “Mapia i vunga na mapia nga kayu.” (Mateo 7:16, 17) Kaya na kagian, i kurug nga relihion ay masingan ta angngurug anna kondukta na miembrona. Maski nu imperfekto anna makaliwa gapa ira, mappursige i kurug nga maddayarayaw nga kuan i uray na Dios. Ikonsidera tam i annam nga panakkilalan nu anni i kurug nga relihion.

6, 7. Anni i pagimamma na aripan na Dios ta Biblia? Anni i ehemplo nga nepasingan ni Jesus meyannung taw?

⁶ Nebase ta Biblia i tuddu na kurug nga aripan na Dios. Nakagi mismu ta Biblia: “Ngamin i egga ta Masanto nga Tura ay naggafu ta Dios, ay masserbi ta pangituddu ta kurug, pangivuya ta makaliwa, panunung ta ugo, anna pangituddu ta matunung nga attolay, tapenu i masserbi ta Dios ay awan tu pakkurangan na anna agga-paran nga mangngua ta ngamin nga mapia.” (2 Timoteo 3:16, 17) Netura ni apostol Pablo ta kagittana nga Cristiano: “Turi ta pakaginna nu ta uvovug na Dios nga em-mi nga pinalappa nikamu, inalawa anna kinurug nu tu yaw ay uvovug na Dios, ari tu uvovug laman na tolay.” (1 Tesalonica 2:13) Manawag gafu nga ari nebase ta pagimamma na tolay onu tradision i angngurug anna kukukuan na kurug nga relihion. Nebase yatun ta nainspiran nga Uvovug, i Biblia.

⁷ Nangipasingan si Jesus tu makasta nga ehemplo gukaban na pangibasena ta tuttudduna ta Uvovug na Dios. Ta pakimallona, kinagina ta Yamana: “I uvovug mu ay kurug.” (Juan 17:17) Nangurug si Jesus ta Uvovug na Dios, anna mekunnay tatun i ngamin nga netudduna. Kanayun nga nevuyâ ni Jesus: “Kagian na Masanto nga Tura.” (Mateo 4:4, 7, 10) Kabalinna, mangikagi yaya tu katurakan. Kunnatun gapa i kuan na aripan ira na Dios ta maddaggun. Ariadda ituddu i naggafu ta ginnonopadda lagapa. Mangurug ira nga Uvovug na Dios i Biblia, anna ibaseda tatun i tuttudduda.

8. Anni i nesali ta paddayarayaw kani Jehova?

⁸ Si Jehova laman i dayarayawan danuri kurug i relihiodda anna ipakannammuda i ngaganna. Nedeklara ni Jesus: “Si Jehova nga Dios mu i mawag nga dayarayawammu anna  yaya laman i mawag nga pangiyawatammu tu sagrado nga passerbi.” (Mateo 4:10, NW ) Yari tu, si Jehova laman i dayarayawan na kurug ira nga aripan na Dios. Kasali taw nga paddayarayaw i pangipakannammu ta ngagan na kurug nga Dios anna nu anni nga klase na persona yaya. Kagian na Salmo 83:18, [NW ]: “Sikaw, nga mangngagan tu Jehova, sikaw laman i Katannangan ta interu davvun.” Nepasingan ni Jesus i pamarigan nga manguffun ta karuan nga mammammuda i Dios turi ta nepakimallona: ‘Nipakannammu i ngagammu ta totolay nga niyawa mu niakan.’ (Juan 17:6) Ta maddaggun, ituttuddu gapa na kurug nga maddayarayaw ta karuan i ngagan na Dios, i gakkag na, anna i kualidad na ira.

9, 10. Kunnasi nga mangipasingan tu aya i kurug nga Cristiano ta kataggitadday?

⁹ Egga kurug anna napafutuan nga aya na aripan na Dios ta kataggitadday. Kinagi ni Jesus: “Nu egga nikamu i pakka-aya-aya, kannammuan ngamin na totolay tu disipulo takamu.” (Juan 13:35) Kunnatun i pakka-aya-aya na ollu ira nga Cristiano. Yaw nga makadios nga aya i mamattaradday ta totolay ta meggo nga pavvurulun na mawwaragi maski nu nadduruma i lahi, estado na pattolay, anna nasion na tadday. (Bibbigammu i Colosas 3:14.) Awan tu kunnatun nga naayâ nga pavvurulun ta miembro na falso nga relihion. Kunnasi tam ammu? Mappipinnatay ira megafu ta nadduruma i lahi anna etniko nga naggafuadda. Ari nga manammi tu armas i kurug nga Cristiano tape patayan i wawwagida onu i maski sinni. Kagian na Biblia: “Yaw i manawag nga nadduman na ána na Dios anna ána na Demonio: i sinni laman nga ari nga mangngua tu tunung anna ari nga mangaya ta wagi na ay ari tu ana na Dios. . . . mawag tu makka-aya-aya ittam. Ariat-tam nga parigan si Cain nga tolay na Demonio, ta pinatay na i mismu nga wagi na.”​—1 Juan 3:10-12; 4:20, 21.

