1, 2. Sinni ira i madukko nga kofun ni Jehova?

SINNI i piliammu nga kofun? Siguradu nga kayamu nga makikofun ta kagittam tu pagimamma, paginteresan, anna prinsipio. Siempre kayamu danuri i makasta ugalida, kagitta na mapammakatalakkan anna masippo.

² Ta interu nga historia, nappili i Dios tu totolay nga nabbalin tu madukko nga kofunna. Angngariganna, tinukoy ni Jehova si Abraham tu kofunna. (Bibbigammu i Isaias 41:8; Santiago 2:23.) Inagalan na Dios si David tu “meddu ta futù,” megafu ta yaya i klase na tolay nga ideddukan ni Jehova. (Kingngua 13:22) Kinagi gapa ni Jehova nga si profeta Daniel ay “tadday nga nabala-balor.”​—Daniel 9:23.

3. Kunnasi nga nabbalin tu kofun ni Jehova i karuan nga totolay?

³ Kunnasi nga nabbalin tu kofun ni Jehova da Abraham, David, anna Daniel? Bueno, kinagina kani Abraham: “Nagginna ka ta ngaral ku.” (Genesis 22:18) Yari tu umaranni si Jehova ta totolay nga sipapakalinno nga mattuppal ta anni laman nga kagianna. Kinagina ta Israelita ira: “Magginna kamu niakan, ay mabbalin ngâ tu Dios nu, anna mabbalin kamu tu totolê.” (Jeremias 7:23) Nu mattuppal ka kani Jehova, mabbalikka gapa tu kofunna!

4, 5. Kunnasi nga ipasingan ni Jehova i sikanna para ta totolena?

⁴ Nonopammu nu anni ira i benefisio na mabbalin tu kofun na Dios. Kagian na Biblia nga magala-aleg si Jehova tu oportunidad “tape ipasingan i sikanna para ta kumpleto i futúda nga masserbi sa.” (2 Cronicas 16:9) Kunnasi nga ipasingan ni Jehova i sikanna para nikaw? Mabibbig ta Salmo 32:8 nga kinagi ni Jehova: “Ituddù nikaw i mepangngo nga lakaram-mu, tudduan anna tabarangngat-taka.”

⁵ Fugurammu yatun nga pangikavurung ni Jehova nikaw! Igiya anna tangngallan naka durante nga iyaplikam i tabarang na. Kaya naka nga uffunan tape maattammammu i pazzigariga. (Bibbigammu i Salmo 55:22.) Yari tu nu passerbiammu si Jehova ta interu futum, makagim gapa i kagitta na nakagi na salmista: “Ammù tu kanayun nga kavulu ku i YAFU; aranni yaya, ay awan tu pakavurungak-ku.” (Salmo 16:8; 63:8) Moffunan naka talaga na Yafu nga si Jehova nga mattolay ta dalan nga mamagayayya sa. Ngem kagitta na nammuammu ngana, egga kontra na Dios nga mangifugag nikaw nga magangngua tatun.

6. Anni i akusasion ni Satanas ta totolay?

⁶ Nagigiammum ta Kapitulo 11 nu kunnasi hinamun ni Satanas nga Diablo i soberania ni Jehova. Inakusanna i Dios anna gitta na ikakkagina nga kamali i arianna pangipamavulun kada Adan anna Eva nga maddesision para ta baggida nu anni i fustu anna ari tu fustu. Kabalin nga nakaliwa da Adan anna Eva anna durante nga mapannu i davvun tu gaka-gakada, kinuestion ni Satanas i motibo na ngamin nga tolay. Gitta na ikakkagi ni Satanas ta Dios: ‘Masserbi nikaw i totolay ari nga megafu ta ayâda nikaw. Iddannà laman tu tiansa ay mapatalikug ku i maski sinni kontra ta nikaw.’ Pakurugan na istoria meyannung kani Job nga kunnaw i pagabbo ni Satanas.  Sinni si Job? Kunnasi yaya nga nesipo ta akusasion ni Satanas?

7, 8. (a)  Anni i rason nu ngatta nerumuruma si Job ta ngamin nga totolay ta kaggawanna? (b) Kunnasi nga kinuestion ni Satanas i motibo ni Job?

