APENDISE
Nu Kunnasi Neprofesiya ni Daniel i Dattal na Mesias
NATOLAY ngana si profeta Daniel maturu tu 500 dagun nige nga neyana si Jesus. Ngem, nepakannammu sa ni Jehova i informasion nga makoffun tape mammuattam nu sonu anni nga mabbalin si Jesus tu Mesias, onu Cristo. Nakagi kani Daniel: “Mawag tu ammuammu anna alippawatammu nga mamegafu ta nepangikagi ta bilin nga metoli anna mapataddag uli i Jerusalem adde ta Mesias nga Lider, ay egga noka 7 ligguan, anna 62 ligguan.”—Daniel 9:25.
Tape mammuattam i dattal na Mesias, mawag tu ammuattam labbi i pamegafuanan na tiempo adde ta dattal na Mesias. Segun ta profesiya, yatun ay “mamegafu ta nepangikagi ta bilin nga metoli anna mapataddag uli i Jerusalem.” Kanni nga nesimmu yatun? Segun kani Nehemias nga nattura ta Biblia, nakagi i bilin nga mapataddag uli i pader na Jerusalem turi “ta meka-20 dagun na pammaguray ni Patul Artaxerxes.” (Nehemias 2:1, 5-8) Pakurugan na historiador ira nga namegafu nammaguray si Artaxerxes turi 475 B.C.E. Yari tu, 455 B.C.E. i meka-20 dagun na pammagurena. Ammu tam ngana gafu i pamegafuanan na profesiya ni Daniel meyannung ta Mesias.
Nekagi ni Daniel nu kunnasi kapaddu na tiempo nga mappasa nige nga duttal i “Mesias nga Lider.” Kagian na profesiya nga “egga noka 7 ligguan, anna 62 ligguan”—69 ligguan ngamin. Kunnasi kapadduna yatun nga tiempo? Kagian na aru nga bersion na Biblia nga ari tu ligguan na agga-aggaw yatun, nu ari, ligguan na daguragun. Kada ligguan, katumbas na i pitu dagun. Familiar i Judio gari taw nga konsepto nga ligguan na dagun, onu pitu-dagun nga periodo. Angngariganna, iselebrada i dagun na Sabbath ta kada meka-pitu dagun. (Exodo 23:10, 11) Nu kunnatun gafu, i neprofesiya nga 69 ligguan ay kebalinanna i 69 nga ligguan na daguragun nga egga aggi-7 nga dagun kada ligguan, onu 483 dagun ngamin.
Mabbilang ngana laman gafu i kuattam. Nu mabbilattam tu 483 dagun mamegafu ta 455 B.C.E., makadde tam ta 29 C.E. Yatun i eksakto nga dagun na nekabawtiso ni Jesus tapus nabbalin tu Mesias! * (Lucas 3:1, 2, 21, 22) Ari kari tu makapabbaw yatun nga ketuppal na profesiya?
^ par. 2 Mamegafu ta 455 B.C.E. adde ta 1 B.C.E., egga 454 dagun. Mamegafu gapa ta 1 B.C.E. adde ta 1 C.E. ay tadday nga dagun (awan tu dagun nga zero). Tapus mamegafu ta 1 C.E. adde ta 29 C.E., egga gapa 28 dagun. Nu pattaraddayattam yatun nga daguragun, mas-suma total tu 483 dagun. “Natay” si Jesus turi 33 C.E., ta meka-70 ligguan na daguragun. (Daniel 9:24, 26) Innammu i kapitulo 11 na Magbigay-Pansin sa Hula ni Daniel! anna i Kaunawaan sa Kasulatan, Tomo 2, pahina 936-939, parehas nga nepublisa yatun na Saksi ni Jehova.
