1, 2. Anni i mawag nga ipakkiavumu ta baggim nu nakapanoka ngana ta falso nga relihion, anna ngatta importante yatun?

KUNNASI nu nammuammu nga egga sekreto nga nangitabbo tu kappatay nga basura ta lugar nu? Mamappeligro yatun nga basura ta totolay. Anni kuammu? Siguradu nga manoka insigida. Ngem maski nu nakapanoka ngana, awayyana nga mavurung ka lagapa, anna mepakkiavumu, ‘Nafektannà panô tatun nga kappatay nga basura?’

² Kunnatun gapa i pakkiavu nga mepaarubang nittam nu meyannung ta falso nga relihion. Ituttuddu na Biblia nga nafektan tu maritta nga tuttuddu anna tradision i kunnatun nga paddayarayaw. (2 Corinto 6:17) Yari tu kuruga importante nga panawammu i “madumu-rumug nga Babilonia,” i imperio na falso nga relihion ta interu mundo. (Nepakannammu 18:2, 4) Nakuam kari ngana yatun? Makasta nu nakuam ngana. Ngem ari laman tu yatun i mawag nga kuammu. Nu nakapanoka ngana, mawag nga iyavumu ta baggim: ‘Egga kari nabattang niakan nga influwensia na falso nga paddayarayaw?’ Ikonsideram i karuan nga angngarigan.

3. (a) Anni i kagian na Biblia meyannung ta paddayarayaw ta imahen? Ngatta awayyana nga mariga para ta karuan nga akseptan i pagimamma na Dios? (b) Anni i mawag nga kuammu ta anni laman nga egga nikaw nga konektadu ta falso nga paddayarayaw?

³ Nabinnay ngana nga egga imahen anna groto ta balay na karuan nga totolay. Egga kari gapa kunnatun ta balem? Baka manonomu nga ari mepangngo onu mekawa ka nga maddasal ta Dios nu awan tu imahen. Awayyana nga kuruga tagibalorammu ira yatun. Ngem i Dios i mepangngo nga makkagi nu kunnasi nga dayarayawan yaya. Ituttuddu na Biblia nga manaki na Dios nga mangiyusa tam tu imahen. (Bibbigammu i Exodo 20:4, 5; Salmo 115:4-8; Isaias 42:8; 1 Juan 5:21) Yari tu metaddaggammu i kurug nga paddayarayaw gukaban na panaral mu ta anni laman nga egga nikaw nga konektadu ta falso nga paddayarayaw. Tape mapagayayyamu gafu si Jehova, mawag tu ikalussom yatun ira kagitta na pangikalussona.”​—Deuteronomio 27:15.

4. (a) Kunnasi tam nammuan nga awan tu kuenta na paddayarayaw ta ginafuan? (b) Ngatta negamma ni Jehova ta aripanna ira nga makiparte ta maski anni nga klase na espiritismo?

⁴ Negagangay gapa ta falso nga relihion i paddayarayaw ta  ginafuan. Nige nga nammuadda i kinakurug nga ituttuddu na Biblia, kurugan na karuan nga siggamatolay i natay ta mundo na espiritu anna awayyada nga uffunan onu dannalan i totolay. Baka aru i dati nga kukukuammu nga ta pagabbomu ay mamagayayya ta natay nga ginafuammu. Ngem nagigiammum ta Kapitulo 6 nga awan ngana tu ammu na natay anna awan ira ta mundo na espiritu. Yatutta awan tu kuenta na pakiuvovug ta natay. Anni laman nga mensahe nga naggafu kanu ta natay nga ideddukattam ay naggafu talaga ta demonio. Yari tu negamma ni Jehova ta Israelita ira i pakiuvovug ta natay onu makiparte ta maski anni nga klase na espiritismo.​—Bibbigammu i Deuteronomio 18:10-12.

5. Anni i awayyam nga kuan nu dati nga neyugalim i mangiyusa tu imahen onu maddayarayaw ta ginafuan?

⁵ Anni i awayyam nga kuan nu dati nga neyugalim i maddayarayaw ta ginafuan? Bibbigan anna nonopammu tu mapia i teksto ira ta Biblia nga mangipasingan ta pagimamma na Dios tatun. Kanayun nga ipakimallomu kani Jehova i pakkaragamu nga itaddaggan i kurug nga paddayarayaw, anna mappoffukka sa tape maparigammu i pagimammana meyannung tatun nga gannug.​—Isaias 55:9.