⁷ Nattolay si Job ma-3,600 dagun ngana i nappasa. Masippo yaya, ta kinagi ni Jehova: “Awan tu kagittana ta davvun. Matunung yaya nga tolay, maganassing ta Dios anna arayyuanna i marake.” (Job 1:8) Kakayà na Dios si Job.

⁸ Kinuestion ni Satanas i motibo ni Job nga masserbi ta Dios. Kinagina kani Jehova: “Ariammu kari ginibaw i mismu nga pallevuna [Job], i balay anna ngamin nga pakkukuana? Binendisionammu i trabahu na limana anna nawwara i aya-ayam na ta davvun. Ngem, tape moli gapa, sonnatammu i limam anna apammu i ngamin nga egga sa, ay siguradu nga ibariaw naka ta mismu nga arubammu.”​—Job 1:10, 11.

9. Anni i kingngua ni Jehova mekunnay ta akusasion ni Satanas, anna ngatta kunnatun i kingnguana?

⁹ Nerason ni Satanas nga masserbi laman si Job ta Dios megafu ta malawana nga bendision. Nepapilit na paga nga nu mazzigariga si Job, magimmang ngana nga masserbi ta Dios. Kunnasi nga sinolusionan yaw ni Jehova? Megafu ta i motibo ni Job i isyu, nepamavulunna nga purueban ni Satanas si Job. Nu kunnaw i kuanna, mapakurug nu talaga nga ayatan ni Job si Jehova.

10. Anni ira nga trahedia i nesimmu kani Job, anna anni kingnguana maski nu nazzigariga?

¹⁰ Ari nabbayag, pinurueban ni Satanas si Job. Nakoko i karuan ta aya-ayam ni Job anna napatay gapa i karuan. Aru ta aripanna ira i napapatay. Nappobre yaya megafu taw. Ari laman tu yatun i nesimmu sa nga trahedia, natay paga i mafulu nga anâna megafu ta badiu. Ngem maski nu grabe i nesimmu kani Job, “ari nga nakaliwâ onu inakusan ni Job i Dios nga mangngua tu marake.”​—Job 1:22.

11. (a) Anni i mekadua nga akusasion ni Satanas kani Job, anna anni i kingngua ni Jehova? (b) Anni i determinasion ni Job maski nu grabe i takîna?

 ¹¹ Ari paga nga nakontento si Satanas. Siguradu nga nanonòna nga maattamman ni Job i kawan na pakkukua, aripan, anna anàna ngem oras tu mattaki yaya, pallikuranna i Dios. Nepamavulun ni Jehova nga pattakitan ni Satanas si Job tu kannama-nama anna kumata-katû nga vutali. Ngem maski kunnatun, ari lagapa nakkafi i pangurug ni Job ta Dios. Determinado lallagu nga nangikagi: “Adde sonu matay ngâ, ariakku alsan i kinamatalo ku!”​—Job 27:5.

12. Kunnasi nga napakurug ni Job nga ari tu fustu i akusasion ni Satanas nga Diablo?

¹² Ari nga ammu ni Job nga si Satanas i kegafuan na pazzigarigana. Megafu ta arianna ammu i meyannung ta pakkuestion ni Satanas ta soberania ni Jehova, nanonòna nga baka i Dios i naggafuan na problemana ira. (Job 6:4; 16:11-14) Ngem nammakatalo lagapa si Job kani Jehova. Yatutta napakurug gabbalaman nga ari tu fustu i akusasion ni Satanas nga masserbi laman si Job ta Dios megafu ta makasarili ira nga benefisio!

13. Anni i resulta na kinamatalo ni Job ta Dios?

¹³ Megafu ta kinamatalo ni Job, nakeyawa si Jehova tu mafuersa nga tabbag ta makapa-insulto nga akusasion ni Satanas. Talaga nga kofun ni Jehova si Job. Binalabalakkan yaya na Dios megafu ta kinamatalona.​—Job 42:12-17.

14, 15. Ngatta makagi tam nga nesipo i ngamin nga totolay ta akusasion ni Satanas kani Job?

