1-3. Anni ira i pakkiavu na totolay meyannung ta patay, anna anni i tabbag na karuan nga relihion?

NABAYAG ngana nga nononopan na totolay yaw ira nga pakkiavu. Importante nga mammuattam i tabbag na ira yatun megafu ta matay onu matayattam ngamin.

² Nagigiammu tam ta nappasa nga kapitulo nga napeggattam tu iddanama nga mattolay tu mannanayun megafu ta sakrifisio nga tavvu ni Jesu-Cristo. Nagigiammu tam gapa nga neprofesiya na Biblia i tiempo nga “awan ngana noka i matay.” (Nepakannammu 21:4) Ngem matay ngamin ittam. Kinagi ni Patul Solomon, “ta ammu na siggamatolay nga matay ira.” (Eclesiastes 9:5) Kuattam i ngamin tape mattolay tam nakuan tu apaddu. Ngem, kaya tam lagapa nga mammuan nu anni i mesimmu nu matay tam.

³ Marraddam tam nu matayattam. Baka manono tam: ‘Anni ngana tamma nesimmu nira? Mazzigariga panô ira? Babbantayadda kari ittam? Moffunattam kari ira? Masingattam kari paga ira uli?’ Nadduruma i tabbag ira na relihion taw ira nga pakkiavu. Ituddu na karuan nga nu masippo ka, umeka ta langi, ngem nu marake ka, umeka ta infiernu. Ituddu na karuan nga relihion nga nu matay i tolay, umay yaya ta lugar na espiritu nga dian na inafú da. Ituddu gapa na tanakuan nga relihion nga umay i natay ta mundo na natay ira tape makastigo tapus meyana uli ta tanakuan nga baggi.

4. Anni i tattadday nga nakebaseyan na tuddu na relihion meyannung ta patay?

 ⁴ Tattadday laman i nakebaseyanna yatun ngamin nga nadduruma nga tuddu—egga imortal nga kararua nga mesinna ta baggi na natay. Segun ta maggi ngamin nga relihion ta nappasa anna ta maddaggun, mattolay tam kanu tu mannanayun nga egga abilidad na nga makasingan, makaginna, anna makanono. Ngem kunnasi nga mesimmu yatun? Konektado ta utô i ngamin nga sentido, kunne na gapa ta appanono tam. Magimmang ngana nga magandar i utô nu matay tam. Ari ngana nga maffunsina i memorya, panageno, anna sentido tam. Mawawan ngana yatun nu matay tam.

5, 6. Anni i ituttuddu na Biblia meyannung ta kondision na natay?

⁵ Ari nga misterio kani Jehova nga Namaratu ta uto i mesimmu nu matay tam. Ammuna i kinakurug anna nepakanawag na i kondision na natay ta Uvovug na, i Biblia. Yaw i manawag nga tudduna: Nu matay i tolay, mawawan ngana yaya. Neruma i natay ta siggamatolay. Ari nga makasingan, makaginna, onu makanono i natay. Awan tu maski anni nga parte na baggi tam i siggamatolay nu natay tam ngana. Awan tu imortal nga kararua tam onu espiritu. *

⁶ Kabalin nga kinagi ni Solomon nga ammu na siggamatolay nga matay ira, neturana: “Ngem i natay, awan ngana pulus tu ammuda.” Neyesplikana paga i kinakurug nga ari ngana mawayya na natay i mangaya onu makalussaw anna “awan tu trabahu onu plano onu pakannammu onu sirib ta Tanam.” (Bibbigammu i Eclesiastes 9:5, 6, 10.) Kinagi gapa na Salmo 146:4 nga nu matay i totolay, “manuppal ngamin i  talakkurug da.” Mortal tam anna ari tam mattulu-tuloy nga matolay nu natay tam ngana. Megitta i inango tam ta afi na kandela. Nu naddo i afína, awan tu tanakuan nga inangngayanna. Nawawan ngana.