¹⁰ Siempre i kurug nga aya, arianna laman kebalinan i ari pamapatay ta kassittolay. Usan na kurug nga Cristiano i tiempo, sikan, anna material nga pakkukuada nga manguffun anna mamagaram ta kataggitadday. (Hebreo 10:24, 25)  Makka-uffu-uffun ira ta tiempo na ziga, anna matalo ira ta tanakuan. Kakuruganna, iyaplikada mismu ta pattoleda i tabarang na Biblia nga ‘kuan i mapia ta ngamin nga ikattolay.’​—Galacia 6:10.

11. Ngatta importante nga alawatattam si Jesus bilang dalan na kapalliagan?

¹¹ Alawatan na kurug nga Cristiano si Jesu-Cristo nga yaya i neyusa na Dios tape mapalliag ira. Kagian na Biblia: “Awan tu tanakuan nga pakalerat-tam ta kapaliag nu ari kani Jesus laman, ta awan ngana tu tanakuan nga ngagan ta interu mundo nga niyawa na Dios tu makapaliag nittam.” (Kingngua 4:12) Nagigiammu tam ta Kapitulo 5 nga nesakrifisio ni Jesus i inangona tape matavvu i minammarulo nga totolay. (Mateo 20:28) Fuera paga tatun, si Jesus i sinunno na Dios nga Patul ta nelangitan nga Pappatulan nga mammaguray ta interu davvun. Ikikkiddaw na Dios nga mattuppal ittam kani Jesus anna iyaplika i tuttudduna nu kaya tam i mattolay tu mannanayun. Yari tu kinagi na Biblia: “I sinni laman nga mangurug ta Ana na Dios ay egga sa i inango nga adde ta ngangangay onu mannanayun. Ngem i sinni laman nga ari nga mangurug ta Ana na Dios ay awan sa yaw nga inango.”​—Juan 3:36.

12. Anni i kebalinan na ari tu parte na mundo?

¹² Ari nga parte na mundo i kurug nga maddayarayaw. Turi ta neyarubang si Jesus ta Romano nga gobernador nga si Pilato, kinagina: “I pammagurayak-ku ay awan toye ta utun na davvun.” (Juan 18:36) Maski nu sitaw nga nasion i diadda, mappasakup i aripan ira ni Jesus ta nelangitan nga Pappatulanna. Kanayun nga neutral i sinaddag da ta maski anni nga politikal nga isyu ta mundo. Awan tu paboradda. Ngem nu mappili i totolay tu partidoda ta politika, makkandidato, onu mabboto ira, ari nga makialam nira i Saksi ni Jehova. Maski nu neutral ta politika i kurug nga aripan na Dios, tuttuladda lagapa i dorob na gobierno. Ngatta? Megafu ta nebilin nira na Uvovug na Dios nga “makimoray ta mammaguray ira nga egga ta gubiernu.” (Roma 13:1) Nu mekontra i dorob na  gobierno ta dorob na Dios, tuttulan na kurug nga aripan ira i ehemplo na apostoles gari nga nakkagi: “Mawag tu kurugam-mi i Dios anne ta tolay.”​—Kingngua 5:29; Marcos 12:17.

13. Anni i pagimamma na kurug nga aripan ni Jesus ta Pappatulan na Dios, anna anni i mawag nga kuadda?

¹³ Ilayyagayya na kurug nga aripan ni Jesus nga i Pappatulan na Dios laman i iddanama na totolay. Neprofesiya ni Jesus: “Ay melayya-gayya noka ta tanga-ravvunan yaw nga Mapia  nga Dumug na Pammaguray na Dios tapenu kannammuan na ngamin nga sinolay. Ta kabalin naw, duttal ngana i panuppalan.” (Mateo 24:14) Imbes nga pagarammadda i totolay nga mammakatalo ta maddaggun ira nga mammaguray, ipakannammu na kurug nga aripan ni Jesus nga i nelangitan nga Pappatulan na Dios laman i kurug nga makasolba ta problema na totolay. (Salmo 146:3) Netuddu ni Jesus nga ipakimallo tam yatun nga perfekto nga gobierno. Kinagina: “Maparattal paray i Pammagurem. Makua i urem toye ta davvun ta kunne ta langi.” (Mateo 6:10) Neprofesiya na Biblia tu yaw nga nelangitan nga Pappatulan “daralanna ngamin ira yaw nga pappatulan [maddaggun mammaguray] anna iyangena i panuppaladda, ay mannanayun yaw noka.”​—Daniel 2:44; Nepakannammu 16:14; 19:19-21.

14. Anni nga relihion i kurugammu nga maketuppal ta panakkilalan ta kurug nga paddayarayaw?

¹⁴ Base ta nagigiammu tam ngana, iyavumu ta baggim: ‘Anni nga relihion i mangibase ta ngamin nga tuttudduna ta Biblia anna mangipakannammu ta ngagan ni Jehova? Anni nga relihion i mangipasingan tu makadios nga aya, mangurug kani Jesus, ari tu parte na mundo, anna mangilayyagayya nga i Pappatulan na Dios laman i iddanama na totolay? Ta ngamin nga relihion ta mundo, sinni i maketuppal ngamin taw?’ Manawag i pamakurug nga yatun nga relihion ay Saksi ni Jehova.​—Bibbigammu i Isaias 43:10-12.