¹⁴ Ari laman tu si Job i kinuestion ni Satanas i kinamatalona. Nesipo ka gapa. Manawag nga masingan yaw ta kinagi mismu ni Jehova ta Proverbio 27:11: “Mammasirib ka, anâ ku, anna pagayayyatammu i futû, tapenu mawayyà nga matabbag i manutturia niakan.” Yaw ira nga uvovug nga netura minagatu nga dagun i nappasa kabalin na patay ni Job, ipasinganna nga adde ta maddaggun, tutturian paga ni Satanas  i Dios anna ak-akusanna i aripanna ira. Makoffuttam nga tabbagan i ari fustu nga akusasion ira ni Satanas nu mattoletam nga mamagayayya kani Jehova. Nu kunnatun, mapagayayya tam i futú na Dios. Kayamu kari nga kuan yatun? Ari kari tu makasta nu egga makuam tape mapakurug nga laddug i akusasion ni Satanas, maski nu mawag nga egga uliammu ta pattolem?

¹⁵ Takkilalammu i kinagi ni Satanas: “Iyawa na tadday nga tolay i ngamin nga egga sa para ta inangona.” (Job 2:4) Ta pangikagina tu “tadday nga tolay,” manawag tu ngamin nga tolay i inakusan ni Satanas, ari laman tu si Job. Kuruga importante yatun nga punto. Kukkuestionan gapa ni Satanas i kinamatalo mu ta Dios. Kayàna nga ari ka mattuppal ta Dios anna panawammu i kinatunung oras tu mazzigariga ka. Anni i awayya nga kuan ni Satanas tape metuppal na yaw?

16. (a)  Anni i kukukuan ni Satanas tape metallikug na i totolay ta Dios? (b) Kunnasi nga usan yaw ni Satanas kontra nikaw?

¹⁶ Nagigiammu tam ta Kapitulo 10 nga nadduruma i appan ni Satanas tape masiluanna i totolay nga tumalikug ta Dios. Fuera paga tatun, umatake yaya nga “kagitta na mangngana-nganangngar nga leon nga magaleg ta kanan na.” (1 Pedro 5:8) Yari tu masingan i influwensia ni Satanas nu kontran na kokkofun, paparientes, onu na karuan nga totolay i paggigiammum tu Biblia anna i pangiyaplikam ta nagigiammum. * (Juan 15:19, 20) Mas paga tatun, “si Satanas ay awayya na nga pabbalinan i baggi na tu kagitta na anghel na nawag!” (2 Corinto 11:14) Puede nga mangiyusa si Satanas tu ari tam mataga-tageno ira nga appan tape meyawawan anna matentana ittam nga panawan i makadios nga pattolay. Mawayyana nga pakafian i nonòmu tape matagenomu nga  ariammu mapagayayya i Dios. (Proverbio 24:10) Mabbalin man si Satanas tu “mangngana-nganangngar nga leon” onu magappappe nga “anghel na nawag,” ari lagapa nanguli i akusasionna: Kagianna nga nu mepaarubakka ta zigariga onu tentasion, magimmakka ngana nga masserbi ta Dios. Anni i kuammu tape matabbag i akusasionna anna mapakurug mu nga matalo ka talaga ta Dios, kagitta ni Job?

17. Anni talaga i rason nu ngatta tuppalattam i bili-bilin ni Jehova?

¹⁷ Matabbag mu i akusasion ni Satanas nu mattoleka nga mamagayayya ta Dios. Kunnasim makua yaw? Kagian na Biblia: “Mawag tu ayatammu si Jehova nga Dios mu ta interu nga futum anna ta interu nga kararuam anna ta interu nga sikammu.” (Deuteronomio 6:5) Durante nga dumakadakal i ayâmu ta Dios, mas matagenomu nga kakayamu nga kuan i kayàna nga kuammu. Netura ni apostol Juan: “Ta nu ayatat-tam i Dios, parulattat-tam gapa i bili-bilin na.” Nu talaga interu futu i pangayâmu kani Jehova, malippawamu nga “ari gammabba tu mariga nga tuttulan” i bili-bilinna.​—1 Juan 5:3.