7. Kunnasi nga neyesplika ni Jesus nu anni nekegittan na patay?

⁷ Egga nekagi ni Jesus meyannung ta kondision na natay turi ta natay i kofunna nga si Lazaro. Nekagi ni Jesus ta disipulos na: “Agga-katurug si Lazaro nga kofut-tam.” Pagabbo na disipulos nga i kaya kagian ni Jesus ay aggakaturug si Lazaro tapenu mammapia ta takîna. Ngem ari tu yatun i kaya kagian ni Jesus. Neyesplikana: “Natay ngana si Lazaro.” (Bibbigammu i Juan 11:11-14.) Nu kunnatun, negitta ni Jesus i patay ta pakkaturug. Awan si Lazaro ta langi onu ta umafa-afi nga infiernu. Arianna nakavulu i anghel onu i inafúna ira. Ari yaya neyana uli. Natay ngana onu nakakaturug anna awan ngana pulus tu matagenona. Negitta paga na karuan nga teksto i patay ta pakkaturug. Angngariganna, turi ta paginnolayan ni Jesus i natay nga abbing, kinagina: “Ari nga natay i abbing, ngem aggakaturug laman!”​—Mateo 9:24.

8. Kunnasi tam mapakurug nga ari gakkag na Dios nga matay i tolay?

⁸ Ginakkag kari na Dios nga matay i tolay? Ari pulus! Pinaratu na Dios i tolay tape mattolay tu mannanayun ta davvun. Kagitta na nagigiammu tam ngana taw nga libru, pinaddian na Dios i ollu nga magatawa ta makakkasta nga paraiso. Iniddanna ira tu perfekto nga gawagawayyan. Puru mapia laman i kaya ni Jehova para nira. Egga kari minaggiddu nga maganâ nga kayana nga mazzigariga i anâna megafu ta pallakay anna  patay? Siempre awan! Ideddukan ni Jehova i anâna anna kayana nga mapeggan ira tu mannanayun nga pagayayya ta davvun. Nekagi na Biblia meyannung ta totolay: “Nepay [ni Jehova] i mannanayun nga tiempo ta futúda.” (Eclesiastes 3:11) Pinaratu ittam ni Jehova nga egga pakkaragana nga mattolay tu mannanayun. Yari tu zinog na i Anâna tape malawa tam i mannanayun nga inango.

9. Anni i negamma ni Jehova kani Adan, anna ngatta ari tu mariga nga tuppalan yaw nga bilin?

⁹ Ngatta gafu matay i tolay? Tape matabbag yatun, mawag tu ammuattam i nesimmu turi ta egga laman tadday nga lalaki anna tadday nga babay ta davvun. Nepakanawag na Biblia: “Pinattugu onu pinattalovu ni Jehova nga Dios ta davvun i kada klase na kayu nga makemmemmi nga innan anna mapia nga kanan.” (Genesis 2:9) Ngem egga negammana. Kinagi ni Jehova kani Adan: “Awayyam kanan i vunga na kada kayu ta hardin adde ta mabattug ka. Ngem nu meyannung ta kayu na pakannammu tu mapia anna marake, ari ka kuman tatun, megafu ta, ta mismu nga aggaw nga kuman ka tatun siguradu nga matay ka.” (Genesis 2:16, 17) Ari tu mariga nga tuppalan yaw nga bilin megafu ta aru paga i tanakuan nga kayu nga awayyada nga kanan i vungana. Nangiyawa lagu yaw nga bilin tu oportunidad nira tape mappabalo ta Dios megafu ta ngamin nga gannagannug nga nalawada, kagitta na perfekto nga inangoda. Ipasingan paga na pattuppal da nga irespetoda i autoridad na nelangitan nga Yamada anna kayada i meddu nga pangidalanna.

10, 11. (a) Kunnasi nga nakaliwâ ta Dios i ollu nga magatawa? (b) Ngatta serioso nga gannug i ari pattuppal da Adan anna Eva?