6, 7. (a) Anni i abbattan na totolay nga selebradda nu Krismas? Neselebra kari yatun na ollu-siglo nga disipulos ni Jesus? (b) Anni i nekonektan na passelebra ta kaggawan na nekeyana, gari ta tiempo na disipulos ni Jesus?

⁶ Awayyana nga nainfluwensian ngana na falso nga relihion i paddayarayaw na tadday nu meyannung ta popular nga selebrasion. Angngariganna, selselebran na totolay i Krismas megafu ta yatun kanu i nekeyana ni Jesu-Cristo. Selebran yatun na maggi-ngamin nga relihion nga makkagi nga Cristiano ira. Ngem awan tu ebidensia nga sinelebran yatun na ollu-siglo nga disipulos ni Jesus. Kinagi na libru nga Sacred Origins of Profound Things: “Ta pappasa na dua gatu nga dagun kabalin na nekeyana ni Jesus, awan tu makannammu,  anna pilippiga laman nga totolay i interesadu ta eksakto nga petsa na nekayana ni Jesus.”

⁷ Maski nu nammuan na disipulos i eksakto nga petsa na nekeyana ni Jesus, ariadda lagapa nga selebran yatun. Ngatta? Megafu ta kagian na The World Book Encyclopedia nga i Cristiano ira gari “nekonsiderada nga pagano nga kostumbre i passelebra ta kaggawan na nekeyana na maski sinni.” Egga laman dua nga kunnatun nga selebrasion nga netura ta Biblia. Yatun i nekeyana na dua nga mammaguray nga ari maddayarayaw kani Jehova. (Genesis 40:20; Marcos 6:21) Pammadayaw gapa ta pagano nga dios i passelebra ta kaggawan na nekeyana. Angngariganna, ta Mayo 24 iselebra na Romano i nekeyana na diosa nga si Diana. Ta tumunug nga aggaw, iselebrada gapa i nekeyana ni Apolo nga dios-bilag. Nu kunnari gafu, konektadu ta paganismo, ari tu ta Cristianidad, i passelebra ta kaggawan na nekeyana.

8. Anni i koneksion na passelebra ta kaggawan na nekeyana ta ana-anito?

⁸ Egga paga tadday nga rason nu ngatta ari neselebra na ollu-siglo nga Cristiano i kaggawan na nekeyana ni Jesus. Awayyana nga ammu na disipulos ni Jesus nga konektadu ta ana-anito i kunnatun nga selebrasion. Angngariganna, aru nga Griego anna Romano gari i nangurug nga egga espiritu nga presente ta aggaw na nekeyana na kada abbing anna yatun nga espiritu i mapprotekta sa adde sonu matay. Kagian na libru nga The Lore of Birthdays: “Egga misterioso nga koneksionna yaw nga espiritu ta dios nga i kaggawan na nekeyanana ay parehas ta nekeyana na abbing.” Siguradu nga ari magayayya si Jehova ta selebrasion nga mangikonekta kani Jesus ta ana-anito. (Isaias 65:11, 12) Ngatta gafu ta aru nga totolay i mangiselebra tu Krismas?

9. Ngatta Disiembre 25 i napili nga keselebra na kaggawan na nekeyana ni Jesus?

⁹ Nappasa labbi i minagatu nga dagun kabalin na patay ni Jesus nige nga neselebra na totolay i kaggawan na  nekeyanana nga Disiembre 25. Ngem ari tu yatun i aggaw na nekeyana ni Jesus. * Ngatta gafu tu Disiembre 25 i napili? I karuan nga makkagi nga Cristiano ira, “kayada nga megiddan yatun ta pagano nga fiesta na Romano nga yatun i passelebra ta ‘kaggawan na nekeyana na ari-maffu nga bilag.’” (The New Encyclopædia Britannica) Ta tiempo na lamming, masseremonia i pagano ira tape manoli i nakkafi anna minarayyu nga bilag anna mangiyawa uli nira tu patu anna nawag. Kurugadda nga Disiembre 25 i aggaw nga mamegafu nga manoli i bilag. Megafu ta kayada nga makomberte i pagano ira, inalawa yaw na lider ira na relihion tapus pinabbalidda tu gitta na “Cristiano” nga selebrasion.” *

10. Ngatta ari masselebra tu Krismas i totolay ira gari?

¹⁰ Nabayag ngana nga nammuan nga pagano i naggafuan na Krismas. Megafu ta ari nga nebase ta Biblia i naggafuanna, nebawal i Krismas ta Inglatera anna ta karuan nga kolonia na Amerika turi meka-17 siglo. Mammulta paga lagu i maski sinni nga ari mattallung ta trabahu nu kaggawan na Krismas. Ngem ari nabbayag, nanoli i dana nga kostumbre, anna egga paga babbagu nga meselselebra. Nabbalin mangana tu popular nga selebrasion i krismas, anna nattalupaddian nga kunnatun ta aru nga lugar. Ngem megafu ta konektadu i Krismas ta falso nga relihion, danuri maya nga mapagayayya i Dios, ariadda selebran yatun onu i  maski anni nga selebrasion nga naggafu ta pagano nga paddayarayaw. *

11. Anni i rason nu ngatta masselebra i karuan nga totolay tu gitta na Krismas, ngem anni nakuan i mas importante nittam?