18, 19. (a) Anni i karuan ta bili-bilin ni Jehova? (Innammu i kahon nga  Lillitan i Ikalussaw ni Jehova.) (b) Kunnasi tam masiguradu nga ari nga kiddawan na Dios nittam i ari tam mawayya?

¹⁸ Anni ira i bili-bilin ni Jehova? Karuan taw ay i annangngua nga mawag tu lillitattam. Angngariganna, innammu i kahon ta pahina 122 nga “ Lillitan i Ikalussaw ni Jehova.” Masingammu tatun i kondukta ira nga manawag tu igamma na Biblia. Ta ollu nga paningammu, gitta na ari mabba marake i karuan taw. Ngem nu bibbigan anna nonopammu tu mapia i teksto ira, malippawamu i sirib na bili-bilin ni Jehova. Posible nga kuruga marigatakka nga ulian i ugalim. Ngem fermi nga magayayya anna kontento ka nu mapagayayyamu i Dios. (Isaias 48:17, 18) Makuam yatun. Kunnasi tam masiguradu?

¹⁹ Ari pulus kiddawan ni Jehova nittam i ari tam mawayya.  (Bibbigammu i Deuteronomio 30:11-14.) Mas ammuna i potensial anna limitasiottam anne nittam. (Salmo 103:14) Fuera paga tatun, meyawa ni Jehova nittam i sikan tape makapattuppal tam sa. Netura ni apostol Pablo: “Ngem pammakatalakkan i Dios, anna arian na nga ipamavulun tu duttal nikamu i tentasion nga arian nu awayya nga affutan. Ta oras na katenta nu, iddan nakamu na Dios ta sikan nu nga magattam tapenu melilli kamu ta kataga ta tentasion.” (1 Corinto 10:13) Mangiyawa nikaw si Jehova tu “ari nga maguku-gukug nga pakapangngua” tape moffunakka nga magattam.​—2 Corinto 4:7.

20. Anni ira nga makadios nga kualidad i mawag nga ipasingammu, anna ngatta importante yaw ira?

²⁰ Egga paga i mawag nga kuattam tape mapagayayya si Jehova. Siempre, mawag nga ayattattam gapa i gannagannug nga ayatanna. (Roma 12:9) Ari kari tu kakayàmu i makikofun ta tolay nga kagittam tu pagimamma, paginteresan, anna prinsipio? Kunnatun gapa si Jehova. Yari tu mawag nga ayatattam i gannagannug nga ayatanna. Mabibbig ta Salmo 15 nu anni ira i kualidad na mebilang tu kofun na  Dios. (Bibbigammu i Salmo 15:1-5.) Ipasingan na kokkofun ni Jehova i kualidad ira nga nakagi ta Biblia tu “vunga na Espiritu.” Kasali tatun nga kualidad i “pangaya, pagayayya, imammo, pappasensia, pia na affutu-futu, pia na pangnga-pangngua ta ikattolay, kapasikkal onu pangurug, pappakasippo, anna pangifugag ta baggi.”​—Galacia 5:22, 23.

21. Anni i makoffun nikaw tape mapeggakka tu makadios ira nga kualidad?

²¹ Makoffun nikaw i regular nga pabbibbig anna paggigiammu tu Biblia tape mapeggakka tu makadios ira nga kualidad. Gigiammuammu gapa i kaya ira na Dios tape metonos i pana-panonòmu ta appana-panòno na Dios. (Isaias 30:20, 21) Durante nga dumakadakal i ayâmu kani Jehova, mas kakayàmu nga mattolay nga mamagayayya sa.

22. Anni i benefisio na pattolay nga mamagayayya ta Dios?

²² Ikagumattam i mattolay nga mamagayayya kani Jehova. Negitta na Biblia i panguli ta pattolem ta pangari ta dana nga kata-katolay anna pangibarwasi tu bagu. (Colosas 3:9, 10) Netura na salmista meyannung ta bili-bilin ni Jehova: “Ta pamarulo ku nira ay dakal i balo ku.” (Salmo 19:11) Matagenomu noka nga talaga nga aru benefisio na pattolay nga mamagayayya ta Dios. Nu kuammu yatun, makeyawa ka tu tabbag ta akusasion ni Satanas anna mapagayayyamu i futu ni Jehova!