ARI nga kagian nittam na Biblia nu kanni nga neyana si Jesus. Ngem mangiyawa nittam tu masikan nga ebidensia nga ari yaya neyana ta vulan na Disiembre.

Nonopammu nu kunnasi i paniempo ta vulan na Disiembre ta Betlehem, i lugar nu sitaw neyana si Jesus. Ta kalendario na Judio, tiempo na lammin anna aggororan i vulan na Kislev (katumbas na Nobiembre/Disiembre). Vulan na Tebet (Disiembre/Enero) i tumunug tatun. Yatun i kalammingan nga vulan na dagun nga nu karuan ay maguran tu niebe ta kabakulugan. Innattam nu anni i kagian na Biblia meyannung ta klima tatun nga lugar.

Nepasingan na nattura tu Biblia nga si Ezra nga malammin anna maguru-uran ta vulan na Kislev. Kabalinna nga kinagi nga naggarammammung i totolay ta Jerusalem ta “meka-20 aggaw na meka-siam nga vulan [Kislev]” kinagi ni Ezra nga aru nga totolay i “mamippippig . . . megafu ta masikan nga uran.” Nu meyannung ta paniempo tatun nga vulan, nekagi mismu na totolay:  “Yatun i tiempo na aggororan. Imposible i maddian ta lawan.” (Ezra 10:9, 13; Jeremias 36:22) Yatun i rason nu ngatta kada vulan na Disiembre, siguraduan na pastor ira nga awan ngana ira ta lawan nu gabi pati i aya-ayam da!

Ngem kagian na Biblia nga egga ta tanâ i pastor ira nga manangngal ta aya-ayam da turi ta gabi nga neyana si Jesus. Kakuruganna, kinagi na nattura ta Biblia nga si Lucas nga “egga i mappastor ira nga maddian ta tana-tana anna manangngal ta aya-ayam da ta gabi” aranni ta Betlehem. (Lucas 2:8-12) Pansinammu nga maddian ta tana-tana mismu danuri mappastor ira, ariadda laman basta nallawan tu manganannuan. Tattangngalladda i aya-ayam da ta gabi. Awayyada panô nga kuan yatun nu tiempo gabba na lammin anna aggororan ta Betlehem nu Disiembre? Siempre ari. Yatutta pakurugan na situasion gari nga ari neyana si Jesus ta Disiembre. *

Ikagi na Biblia nu kanni natay si Jesus ngem baddi laman nga detalye i kagianna nu meyannung ta nekeyanâna. Iperaddam na yaw i nekagi ni Patul Solomon: “Mas makasta i mapia nga ngagan anne ta mangina nga denu, anna i aggaw na patay anne ta aggaw na nekeyâna.” (Eclesiastes 7:1) Ari tam gafu pappabbawan nu ngatta aru nga detalye i nerekord ta Biblia meyannung ta ministerio anna patay ni Jesus ngem baddi laman nga detalye meyannung ta nekeyanâna.