¹¹ Umanugu i karuan, nga pagano i naggafuan na selebrasion kagitta na Krismas ngem kagiadda nga ari gamma marake nu meselebra. Tutal, ari gamma nga nonopan na totolay i falso nga paddayarayaw nu iselebrada yatun. Mangiyawa paga lagu yaw nga okasion tu tiansa nga makapattaradday i makkakaparientes. Kunnatun kari gapa i matagenomu? Nu kunnatun, awayyana nga aya ta familia, ari tu aya ta falso nga relihion i rason nu ngatta marigatakka nga itaddaggan i kurug nga paddayarayaw. Makasiguraduka nga si Jehova, i naggafuan na unnug na familia, kayàna nga makasta i relasiommu ta paparientes mu. (Efeso 3:14, 15) Egga paga ira tanakuan nga okasion nga alawatan na Dios nga awayyanu iselebra nga mappaladda ta relasionnu nga makkakaparientes. Meyannung ta gannug nga mawag tu mas importante nittam, netura ni apostol Pablo: “Ammuan nu nakuan nu anni i makapagayaya ta Yafu.”​—Efeso 5:10.

12. Anni nga angngarigan i manguffun nittam nga mangalippawa nu ngatta mawag nga lillitattam i madaping ira nga kostumbre anna selebrasion?

¹² Awayyana nga mapanonomu nga ari tu i naggafuan na okasion i rason nu ngatta meselebra ira yatun ta kaggawattam. Talaga kari nga importante nga mammuan i naggafuan na selebrasion? Wan! Angngariganna: Nu nakasingakka tu kendi ta kanal, apammu kari yatun tapus kanammu? Siempre ari! Gitta na masingngo yatun nga kendi, ngem ari mepangngo nga kanan ta madaping yatun. Kunnatun gapa ta selebrasion ira, gitta na mepangngo gapa ngem madaping i naggafuadda. Tape metaddaggattam i kurug nga paddayarayaw, mawag nga  parigattam i pagimamma ni apostol Pablo nga nangikagi ta kurug ira nga maddayarayaw: “Arian nu siggeran i anni laman nga maritta.”​—2 Corinto 6:17.

13. Anni ira nga problema i posible nga mallattuag nu ari ka makipasselebra nu egga okasion?

¹³ Awayyana nga makkaproblema nu maddesisiokka nga ari makisali ta selebrasion. Angngariganna, baka mattaka i katrabahum nu ngatta ari ka makipasselebra nu egga okasion ta pattrabahuammu. Kunnasi nu regalluaddaka ta Krismas? Marake kari nga alawatan yatun? Kunnasi nu tanakuan i relihion na atawam? Anni kuammu tapenu ari nga matageno na ánamu nga kakkabbi gapa ira megafu ta ariannu ira pamavulunan nga makipasselebra?

14, 15. Anni i kuammu nu egga nangikagi nikaw tu kagitta na “Merry Christmas” onu egga maya nga marregalu nikaw?

¹⁴ Mawag i pakalippawa tape ammum i mepangngo nga kuammu ta nadduruma nga situasion. Awayyam mappabalo nu egga makkagi nikaw tu kagitta na “Merry Christmas!” Ngem kunnasi nu kanayummu gamma nga masingan anna makavulu i nangikagi? Awayyam iyesplika i pangurug mu. Mataktika ka nakuan kanayun. Itabarang na Biblia: “Kanayun gapa nakuan nga makapagayaya anna makapagustu i uvovugan nu, anna ammu nu nakuan i mepangngo nga itabba-tabbag nu ta ngamin nga totolay.” (Colosas 4:6) Kanayummu lagapa nga irespeto i tanakuan. Magimmugug ka ta pangipakanawag ta sinaddag mu tape ariammu ira mapatakitan. Klaro nakuan nira nga ariammu kontran i parrega-regalu anna passelebra ngem mas kayamu nga kuan ira yatun ta tanakuan nga tiempo.

