ARI nga naggafu ta Biblia i popular ira nga relihioso anna sekular nga okasion nga meselselebra ta aru nga lugar ta interu mundo. Anni gafu i naggafuanna yatun nga okasion? Nu mabbibbig ka tu referensia ira nga libru ta libraria meyannung ta popular ira nga okasion, baka makaddag ka ta informasion ira nga mammuammu tatun. Ikonsideram i karuan nga angngarigan.

 Easter. Kagian na The Encyclopædia Britannica nga “awan tu pamakurug ta Bagu nga Testamento meyannung ta passelebra ta Easter.” Anni gafu i naggafuan na Easter? Naggafu yatun ta paddayarayaw na pagano. Maski nu kagian na magaru nga passelebra kanu yatun ta paginnolay ni Jesus, ari gamma nga kukukuan na Cristiano i kostumbre ira nga konektadu ta Easter. Angngariganna, meyannung ta popular nga “Easter bunny [koneho],” kagian na The Catholic Encyclopedia: “Pagano nga simbolo i koneho anna kanayun nga irepresentana i kinaproduktibo na paganâ.”

Passelebra tu Bagu-Ragun. Nadduruma i petsa anna kostumbre na passelebra tu bagu-ragun ta nadduruma nga nasion. Nu meyannung ta naggafuanna yaw nga selebrasion, kagian na The World Book Encyclopedia: “I Romano nga mammaguray nga si Julius Caesar, kingnguana i Enero 1 bilang Aggaw na Bagu-Ragun turi 46 B.C. Aggaw yaw na pammadayaw na Romano ira kani Janus, i dios na trangka, puerta, anna pamegafuanan. I vulan nga January [Enero] ay naggafu ta ngagan ni Janus, nga egga dua nga mukâna​—tadday nga nakaarubang anna tadday nga nakalikug.” Yatutta naggafu ta pagano nga tradision i passelebra tu Bagu-Ragun.

Halloween. Kagian na The Encyclopedia Americana: “Naggafu ta seremonia na Druid [pari gari na Celt] nige na tiempo na Cristiano, i nadduruma nga kostumbre ta Halloween. Egga fiesta na Celt ira kada Nobiembre 1, i gafu na Bagu-Ragudda, para ta dua nga dios da​—i dios-bilag anna i dios na natay. Sesenu nga nesali yaw nga fiesta na natay ta ritual na Cristiano.”

Tanakuan paga ira nga okasion. Ariattam magigiammu ngamin i nadduruma nga okasion nga meselselebra ta interu mundo. Ngem daddammammu nga ari nga makapagayayya kani Jehova i anni laman nga okasion nga mangidayaw ta totolay onu ta organisasion ira na totolay. (Jeremias 17:5-7; Kingngua 10:25, 26) Nonopammu gapa nga i naggafuan na relihioso ira nga selebrasion i pabbaseyan nu mamagayayya yaw ta Dios onu ari. (Isaias 52:11; Nepakannammu 18:4) Makoffun nikaw i prinsipio ira na Biblia nga egga ta Kapitulo 16 tape mammuammu nu anni i pagimamma na Dios ta pakipasselebra ta sekular ira nga okasion.