Meddu nga Wawwaragi:

I pangaya ta Dios anna ta totolay i mamaguyu nittam nga ‘umay ta ngamin nga totolay ta ngamin nga lugu-lugar anna pabbalinan ira tu disipulo, anna bawtisowan ira.’ (Mat. 28:19, 20; Mar. 12:28-31) Dakal i makua na ari makasarili nga aya. Mapaguyu na i giffutuan danuri “mepangngo nga mangalawa tu mannanayun nga inango.”—King. 13:48, NW.

Nakafokus ittam dati ta pakkabisadu ta presentasion ira anna ta pangibattang tu publikasion. Sangawe maffokus ittam ta pamakasta ta abilidad tam nga makibbida ta totolay. Mepasingattam i aya tam ta tanakuan nu ipakibbida tam ta nira i topiko ira nga paginteresadda. Mawag gafu nga minakkibagay ittam anna pannonopattam tu mapia i pakavurungan anna paginteresan na kada tolay. Kunnasi nga makoffun yaw nga brosiur tapenu makua tam yatun?

Egga i 12 nga leksion naw nga brosiur nga mangituddu nittam ta kualidad ira nga mawag tam tapenu mepasingan i aya anna moffunattam i tanakuan nga mabbalin tu disipulo. Nebase i kada leksion ta tadday nga rekord ta Biblia nu sitaw nipasingan ni Jesus onu na tanakuan paga nga evanghelisador ta ollu-siglo i espesipiko nga kualidad ta ministerio. Gakkag tam i mangipasingan tu aya ta totolay, ari tu makkabisadu tu presentasion. Mawag i kada kualidad ta ngamin nga aspeto na ministerio tam. Ngem innattam nu kunnasi nga makoffun i espesipiko ira nga kualidad ta pangigafu tu pakiyuvovug, ta passinoli, onu ta pab-Bible study.

Ta paggigiammu nu ta kada leksion, pannonopan nu tu mapia nu kunnasi nu nga mepasingan i tadday nga kualidad ta pakibbida nu ta totolay ta lugar nu. Ikaguman nu nga paladdan i aya nu kani Jehova anna ta totolay. Yatun nga aya, ari tu i espesipiko nga metodo i makoffun ta nikamu tapenu madde nu i goal nu nga pabbalinan i tanakuan tu disipulo.

Appresiammi yaw nga dakal nga pribilehio nga makipattrabahu ta nikamu. (Zef. 3:9) Paray nakuan tu bendisionan nakamu ni Jehova durante nga itulu-tuloy nu nga ayatan i totolay anna pabbalinan ira tu disipulo!