¹⁵ Kunnasi nu egga maya marregalu nikaw? Nakadepende yatun ta situasion. Awayyana nga kagian na marregalu: “Ammu nga ari ka masselebra. Ngem kaya ku lagapa nga iyawa yaw nikaw.” Awayyam maddesision nga i pangalawa tatun nga regalu ay ari tu kagitta na passelebra ta okasion. Siempre,  nu ari nga ammu na tolay nga mangiyawa i meyannung ta angngurug mu, awayyam ikagi nga ari ka masselebra. Makoffun yaw tape malippawana nu ngatta ari ka mangiyawa sa tu regalu. Ngem mas makasta nu ariammu alawatan i regalu nu manawag nga i intensionna ay pakurugan nga ariammu itaddaggan i angngurug mu onu ikompromisom i angngurug mu para laman ta regalu.

16. Kunnasim nga mepasingan i pagimmugug meyannung ta gannagannug nga konektadu ta selebrasion?

¹⁶ Kunnasi nu tanakuan i relihion na kafamiliam? Takkilalammu, mawag nga magimmugug ka. Ari tu mawag nga paddidiskusionannu i kada kostumbre onu okasion nga iselebrada. Irespetom lallagu i pagimammada nu kunnasi nga kayamu gapa nga irespetoda i pagimammamu. (Bibbigammu i Mateo 7:12.) Ari ka magangngua tu maski anni nga mangipasingan tu passuporta ta okasion. Ngem mabbalikka gapa tu rasonable nu meyannung ta gannagannug nga ari gamma konektadu ta aktual nga selebrasion. Siempre, mawag tu kanayun nga maski anni kuammu, mattalupaddian nga marenu i konsensiam.​—Bibbigammu i 1 Timoteo 1:18, 19.

17. Anni i awayyam nga kuan tape ari matageno na ánamu nga kakkabbi ira nu masingadda i karuan nga masselebra?

¹⁷ Anni kuammu tapenu ari nga matageno na ánamu nga kakkabbi gapa ira megafu ta ari passelebra ta okasion nga ari nebase ta Biblia? Nakadepende yatun ta kukukuammu ta tanakuan nga tiempo na dagun. Marregalu i karuan nga maganâ ta ánada. I tiempo anna napafutuan nga atensiommu i tadday ta kapianan nga regalu nga meyawamu ta ánamu.

18. Kunnasi nga makoffun i pagatende ta paggarammammung na Cristiano tape metaddaggammu i kurug nga paddayarayaw?

¹⁸ Mawag tu lillitammu i falso nga paddayarayaw anna itaddaggammu i kurug nga paddayarayaw tape mapagayayya i Dios. Kunnasim nga kuan yaw? Kagian na Biblia: “Ay nonopat-tam nu kunnasi pakka-uffu-uffut-tam nga  mangipasingan ta aya anna pangngua ta mapia. Ariat-tam nga immangan i paggarammammung tam, kagitta na kuan na karuan ira. Makkapasa-pasikan ittam lallagu tu nono, metallugaring ta masingat-tam tu aranni ngana i Aggaw na Yafu.” (Hebreo 10:24, 25) Makapagayayya nga oportunidad i paggarammammung na Cristiano tape dayarayawan i Dios. (Salmo 22:22; 122:1) Ta kunnatun nga paggarammammung, “makkapasa-pasikan ittam ta angngurug” kavulu i matalo ira nga Cristiano.​—Roma 1:12.

19. Ngatta importante nga ikagim ta tanakuan i nagigiammum ta Biblia?

¹⁹ I pangikagi ta tanakuan meyannung ta nagigiammum ta Biblia kavulu i Saksi ira ni Jehova, i tadday paga nga makoffun tape metaddaggammu i kurug nga paddayarayaw. Aru nga totolay i talaga maddagaraging anna mazigarigatan megafu ta kinamarakay nga mesissimmu. Baka egga ammammum nga kunnatun i matagenoda. Ngatta ariammu ikagi nira i meyannung ta nebase-Biblia nga iddanamam ta mappange? Durante nga makikavulu ka ta kurug ira nga Cristiano anna ikakkagim ta tanakuan i makapabbaw nga kinakurug ta Biblia nga nagigiammum, matagenomu nga sesenu nga mawawan i pakkaraga ta futum nga tuttulan i kostumbre ira na falso nga paddayarayaw. Siguradu nga magayayya anna makalawaka tu aru nga bendision nu itaddaggammu i kurug nga paddayarayaw.​—Malakias 3:10.