ARU nga termino i neyusa ta libru na Nepakannammu nga ari tu literal i kebalinanna. (Nepakannammu 1:1) Angngariganna, tukuyan na Nepakannammu 17:1, 5 i tadday nga babay nga netura ta frentena i ngagan nga “Madumu-rumug nga Babilonia” [“Babilonia nga Dakal,” NW ]. Agga-itubang paga yaya ta “madduma-ruma nga nasion, totolay, rasa, anna paguvovug.” (Nepakannammu 17:15) Megafu ta awan gamma tu babay nga literal nga makakua taw, simboliko gafu i Babilonia nga Dakal. Anni gafu i isimbolo na babay nga minakkigannug?

Ta Nepakannammu 17:18, yatun nga simboliko nga babay ay nakagi tu “i madumurumug onu i dakal nga siudad nga mammaguray ta patul ira toye ta utun na davvun.” I termino nga “siudad” tukuyanna i organisado nga grupo na totolay. Megafu ta egga kontrol na “dakal nga siudad” ta ‘patul ira ta davvun,’ siguradu  nga maimfluwensia anna internasional yaw nga organisasion. Fustu laman nga magalan tu tangapamundowan nga imperio. Anni i klasena nga imperio? Relihioso. Pansinammu nu kunnasi nga pakurugan yatun na karuan nga bersikulo ta libru na Nepakannammu.

Awayyana nga politikal, komersial, onu relihioso i tadday nga imperio. Ari tu politikal nga imperio i babay nga nagalan tu Babilonia nga Dakal megafu ta kinagi na Biblia nga “nakigannug” sa ‘i patul ira ta davvun,’ onu i politikal nga elemento na mundo. Nakua na babay yatun nga seksual nga immoralidad gukaban na paki-alliansana ta mammaguray ira ta davvun anna kingnguana i ngamin nga mawayyana tape mapeggan tu pakapangngua anna influwensia nira. Yatun i rason nu ngatta nagalan tu “madumu-rumug ta pakigannug.”​—Nepakannammu 17:1, 2; Santiago 4:4.

Ari tu komersial nga imperio i Babilonia nga Dakal megafu ta sinangitan yaya na “komersiante ira” nga mangisimbolo ta komersial nga elemento megafu ta nekadaral na. Kakuruganna, nakagi nga giliggirawan na patul ira anna na komersiante ira i Babilonia nga Dakal ta “arayyu.” (Nepakannammu 18:3, 9, 10, 15-17) Yari tu, rasonable laman nga kurugattam nga relihioso nga imperio i Babilonia nga Dakal, ari tu politikal onu komersial nga imperio.

Mas nga napakurug paga tu relihioso nga imperio i Babilonia nga Dakal megafu ta nakagi nga neyawawan i nasa-nasion megafu ta ‘bisiu’ onu espiritistiko nga kukukuanna. (Nepakannammu 18:23) Megafu ta ngamin nga klase na espiritismo ay egga koneksionna ta relihion anna naggafu ta demonio, ari gafu nga pappabbawan nu ngatta kinagi na Biblia tu “demonio ira i maddian ngana” ta Babilonia nga Dakal. (Nepakannammu 18:2; Deuteronomio 18:10-12) Nakagi gapa tu aktibo nga kokkontranna yaw nga imperio i kurug nga relihion yari tu zinaradarum anna pinapatena i “profeta” anna “totolay na Dios.” (Nepakannammu 18:24) Kakuruganna, megafu ta sobra nga lussaw na Babilonia nga Dakal ta kurug nga relihion, awan tu allòna nga zinaradarum anna pinatay paga lagu i totolay “megafu ta angngurug da kani Jesus.” (Nepakannammu 17:6) Manawag gafu nga isimbolo na Babilonia nga Dakal i imperio na falso nga relihion ta interu mundo, kasali ngana i ngamin nga relihion nga mangontra kani Jehova nga Dios.