¹⁰ Ngem kaddaraddam ta pinili na ollu nga magatawa nga ari mattuppal kani Jehova. Kinagi ni Satanas kani Eva gukaban na serpiente: “Kurug kari nga kinagi na Dios nga ari kamu kuman ta vunga na kada kayu ta hardin?” Netabbag ni Eva: “Awayyami nga kuman ta vunga na kayu ira ta hardin. Ngem kinagi na Dios meyannung ta vunga na kayu nga egga ta tangnga na hardin: ‘Ari ka kuman tatun, ari, ariammu siggeran; ta matay ka nu kuammu yatun.’”​—Genesis 3:1-3.

¹¹ Kinagi ni Satanas: “Siguradu nga ari ka matay. Ta ammu na Dios nga ta mismu nga aggaw nga kumakka tatun, mavukatan i matam anna mabbalikka tu kagitta na Dios nga makannammu tu mapia anna marake.” (Genesis 3:4, 5) Kaya  ni Satanas nga kurugan ni Eva nga pakabenefisiowanna nu kuman ta negamma nga vunga. Segun sa, awayya lagapa ni Eva i maddesision para ta baggina nu anni i fustu anna ari fustu; awayyana nga kuan nu anni kayana. Inakusan paga ni Satanas tu laddug si Jehova turi ta kinagina nga matay i sinni laman nga kuman tu vunga na kayu. Kinurug ni Eva si Satanas. Yari tu namusi yaya tu vunga anna kinnanna. Kabalinna, iniddanna gapa i atawana, tapus kiminan gapa. Ariadda kingngua yaw megafu ta ignorante ira. Ammuda nga i kukukuadda ay i mismu nga kinagi na Dios nga ariadda kuan. Turi ta kinnadda i vunga, sinadyada nga ari parulattan i simple anna rasonable nga bilin na Dios. Ariadda nerespeto i nelangitan nga Yamada anna i autoridad na. Ari nga  mapakoma yatun nga kawan na respeto ta minangngaya nga Namaratu!

12. Anni i makoffun nittam nga malippawa i natageno ni Jehova turi ta kinontra da Adan anna Eva yaya?

¹² Angngariganna: Anni matagenomu nu ari naka gigginnan na anâmu nga pinadakal anna sinangngallammu, anna ari nangipasingan tu respeto anna ayâ nikaw? Siguradu nga kuruga mataka-taki yatun nikaw. Nonopammu gapa nu kunnasi takî na natageno ni Jehova turi ta kinontra da Adan anna Eva yaya.

13. Anni i kinagi ni Jehova nga mesimmu kani Adan nu matay, anna anni i kaya na kagian yaw?

¹³ Awan tu rason ni Jehova tapenu ipamavulunna paga nga mattolay tu mannanayun da Adan anna Eva. Natay ira, kagitta na kinagina nga mesimmu nira. Awan ngana da Adan anna Eva. Ariadda minay ta lugar na espiritu ira. Ammu tam nga kunnaw megafu ta kinagi ni Jehova kani Adan turi ta kinonfruntana: “Manoli ka ta davvun, ta yatun i naggafuammu. Megafu ta gavu ka ay ta gavu i panolliammu.” (Genesis 3:19) Finorma ni Jehova si Adan ta gavu na davvun. (Genesis 2:7) Nige na yatun, awan si Adan. Nu kunnatun, turi ta kinagi ni Jehova tu manoli si Adan ta gavu, kaya na kagian nga nanoli si Adan kagitta na dati​—awan ngana yaya. Negitta si Adan ta awan tu inangona nga gavu.

14. Ngatta matay tam?

¹⁴ Siggamatolay paga nakuan da Adan anna Eva, ngem natay ira megafu ta pinilida i ari mattuppal ta Dios yari tu nakaliwâ ira. Matay tam megafu ta neperensia ni Adan i tagaruli ta ngamin nga gaka-gakana. (Bibbigammu i Roma 5:12.) Negitta yatun nga tagaruli ta namana nga grabe nga taki nga awan tu maski sinni i makalisi. I narresultanna nga patay ay mebilang nga sumpa. Tadday nga kontra i patay, ari tu kofun. (1 Corinto 15:26) Kunnatun ngana laman i pappabalo tam kani Jehova megafu ta neyawana nga tavvu tape matavvu tam ta kananassing nga kontra!