15. Anni paga i ikikkiddaw na Dios fuera ta basta angngurug sa?

¹⁵ Ari laman nga angngurug ta Dios i kawagan tape mapagayayyamu i Dios. Kakuruganna, kagian na Biblia nga maski i demonio ira ay mangurug ta Dios. (Santiago 2:19) Ngem ariadda kuan i uray na Dios anna awan i pabor na Dios nira. Tape paboran ittam na Dios, ariattam laman gafu basta mangurug sa, mawag gapa nga kuattam i urena. Mawag gapa tu panawattam i falso nga relihion anna mattallung ta kurug nga paddayarayaw.

16. Anni i mawag nga kuan danuri makipapparte ta falso nga relihion?

 ¹⁶ Nepasingan ni apostol Pablo nga ariattam nakuan makiparte ta falso nga paddayarayaw. Neturana i kinagi ni Jehova: “Panawan nu ira ngana anna mesina kamu nira. Arian nu siggeran i anni laman nga maritta ay alawatat-takamu.” (2 Corinto 6:17; Isaias 52:11) Lillitan gafu na kurug ira nga Cristiano i anni laman nga konektadu ta falso nga paddayarayaw.

17, 18. Anni i “Madumu-rumug nga Babilonia,” anna ngatta mawag nga alistuammu nga panawan yaya?

¹⁷ Ipasingan na Biblia tu ngamin nga nadduruma nga relihion ay parte na “Madumu-rumug nga Babilonia.” * (Nepakannammu 17:5) Iperaddam na yatun nga ngagan i siudad na Babilonia gari, nga namegafanan na falso nga relihion kabalin na Delubio turi ta kaggawan ni Noe. Naggafu ta Babilonia i aru nga tuttuddu anna tradision na falso nga relihion ta maddaggun. Angngariganna, naddayarayaw i taga-Babilonia ta trinidad, onu tallu nga persona ta tattadday nga dios. Ta kaggawattam gapa, aru nga relihion i mangurug nga egga Dios Ama, Dios Ana, anna Dios Espiritu Santo onu Trinidad kunna karuan. Ngem manawag i ituttuddu na Biblia nga si Jehova laman i tattadday nga kurug nga Dios, anna si Jesu-Cristo ay Anana. (Juan 17:3) Kurugan paga na taga-Babilonia nga egga imortal nga kararua nga mesina ta baggi na natay nga mannanayun nga mazzigariga ta infiernu. Ta maddaggun, ituttuddu na magaru nga relihion nga egga imortal nga kararua anna infiernu.

¹⁸ Megafu ta nawwara ta interu davvun i tuttuddu na Babilonia, makagi tam gafu nga i moderno nga Babilonia i imperio na falso nga relihion ta interu mundo. Dati ngana nga kinagi na Dios nga aranni ngana i kadaral na yaw nga imperio na falso nga relihion. Malippawamu kari ngana nu ngatta importante nga panawammu i Babilonia? Kaya ni Jehova nga Dios tu alistuammu nga ‘panawan i Babilonia’  durante nga egga paga tiempo.​—Bibbigammu i Nepakannammu 18:4, 8.

19. Anni i malawamu nu masserbi ka kani Jehova?

¹⁹ Baka ari ngana makikavulu nikaw i dati nga kokkofummu nu neyimmammu ngana i annangngua na falso nga relihion. Ngem mas aru i malawamu anne ta mawawammu nu masserbi ka kani Jehova kavulu i aripanna ira. Kagitta na disipulos gari ni Jesus nga aru i pinanawadda tape mabbalin ira tu tagatuttul na, mapeggakka gapa tu aru nga espiritual nga wawwagi. Mabbalikka tu parte na interu mundo nga familia na minillion nga kurug nga Cristiano, nga mangipasingan nikaw tu napafutuan nga aya. Mapeggakka paga tu makakkasta nga iddanama nga mannanayun nga inango ta “mappange nga attolay.” (Bibbigammu i Marcos 10:28-30.) Ariammu laman ammu, baka danuri nattallikug nikaw megafu ta angngurug mu ay maginteres gabbalaman ta ituttuddu na Biblia tapus mabbalin tu Saksi ni Jehova.

20. Anni i makasta nga iddanama para ta kurug nga relihion?

²⁰ Ituttuddu na Biblia nga aranni ngana nga pangultimuan na Dios yaw nga marake nga sistema na gannagannug tapus talliananna tu matunung nga bagu nga mundo nga immagurayan na Pappatulanna. (2 Pedro 3:9, 13) Anni mabba kasta na yatun! Tattadday ngana laman i relihion tatun nga matunung nga bagu nga sistema​—i kurug nga paddayarayaw. Ari kari tu kinasirib nu kuammu ngana i kawagan ira nga makua tape mebilang ka ta kurug ira nga maddayarayaw?