MABBIBBIG ka tu maski anni nga diario. Maggiroka ta telebision, onu magginna ka ta radio. Aru i balita meyannung ta krimen, gerra, anna terorismo! Nonopammu gapa i problemam ira. Baka grabe vurummu megafu ta mattaki onu natay i ideddukammu. Awayyana nga matagenomu i kagitta na natageno na masippo nga tolay, si Job nga nangikagi tu “napannuan yaya tu kepasiranan anna pazzigariga.”​—Job 10:15.

Iyavumu ta baggim:

• Yaw kari i ginakkag na Dios niakan anna ta ngamin nga totolay?

• Pakalegakku tu uffun tape masolba i problemà?

• Egga kari iddanama nga mapeggan noka tu imammo i davvun?

Egga makakontento nga tabbag na Biblia taw ira nga pakkiavu.

“Funatan na ngamin i lulua da nga manuru, anna awan ngana noka tu matay, onu maraddam, onu tumangi-tangi, onu magattam ta taki.”​—Nepakannammu 21:4

“Mallattu i pilay nga kagitta na utta.”​—Isaias 35:6

“Mavukatan i mata na vuling.”—Isaias 35:5

 “I natay ira ay . . . mallalawan ta livud-da.”​—Juan 5:28, 29

“Awan noka tu maski sinni i mangikagi: ‘Mataki ngâ.’”​—Isaias 33:24

“Aru paray i magatab ta koman ira.”​—Salmo 72:16

Ariammu insigida nonopan nga ilusion laman i nasingammu ta letratu ira. Nepromesa na Dios nga ipatuppal na yaw ira, anna iyesplika na Biblia nu kunnasina nga kuan yatun.

Ngem ari laman tu yatun i meuffun na Biblia. Uffunan naka tape talaga makapagayayya i pattolem maski ta maddaggun. Nonopammu ta manganannuan i pakavurungan anna problemam. Puede nga problema ta kuartu, familia, pattaki, onu patay na ideddukammu. Uffunan naka na Biblia tatun nga problemam ira, anna bannabannayan naka gukaban na pattabbag taw nga pakkiavu ira:

• Ngatta mazzigariga tam?

• Kunnasi tam masolba i problema ira ta pattolay?

• Kunnasi nga mabbalin tu mas magayayya i attolay na familia tam?

• Anni i mesimmu nu matay tam?

• Masingattam kari paga uli i natay ira nga ideddukattam?

• Kunnasi tam makasiguradu nga tuppalan na Dios i promesana ira ta mappange?

 Ipasingan na pabbibbig mu taw nga libru nga kayàmu mammuan nu anni i ituttuddu na Biblia. Moffunan naka yaw nga libru. Pansinammu nga egga ira parafo anna pakkiavu ta gukag na. Kakayà na minillion nga totolay i pakkiavu-anna-tabbag nga metodo nu gigiammuadda i Biblia kavulu i Saksi ni Jehova. Paray nakuan tu kunnatun gapa nikaw. Bendisionan naka nakuan na Dios durante nga ma-enjoy mu i makapagayayya anna makakontento nga paggigiammu nu anni talaga i ituttuddu na Biblia!