15. Ngatta makapabannay i pangammu ta kinakurug meyannung ta patay?

¹⁵ Makapabannay i kinakurug nga ituttuddu na Biblia meyannung ta patay. Kagitta na nagigiammu tam, ari nga mazzigariga onu maraddam i natay. Awan tu rason nga ikassing ira, ta ariadda ittam madannal. Ariadda kawagan i uffuttam, anna ariadda ittam moffunan. Ariattam ira makibbida onu makiergo. Kagian na aru nga lider na relihion nga moffunadda i natay, yari tu mangiyawa nira tu kuartu danuri mangurug nira. Ngem ariadda ittam mailloko nu ammu tam i kinakurug meyannung ta patay.

16. Sinni i nanginfluwensia ta tuddu na aru nga relihion, anna kunnasi?

¹⁶ Parehas kari ta ituttuddu na Biblia i ituttuddu na relihion mu meyannung ta patay? Aru i mekontra ta Biblia i tudduda. Ngatta? Megafu ta nainfluwensian ira ni Satanas. Usanna i falso nga relihion tape mangurug i totolay nga nu matay ira, mattulu-tuloy ira nga matolay ta lugar na espiritu. Kinaladdug yaw nga nekivu ni Satanas ta karuan paga nga kinaladdug tape umarayyu i totolay kani Jehova nga Dios. Kunnasi?

17. Ngatta ari nga kedayawan ni Jehova i tuddu meyannung ta infiernu?

¹⁷ Kagitta na nakagi ngana, ituddu na karuan nga relihion nga nu matay i marake nga tolay, umay yaya ta infiernu tape mannanayun nga mazigarigatan. Ari nga kedayawan na Dios yaw nga tuddu. Si Jehova ay Dios na aya anna arianna pulus zigarigatan i totolay tu kunnatun. (Bibbigammu i 1 Juan 4:8.) Anni i makagim nu kastiguan na yama i anâna gukaban na pangipena ta lima na abbing ta afi? Irespetom kari i kunnatun nga tolay? Ta kakuruganna, kayamu kari paga nga mammammu yatun nga tolay? Siguradu nga ari! Baka nonopammu paga nga kuruga marake yaya. Ngem kaya ni Satanas nga kurugattam nga mannanayun nga zigarigatan ni Jehova i totolay ta umafa-afi nga infiernu!

18. Anni nga kinaladdug i nakebaseyan na paddayarayaw ta natay?

 ¹⁸ Usan gapa ni Satanas i karuan nga relihion tape ituddu nga nu matay i tolay, mabbalin yaya tu espiritu nga mawag tu irespeto anna dayawan na siggamatolay ira. Segun taw nga tuddu, awayyana nga mabbalin tu makapangngua nga kofun onu kananassing nga kontra i espiritu na natay. Aru nga totolay i mangurug taw nga kinaladdug. Maganassing ira ta natay yari tu ikakua anna dayarayawadda. Ngem ituttuddu na Biblia nga aggakaturug i natay anna si Jehova laman nga Dios, i Minangngiyawa anna Namaratu nittam, i mawag nga dayawattam.​—Nepakannammu 4:11.

19. Anni nga tuddu na Biblia i malippawa tam nu ammu tam i kinakurug meyannung ta patay?

¹⁹ Ari ka mailloko ta kunnatun ira nga kinaladdug nu ammum i kinakurug meyannung ta natay. Uffunan naka paga yatun nga malippawa i karuan nga tuddu na Biblia. Angngariganna, nu ammum nga ari gabba umay i natay ta lugar na espiritu ira, mas maappresiam i promesa nga mannanayun nga inango ta paraiso nga davvun.

20. Anni nga pakkiavu i matabbag ta tumunug nga kapitulo?

²⁰ Gari, nepakkiavu na matunung nga tolay nga si Job: “Nu matay i tolay, mapaginnolay panô paga?” (Job 14:14) Maginnolay kari paga i awan tu inangona nga tolay nga nakakaturug ta patay? Kuruga makapabannay i tuddu na Biblia meyannung taw. Yatun i magigiammu ta tumunug nga kapitulo.